1 TIMOTEO 3:2 - Chatino Tataltepec

² Si laca sca ñati̱ loo ji'i̱ ña'a̱ taju tya'a ñati̱ ji'i̱ Jesucristo, li' ntsu'u cha' cua'ni yu xcui' cha' tso'o lo'o ñati̱, cha' ná caja ñi'ya̱ jña ngu' qui'ya ji'i̱ yu li'. Caja clyo'o yu bi' lo'o sca ti nu cuna'a̱; jua'a̱ ntsu'u cha' culacua tso'o ti' yu, cha' cua'a yu ji'i̱ cha' cuxi nu ntsu'u tyiquee ycui' ca yu, cha' tso'o ti tyi'i̱ yu lo'o tya'a ñati̱. Ntsu'u cha' ta yu ni'i̱ ji'i̱ yu lo'o jña ñati̱ nu lijya̱ tyijyu', jua'a̱ ntsu'u cha' ta yu na cacu ngu' bi'. Ntsu'u cha' culu'u yu cha' ji'i̱ ycui' Ndyosi ji'i̱ ñati̱, bi' cha' ná tso'o si ná nchca ji'i̱ yu.

1 TIMOTEO 3:2 ပူးပေါင်းရင်းမြစ်များ

SAN LUCAS 1:6

Liñi tsa ndu'ni tyucuaa ngu' bi' cuentya ji'i̱ ycui' Ndyosi, ndaquiya' ngu' lcaa cña ji'i̱ ycui' Ni; ndaquiya' tsa ngu' lcaa cha' nu cua nda Ni lo'o ñati̱ cua sa'ni la, jua'a̱ ná tucui nchcui' cha' cuxi ji'i̱ ngu' bi'.

SAN LUCAS 2:36

Ntsu'u sca nu cuna'a̱ nu laca tu'ba ji'i̱ ycui' Ndyosi, nu ndi'i̱ ne' laa bi'; Ana naa nu cuna'a̱ bi', sñi' Fanuel laca, lo'o la cui' ñati̱ tya'a ji'i̱ ngu' Aser laca nu cuna'a̱ bi'. Cusu' tsa ma' bi' juani. Tya cuañi' ma' lo'o ngujui clyo'o ma'; pana cati ti yija̱ nguti'i̱ ma' lo'o clyo'o ma', lo'o li' ngujuii nu qui'yu bi'.

ROMANOS 12:13

Nu lo'o lyiji sca na ji'i̱ sca ngu' tya'a ngusñi ma̱ cha' ji'i̱ Cristo, nga'a̱ cha' tya'be cha' tso'o nu ntsu'u ji'i̱ ycui' ca ma̱, cha' ta ma̱ na ji'i̱ ngu' bi', na laca nu lyiji ji'i̱ ngu'. Lcaa tyempo ta ma̱ to' tyi ma̱ cha' tyi'i̱ ñati̱ nu lijya̱ ti.

FILIPENSES 2:15

cha' ná caca ñacui̱ ngu' cha' ntsu'u qui'ya ji'i̱ ma̱ li', lo'o jua'a̱ ná caja su lyiji cua'ni ma̱ sca cha' li'. Tso'o la si caca cuayá' ti' ngu' cha' chañi cha' laca ma̱ sñi' ycui' Ndyosi tyucui tyiquee ma̱, masi xcui' ndi'i̱ ti ma̱ chalyuu laja ñati̱ cuxi, laja ñati̱ nu chi̱i̱ nti' ngu' ña'a̱ ji'i̱ tya'a ngu'. Xqui'ya cu'ma̱ nga'a̱ cha' cañi cha' ji'i̱ Jesús lcaa su ndi'i̱ ñati̱ bi'; ñi'ya̱ nu ntyiji'i̱ xee cuii nde talya, jua'a̱ caca ma̱ xee nde chalyuu,

1 TIMOTEO 3:12

Ñati̱ nu laca cña ji'i̱ ña'a̱ taju ngu' nu ngusñi cha' ji'i̱ Jesús ni, caja clyo'o ñati̱ bi' lo'o sca ti nu cuna'a̱; nga'a̱ cha' culo tso'o ñati̱ bi' cña ji'i̱ sñi' ngu', cha' taquiya' tso'o lcaa ñati̱ nu ndi'i̱ to' tyi ngu' cha' nu chcui' ngu' bi'.

1 TIMOTEO 3:8

Lo'o jua'a̱ ñati̱ nu laca cña ji'i̱ ngu' tya'a ngusñi na cha' ji'i̱ Jesús ni, lo'o ngu' bi' ntsu'u cha' cua'ni ngu' xcui' cha' tso'o. Ná tso'o si tucua cha' ntsu'u tyiquee ngu' bi' lo'o ndu'ni ngu' cña bi'; ná tso'o si cu'bi ngu' bi', ni ná tso'o si jña ngu' bi' cñi ji'i̱ tya'a ñati̱ cha' caca culiya' tsa ycui' ca ngu'.

1 TIMOTEO 4:3

Nclu'u ngu' cuiñi bi' cha' ná tso'o caja clyo'o na; nclu'u ngu' cha' ntsu'u tsa na ndacu na nu ná tso'o cacu na, nacui̱ ngu' bi'. Tlyu tsa cha' cuiñi nu nda ngu' bi'. Pana ngüiñá ycui' Ndyosi lcaa na nu ndacu na cha' tso'o ti cacu na ji'i̱, lcaa tya'a na nu ntsu'u cha' ji'na lo'o Jesucristo; bi' cha' tya na xlya'be ji'i̱ ycui' Ndyosi lo'o cua cacu ti na, cha' jlo ti' na cha' tso'o ji'i̱ ycui' Ni.

1 TIMOTEO 5:10

Scua ngu' xtañi ma' cusu' nu nchcui' ngu' ji'i̱ cha' tso'o tsa cña ndu'ni ma' cusu' bi': si cua ngua'ni cu'ú tso'o ma' ji'i̱ nu sube; si cua nda ma' su tyi'i̱ ñati̱ nu lijya̱ tyijyu'; si cua nguxtyucua ma' ji'i̱ tya'a ñati̱ ji'i̱ Jesucristo, masi tlyu cña ntsu'u cha' cua'ni ma'; si ngua tya'na ti' ma' ji'i̱ ñati̱ nu quicha ti'. Si jua'a̱ xcui' cña tso'o ndu'ni ma' cusu' bi', scua ngu' xtañi ma' lo quityi bi' lacua.

1 TIMOTEO 5:22

Ná yala tsa cua'ni nu'u̱ cha' sta ya' nu'u̱ hichu̱' sca ñati̱, cha' caca yu loo ji'i̱ sca taju ñati̱ ji'i Jesucristo; jatya xi cha' ña'a̱ si chañi cha' ñati̱ nu xcui' ndu'ni cha' tso'o laca yu, si chañi cha' tso'o tsa cña ndyu'ni yu, cha' ná tyanu qui'ya yu hichu̱' nu'u̱ si ntsu'u cha' cuxi ne' cresiya ji'i̱ yu bi'. Lo'o nu'u̱ ni, xcui' lubii ti cresiya jinu'u̱ cua'ni nu'u̱ cña.

1 TIMOTEO 5:9

Tso'o la scua ngu' cusu' xtañi lcaa nu cuna'a̱ ti'i nu cua ndye snayala yija̱ ji'i̱, ma' cusu' nu sca ti quiya' ngujui clyo'o, nu sca ti lo'o clyo'o ma' nguti'i̱ ma' chalyuu.

2 TIMOTEO 2:24

Nu ñati̱ nu ndyu'ni cña ji'i̱ ycui' nu Xu'na na ni, ná tso'o si xcui' nxu̱u̱ ti ngu' ndi'i̱ ngu' lo'o tya'a ngu'; ntsu'u cha' chcui' tso'o ti ngu' bi' lo'o lcaa ñati̱. Tso'o si nchca ji'i̱ ngu' bi' culu'u ngu' cha' ji'i̱ ycui' Ndyosi ji'i̱ xa' ñati̱; jua'a̱ ntsu'u cha' talo tyiquee ngu' bi' ji'i̱ ñati̱ nu cua'ni lya' ti' ji'i̱ ngu',

TITO 2:2

Culu'u nu'u̱ ji'i̱ ngu' nu cusu' la cha' ná caca cu'bi ngu', cha' xcui' cha' liñi jlya ti' ngu', cha' cua'a ngu' ji'i̱ ycui' ca ngu', cha' xcui' cha' tso'o cua'ni ngu' li'; culu'u nu'u̱ ji'i̱ ngu' bi' cha' jlya tso'o ti' ngu' lcaa cha' liñi, cha' tyu'u tyiquee ngu' ña'a̱ ngu' ji'i̱ tya'a ñati̱ ngu', cha' talo tyiquee ngu' lo'o ndyu'ni lya' ti' ñati̱ ji'i̱ ngu'.

HEBREOS 13:2

Tyi'u ti' ma̱ cha' chcui' tso'o ma̱ lo'o cua ña'a̱ ca ngu' xta, ngu' xa' quichi̱, si tyalaa ngu' toni'i̱ ji'i̱ ma̱; ta ma̱ su tyi'i̱ ngu' bi', cha' jua'a̱ ngua'ni xi jyo'o cusu' ji'i̱ ma̱ nu ngua sa'ni la, lo'o tiya' la li' nquijeloo ji'i̱ ngu' cha' xca̱ ji'i̱ ycui' Ndyosi nu ntsu'u nde cua̱ laca ñati̱ nu ngulaa toni'i̱ ji'i̱ ngu' bi'.

HEBREOS 3:14

Lcaa na lo'o tya'a na, tya ntsu'u cha' ji'na lo'o Cristo si ña'a̱ ti xñi na cha' ji'i̱ Ni ña'a̱ cuayá' nu tye chalyuu ji'na, la cui' ñi'ya̱ lo'o jlya ti' na ji'i̱ yu nu ngua tya clyo.

1 PEDRO 4:7

Cua tye ti cha' ji'i̱ lcaa na nu ntsu'u chalyuu; bi' cha' tso'o la si cua'a ma̱ ji'i̱ ycui' ca ma̱, tii ti ti' ma̱ tyi'i̱ ma̱ chalyuu cha' taca cua'ni ma̱ cña tso'o, cha' lu'ba ti taca chcui' ma̱ lo'o ycui' Ndyosi.

1 PEDRO 4:9

Ta ma̱ xi to' tyi ma̱ su tyi'i̱ tya'a ma̱, lo'o jua'a̱ ta ma̱ na cacu ngu' lo'o tyalaa ngu' bi' slo ma̱; ná chcui' ma̱ cha' ti'í ji'i̱ tya'a ma̱ xqui'ya cha' ndyalaa ngu' slo ma̱.

1 PEDRO 5:8

¡Tii ti ti' ma̱ tyi'i̱ ma̱ chalyuu! Ná caja' ma̱, cha' tya'a cusu̱u̱ ma̱ laca ycui' nu xña'a̱, lo'o jua'a̱ cacua tsa ndu̱ bi' slo ma̱. Ñi'ya̱ nti' sca cuichi nu tyaala tsa nu nclyana ji'i̱ sca ñati̱ cha' cacu ni', jua'a̱ nti' ndya'a̱ yu'u nu xña'a̱ bi' chalyuu.