2 CORINTIOS 1:12 - Chatino Tataltepec

¹² Tso'o tsa nti' ya cha' xcui' ngua'ni tyucui tyiquee ya lo'o ma̱, xcui' nda ya cha' liñi lo'o ma̱, ñi'ya̱ nu ngua'ni ya lo'o xa' ñati̱; jua'a̱ nti' ya. Ngua ji'i̱ ya cua'ni ya jua'a̱ lo'o ma̱ xqui'ya cha' lye tsa ngua'ni tya'na ti' ycui' Ndyosi ji'na laja ti; si'i cha' nda'ya cha' hique ti ya, bi' cha' ndu'ni ya jua'a̱.

2 CORINTIOS 1:12 ပူးပေါင်းရင်းမြစ်များ

LOS HECHOS 23:1

Cua ndyu'u ti'i̱ lcaa ngu' cusu' bi'. Li' ña'a̱ tsa Pablo ji'i̱ ngu' cusu' nu cua'ni cuayá' ji'i̱ yu. ―Cu'ma̱ ngu' cusu' tya'a na' ―nacui̱ Pablo ji'i̱ ngu' li'―, lcaa tsa̱ tso'o ndi'i̱ na'. Lubii cresiya jna' cuentya ji'i̱ ycui' Ndyosi.

LOS HECHOS 24:16

bi' cha' nti' na' cua'ni na' xcui' cha' tso'o laja lo'o ndi'i̱ na' chalyuu, cha' ná caja ñi'ya̱ nu cutsi̱i̱ na' ca slo ycui' Ndyosi, lo'o jua'a̱ ná cutsi̱i̱ na' slo ñati̱ ti li'.

ROMANOS 9:1

Ñati̱ nu ntsu'u cha' ji'i̱ lo'o Cristo laca na', bi' cha' xcui' cha' liñi ta na' lo'o cu'ma̱; si'i cha' cuiñi nchcui' na'. Xtyi'i ycui' Ndyosi ngua'ni cha' ngua'ya cha' hique na', bi' cha' liñi tsa cha' nu ta na' lo'o ma̱ juani.

1 CORINTIOS 1:17

Si'i cha' tyucuatya na' ji'i̱ ñati̱ nda ycui' Ndyosi cña 'na lijya̱a̱; cua ngulo Ni cña 'na cha' tsa'a̱ chcui̱' cha' tso'o nu ntsu'u ji'i̱ Jesús lo'o ñati̱. Si'i na lijya̱ na' lo'o quiña'a̱ tsa cha' nu culo hique ti na', ñi'ya̱ nchcui' ñati̱ chalyuu nu nchca tsa ji'i̱; si jua'a̱, ná ca cuaya' ti' ñati̱ ñi'ya̱ ngua cha' tlyu nu ngua'ni Cristo lo'o ngujuii yu lo crusi.

1 CORINTIOS 12:8

Ndi'ya̱ laca cña nu taca cua'ni na xqui'ya Xtyi'i ycui' Ndyosi: ntsu'u ngu' nu ndacha' liñi ñi'ya̱ nu ngua ji'i̱ Jesús; lo'o jua'a̱ ntsu'u ngu' nu tso'o tsa nclyu'u tyucui̱i̱ cha' xñi na cha' ji'i̱ ycui' Ndyosi;

1 CORINTIOS 15:10

Pana tya'na ti' ycui' Ndyosi, bi' cha' tso'o ti ntsu'u tyiquee Ni ña'a̱ Ni jna'; jua'a̱ ngua'ni Ni cha' ndya'a̱ na' cña ji'i̱ Ni li'. Ni si'i na nguliji yu'u cha' bi' jua'a̱ ti lo'o ngua'ni Ni cha' tso'o lo'o na'; masi lo'o nu xa' la ngu' tya'a ya ndyu'ni ngu' la cui' cña nu ndyu'ni na', pana tlyu la cña ntsu'u jna' que ngu' bi'. Si'i na nchca tsa 'na, pana ycui' Ndyosi laca nu ndu'ni lo'o na' cha' caca chcui' na' lo'o ñati̱, cha' tso'o ti ntsu'u tyiquee Ni ña'a̱ Ni 'na.

1 CORINTIOS 2:13

Nu lo'o cacha' na cha' tso'o nu ji'i̱ ycui' Ndyosi bi' ji'i̱ ñati̱ ji'i̱ ycui' Ni, nu ngu' nu ntsu'u Xtyi'i ycui' Ni ne' cresiya ji'i̱, li' clyana na sca cha' nu chcui' na, sca cha' nu ta Xtyi'i ycui' Ni lo'o na; ná clyana na quiña'a̱ tsa cha' chcui' na ñi'ya̱ nu ndu'ni ñati̱ nu nchca tsa ji'i̱ ycui' ca ngu'.

1 CORINTIOS 4:4

lo'o jua'a̱ cuentya ji'i̱ ycui' Ndyosi, ná ntsu'u cha' cuxi nu ngua'ni na', nti' na'. Pana ná ñacui̱ na' cha' ná ntsu'u cha' sta Ni qui'ya 'na tsiya' ti, sca ti ycui' Ndyosi nu Xu'na na taca cua'ni cuayá' Ni jna' ca lo'o tye chalyuu.

1 CORINTIOS 5:8

Bi' cha' tso'o la si tyi'u ti' na ji'i̱ Cristo lcaa tsa̱, cha' xa' ña'a̱ cua'ni na li'; tso'o ti cua'ni na lo'o ñati̱, xcui' cha' liñi chcui' na lo'o ñati̱. Laca na ñi'ya̱ laca xlyá cui nu ndya' chaca quiya' li'; nga'aa ntsu'u cha' cua'ni na ñi'ya̱ nu ngua'ni na sa'ni lo'o ntsu'u cha' cuxi ji'na, lo'o ntsu'u cha' suba' ji'na, cha' ngua na ñi'ya̱ ngua tsa ycu' xlyá nu ná tso'o tyempo bi'.

2 CORINTIOS 1:17

Pana lo'o ná ya̱a̱ na' slo cu'ma̱ ni, li' ngua ti' ma̱ cha' ná ngulacua tso'o ti' na'. Ná tso'o cha' chcui' ma̱ cha' laca na' sca ñati̱ nu nchcui' tucua ti cha'; nu lo'o ngüiñi tyucui̱i̱ 'na tya clyo, ná nñilo'o na' ji'i̱ ni sca ñati̱.

2 CORINTIOS 11:3

ndube tsa ti' na' si quiñu'u̱ chca cresiya ji'i̱ ma̱. Tya sa'ni ni, cua nguñilo'o nu cuaña ji'i̱ Eva, cha' tajua' tsa nchcui' nu xña'a̱ bi'. Pana ná nti' na' cha' quiñu'u̱ cha' ji'i̱ ma̱ lo'o Cristo jua'a̱, ná nti' na' cha' ñilo'o nu xña'a ji'i̱ ma̱ xqui'ya xa' ñati̱; juani tso'o tsa cha' tyucui tyiquee ma̱ cua ngusñi ma̱ cha' ji'i̱ ycui' Cristo.

2 CORINTIOS 2:17

Si'i ngana ndyu'ni ya lo'o cha' ji'i̱ ycui' Ndyosi bi', si'i na nchcutsa'a̱ ya ji'i̱ lo'o xa' la cha'; tyucui ti' tyiquee ya nchcui' ya lo'o ñati̱ ñi'ya̱ laca si na ndi'i̱ ycui' Ndyosi slo ya, xqui'ya cha' ycui' Ndyosi laca nu ngua'a̱ loo ji'i̱ ya cha' cua'ni ya cña bi' cuentya ji'i̱ Cristo.

2 CORINTIOS 4:2

Cua nguxtyanu ya ji'i̱ lcaa cha' cuxi nu ndyu'ni ngu' cuaana ti, lcaa cha' nu ntyuju'u tsa ti' ngu' cua'ni ngu' ji'i̱. Si'i na nñilo'o ya ji'i̱ ngu', la cui' jua'a̱ ná nchcutsa'a̱ ya cha' ji'i̱ ycui' Ndyosi lo'o xi xa' la cha', nu lo'o nchcui' ya cha' bi' lo'o ngu'; tso'o ti nclyu'u ya tyucui cha' ji'i̱ Jesús ji'i̱ ngu'. Lo'o jua'a̱ chañi tsa laca cha' bi', cha' jua'a̱ caca cuayá' ti' lcaa ñati̱ cha' tyucui tyiquee ya ndu'ni ya cña ji'i̱ ycui' Ndyosi; jua'a̱ nti' ycui' Ni ña'a̱ Ni ji'i̱ ya.

2 CORINTIOS 8:8

Si'i na nclyo na' cña ji'i̱ ma̱ re; nu lo'o ña'a̱ ma̱ ji'i̱ xa' la ngu' tya'a na, cha' nti' tsa ngu' xtyucua ngu' ji'i̱ tya'a ñati̱ ji'i̱ Cristo, li' taca cua'ni cuayá' ma̱ ji'i̱ ycui' ca ma̱ si chañi ca cha' ntsu'u tyiquee ma̱ ña'a̱ ma̱ ji'i̱ la cui' ngu' tya'a ma̱.

GÁLATAS 6:4

Ntsu'u cha' cui'ya na cuentya ñi'ya̱ nu ndi'i̱ scaa na chalyuu. Si chañi cha' tso'o tsa ndu'ni na, cha' ji'i̱ ycui' na laca cha' bi'; ná ntsu'u cha' cua'ni tyucuaa ti' na lo'o xa' la ñati̱.

EFESIOS 6:14

Bi' cha' cua'ni tajua' ma̱ lacua; ñi'ya̱ lo'o ndyaaca̱' ne' sendaru lo'o juata cha' xñi ca'a̱ tso'o ste' ngu', jua'a̱ cu'ma̱, xñi tso'o ma̱ cha' nu nchcui' Ni bi'. Xcui' cha' liñi chcui' ma̱, cha' li' taca xu̱u̱ tya'a ma̱ lo'o nu cuxi. Sca sendaru ni, ndyacu̱' chcua̱ lo tyiquee yu lo'o nde chu̱' yu, cha' cua'a yu ji'i̱ tyiquee yu. Lo'o jua'a̱ cu'ma̱, ná taca sta ngu' qui'ya ji'i̱ ma̱ si xcui' cha' liñi ndu'ni ma̱.

FILIPENSES 1:10

ndijña na' cha' lcaa tyempo taca ca'ya cha' hique ma̱ ñi'ya̱ nu tso'o la cha' cua'ni ma̱. Jua'a̱ nga'aa tyaja'a̱ ma̱ cua'ni la ma̱ cha' cuxi, nga'aa tyanu yabe' hichu̱' ma̱ nu lo'o tyalaa tsa̱ cha' ca̱a̱ Cristo chaca quiya'.

1 TESALONICENSES 2:10

Cua na'a̱ ma̱, lo'o jua'a̱ cua na'a̱ ycui' Ndyosi, cha' tso'o ti nguti'i̱ ya slo cu'ma̱ nu ntsu'u cha' ji'i̱ ma̱ lo'o Ni. Ñati̱ lubii laca ya, ná ntsu'u cha' jña ngu' qui'ya ji'i̱ ya li'.

1 TIMOTEO 1:5

Culo nu'u̱ cña ji'i̱ ngu' cha' tso'o tsa tyu'u tyiquee ngu' ña'a̱ ngu' ji'i̱ tya'a ngu', cha' bi' laca cña nu ndu'ni ñati̱ nu ngua lubii cresiya ji'i̱ cuentya ji'i̱ ycui' Ndyosi; jlo ti' ñati̱ bi' ñi'ya̱ laca cña tso'o, lo'o jua'a̱ ndyu'ni ngu' bi' cña tso'o bi' li'. Chañi cha' ngusñi ngu' bi' cha' ji'i̱ ycui' Ndyosi si ntsu'u tyiquee ngu' ña'a̱ ngu' ji'i̱ tya'a ngu'.

TITO 2:7

Xcui' tso'o ti cua'ni nu'u̱, cha' jua'a̱ ca tsa'a̱ nu ngu' cuañi' bi' lcaa cha' tso'o lo'o ña'a̱ ngu' cua ña'a̱ ca cha' nu ndyu'ni nu'u̱; lcaa cha' liñi culu'u tso'o nu'u̱ ji'i̱ ngu' bi', si'i cha' laja ti chcui' nu'u̱ lo'o ngu'.

HEBREOS 13:18

Ña'a̱ ti chcui' ma̱ lo'o ycui' Ndyosi cuentya ji'i̱ cuare. Tyucui tyiquee ya jlo ti' ya cha' ni sca cha' cuxi ná ntsu'u ji'i̱ ya nu caca tyuju'u ti' ya ji'i̱. Lcaa tyempo nti' ya cua'ni ya cua ña'a̱ ca cha' nu tso'o la cuentya ji'i̱ ycui' Ndyosi.

SANTIAGO 4:6

Tlyu la tsiya' ti cha' tso'o nu ndu'ni ycui' Ndyosi lo'o na, cha' xtyucua Ni ji'na. Ndi'ya̱ nscua chaca cha' lo quityi ji'i̱ ycui' Ndyosi: “Ná sca na ta ycui' Ni ji'i̱ ñati̱ nu xcui' tyiji̱loo ji'i̱ tya'a ñati̱ ngu', nti' ngu'; pana quiña'a̱ tsa cha' tso'o ndu'ni Ni lo'o ñati̱ nu tso'o ti ndi'i̱ chalyuu, nu ná ndyu'ni tyucuaa ti' lo'o xa' ñati̱”, nacui̱ quityi bi'.

1 PEDRO 3:16

Xcui' cha' tso'o cua'ni ma̱ lo'o ngu' lacua, cha' taca tyanu lubii cresiya ji'i̱ ma̱; li' caca tyuju'u ti' nu ngu' cuiñi bi', ngu' nu nchcui' cuentyu ji'i̱ ma̱ xqui'ya cha' tso'o nu ndyu'ni ma̱ cuentya ji'i̱ Cristo.

1 PEDRO 3:21

Ñi'ya̱ nu ngua'ni lyaá Ni ji'i̱ ngu' nu nguta'a̱ ne' yaca ni'i̱ bi' lo hitya nu ngua sa'ni la, cha' ndaquiya' ngu' bi' ji'i̱ cha' nu nchcui' ycui' Ni; jua'a̱ clyaá ma̱ juani, cha' cua ndaquiya' ma̱ ji'i̱ cha' nu nchcui' Ni. Cua ndyaa ma̱ lo hitya cha' tyucuatya ma̱ li'. Si'i na caata ti na chcu laca cha' bi', si'i cha' cuu' cuaña' na, bi' cha' tyucuatya na li'; ndi'ya̱ laca cha': na cua ndijña na ji'i̱ ycui' Ndyosi cha' cua'ni lubii Ni ji'i̱ cresiya ji'na xqui'ya cha' cua ndyu'ú Jesucristo chaca quiya', bi' cha' ntyucuatya na.