2 CORINTIOS 10:18 - Chatino Tataltepec

¹⁸ Si'i na taquiya' tso'o la Ni ji'i̱ ñati̱ nu nchcui' tsa ji'i̱ cña nu ndyu'ni ycui' ca ngu'; nu lo'o tso'o ti nti' Ni ña'a̱ Ni ji'i̱ ñati̱, li' taquiya' Ni ji'i̱ cña nu ndyu'ni ngu' bi'.

2 CORINTIOS 10:18 ပူးပေါင်းရင်းမြစ်များ

SAN LUCAS 16:15

Li' nguxtyacui Jesús cha' lo'o ngu' bi': ―Cu'ma̱ ―nacui̱ yu―, tso'o tsa ndu'ni ma̱ cha' ña'a̱ ti xa' ñati̱ ji'i̱ ma̱, pana cua jlo ti' ycui' Ndyosi lcaa ña'a̱ cha' nu ntsu'u tyiquee ma̱. Ñati̱ nu tlyu tsa ndu'ni ji'i̱ ycui' ca ngu', xtyanu ti'i̱ ycui' Ndyosi ji'i̱ ngu' bi'.

SAN JUAN 12:43

Ndiya la ti' ngu' bi' cha' tso'o ti chcui' ñati̱ chalyuu cha' ji'i̱ ycui' ngu'. Ná nti' ngu' cha' caca tso'o tyiquee ycui' Ndyosi ña'a̱ Ni ji'i̱ ngu'.

LOS HECHOS 2:22

’Cu'ma̱ ngu' Israel ―nacui̱ yu―, cua'a̱ jyaca̱ ma̱ ji'i̱ cha' nu chcui' na' lo'o ma̱ juani: Ngu' Nazaret laca Jesús. Nguxtyucua ycui' Ni ji'i̱ yu lo'o ngua'ni yu xcui' cña tonu ca slo ma̱. Ngulacua tsa ti' ma̱ lo'o na'a̱ ma̱ cña tonu bi', lo'o ngua cuayá' ti' ma̱ cha' xcui' cña ji'i̱ ycui' Ndyosi ngua.

ROMANOS 14:18

Li' tso'o ntsu'u tyiquee Ni ña'a̱ Ni ji'i̱ ma̱, lo'o jua'a̱ ñati̱ chalyuu cua'ni chi̱ ngu' loo ma̱, si cua'ni ma̱ lcaa ña'a̱ cña nu ngulu'u Cristo ji'na.

ROMANOS 16:10

jua'a̱ ji'i̱ Apeles, cha' cua jlo ti' na cha' ngusñi tso'o yu cha' ji'i̱ Cristo xqui'ya lcaa cña nu ngua ji'i̱ yu cuentya ji'i̱ Cristo; jua'a̱ ji'i̱ lcaa ngu' tya'a Aristóbulo;

ROMANOS 2:29

si'i jua'a̱ laca na ngu' judío. Tyucui tyiquee ngu' judío laca na lo'o xñi tso'o na cha' ji'i̱ ycui' Ndyosi; liñi la tyu'u cha' ji'na lo'o Ni si chca'a̱ cuayá' ji'i̱ ycui' Ndyosi ca ne' cresiya ji'na. Li' taca culo Ni cña ji'na lo'o Xtyi'i ycui' Ni, si'i lo'o sca cha' nu nscua lo quityi ti. Lo'o li' tso'o tsa cua'ni ycui' Ndyosi lo'o na, nga'aa si'i ñati̱ chalyuu ti nu chcui' tso'o ji'na li'.

1 CORINTIOS 11:19

Si jua'a̱ ná stu'ba ntsu'u cha' ji'i̱ ma̱ lo'o tya'a ma̱, chañi tiya' la li' taca ca cuayá' ti' na tilaca nu chañi ca ndaquiya' cha' ji'i̱ Jesús.

1 CORINTIOS 4:5

Lo'o jua'a̱ cu'ma̱, ná yala tsa clyacua ti' ma̱ cha' sta ma̱ qui'ya ji'i̱ sca ñati̱; jatya ma̱ ña'a̱ cuayá' ca̱a̱ ycui' nu Xu'na na, bi' laca nu cua'ni cuayá' ji'i̱ ca ta'a na. Li' culotu̱ Ni ji'i̱ lcaa cha' cuxi nu ntsu'u cuaana ti ne' cresiya ji'na, masi sca cha' nu ná nti' na cacha' na ji'i̱ tya'a ñati̱ chalyuu na. Jua'a̱ cacha' Ni lcaa cha' nu ntsu'u ne' cresiya ji'i̱ lcaa ñati̱ chalyuu, lo'o li' ta Ni nu tso'o ji'na, cua ña'a̱ ca cha' tso'o nu ñacui̱ Ni cha' tyacua ji'i̱ scaa na.

2 CORINTIOS 10:12

Si'i na caca stu'ba cha' ji'i̱ ya lo'o ñati̱ bi', nti' ya; tyixi tsa ndu'ni ngu' bi' lo'o tya'a ngu', tonto tsa ngu' bi'. Na ña'a̱ cuayá' ngu' bi' ji'i̱ ycui' ca ngu', bi' cha' nti' ngu' cha' tso'o tsa ndyu'ni ycui' ngu'.

2 CORINTIOS 13:7

Lu'ba ti ndijña ya cha' ji'i̱ ycui' Ndyosi, cha' ná ta Ni chacuayá' cha' cua'ni ma̱ xa' la cha' cuxi; na cua nti' ya cha' xtyucua Ni ji'i̱ ma̱ cha' tso'o ti caca tyiquee ma̱. Ná ndube ti' ya, masi ñacui̱ ngu' cha' ná nchca ji'i̱ ya tsiya' ti.

2 CORINTIOS 3:1

Ná nchcui' tyucuaa ti' ya lo'o cu'ma̱. Ná nti' ya cha' chcui' ma̱ cha' tlyu tsa ñati̱ laca ya. Lo'o ndya'a̱ ya slo ma̱, ná ntsu'u cha' qui'ya ya sca quityi nu ñacui̱ cha' tso'o ti ndyu'ni ya cña; jua'a̱ lo'o ndyaa ya chaca se'i̱, ná ntsu'u cha' jña ya sca quityi jua'a̱ ji'i̱ ma̱.

2 CORINTIOS 5:12

si'i cha' tyixi ti ya nchcui' tso'o ti ya cha' ji'i̱ ycui' ca ti ya. Ndi'ya̱ nti' ya: caja ñi'ya̱ xtyacui ma̱ cha' lo'o ngu' cuentya ji'i̱ ya, si tso'o ti nti' ma̱ ña'a̱ ma̱ ji'i̱ ya. Ntsu'u ñati̱ ca bi' nu ná ndube ti' ñi'ya̱ ndu'ni ngu' lo'o tya'a ngu', pana ndube la ti' ngu' bi' ñi'ya̱ ndu'ni chi̱ ngu' loo ycui' ca ngu'.

2 CORINTIOS 6:4

Tso'o la nti' ya si caca cuayá' ti' ngu' cha' ndya'a̱ ya lo cña ji'i̱ ycui' Ndyosi, nu lo'o ña'a̱ ngu' cña nu ndyu'ni ya cuentya ji'i̱ Ni. Ndalo tsa ya ji'i̱ cha' ti'í nu ndu'ni ngu' lo'o ya, masi ntsu'u tsa na nu lyiji ji'i̱ ya, masi ntsu'u tsa cha' tucui nu ndyaca ji'i̱ ya.

2 TIMOTEO 2:15

Lye tsa cua'ni nu'u̱ cña nu cua nda ycui' Ndyosi jinu'u̱, cha' ná ca tyuju'u ti' nu'u̱ xqui'ya cña nu ngua'ni nu'u̱ nu lo'o tsaa nu'u̱ tyi'i̱ ca slo Ni. Chañi tsa laca cha' ji'i̱ ycui' Ndyosi, bi' cha' tya culu'u la nu'u̱ cha' liñi bi' ji'i̱ ngu' lacua; tso'o ti caca tyiquee Ni ña'a̱ Ni jinu'u̱ li'.

1 PEDRO 1:7

Ndyacua cha' ti'í ji'i̱ ma̱ jua'a̱, cha' taca cua'ni cuayá' Ni ji'i̱ ma̱, si chañi cha' ngusñi ma̱ cha' ji'i̱ ycui' Ni. Jlo ti' ma̱ cha' quiña'a̱ tsa nga'a̱ chcua̱ oro; pana hora ti ndu'ni cuayá' ngu' ji'i̱ oro bi' lo'o quii' cha' tyalá bi', cha' ña'a̱ ngu' si chañi cha' xcui' oro laca bi'. Nde loo la quiñu'u̱ chcua̱ oro, tye cha' ji'i̱, masi quiña'a̱ tsa cña ngua'ni ngu' cha' tyubii oro bi' tya clyo; pana nu cha' ji'i̱ Jesús nu cua ngusñi ma̱ ni, ndulo tsa cha' bi' cuentya ji'i̱ ycui' Ndyosi. Masi quiña'a̱ tsa chcua̱ oro caja ji'na, ná stu'ba tsiya' ti cha' ji'i̱ bi' lo'o ycui' Jesús. Lo'o ndye ndalo ma̱ ji'i̱ lcaa cha' ti'í nu ndyacua ji'i̱ ma̱ xqui'ya cha' ngusñi ma̱ cha' ji'i̱ Ni, li' tso'o tsa cha' nu caja ji'i̱ ma̱ lo'o tyu'u tucua ycui' Jesucristo ca̱a̱ chaca quiya'; ta Ni sca su tso'o cha' tyi'i̱ ma̱ slo ycui' Ni laja xee nu ndubi tsa ca su ntucua ycui' Ni.