2 CORINTIOS 1:21 - Chatino Tataltepec

²¹ Ycui' Ndyosi laca nu ngua'ni lo'o ya cha' ngusñi tso'o ya cha' ji'i̱ Cristo, lo'o jua'a̱ ngua'ni Ni lo'o cu'ma̱; na cua ngua'ni ycui' Ndyosi cha' laca na ñati̱ ji'i̱ Ni.

2 CORINTIOS 1:21 ပူးပေါင်းရင်းမြစ်များ

SAN JUAN 3:34

Nda Ni ji'i̱ nu Jesucristo bi' ya̱a̱ chalyuu, lo'o jua'a̱ xcui' cha' ji'i̱ ycui' Ndyosi nda yu lo'o na xqui'ya Xtyi'i ycui' Ndyosi. Lo'o ycui' Ndyosi ni, ná ntsu'u cha' tye cha' ta Ni Xtyi'i ycui' Ni ji'na.

LOS HECHOS 10:38

Jlo ti' ma̱ ñi'ya̱ nguti'i̱ Jesús chalyuu, la cui' Jesús Nazaret. Cua ngusubi ycui' Ndyosi Sti yu ji'i̱ Jesús, nda la Ni juersa ji'i̱ nu Jesús bi' nu lo'o ndyalaa Xtyi'i ycui' Ni lo yu. Lcaa su nguta'a̱ yu ngua'ni yu cha' tso'o lo'o ñati̱, lo'o jua'a̱ ngua'ni yu cha' ndyaca tso'o ngu' nu quicha tsa, masi ñati̱ nu ntsu'u tsa cha' ti'í ji'i̱ xqui'ya cha' ngusñi cui'i̱ cuxi ji'i̱ ngu'. Ngua'ni Jesús cña jua'a̱, cha' nguxtyucua ycui' Ndyosi ji'i̱ yu.

ROMANOS 16:25

Cua'ni tlyu na ji'i̱ ycui' Ndyosi lacua. Taca ji'i̱ Ni ta Ni juersa ji'i̱ ma̱, cha' tyi'i̱ ma̱ ñi'ya̱ nu nga'a̱ cha' tyi'i̱ ti na chalyuu, si xñi tso'o na cha' ji'i̱ Jesús. Cha' tso'o ji'i̱ la cui' Jesucristo, bi' laca cha' nu nda na' lo'o ngu', masi tyu̱u̱ tsa siyento yija̱ ntsu'u cuatsi' ti cha' nu nchcui' ñi'ya̱ nu cua'ni ycui' Ndyosi nde loo la;

ROMANOS 8:9

Nga'aa si'i jua'a̱ ndi'i̱ ma̱ juani, nga'aa nchca tiji̱' ti' ma̱ ji'i̱ cha' cuxi nu ntsu'u nde chalyuu; stu'ba ntsu'u cha' ji'i̱ ma̱ lo'o ycui' Ndyosi juani, cha' cua nda ycui' Ndyosi Xtyi'i Ni cha' tyanu ne' cresiya ji'i̱ ma̱. Lo'o jua'a̱ ná ntsu'u cha' ji'na lo'o Cristo tsiya' ti, si bilya tyanu Xtyi'i ycui' Ni ne' cresiya ji'na, la cui' Xtyi'i nu ndyu'u ji'i̱ Cristo.

1 CORINTIOS 1:8

Ycui' Jesús laca nu cua'ni cha' tyanu tachaa cha' ne' cresiya ji'i̱ ma̱ ña'a̱ cuayá' nu tye chalyuu ji'i̱ ma̱. Lo'o li' ná ntsu'u qui'ya nu sta ycui' Ndyosi hichu̱' ma̱ lo'o ca̱a̱ Jesucristo nu Xu'na na cha' cua'ni cuayá' Ni ji'i̱ ñati̱ chalyuu.

2 CORINTIOS 5:5

Na cua ngua'ni cho'o ycui' Ndyosi cha' jua'a̱ caca ji'na ca li'; cua nda Ni Xtyi'i ycui' Ni cha' tyanu ne' cresiya ji'na juani. Laca bi' sca cha' nu nda Ni ji'na yala ti, cha' tyi'u ti' na lcaa cha' nu cua'ni Ni cuentya ji'na ca nde loo la.

COLOSENSES 2:7

Jua'a̱ xñi tso'o ma̱ cha' ji'i̱ Jesús, cha' ca cuayá' ti' ma̱ lcaa cha' nu laca su̱u̱ cha' bi'; cha' nu Jesús ni, bi' laca su̱u̱ lcaa cha' nu cua ngusñi na, la cui' ti cha' nu cua ngulu'u ngu' ji'i̱ ma̱ tya tsubi' la. Lo'o jua'a̱ lcaa tsa̱ tya ma̱ xlya'be ji'i̱ nu Cristo bi' li'.

1 TESALONICENSES 3:13

ndijña ya cha' cua'ni Ni cha' caca lubii cresiya ji'i̱ ma̱, cha' tyanu tso'o cha' ji'i̱ ycui' Ndyosi ne' cresiya ji'i̱ ma̱. Li' nga'aa ntsu'u cha' sta ycui' Ndyosi Sti na qui'ya ji'i̱ ma̱ tsa̱ bi', nu lo'o ca̱a̱ Jesús nu Xu'na na nde chalyuu chaca quiya'. Ca̱a̱ ycui' nu Xu'na na lo'o lcaa ñati̱ ji'i̱ Ni tsa̱ bi'.

2 TESALONICENSES 2:8

li' caca yu xña'a̱ bi' loo. Ca tiya' la ca̱a̱ Jesús nu Xu'na na, lo'o li' cujuii Jesús ji'i̱ yu xña'a̱ bi' nu lo'o culutu'u ti Jesús ji'i̱ yu bi' lo'o cui'i̱ nu ntsu'u tu'ba Ni; tye cha' ji'i̱ yu xña'a̱ bi' lo'o ca̱a̱ Jesús, cha' ná talo yu ña'a̱ yu ji'i̱ xee ndubi ji'i̱ ycui' nu Xu'na na.

2 TESALONICENSES 3:3

Chañi cha' ndu'ni nu Xu'na na lcaa cha' nu ñacui̱ Ni ji'na, cua'ni Ni cha' caca tlyu tyiquee ma̱, cua'a Ni ji'i̱ ma̱ cha' ná cala' nu xña'a̱ ji'i̱ ma̱.

HEBREOS 13:9

Ná ta ma̱ chacuayá' culu'u ñati̱ xi xa' la cha' ji'i̱ ma̱, sca cha' nu ná stu'ba nchcui' lo'o cha' bi', cha' ná xtyanu ma̱ jua'a̱ ji'i̱ tyucui̱i̱ liñi. Tso'o la si tyanu tso'o lcaa cha' ji'i̱ ycui' Ndyosi ne' cresiya ji'na, si cube ti' na ji'i̱ lcaa cha' tso'o nu ndu'ni Ni lo'o na lcaa hora; pana ná taca tyanu tso'o cha' ji'i̱ ycui' Ndyosi ne' cresiya ji'na lo'o taquiya' na ji'i̱ cua ña'a̱ ca cña nu tatsaa ngu' ji'na, ñi'ya̱ nti' si nacui̱ ngu' cha' ná tso'o cacu na sca lo na nu ndacu ngu'. Masi cua ndaquiya' tsa na ji'i̱ cña bi' tya tsubi' la, si'i na tso'o la ngua ti' na lo'o ngua'ni na jua'a̱.

1 PEDRO 5:10

Pana xti ti tsa̱ tyacua cha' ti'í ji'i̱ ma̱. Lo'o tye tsa̱ nu nchcube' ma̱, li' cua'ni ycui' Ndyosi cha' caca tso'o ma̱, cua'ni Ni cha' caca nguula ti' tyiquee ma̱ chaca quiya'; ta Ni juersa ji'i̱ ma̱, cha' xcui' tso'o tsa ndu'ni ycui' Ni lo'o na. Xqui'ya Cristo cua ngusubi Ni ji'na cha' taca tyi'i̱ na ca su tlyu su ntucua ycui' Ni.

1 JUAN 2:20

Cua nda Cristo Xtyi'i ycui' Ni cha' tyanu ne' cresiya ji'i̱ lcaa ngu' tya'a ngusñi ma̱ cha' ji'i̱ Ni, bi' cha' cua ngua cuayá' tso'o ti' lcaa tya'a ma̱ lcaa cha' nu nclyu'u ycui' Ndyosi ji'na.

1 JUAN 2:27

Nu cu'ma̱ ni, cua ndyanu Xtyi'i ycui' Ndyosi ne' cresiya ji'i̱ ma̱, bi' cha' nga'aa nti' cha' culu'u xa' ñati̱ ji'i̱ ma̱; Xtyi'i ycui' Ndyosi ni, bi' laca nu culu'u ji'i̱ ma̱ lcaa cha' nu lyiji cha' ca tsa'a̱ ma̱ ji'i̱. Nu lo'o nclyu'u Xtyi'i ycui' Ndyosi ji'i̱ ma̱ ni, liñi tsa laca cha' bi'; si'i cha' cuiñi nda nu bi'. Bi' cha' lacua, ñi'ya̱ nu nclyu'u Xtyi'i ycui' Ni ji'i̱ ma̱, la cui' jua'a̱ nga'a̱ cha' xñi ma̱ cha' ji'i̱ Jesús.

APOCALIPSIS 1:6

Cua ngua'ni Jesús cha' laca na sca lo ñati̱ nu ndulo tsa cuentya ji'i̱ ycui' Ndyosi, nu ndyu'ni cña nu nti' ycui' Ndyosi Sti Jesús cha' cua'ni na. Cua nti' na cha' lcaa yija̱ nu lijya̱ nde loo la ná tye cha' cua'ni tlyu na ji'i̱ ycui' Ndyosi, cha' nchca ji'i̱ Ni cua'ni Ni lcaa lo cña tsiya' ti. Jua'a̱ caca cha' lacua.

APOCALIPSIS 3:18

Ta na' sca cui̱i̱ lo'o ma̱ lacua, bi' cha' cua'a̱ jyaca̱ ma̱ ji'i̱ cha' nu chcui' na' lo'o ma̱, cha' chañi taca culu'u cha' bi' ji'i̱ ma̱ ñi'ya̱ caca xutacui cha' cuxi nu ntsu'u ji'i̱ ma̱: Nga'a̱ cha' cua'ni ma̱ cha' caja sca chalyuu cucui ji'i̱ ma̱ su nga'aa cua'ni ma̱ cha' cuxi, cha' nga'aa ntsu'u cha' ca tyuju'u la ti' ma̱ li'. Cua'ni ma̱ cha' culacua tso'o xi ti' ma̱ lacua, cha' ca cuayá' ti' ma̱ scaa cha'.