1 PEDRO 4:6 - Chatino Tataltepec

⁶ Lo'o jua'a̱ ngu' nu cua ngujuii, nu cua ndyuna cha' tso'o ji'i̱ Jesucristo, ñati̱ chalyuu ti ngua ngu' bi', bi' cha' ngujuii ngu', ñi'ya̱ nu nscua cha' cajaa lcaa ñati̱; pana cua'ni Xtyi'i ycui' Ndyosi cha' tyu'ú ngu' bi' chaca quiya', cha' caja chalyuu nu ná nga'a̱ cha' tye ji'i̱ ngu' bi', cha' cua ngusñi ngu' cha' ji'i̱ Jesús.

1 PEDRO 4:6 ပူးပေါင်းရင်းမြစ်များ

SAN MATEO 24:9

’Nu lo'o xana cha' cuxi bi', tejeya' ngu' ji'i̱ ma̱ cha' xcube' ngu' ji'i̱ ma̱, hasta ña'a̱ cuayá' nu cujuii ngu' ji'i̱ ma̱, cha' ntsu'u ngu' tyucui ña'a̱ chalyuu nu caca ti'í ti' ngu' ña'a̱ ngu' ji'i̱ ma̱ xqui'ya na';

ROMANOS 8:2

Nu lo'o laca Xtyi'i ycui' Ndyosi loo ji'na, li' caja chalyuu cucui ji'na xqui'ya Jesucristo, cha' stu'ba ntsu'u cha' ji'na lo'o Ni; na cua ngulo Ni ji'na ya' nu cuxi nu ndyu'ni cha' chcuna' chalyuu ji'na.

GÁLATAS 2:19

Lo'o na' ni, ná nchca cua'ni na' lcaa cha' cusu' bi', bi' cha' cua ndye cha' jna' lo'o cha' bi'; juani xcui' ndi'i̱ na' chalyuu cha' cua'ni na' lcaa ña'a̱ cña nu nti' ycui' Ndyosi cha' cua'ni na'.

GÁLATAS 5:25

Tya lo'o ngusñi na cha' bi' clyo, li' ngujui chalyuu tso'o ji'na xqui'ya Xtyi'i ycui' Ndyosi. Juani tso'o la si taquiya' na cha' nu nda Xtyi'i ycui' Ndyosi lo'o na cha' tyanu ne' cresiya ji'na lcaa se'i̱ su ndi'i̱ na.

1 PEDRO 1:12

Pana ná nquije cha' bi' ji'i̱ ngu' bi' li'; sca ti cha' nchcui' ycui' Ni lo'o ngu' bi', cha' si'i ycui' ngu' bi' laca nu ca cuayá' tso'o ti' ñi'ya̱ caca cha' bi' tyempo nde loo la. Pana cu'ma̱ ni, nu lijya̱ chalyuu nde loo la ji'i̱ ngu' jyo'o bi', nchca cuayá' ti' ma̱ juani, xqui'ya cha' cua ndyuna ma̱ lcaa cha' tlyu nu ngua'ni Jesucristo. Cua ndacha' liñi ya cha' bi' ji'i̱ ma̱; chacuayá' ji'i̱ Xtyi'i ycui' Ndyosi ngulu'u ya cha' bi' ji'i̱ ma̱, cha' cua nda ycui' Ndyosi Xtyi'i ycui' Ni lijya̱ lo ya nde chalyuu. Lo'o jua'a̱ lcaa xca̱ ji'i̱ ycui' Ni nu ndi'i̱ slo Ni, lcaa ngu' bi' nti' tsa ngu' ca cuayá' ti' ngu' lcaa cha' nu ngua ji'i̱ Cristo lo'o ñaa yu nde chalyuu.

1 PEDRO 3:18

Ycui' Cristo ngujuii xqui'ya qui'ya nu ntsu'u ji'na, masi lubii tsiya' ti cresiya ji'i̱ yu; nchcube' yu cuentya ji'na, cha' cuxi tsa tyiquee na. Lo'o juani taca tyalaa na slo ycui' Ndyosi xqui'ya nu Cristo bi'. Sca ti quiya' ngua cha' ti'í bi' ji'i̱ Cristo, ndye cña ji'i̱ yu nde loyuu chalyuu li'. Ndyujuii ngu' ji'i̱ nu ñati̱ nu naa Jesucristo bi', pana ngua'ni Xtyi'i ycui' Ndyosi cha' ndyu'ú yu chaca quiya'.

1 PEDRO 3:19

Xtyi'i ycui' Cristo ngua nu ndyaa ne' ni'i̱ chcua̱ su ntsu'u ngu' jyo'o ca bilyaa, cha' chcui' Ni lo'o ngu' jyo'o bi'.

APOCALIPSIS 14:18

Jua'a̱ ngutu'u tya chaca xca̱ nu ndu̱ to' mesa su ndyaqui̱ msta̱, ya̱a̱ li'; bi' laca nu laca loo ji'i̱ quii' bi'. Li' cui̱i̱ ngusi'ya bi' lo'o xca̱ nu ndacui maxtyi cha tu'ba ya': ―Xu'ba clya nu'u̱ maxtyi jinu'u̱, xi'yu jyacua' si'yu losu' tyixi nu ntsu'u chalyuu, cha' ngumi̱ tsa ña'a̱ si'yu bi'.