1 PEDRO 5:12 - Chatino Tataltepec

¹² Jlo ti' na' cha' tso'o tsa ngusñi Silvano tya'a na cha' ji'i̱ ycui' nu Xu'na na; yu bi' laca nu nguxtyucua tsa 'na lo'o nguscua ya quityi sube re cha' ca̱a̱ slo cu'ma̱. Nti' na' cha' caca nguula ti' tyiquee ma̱, cha' chañi cha' tlyu tsa cha' tso'o ndu'ni ycui' Ni lo'o na. Jlo ti' na' cha' bi', lo'o jua'a̱ tso'o tsa si lo'o cu'ma̱ tyi'u ti' ma̱ cha' bi', ñi'ya̱ laca lo'o nxtyucua tsa ycui' Ni ji'na lcaa tsa̱.

1 PEDRO 5:12 ပူးပေါင်းရင်းမြစ်များ

SAN JUAN 21:21

Na'a̱ Pedro cha' lca'a̱ nu qui'yu bi' ji'i̱ ngu', bi' cha' nchcuane Pedro ji'i̱ Jesús: ―¿Na ca caca ji'i̱ yu bi' nde loo la? ―nacui̱ Pedro ji'i̱.

LOS HECHOS 11:23

Li' ndu'u Bernabé ndyaa yu, ndyalaa yu ca quichi̱ bi', na'a̱ yu ñi'ya̱ laca cha' tso'o nu ngua'ni ycui' Ndyosi lo'o ngu' bi'. Tso'o tsa ntsu'u tyiquee Bernabé li'. Nda yu sca cui̱i̱ lo'o taju ñati̱ ji'i̱ Jesucristo ca bi', cha' tyucui tyiquee ngu' cua'ni ngu' cña lcaa tsa̱, lcaa ña'a̱ cña nu nti' ycui' nu Xu'na na cha' cua'ni na.

LOS HECHOS 15:22

Ngua stu'ba cha' ji'i̱ ngu' lo'o tya'a ngu' li', lcaa ñati̱ ji'i̱ Jesucristo nde Jerusalén, lo'o ngu' nu ngua tsa'a̱ ji'i̱ Jesucristo tya clyo, lo'o ngu' nu laca loo ji'i̱ taju ngu'. Li' ngua ti' ngu' cha' subi ngu' xi xa' la tya'a ngu' cha' tsaa ngu' lo'o Pablo lo'o Bernabé ca quichi̱ Antioquía; ngusubi ngu' ji'i̱ Judas nu laca xtañi Barsabás, lo'o ji'i̱ Silas, ñati̱ nu ndaquiya' tsa ngu' bi' ji'i̱.

LOS HECHOS 20:24

Pana ná ntsi̱i̱ na' xqui'ya cha' nu nchcui' ngu' bi', ná ndu'ni cha' jna' masi cujuii ngu' jna'. Sca ti cha' nti' na', cha' tso'o ti tye cña nu nda ycui' Jesús jna', cha' ta na' cha' tso'o ji'i̱ ycui' Ndyosi lo'o xa' ñati̱, cha' ntsu'u tsa tyiquee Ni ña'a̱ Ni ji'i̱ ñati̱ chalyuu.

ROMANOS 5:2

Tso'o tsa ndyu'ni ycui' Ndyosi lo'o na chacuayá' ji'i̱ Cristo, nu lo'o ngusñi na cha' ji'i̱ nu Cristo bi'. Ngua'ni Ni cha' ntsu'u cha' ji'na lo'o ycui' Ni, bi' cha' nga'aa ntsu'u cha' tya'a̱chu̱' na ji'i̱ Ni; tso'o tsa ntsu'u tyiquee na, cha' jlo ti' na cha' ca tiya' la caja sca se'i̱ nu tso'o tsa su tyi'i̱ na ca su ntucua ycui' Ndyosi, cha' jua'a̱ tso'o ti ndu'ni Ni lo'o na.

1 CORINTIOS 15:1

Cu'ma̱ tya'a ngusñi na cha' ji'i̱ Jesús, cua nti' na' cha' tyi'u ti' ma̱ ji'i̱ cha' nu cua ndacha' na' ji'i̱ ma̱ tya clyo, cha' ndu'ni lyaá ycui' Jesús ji'na ji'i̱ nu cuxi; bi' laca cha' nu cua ndyuna ma̱ tya clyo, lo'o juani cua ndyanu tso'o ti cha' bi' ne' cresiya ji'i̱ ma̱.

2 CORINTIOS 1:19

cha' nu Jesucristo bi', nu sca ti Sñi' ycui' Ndyosi ni, si'i tucua cha' ntsu'u tyiquee Ni. Cua nchcui' ya cha' ji'i̱ Ni su ndi'i̱ cu'ma̱, lo'o na', lo'o Silvano, lo'o Timoteo, nchcui' cua cha' ji'i̱ Ni. Ná chcui' Ni cha' si'i jua'a̱ laca sca cha' si cua nchcui' Ni tsaca quiya' cha' jua'a̱ laca cha' bi'. Sca ti Cristo laca nu chañi cha' nchcui' Ni cha' liñi,

2 CORINTIOS 1:24

Pana tso'o la masi si'i xqui'ya cuare ti taquiya' ma̱ cha' ji'i̱ ycui' Ndyosi, cha' ne' tyiquee ycui' ca ma̱ cua ngusñi tso'o ma̱ cha' ji'i̱ Jesús. Na cua nti' ya xtyucua ya ji'i̱ ma̱ cha' ca chaa la ti' ma̱ laja lo'o ndyu'ni tlyu ycui' ca ma̱ ji'i̱ Jesús.

EFESIOS 3:3

Cua ndacha' Ni jna' ñi'ya̱ nu nti' Ni cua'ni Ni nde chalyuu. Masi ná ndacha' Ni ji'i̱ ñati̱ sa'ni la ñi'ya̱ cua'ni Ni nde chalyuu, hasta juani ndacha' Ni cha' bi' jna', la cui' ti cha' nu cua nscua tya sa'ni nu caca tyempo juani; cua laca nscua na' xi' cha' bi' lo quityi re nu cua ca̱a̱ ti slo cu'ma̱.

EFESIOS 6:21

Cua nda na' ji'i̱ yu Tíquico cha' ca̱a̱ slo ma̱. Tso'o tsa ntsu'u tyiquee ya cha' stu'ba tsa ndu'ni ya cña ji'i̱ ycui' nu Xu'na na lo'o yu. Cacha' lyiji yu ji'i̱ ma̱ lcaa cha' ñi'ya̱ nu ndyaca 'na ca nde, ñi'ya̱ cña nu ndyu'ni na'.

COLOSENSES 1:7

Cua ngujui cha' bi' ji'i̱ ma̱ lo'o ngulu'u yu Epafras ji'i̱ ma̱; tso'o tsa tya'a ndya'a̱ ya cña laca yu bi'. Jlo ti' ya cha' tso'o tsa nchcui' yu cha' ji'i̱ Cristo lo'o ngu' lcaa su ndya'a̱ yu cuentya ji'i̱ ya.

COLOSENSES 4:7

Yu Tíquico tya'a na ni, ta yu cha' lo'o ma̱, lcaa cha' ñi'ya̱ nu ndyaca jna' ca nde. Ntsu'u tsa tyiquee na ña'a̱ na ji'i̱ yu bi', lo'o la cui' jua'a̱ tya'a ndyu'ni ya cña ji'i̱ nu Xu'na na laca yu; lcaa tsa̱ ndyu'ni yu cña bi', ná nchca taja ti' yu ji'i̱.

COLOSENSES 4:9

Stu'ba ti ca̱a̱ yu lo'o Onésimo tya'a quichi̱ tyi ma̱; na tyaca'a tsa nu Onésimo bi' ji'i̱ ya, xqui'ya cha' ná nchca taja ti' yu nchcui' yu cha' ji'i̱ nu Xu'na na. Tyucuaa ngu' bi', ta ngu' cha' lo'o ma̱ ñi'ya̱ nu ndyaca lcaa cha' ca su ndi'i̱ ya ca nde.

1 TESALONICENSES 1:1

Pablo laca na'. Lo'o Silvano lo'o Timoteo ndi'i̱ ngu' ca nde lo'o na'. Nscua ya quityi re cha' tsaa slo cu'ma̱, ña'a̱ taju ti ma̱ ngu' quichi̱ Tesalónica nu ntsu'u cha' ji'i̱ ma̱ lo'o ycui' Ndyosi Sti na, jua'a̱ ntsu'u cha' ji'i̱ ma̱ lo'o Jesucristo nu Xu'na na. Nti' tsa ya cha' ña'a̱ ti cua'ni ycui' Ndyosi cha' tso'o lo'o ma̱, cha' cua'ni Ni cha' ti̱ ti tyi'i̱ tyiquee ma̱.

2 TESALONICENSES 1:1

Pablo, Silvano, Timoteo naa ya. Nscua ya quityi re cha' tsaa ca slo ña'a̱ taju cu'ma̱ ngu' quichi̱ Tesalónica nu ngusñi cha' ji'i̱ ycui' Ndyosi Sti na, cu'ma̱ nu cua ngusñi cha' ji'i̱ Jesucristo nu Xu'na na.

HEBREOS 13:22

Cu'ma̱ tya'a ngusñi na cha' ji'i̱ Cristo, cua'ni clyu ti' ma̱ 'na, talo tyiquee ma̱ xi 'na cha' cuna ma̱ cha' nu nchcui' na' re. Ná quiña'a̱ tsa cha' nscua na' lo quityi re, pana cua nti' na' cha' tyanu tachaa la cha' bi' ne' cresiya ji'i̱ ma̱.

1 PEDRO 1:13

Bi' cha' culacua xi ti' ma̱, tii ti' ma̱ tyi'i̱ ma̱ chalyuu, cha' lcaa tsa̱ jatya ma̱ ji'i̱ cha' tso'o nu cua tlyu xi, nu cua'ni Ni lo'o ma̱ lo'o cua'ni lyaá lyiji Ni ji'i̱ ma̱; jua'a̱ caca nu lo'o tyu'u tucua Jesucristo chaca quiya'.

1 PEDRO 4:10

Nda xlya'be ti ycui' Ndyosi ñi'ya̱ taca cua'ni scaa ma̱ sca cña tso'o, lcaa ma̱ nu ngusñi ma̱ cha' ji'i̱ Jesús. Ñi'ya̱ lo'o nxtyucua ycui' Ndyosi ji'na cha' caca tya'na ti' na ji'i̱ tya'a ñati̱ na, la cui' jua'a̱ nga'a̱ cha' xtyucua na ji'i̱ ngu' lo'o cua'ni na cña nu nda Ni cha' cua'ni sa scaa na.

2 PEDRO 1:12

Tya tyu̱u̱ quiya' nti' na' chcui' na' lo'o ma̱ cuentya ji'i̱ lcaa cha' liñi ji'i̱ ycui' Ndyosi, masi cua jlo ti' ma̱ cha' bi'. Lo'o jua'a̱ jlo ti' na' cha' ngusñi tso'o ma̱ lcaa cha' nu nscua na' bi';

2 PEDRO 2:15

cua nguxtyanu ngu' bi' tyucui̱i̱ su tsaa na ca slo ycui' Ndyosi, xa' tyucui̱i̱ ngusñi ngu' bi'. Lo'o jua'a̱ nguna' tsa ndya'a̱ ngu' bi' juani, cha' la cui' tyucui̱i̱ su nguta'a̱ jyo'o cusu' Balaam sñi' Beor ndya'a̱ ngu' bi' juani. Nu Balaam bi' ngua tiji̱' tsa ti' ji'i̱ cñi, bi' cha' ngua'ni yu cña cuxi, cha' caja la cñi ji'i̱ yu ngua ti' yu.

3 JUAN 1:12

Tso'o tsa nchcui' lcaa ñati̱ ji'i̱ Demetrio; masi ycui' ca na, lo'o ña'a̱ na ji'i̱ yu nchca cuayá' ti' na cha' tso'o tsa ndyu'ni yu lo'o lcaa ñati̱. Jua'a̱ cuare, nchcui' ya lo'o ma̱ juani cha' chañi tsa cha' nu nchcui' ngu' ji'i̱ yu cha' tso'o tsa tyiquee yu. Cua jlo tso'o ti' ma̱ cha' nchcui' ya cha' liñi lo'o ma̱.

JUDAS 1:3

Cu'ma̱ ngu' tya'a tso'o na nu tyaca'a tsa ma̱ 'na, nti' tsa na' scua na' quityi cha' tsaa ca slo ma̱, sca quityi nu chcui' ji'i̱ cha' tlyu nu ngua'ni Jesús cha' taca clyaá na ji'i̱ nu cuxi; pana ná ngua scua na' ji'i̱ yala ti. Lo'o nu juani nga'a̱ cha' scua na' quityi re cha' tsaa ca slo ma̱, cha' ta na' sca cui̱i̱ lo'o ma̱; nga'a̱ cha' cua'a ma̱ ji'i̱ cua ña'a̱ ca ngu' cuiñi, xqui'ya cha' ná jlya ti' ngu' ji'i̱ cha' liñi nu cua nda ycui' Ndyosi nu Xu'na na lo'o na, lcaa na nu ntsu'u cha' ji'na lo'o Jesucristo. Ná cua'a̱ jyaca̱ ma̱ tsiya' ti ji'i̱ cha' nu nchcui' ngu' cuiñi bi'.