1 TESALONICENSES 2:4 - Chatino Tataltepec

⁴ Cua nda ycui' Ni cha' bi' lo'o ya cha' culu'u ya ji'i̱ ñati̱, bi' cha' liñi nchcui' ya lo'o ngu' nde lcaa quichi̱. Si'i ñati̱ chalyuu laca nu Xu'na na, ycui' Ndyosi laca nu Xu'na na; bi' cha' cuentya ji'i̱ ycui' Ni nclu'u ya cha' tso'o bi' ji'i̱ Ni ji'i̱ lcaa ma̱, cha' jlo ti' Ni lcaa cha' nu ntsu'u ne' cresiya ji'i̱ ya.

1 TESALONICENSES 2:4 ပူးပေါင်းရင်းမြစ်များ

SAN LUCAS 12:42

Li' nguxacui̱ Jesús cha' ji'i̱ yu: ―¿Ha ntsu'u cu'ma̱ nu tyucui tyiquee ma̱ ntaja'a̱ ma̱ cua'ni ma̱ cña 'na? Ndi'ya̱ cua'ni ma̱ lacua: sca msu nu tso'o ni, ta xu'na yu cña ji'i̱ yu cha' caca yu loo ne' ni'i̱ ji'i̱ xu'na yu; culo xu'na yu cña ji'i̱ yu cha' xacu yu ji'i̱ lcaa ngu' nu ndi'i̱ ni'i̱ bi'.

SAN LUCAS 16:11

Si ná nchca cña'a̱si̱i̱ ma̱ sca cha' tso'o nu ntsu'u ji'i̱ ma̱ nde chalyuu, ni ná ta ycui' Ndyosi sca cña tso'o la cha' cua'ni ma̱ cuentya ji'i̱ ycui' Ni.

SAN JUAN 21:17

Cua ngua sna quiya' nu nchcuane Jesús ji'i̱: ―¿Ha chañi hi̱ cha' ntsu'u tyiquee nu'u̱ ña'a̱ 'na? Cua xñi'i̱ ti' Pedro cha' cua sna quiya' nchcuane Jesús ji'i̱ si chañi cha' ntsu'u tyiquee ña'a̱ ji'i̱ yu, bi' cha' nchcui' ndi'ya̱: ―Lcaa ca cha' jlo ti' nu'u̱, Xu'na ―nacui̱ Pedro ji'i̱ yu―. Cua jlo ti' nu'u̱ cha' ntsu'u tsa tyiquee na' ña'a̱ na' jinu'u̱. ―Culu'u nu'u̱ cha' 'na ji'i̱ ñati̱ 'na lacua ―nacui̱ Jesús ji'i̱―.

ROMANOS 8:27

Nclyotu̱ ycui' Ndyosi lcaa ca cha' nu ntsu'u ne' cresiya ji'i̱ ñati̱. Lo'o jua'a̱ jlo ti' Ni lcaa cha' nu nti' Xtyi'i ycui' Ni ta lo'o Ni, cha' nu lo'o ndijña nu bi' sca cha' ji'i̱ ycui' Ndyosi Sti na cuentya ji'na, stu'ba nti' Xtyi'i Ni lo'o lcaa cha' nu nclyacua ti' ycui' Ndyosi Sti na.

1 CORINTIOS 7:25

Bilya ta ycui' nu Xu'na na cha' lo'o na' ñi'ya̱ cua'ni ñati̱ nu ntucua ycui' ti, si caja clyo'o ngu', si ná caja clyo'o ngu'; bi' cha' cuentya jna' ti, ta na' xi cha' lo'o ma̱. Taca xñi ma̱ cha' jna', xqui'ya cha' lo'o na' ngua'ni tya'na ti' Ni 'na; bi' cha' ndyu'ni na' cña ji'i̱ Ni.

1 CORINTIOS 9:17

Nu lo'o cua'ni na' sca cña cuentya 'na ti, ndu̱ ti' na' cha' caja xcaya' na' li'. Pana xa' ña'a̱ cña laca cña nu nda Ni 'na; na cua ndyanu cña bi' 'na cha' bi' ti cña cua'ni na', cha' cua ndatsaa Ni 'na cha' cua'ni na' ji'i̱. Bi' cha' ndyu'ni na' cña bi'.

2 CORINTIOS 2:17

Si'i ngana ndyu'ni ya lo'o cha' ji'i̱ ycui' Ndyosi bi', si'i na nchcutsa'a̱ ya ji'i̱ lo'o xa' la cha'; tyucui ti' tyiquee ya nchcui' ya lo'o ñati̱ ñi'ya̱ laca si na ndi'i̱ ycui' Ndyosi slo ya, xqui'ya cha' ycui' Ndyosi laca nu ngua'a̱ loo ji'i̱ ya cha' cua'ni ya cña bi' cuentya ji'i̱ Cristo.

2 CORINTIOS 4:2

Cua nguxtyanu ya ji'i̱ lcaa cha' cuxi nu ndyu'ni ngu' cuaana ti, lcaa cha' nu ntyuju'u tsa ti' ngu' cua'ni ngu' ji'i̱. Si'i na nñilo'o ya ji'i̱ ngu', la cui' jua'a̱ ná nchcutsa'a̱ ya cha' ji'i̱ ycui' Ndyosi lo'o xi xa' la cha', nu lo'o nchcui' ya cha' bi' lo'o ngu'; tso'o ti nclyu'u ya tyucui cha' ji'i̱ Jesús ji'i̱ ngu'. Lo'o jua'a̱ chañi tsa laca cha' bi', cha' jua'a̱ caca cuayá' ti' lcaa ñati̱ cha' tyucui tyiquee ya ndu'ni ya cña ji'i̱ ycui' Ndyosi; jua'a̱ nti' ycui' Ni ña'a̱ Ni ji'i̱ ya.

2 CORINTIOS 5:11

Xqui'ya cha' ndube tsa ti' ya cha' ña'a̱ ycui' Ndyosi ji'i̱ ya, bi' cha' nchcui' tsa ya cha' ji'i̱ Jesús lo'o xa' ñati̱. Tso'o tsa nslo ycui' Ndyosi ji'i̱ ya, ñi'ya̱ ndu'ni sa scaa ya. Lo'o jua'a̱ cu'ma̱, nti' ya cha' liñi tsa ndyuloo ma̱ ji'i̱ ya,

2 CORINTIOS 5:16

Bi' cha' juani nga'aa chcui' tyucuaa ti' na lo'o xa' ñati̱ si ná ndiya ti' na ñi'ya̱ ndu'ni ngu' bi' nde chalyuu. Nu ngua tya sa'ni la, la cui' ti cha' ná ndiya ti' ya cña nu ngua'ni ycui' Cristo; si'i ñati̱ nguula, si'i ñati̱ tlyu laca yu ngua ti' ya tya li'. Pana juani nga'aa si'i jua'a̱ nclyacua ti' ya ña'a̱ ya ji'i̱ Cristo.

GÁLATAS 1:10

Lo'o nacui̱ na' jua'a̱, si'i cha' ndyu'ni cña tsa ti' na' cha' caja ñati̱ 'na nu cua'ni chi̱ loo na'. Tsa bi' ti cha' tso'o nti' na', si ycui' Ndyosi cua'ni chi̱ Ni loo na'; si'i na cua nti' na' cha' tso'o ti chcui' ñati̱ jna'. Nga'aa caca cua'ni na' cña ji'i̱ Cristo, si xcui' cha' cua'ni tya'a na' lo'o ñati̱ ntsu'u tyiquee na'.

GÁLATAS 2:7

Ndi'ya̱ ngua: ngutucuá ngu' bi' ji'i̱ cha' nu nchcui' na' lo'o ngu'; cua ngüiñi cha' ji'i̱ ngu' bi' lo'o na' li'; cua ngua cuayá' ti' ngu' cha' cua nda ycui' Ndyosi cña 'na cha' tsa'a̱ ta na' cha' ji'i̱ Ni lo'o cu'ma̱ ngu' xa' tsu', ñi'ya̱ taca clyaá ma̱ ji'i̱ nu cuxi. Lo'o jua'a̱ nacui̱ ngu' cha' cua nda Ni la cui' cña ji'i̱ nu Pedro bi', cha' chcui' yu cha' tso'o bi' lo'o ngu' judío.

EFESIOS 3:8

Ná tso'o la na' tsiya' ti que cua ña'a̱ ca ñati̱ nu ngusñi cha' ji'i̱ ycui' Ndyosi, tso'o la ngu' bi' que na'; pana nda Ni chacuayá' cha' tsa'a̱ slo ñati̱ nu ndi'i̱ xa' tsu'. Tso'o tsa cña nda Ni 'na, cha' cacha' na' cha' tso'o bi' ji'i̱ ngu', masi tya lyiji tsa cha' tye ca cuayá' ti' ycui' na' lcaa cha' tso'o nu ndu'ni Cristo lo'o ñati̱.

EFESIOS 6:6

Cua'ni ma̱ cña ji'i̱ ngu' lacua; si'i na cua'ni ti ma̱ jua'a̱ cha' tyanu tso'o ma̱ lo'o ngu', nu lo'o ndu̱ ti ngu' ndyi'ya ngu' cuentya ji'i̱ ma̱ si ndyu'ni ma̱ cña. Tso'o la si tyi'u ti' ma̱ cha' la cui' msu ji'i̱ Cristo laca ma̱, bi' cha' tyucui tyiquee ma̱ cua'ni ma̱ lcaa ña'a̱ cña nu nti' ycui' Ndyosi cha' cua'ni na.

COLOSENSES 3:22

Cu'ma̱ ngu' msu nu ndyu'ni cña ji'i̱ ngu' laja ti, taquiya' ma̱ lcaa cña nu culo ñati̱ nu laca loo ji'i̱ ma̱ nde chalyuu. Si'i na cua'ni ti ma̱ jua'a̱ cha' tyanu tso'o cha' ji'i̱ ma̱ lo'o ngu' lo'o ndu̱ ti ngu' slo ma̱, cha' ndyi'ya ngu' cuentya ji'i̱ ma̱ si ndu'ni ma̱ cña; pana tyucui tyiquee ma̱ cua'ni ma̱ cña bi', xqui'ya cha' lcaa hora ndube ti' ma̱ ji'i̱ ycui' nu Xu'na na.

1 TIMOTEO 6:20

Lo'o nu'u̱ Timoteo, cua'ni tyaca'a nu'u̱ ji'i̱ cha' nu ntsu'u cha' culu'u nu'u̱ ji'i̱ ñati̱ cuentya ji'i̱ ycui' Ndyosi. Ná taquiya' nu'u̱ tsiya' ti ji'i̱ cha' cuxi nu nchcui' nu ngu' cuiñi bi'. Jlo tsa ti' ycui' ca ngu', jua'a̱ nti' nu ngu' cuiñi bi'; pana ná nda ngu' bi' cuentya tsiya' ti ñi'ya̱ laca sca cha' liñi.

2 TIMOTEO 1:14

Cua'ni tyaca'a nu'u̱ ji'i̱ cha' tso'o nu nda ycui' Ndyosi lo'o na; xtyucua Xtyi'i ycui' Ni jinu'u̱ cha' cua'ni nu'u̱ cña bi', bi' cha' ndyanu Xtyi'i ycui' Ni ne' cresiya ji'na.

2 TIMOTEO 2:2

Cua ndyuna nu'u̱ lcaa cha' nu ngulu'u na' ji'i̱ tyu̱u̱ tya'a ñati̱; nu juani la cui' ñi'ya̱ nu ngulu'u na', jua'a̱ culu'u nu'u̱ ji'i̱ ñati̱ nu tyucui tyiquee nti' ngu' culu'u ngu' cha' bi' ji'i̱ xi xa' la ñati̱, cha' ca tsa'a̱ tso'o nu xa' la ngu' bi' cha' ji'i̱ ycui' Ndyosi.

TITO 1:3

Lo'o juani cua nti' Ni cha' tso'o tsa tyempo cha' cañi tyijyu' cha' ji'i̱ ycui' Ndyosi nu ndyu'ni lyaá ji'na, lo'o jua'a̱ cua ngulo Ni cña jna' cha' culu'u na' cha' tso'o bi' ji'i̱ xa' ñati̱.

HEBREOS 4:13

Ná taca tyu'u cuaana ti cha' tyiquee na, ni tsaca cha' nu ntsu'u ji'na, cha' ná ca cuayá' ti' ycui' Ndyosi ji'i̱ cha' bi'. Ná taca. Ña'a̱ Ni ji'i̱ lcaa ñati̱ nu cua ngüiñá Ni, nu cua ngusta Ni chalyuu; nchca tii Ni lcaa cha' nu ntsu'u ji'na. Ná taca cua'ni na ni sca cña ca slo ycui' Ndyosi cha' tyu'u cuatsi' ti sca cha', cha' nga'a̱ cha' xacui̱ na cha' ji'i̱ ycui' Ni cuentya ji'i̱ lcaa cña nu ngua'ni scaa na nde chalyuu, nu lo'o tye chalyuu ji'na.

1 PEDRO 4:11

Culu'u ma̱ cha' ji'i̱ ñati̱, si bi' laca cña nu cua nda Ni ji'i̱ ma̱ cha' cua'ni ma̱; culu'u ma̱ tsa ña'a̱ cha' nu nti' ycui' Ndyosi chcui' Ni lo'o ngu'. Lo'o jua'a̱ xtyucua ma̱ ji'i̱ tya'a ñati̱ ma̱ lo'o tyucui juersa nu nda ycui' Ndyosi ji'i̱ ma̱, si bi' laca cña nu cua nda Ni ji'i̱ ma̱ cha' cua'ni ma̱. Nu lo'o ña'a̱ ngu' cña tso'o nu ndyu'ni ma̱ bi', li' cua'ni tlyu ngu' ji'i̱ ycui' Ndyosi xqui'ya Jesucristo. Lo'o li' ná nga'a̱ cha' tye cha' cua'ni tlyu ngu' ji'i̱ Cristo bi', cha' laca Cristo loo tsiya' ti. Jua'a̱ caca cha' tu'ni.

APOCALIPSIS 2:23

hasta cujuii na' ji'i̱ ñati̱ nu ngusñi cha' ji'i̱ nu cuna'a̱ bi', nacui̱ Ni. Lo'o li' lcaa taju ñati̱ ji'i̱ Jesucristo lcua ti quichi̱, caja cha' ji'i̱ ngu' cha' cua ngua'ni tye na' ji'i̱ cha' cuxi bi'; li' taca jlya tso'o ti' ngu' cha' cua jlo ti' na' lcaa ña'a̱ cha' nu nclyacua ti' ñati̱ chalyuu. Lo'o li' ca cuayá' ti' lcaa ma̱ cha' la cui' ñi'ya̱ ngua'ni ma̱ cha' cuxi tya lo'o ya̱a̱ ma̱ chalyuu, jua'a̱ xcube' na' ji'i̱ ma̱, nacui̱ Jesús.