1 TESALONICENSES 2:9 - Chatino Tataltepec

⁹ Cu'ma̱ ngu' tya'a na, tyi'u ti' ma̱ cha' lye tsa ngua'ni ya cña cha' caja ñi'ya̱ tyiji̱ yu'u ya chalyuu; tsa̱ lo'o talya ngua'ni ya cña lo'o ya' ti ya, cha' ná culiji ma̱ cñi ji'i̱ ma̱ lo ya laja lo'o ngulu'u ya cha' tso'o bi' ji'i̱ ma̱.

1 TESALONICENSES 2:9 ပူးပေါင်းရင်းမြစ်များ

SAN LUCAS 18:7

Pana tso'o tsa tyiquee ycui' Ndyosi, yala ti xtyucua Ni ji'i̱ ñati̱ nu cua ngusubi Ni ji'i̱, nu tya'na tsa nxi'ya ji'i̱ Ni tsa̱ lo'o talya. ¿Ha tiya' tsa xtyucua Ni ji'i̱ ngu' nti' ma̱?

SAN LUCAS 2:37

Ndyanu ti'i ma' tyucui tyempo lo'o ndi'i̱ ma' chalyuu, lo'o nu juani ntsu'u jacuayala ntucua jacua yija̱ ma'. Tyucui tyempo ndi'i̱ ma' ca ne' laa tlyu bi', nde tsa̱ lo'o jua'a̱ nde talya ndyu'ni tlyu ma' ji'i̱ ycui' Ndyosi; ná ndacu ma' tyaja hora lo'o nchcui' ma' lo'o ycui' Ndyosi.

LOS HECHOS 18:3

Stu'ba ti ngua'ni Pablo cña lo'o ngu' bi' li', cha' cuityi ni'i̱ late' laca ngu'; bi' cha' ndyanu yu slo ngu' cha' cua'ni yu cña lo'o ngu'.

LOS HECHOS 20:24

Pana ná ntsi̱i̱ na' xqui'ya cha' nu nchcui' ngu' bi', ná ndu'ni cha' jna' masi cujuii ngu' jna'. Sca ti cha' nti' na', cha' tso'o ti tye cña nu nda ycui' Jesús jna', cha' ta na' cha' tso'o ji'i̱ ycui' Ndyosi lo'o xa' ñati̱, cha' ntsu'u tsa tyiquee Ni ña'a̱ Ni ji'i̱ ñati̱ chalyuu.

LOS HECHOS 20:31

Cui'ya ma̱ cuentya lacua. Tyi'u ti' ma̱ cha' cua ndya'a sna yija̱ ngulu'u na' ji'i̱ ma̱ tsa̱ lo'o talya, lo'o jua'a̱ ntsu'u quiya' ngusi'ya tsa na' xqui'ya cu'ma̱.

ROMANOS 1:1

Pablo laca na' nu nscua̱ quityi re cha' ca̱a̱ nde quichi̱ Roma ca su ndi'i̱ ma̱, cu'ma̱ nu ngusñi ma̱ cha' ji'i̱ Jesucristo. Ndyu'ni na' cña ji'i̱ ycui' Ndyosi, cha' ycui' Ni ngusubi Ni jna' cha' tsa'a na' chcui' na' cha' tso'o ji'i̱ Ni lo'o ñati̱.

ROMANOS 15:16

Cua ngusubi ycui' Ndyosi 'na cha' cua'ni na' cña ji'i̱ Jesucristo; cña bi' laca cha' tsa'a na' ta na' cha' tso'o ji'i̱ ycui' Ndyosi lo'o ngu' xa' tsu', lcaa su ndi'i̱ ngu'. Jua'a̱ ndyu'ni na', cha' tyucui tyiquee ngu' caca ngu' bi' ñati̱ ji'i̱ ycui' Ndyosi xqui'ya cña nu cua'ni Xtyi'i ycui' Ndyosi ne' cresiya ji'i̱ ngu'. Li' tyaja'a̱ Ni quiñi cha' ji'i̱ Ni lo'o ngu' bi' xqui'ya na'.

ROMANOS 15:19

Ngua'ni Ni cña tonu nu ná ca cua'ni ñati̱ chalyuu, cha' cube ti' xa' ñati̱ cha' ycui' Ndyosi laca nu ndyu'ni cña bi'. Jua'a̱ ngua cha' cua ndya'a̱ na' ndi'i̱ na' ca loyuu tyijyu' la. Nguxana na' nde quichi̱ Jerusalén, ña'a̱ cuayá' ndyalaa na' loyuu su cuentya Ilírico. Lcaa quichi̱ su ndya'a̱ na', quiña'a̱ tsa cha' tso'o ji'i̱ Cristo nda na' lo'o ngu' ña'a̱ cuayá' nu ngua 'na.

1 CORINTIOS 4:12

Ti'i̱ tsa cña nu ndu'ni ya cha' caja ñi'ya̱ nu tyiji̱ yu'u ji'i̱ ya chalyuu. Nu lo'o ti'í tsa cha' nu nda ngu' lo'o ya, ná nsacui̱ tu'ba ya ji'i̱ ngu'; tso'o ti nchcui' ya lo'o ngu' li'. Lo'o ndu'ni lya' ti' ngu' ji'i̱ ya, ndalo ya li'; ná nsacui̱ ya' ya ji'i̱ ngu' tsiya' ti.

1 CORINTIOS 9:15

Pana ná ngüijña na' na cacu na' ji'i̱ ngu' tsiya' ti lcaa se'i̱ su ndya'a̱ na'. La cui' jua'a̱ ná nscua na' quityi re cha' jña na' na cacu na' ji'i̱ cu'ma̱, cha' ná xñi na' na nu ta ngu' 'na masi cajaa ycui' na'; tso'o la nti' na' cha' ndu'ni na' cña re jua'a̱ ti, ná lo'o caya'.

1 CORINTIOS 9:18

¿Ha ná caja xcaya' na' li'? Chañi cha' caja bi' 'na, pana xa' lo na laca bi' li'; laca cha' tso'o tsa ntsu'u tyiquee na' nu lo'o nchcui' na' cha' tso'o ji'i̱ Jesús lo'o ñati̱. Bi' cha' tso'o tsa nti' na', masi ná nda ngu' xcaya' na'. Ná nti' na' jña na' xcaya' na' ji'i̱ ma̱, masi ntsu'u chacuayá' cha' jña na' cha' bi' ji'i̱ ma̱, laja lo'o ndyu'ni na' cña ji'i̱ ycui' Ni.

1 CORINTIOS 9:4

Ntsu'u chacuayá' 'na cha' xñi na' xi na cacu na' lo'o na co'o na' caya' lo cña nu ndyu'ni na', ni na' ji'i̱ ngu' bi'.

2 CORINTIOS 11:27

Tucui tsa cña nu ndyacua 'na, ti'í tsa cña ndyacua 'na ca su ndya'a̱ na', ña'a̱ cuaya' tyu̱u̱ tsa quiya' ná ngua caja' na'; ntsu'u quiya' ntyute' na', jua'a̱ ntsu'u quiya' nguityi na' hitya, lo'o jua'a̱ ntsu'u tsa̱ nu ná ngujui tsiya' ti na cacu na', ntsu'u tsa̱ lo'o lye tsa nchca tlya' na', la cui' jua'a̱ ná ngujui late' cacu' na'. Lcaa cha' bi' ndyacua 'na ca su ndya'a̱ na'.

2 CORINTIOS 11:9

Tyucui tyempo nu lo'o nguti'i̱ na' lo'o cu'ma̱, nu lo'o lyiji cñi 'na, li' ná ngüijña na' ji'i̱ ma̱ cha' xtyucua ma̱ xi 'na; nu ngu' ca tyi Macedonia, tya'a ngusñi na cha' ji'i̱ Cristo, cua ya̱a̱ ya̱lo'o ngu' bi' lcaa na nu nguliji ti xi 'na. Jua'a̱ ngua'ni na' nu ngua li', cha' ná ta na' quiña'a̱ tsa cña ji'i̱ cu'ma̱, ngua ti' na'. La cui' jua'a̱ tya cua'ni la na' tyempo nde loo la, nti' na'.

2 CORINTIOS 6:5

Cua ngujui'i̱ juata ngu' ji'i̱ ya, jua'a̱ cua ngusu'ba ngu' ji'i̱ ya ne' chcua̱; cua ndyu'u ti'i̱ tsa tlyu ti ñati̱ ca slo ya cha' cua'ni lya' ti' ngu' ji'i̱ ya; lo'o jua'a̱ ntsu'u quiya' nteje tacui ya cuayá' cña nu ndyu'ni ya, ntsu'u quiya' ná nchca caja' ya, ntsu'u quiya' nu lye tsa ntyute' ya.

FILIPENSES 4:16

Lo'o jua'a̱ tyu̱u̱ quiya' cua nda ma̱ sca xlya'be 'na nu lo'o nguliji xi cha' tyiji̱ yu'u 'na ca quichi̱ Tesalónica.

1 TESALONICENSES 1:3

Ntsu'u ti' ya cha' ntsu'u tsa cha' tso'o nu ndyu'ni ma̱, cha' ntsu'u tsa tyiquee ma̱ ña'a̱ ma̱ ji'i̱ tya'a ma̱, xqui'ya cha' ngusñi ma̱ cha' ji'i̱ Jesucristo. Ndalo tsa tyiquee ma̱ xqui'ya cha' jlo ti' ma̱ cha' ntucua Jesucristo nu Xu'na na ca slo ycui' Ndyosi Sti na; bi' cha' xcui' cha' tso'o ndyu'ni ma̱, masi tlyu tsa cña.

1 TESALONICENSES 2:2

Cua ngua'ni ycui' Ndyosi cha' tlyu tyiquee ya, cha' ngulu'u ya cha' tso'o nu ntsu'u ji'i̱ ycui' Ndyosi ji'i̱ ma̱ lo'o ngulaa ya slo cu'ma̱, masi lya' tsa ti' ngu' ji'i̱ ya tya tsubi' la ca quichi̱ Filipos. Jlo ti' ma̱ cha' cuxi tsa ngua'ni ngu' bi' lo'o ya li', lo'o jua'a̱ ntsu'u ngu' quichi̱ tyi ma̱ nu cuxi nti' ña'a̱ ngu' ji'i̱ ya.

1 TESALONICENSES 2:6

Ná nti' ya cha' cua'ni chi̱ ma̱ loo ya, masi chacuayá' ji'i̱ ycui' Jesucristo ndyalaa ya slo cu'ma̱; si'i na nchcui' tyucuaa ti' ya lo'o ma̱, cha' loo laca ya ji'i̱ ma̱, ni si'i na tyixi ya cha' loo laca ya ji'i̱ xa' ñati̱.

1 TESALONICENSES 3:10

Nchcui' ya lo'o ycui' Ndyosi nde tsa̱ lo'o nde talya. Tya'na tsa nchcui' ya lo'o Ni cha' ta Ni chacuayá' ji'i̱ ya cha' tyacua tya'a na chaca quiya', cha' bilya tye culu'u ya ji'i̱ ma̱ lcaa cha' tso'o nu nga'a̱ cha' caca cuayá' ti' ma̱, cha' jua'a̱ xñi tso'o ma̱ cha' ji'i̱ Jesús.

1 TIMOTEO 1:11

La cui' cha' tso'o bi' nclu'u na' chacuayá' ji'i̱ ycui' Ndyosi juani, lo'o nclu'u na' cha' tlyu tsa laca ycui' Ndyosi, cha' tso'o tsa ntsu'u tyiquee Ni ña'a̱ Ni ji'na.

1 TIMOTEO 4:10

Jlya ti' na ji'i̱ ycui' Ndyosi nu lu'ú ca; bi' cha' lye cua'ni na cña ji'i̱ Ni, masi lya' tsa ti' ngu' ji'na. Lo'o ycui' Ndyosi ni, cua'ni lyaá Ni ji'i̱ lcaa ñati̱ si taquiya' ngu' ji'i̱ Ni. Lo'o xñi na cha' ji'i̱ Ni, li' ca cuayá' tso'o la ti' na cha' bi'.

1 TIMOTEO 5:5

Sca ti ji'i̱ ycui' Ndyosi ndu̱ ti' ngu' cuna'a̱ ti'i nu chañi cha' ndyanu ycui' ti ngu'; sca ti ycui' Ni xtyucua Ni ji'i̱ ngu' nti' ngu', bi' cha' nchcui' ngu' lo'o ycui' Ndyosi tsa̱ lo'o talya, ndijña ngu' ji'i̱ Ni na ca nu lyiji ji'i̱ ngu'.

2 TIMOTEO 1:3

Ñi'ya̱ nu tyucui tyiquee jyo'o cusu' ji'na ngua'ni ngu' cña ji'i̱ ycui' Ndyosi nu ngua sa'ni la, jua'a̱ tyucui tyiquee na' ndyu'ni na' cña ji'i̱ ycui' Ndyosi juani. Ndya na' xlya'be ji'i̱ ycui' Ni lo'o nchcui' na' lo'o Ni cuentya jinu'u̱, cha' tsa̱ lo'o talya nchcui' na' lo'o Ni.