1 PEDRO 4:7 - Chatino Tataltepec

⁷ Cua tye ti cha' ji'i̱ lcaa na nu ntsu'u chalyuu; bi' cha' tso'o la si cua'a ma̱ ji'i̱ ycui' ca ma̱, tii ti ti' ma̱ tyi'i̱ ma̱ chalyuu cha' taca cua'ni ma̱ cña tso'o, cha' lu'ba ti taca chcui' ma̱ lo'o ycui' Ndyosi.

1 PEDRO 4:7 ပူးပေါင်းရင်းမြစ်များ

SAN MATEO 24:42

’Bi' cha' cua'ni tii ti' ma̱, cha' ná jlo ti' ma̱ tsiya' ti ni tsa̱ laca nu ca̱a̱ ycui' nu Xu'na ma̱.

SAN MATEO 25:13

Tya nchcui' la xi Jesús lo'o ngu' li': ―Bi' cha' tii ti ti' tyi'i̱ ma̱ lcaa hora, cha' ná jlo ti' ma̱ ni tsa̱ ni hora ca̱a̱ na' chaca quiya', na' nu cua nda Ni 'na lijya̱a̱ cha' caca na' ñati̱.

SAN LUCAS 21:34

’Cui'ya ma̱ cuentya, cua'a ma̱ ji'i̱ ycui' ca ma̱ cha' tii ti ti' ma̱ tyi'i̱ ma̱ lo'o tyalaa tsa̱ bi'; si culiji yu'u ti ma̱ chalyuu ji'i̱ ma̱ jua'a̱ ti lo'o ndya'a̱ tsa ma̱ calle, lo'o cu'bi ti ma̱, la cui' jua'a̱ si ntsu'u tyu̱u̱ tya'a cha' nu ndube tsa ti' ma̱ ji'i̱, ná caca tyi'i̱ ma̱ tii ti ti' ma̱ li'. Ñi'ya̱ ndyacu̱' sca lco'o,

SAN LUCAS 21:36

Tii ti ti' ma̱ tyi'i̱ ma̱ chalyuu lacua. Lcaa tyempo chcui' ma̱ lo'o ycui' Ndyosi cha' xtyucua Ni ji'i̱ ma̱, cha' talo ma̱ lo'o caca cha' cuxi bi' chalyuu. Lo'o li' caja ñi'ya̱ nu tyalaa ma̱ su tyucua ycui' na' nu cua nda Ni 'na lijya̱a̱ cha' caca na' ñati̱, cha' cua'ni cuayá' na' ji'i̱ ma̱ ―nacui̱ Jesús ji'i̱ ngu'.

SAN LUCAS 22:46

Li' nacui̱ yu ji'i̱ ngu': ―¿Ni cha' laca ndi'i̱ ma̱ laja' ti ma̱? Tyatu̱ clya ma̱ cha' chcui' ma̱ lo'o ycui' Ndyosi, cha' ná tyiji̱loo nu xña'a̱ ji'i̱ ma̱.

ROMANOS 12:12

Ndu'ni cha' tso'o tsa caca tyiquee ma̱ lo'o jatya ma̱ ji'i̱ ycui' Ndyosi cha' ca̱a̱ Ni cua'ni lyaá Ni ji'i̱ ma̱. Ná xtyanu ma̱ ji'i̱ cha' bi', masi ti'í tsa xcube' ngu' ji'i̱ ma̱ su ndi'i̱ ma̱ chalyuu. Lcaa tsa̱ chcui' ma̱ lo'o ycui' Ndyosi Sti na.

1 CORINTIOS 15:24

li' tye chalyuu. Cua'ni tye Cristo ji'i̱ lcaa nu laca loo, ji'i̱ lcaa ngu' tisiya, ji'i̱ lcua ti ña'a̱ ñati̱ nu nxu̱u̱ tya'a lo'o ycui' Ndyosi. Li' chaca quiya' tya Jesús lcaa chacuayá' nu cua nda ycui' Ndyosi ji'i̱ tya clyo, cha' caca Ni loo ji'i̱ lcua ti lo ñati̱ li'.

1 CORINTIOS 7:29

Cu'ma̱ tya'a ngusñi na cha' ji'i̱ Jesús, ndi'ya̱ laca cha' nu ta na' lo'o ma̱: Tya xti tya tyempo tya lijya̱ ji'na chalyuu. Bi' cha' cua'ni yala ma̱ su ndi'i̱ ma̱ chalyuu; masi ntsu'u clyo'o ma̱, si'i xcui' cha' ji'i̱ clyo'o ma̱ tyu'u tyiquee ma̱;

EFESIOS 6:18

Chcui' ma̱ lo'o ycui' Ndyosi nu lo'o nxu̱u̱ tya'a ma̱ lo'o nu cuxi, cha' jña ma̱ chacuayá' ji'i̱ Ni; lcaa tyempo xtyucua Xtyi'i ycui' Ndyosi ji'i̱ ma̱ cha' taca chcui' ma̱ lo'o Ni. Lo'o jua'a̱ chcui' ma̱ lo'o Ni cuentya ji'i̱ lcaa ñati̱ nu cua ngusñi cha' ji'i̱ Ni. Bi' cha' lacua, tii ti ti' ma̱ chcui' ma̱ lo'o Ni, cha' ná ca taja ti' ma̱.

FILIPENSES 4:5

Xcui' cua'ni tya'na tsa ti' ma̱ lo'o lcaa ñati̱, cha' ca cuayá' ti' ñati̱ cha' jua'a̱ ndu'ni ma̱. Cua ngulala ti ca̱a̱ ycui' nu Xu'na na chaca quiya'.

COLOSENSES 4:2

Lcaa cu'ma̱, ná ca taja ti' ma̱, lcaa tsa̱ chcui' ma̱ lo'o ycui' Ndyosi. Lo'o jua'a̱ tii ti ma̱ tyi'i̱ ma̱ lo'o chcui' ma̱ lo'o Ni, jua'a̱ ta ma̱ xlya'be ji'i̱ Ni lo'o chcui' ma̱ lo'o Ni.

2 TIMOTEO 4:5

Lo'o nu'u̱ ni, culacua xi ti' nu'u̱ na laca nu tso'o la cha' cua'ni nu'u̱, cha' talo tyiquee nu'u̱ lo'o lya' tsa ti' ngu' jinu'u̱, cha' ña'a̱ ti chcui' nu'u̱ cha' tso'o ji'i̱ ycui' Ndyosi lo'o ñati̱, cha' tya cua'ni la nu'u̱ lcaa cña nu ntsu'u cha' cua'ni nu'u̱ cuentya ji'i̱ ycui' Ndyosi.

TITO 2:12

jua'a̱ cua ngulu'u Ni ji'na ñi'ya̱ taca tyi'i̱ tso'o ti na nde chalyuu. Nti' Ni cha' cua'a na ji'i̱ ycui' ca na, cha' tso'o ti cua'ni na lo'o tya'a ñati̱ na. Taca cua'ni tlyu na ji'i̱ ycui' Ndyosi nu lo'o cua ngulochu̱' na ji'i̱ lcaa cha' cuxi nu ná ndiya ti' Ni ji'i̱, nu lo'o nga'aa ndu'ni na lcaa cha' suba' nu ndiya ti' ñati̱ chalyuu ti.

HEBREOS 10:25

Ntsu'u ngu' tya'a na nu nga'aa ndya'a̱ slo ngu' tya'a ngusñi na cha' ji'i̱ Jesús, nu nga'aa ndyu'u ti'i̱ lo'o tya'a na. Pana ná tso'o cua'ni na jua'a̱; tso'o la ña'a̱ ti tsaa na tyu'u ti'i̱ na lo'o tya'a na, cha' tyanu tachaa la cha' ji'i̱ ycui' Ndyosi ne' cresiya ji'na, lcaa na lo'o tya'a ngusñi na cha' ji'i̱ Ni. Nti' na cha' cua tya̱a̱ ti nu Xu'na na chaca quiya', bi' cha' lu'ba ti tyu'u ti'i̱ na juani lo'o ngu' tya'a na.

HEBREOS 9:26

Si jua'a̱ ngua, ná tyiquee' cua tyu̱u̱ tsa quiya' cua ngujui'i̱ ca'a̱ ngu' ji'i̱ Cristo lo crusi tya lo'o ndya' chalyuu; pana si'i jua'a̱ ngua cha' bi', sca ti quiya' cua ya̱a̱ yu chalyuu nu ngua sa'ni xi lo'o cua tye ti chalyuu cusu', cha' cuityi̱ yu qui'ya nu ntsu'u ji'i̱ lcaa ñati̱ lo'o ngujuii yu lo crusi.

1 PEDRO 1:13

Bi' cha' culacua xi ti' ma̱, tii ti' ma̱ tyi'i̱ ma̱ chalyuu, cha' lcaa tsa̱ jatya ma̱ ji'i̱ cha' tso'o nu cua tlyu xi, nu cua'ni Ni lo'o ma̱ lo'o cua'ni lyaá lyiji Ni ji'i̱ ma̱; jua'a̱ caca nu lo'o tyu'u tucua Jesucristo chaca quiya'.

1 PEDRO 3:7

Lo'o jua'a̱ cu'ma̱ ngu' qui'yu ni, tso'o ti tyi'i̱ ma̱ lo'o clyo'o ma̱, cua'ni tyaca'a ma̱ ji'i̱ clyo'o ma̱; masi xtyi la juersa ntsu'u ji'i̱ nu cuna'a̱, pana stu'ba ti laca tyucuaa ma̱ cuentya ji'i̱ ycui' Ndyosi, cha' cua nda Ni chalyuu nu ná nga'a̱ cha' tye ji'i̱ tyucuaa ma̱. Si cua'ni ma̱ tso'o jua'a̱, tso'o ti tyi'i̱ ma̱ to' tyi ma̱; li' ná caja sca cha' cuxi nu cua'a ji'i̱ ma̱, nu cua'ni cha' ná chcui' ma̱ lo'o ycui' Ndyosi.

1 PEDRO 5:8

¡Tii ti ti' ma̱ tyi'i̱ ma̱ chalyuu! Ná caja' ma̱, cha' tya'a cusu̱u̱ ma̱ laca ycui' nu xña'a̱, lo'o jua'a̱ cacua tsa ndu̱ bi' slo ma̱. Ñi'ya̱ nti' sca cuichi nu tyaala tsa nu nclyana ji'i̱ sca ñati̱ cha' cacu ni', jua'a̱ nti' ndya'a̱ yu'u nu xña'a̱ bi' chalyuu.

APOCALIPSIS 16:15

“Cua'a̱ jyaca̱ ma̱”, nacui̱ Jesús, “tsiya' ca tyu'u tucua na' tya̱a̱ na' ñi'ya̱ nti' sca nu cuaana. Tso'o caca tyiquee ñati̱ nu tii ti ti' tyi'i̱ chalyuu, xqui'ya cha' ngusñi ngu' cha' jna'; nga'aa ca tyuju'u ti' ngu' bi' slo ñati̱ lo'o tyalaa hora nu tya̱a̱ na' li'.” Jua'a̱ nacui̱ Jesús ji'i̱ ñati̱ ji'i̱ Ni.