2 CORINTIOS 1:17 - Chatino Tataltepec

¹⁷ Pana lo'o ná ya̱a̱ na' slo cu'ma̱ ni, li' ngua ti' ma̱ cha' ná ngulacua tso'o ti' na'. Ná tso'o cha' chcui' ma̱ cha' laca na' sca ñati̱ nu nchcui' tucua ti cha'; nu lo'o ngüiñi tyucui̱i̱ 'na tya clyo, ná nñilo'o na' ji'i̱ ni sca ñati̱.

2 CORINTIOS 1:17 ပူးပေါင်းရင်းမြစ်များ

SAN MATEO 1:19

Pana nu José bi' ni, tya'na ti' yu ji'i̱ María, tso'o tsa ntsu'u tyiquee yu ña'a̱ yu ji'i̱. Lo'o cua ndyuna yu cha' bi', ná nti' yu ta yu cha' tyuju'u ti' ji'i̱ Mariá, masi nga'aa caja clyo'o yu lo'o xqui'ya sñi', ngua ti' yu; tye cha' jua'a̱ ti ngua ti' yu, cha' ná nti' yu sta yu qui'ya ji'i̱ ca toni'i̱ cña.

SAN MATEO 5:37

Tsa bi' ti cha' ñacui̱ ma̱: “Chañi”, si cha' liñi laca; lo'o jua'a̱ ñacui̱ ma̱: “Si'i”, si cha' cuiñi. Cua ña'a̱ ca cha' nu chcui' ma̱ nu lo'o ndu'ni ma̱ jura, cha' ji'i̱ nu xña'a̱ laca bi'.

SAN JUAN 8:15

Cua laca ngusta ma̱ yabe' chu̱' na'. Lo'o ndyu'ni ma̱ jua'a̱, ndyu'ni ma̱ ñi'ya̱ ndu'ni ñati̱ chalyuu ti. Si'i na lijya̱ na' chalyuu cha' sta na' yabe' chu̱' ñati̱ ―nacui̱―,

2 CORINTIOS 1:12

Tso'o tsa nti' ya cha' xcui' ngua'ni tyucui tyiquee ya lo'o ma̱, xcui' nda ya cha' liñi lo'o ma̱, ñi'ya̱ nu ngua'ni ya lo'o xa' ñati̱; jua'a̱ nti' ya. Ngua ji'i̱ ya cua'ni ya jua'a̱ lo'o ma̱ xqui'ya cha' lye tsa ngua'ni tya'na ti' ycui' Ndyosi ji'na laja ti; si'i cha' nda'ya cha' hique ti ya, bi' cha' ndu'ni ya jua'a̱.

2 CORINTIOS 11:18

Pana ná ndube ti' na', chcui' na' xi juani, cha' ntsu'u tsa ngu' nu jua'a̱ nchcui' tsa ngu' cha' caca chi̱ la loo ycui' ca ngu', nti' ngu'; bi' cha' lo'o na' ntsu'u chacuayá' chcui' na' xi, nti' na'.

GÁLATAS 1:16

Lo'o jua'a̱ ngua'ni Ni cha' ndyuloo na' ji'i̱ Jesús, nu sca ti Sñi' ycui' Ni, cha' li' nchca 'na ta na' cha' ji'i̱ Ni lo'o lcaa cu'ma̱, ñati̱ nu ndi'i̱ xa' tsu'. Li' ndacha' na' ji'i̱ lcaa ma̱ cha' xqui'ya Jesús taca clyaá ma̱ ji'i̱ cha' cuxi nu ntsu'u ji'i̱ ma̱. Nu lo'o ngusñi ca ti na' cha' bi', li' hora ti ndu'u na' nguta'a̱ na' nde loyuu su naa Arabia; ca bi' nguti'i̱ na' ycui' ti na'. Ná nguta'a̱ na' ndyaana na' sca cui̱i̱ nu ta sca ñati̱ lo'o na'; la cui' ti jua'a̱ ná nguta'a̱ na' nde quichi̱ Jerusalén cha' chcui' na' lo'o ngu' tya'a ndyu'ni na' cña nu ndi'i̱ nde jua, masi cua nda ngu' bi' cha' ji'i̱ Jesús lo'o ñati̱ clyo la, nu lo'o tya lyiji cuna na' cha' bi'. Pana nguta'a̱ na' nde Arabia, lo'o tiya' la li' nguxtyu̱u̱ na' nguta'a̱ na' nde quichi̱ Damasco.

GÁLATAS 2:2

Ndyaa ya Jerusalén, xqui'ya cha' cua ngua'ni ycui' Ndyosi cha' ngua'ya sca cha' hique na' cha' tyaa ya; bi' cha' lo'o cua ndyalaa ya quichi̱ bi', li' ndya'a̱ ca su ntucua ngu' ycui' ti ngu', nchcui' na' lo'o ngu' nu laca loo la ji'i̱ taju tya'a ñati̱ ji'i̱ Cristo quichi̱ bi'. Li' ndacha' na' ji'i̱ ngu' bi', nchcui' na' ni cha' nu nda na' lo'o ngu' xa' tsu' cuentya ji'i̱ Cristo, cha' ngua'ni lyaá Cristo ji'na ji'i̱ nu cuxi. Jua'a̱ nchcui' na' lo'o ngu' bi', xqui'ya cha' ná nti' na' cha' culacua cuxi ti' ngu' bi' ña'a̱ ngu' jna'; ná nti' na' cha' chcui' ngu' cha' ná tso'o laca cha' nu nda na' lo'o cu'ma̱ ngu' xa' tsu' tya tsubi' la, masi chcui' ngu' cha' ná tso'o ndu'ni na' juani.

1 TESALONICENSES 2:18

Tyu̱u̱ quiya' ngua ti' ya ca̱a̱ ya nquicha'. Lo'o na' ni, la cui' Pablo laca na', nti' tsa na' ca̱a̱ na'; pana lcaa quiya' ngua'a Satanás cha' ji'i̱ ya cha' ná ca̱a̱ ya.

SANTIAGO 5:12

Nde laca sca cña nu ná nga'a̱ cha' cua'ni na tsiya' ti, cu'ma̱ tya'a ngusñi na cha' ji'i̱ ycui' Ndyosi: Ná cua'ni ma̱ jura laja ti lo'o xtañi ycui' Ni lo'o cua quiñi ti sca cha' ji'i̱ ma̱ lo'o xa' ñati̱; ná ñacui̱ ma̱: “Chacuayá' ji'i̱ ycui' Ndyosi nu ntucua nde cua̱”, ni ná ñacui̱ ma̱: “Chacuayá' ji'i̱ ndyosi nde lo yuu”. Ná culotu̱ ma̱ ni sca xtañi Ni tsiya' ti, cha' caja ñi'ya̱ nu tyanu tachaa cha' ji'i̱ ma̱ lo'o ñati̱. Tsa bi' ti cha' ñacui̱ ma̱ ji'i̱ ñati̱: “Cua'ni na'”, ñacui̱ ma̱, si taca cua'ni ma̱ ji'i̱; lo'o jua'a̱ “Ná cua'ni na'”, ñacui̱ ma̱, si ná nchca cua'ni ma̱ ji'i̱. Ná caja ñi'ya̱ sta Ni qui'ya ji'i̱ ma̱ li'.