1 PEDRO 4:14 - Chatino Tataltepec

¹⁴ Nu lo'o nchcui' ngu' cha' ti'í ji'i̱ ma̱ xqui'ya Cristo, ca tso'o tyiquee ma̱ cha' ndi'i̱ Xtyi'i ycui' Ndyosi lo'o ma̱, lo'o jua'a̱ tlyu tsa cha' tso'o ntsu'u ji'i̱ ycui' Ni. Nchcui' ngu' bi' cha' cuxi ji'i̱ ycui' Ndyosi; pana cu'ma̱ ni, tso'o tsa si tya cua'ni tlyu ma̱ ji'i̱ Ni.

1 PEDRO 4:14 ပူးပေါင်းရင်းမြစ်များ

SAN MATEO 5:11

’Lo'o jua'a̱ tso'o ntsu'u tyiquee ma̱ masi xtyí lo'o ngu' ji'i̱ ma̱ xqui'ya na', masi lya' tsa ti' ngu' ji'i̱ ma̱, masi cuiñi tsa ngu', masi chcui' tsa ngu' cuentyu ji'i̱ ma̱ xqui'ya na'.

SAN MATEO 5:16

Lo'o jua'a̱ cu'ma̱ ni, si xee laca ma̱ nu culu'u tyucui̱i̱ ji'i̱ ñati̱, xcui' cha' tso'o cua'ni ma̱ cha' ña'a̱ xa' ñati̱ ña'a̱ cha' tso'o nu ndu'ni ma̱, nu laca ma̱ sñi' ycui' Ndyosi. Lo'o li' tyi'u ti' ngu' ji'i̱ ycui' Ndyosi Sti na, cua'ni tlyu ngu' ji'i̱ ycui' Ndyosi nu ntucua nde cua̱.

SAN LUCAS 6:22

’Lo'o jua'a̱ tso'o ti caca tyiquee cu'ma̱ masi ti'í ti' ngu' ña'a̱ ngu' ji'i̱ ma̱, masi culo'o ngu' ji'i̱ ma̱ ca su ndi'i̱ ma̱, masi suba' tsa chcui' ngu' lo'o ma̱, masi hasta nga'aa nti' ngu' chcui' ngu' lo'o ma̱, xqui'ya cha' jlya ti' ma̱ jna', na' nu cua nda Ni lijya̱a̱ cha' caca na' ñati̱;

SAN JUAN 15:21

Jua'a̱ cua'ni ngu' lo'o cu'ma̱ xqui'ya na' ―nacui̱ Jesús―, cha' ná nslo ngu' tilaca laca nu nda 'na lijya̱a̱ nde chalyuu.

SAN JUAN 8:48

Li' nguxtyacui ngu' judío cha' lo'o Jesús: ―Liñi cha' nu nchcui' ya jinu'u̱ juani, cha' ngu' Samaria laca nu'u̱. Ñi'ya̱ nti' sca nu xña'a̱, jua'a̱ nti' nu'u̱ ―nacui̱ ngu' li'.

SAN JUAN 9:28

Li' nchcui' nu ngu' judío bi' cha' ti'í lo'o: ―Nu'u̱ laca sca nu ndyaca tsa'a̱ ji'i̱ yu bi' ―nacui̱ ngu'―, cuare laca ya ñati̱ nu ndyaca tsa'a̱ ji'i̱ jyo'o cusu' Moisés.

SAN JUAN 9:34

―Ngu' cuxi laca nu'u̱, pana nti' nu'u̱ culu'u xi cha' jo'ó ji'i̱ ya ―nacui̱ ngu' judío li'―. Cuxi nu'u̱ lo'o ngula nu'u̱, jua'a̱ cuxi ti nguluu nu'u̱ ―nacui̱ ngu'. Lo'o li' ngulo'o ngu' ji'i̱ nu qui'yu bi', nga'aa nda ngu' chacuayá' tsaa ne' laa tsiya' ti.

LOS HECHOS 13:45

Ñasi̱' tsa nu ngu' judío bi' lo'o na'a̱ ngu' ji'i̱ nu quiña'a̱ tsa ñati̱ bi'. Nchcui' suba' ngu' judío lo'o Pablo li', nacui̱ ngu' cha' cuiñi tsa cha' nu nclu'u yu bi'.

LOS HECHOS 18:6

Pana ngunasi̱' tsa ngu' judío bi' ji'i̱ Pablo li', suba' tsa nchcui' ngu' lo'o; bi' cha' nguscui̱ yu ste' yu slo ngu' cha' ca cuayá' ti' ngu' cha' cuxi tsa nchcui' ngu' lo'o yu. ―Nguna' tsa ndu'ni cu'ma̱ ―nacui̱ Pablo ji'i̱ ngu'―. Xqui'ya ycui' ma̱ laca; ná ntsu'u qui'ya 'na, cha' xcui' cha' liñi laca nu ngulu'u na' ji'i̱ ma̱. Cua tya'a ti na' lacua. Juani tsa'a na' cha' ta na' cha' re lo'o ngu' xa' tsu', cha' ná nduna cu'ma̱, ngu' judío.

LOS HECHOS 28:22

Nti' ya cuna ya tyucui ña'a̱ cha' nu ntsu'u cha' ta nu'u̱ lo'o ya cuentya ji'i̱ tyucui̱i̱ cucui bi', cha' jlo ti' ya cha' lcaa quichi̱ ntsu'u ngu' nu ñasi̱' tsa ji'i̱ ngu' nu cua ngusñi tyucui̱i̱ bi'.

LOS HECHOS 5:41

Ndu'u ngu', chaa tsa ti' ngu' li', masi cua nchcube' ngu' nu laca loo bi' ji'i̱ ngu' xqui'ya cha' ngusñi ngu' cha' ji'i̱ Jesús.

2 CORINTIOS 12:10

Tso'o nti' na' lacua, masi ná ntsu'u juersa 'na tsiya' ti, masi quiña'a̱ tsa cha' ti'í nchcui' ngu' jna', masi ti'i tsa na', masi lya' tsa ti' ngu' 'na, masi tucui tsa laca cña su ndya'a̱ na' cuentya ji'i̱ Cristo; la cui' tyempo lo'o ná nchca 'na tsiya' ti, la cui' hora bi' tso'o tsa ndyiji juersa 'na xqui'ya Cristo.

2 CORINTIOS 4:10

Macala su ndya'a̱ ya nde chalyuu, lu'ba ti nchca quicha ya, ntsu'u tsa cha' ti'í nu ndyu'ni ngu' lo'o ya, tsa ña'a̱ nu ngua ji'i̱ Cristo lo'o ya̱a̱ yu nde chalyuu, nu lo'o ndyujuii ngu' ji'i̱ yu. Pana li' ca jlo ti' xa' ñati̱ cha' ña'a̱ ti tya lu'ú ycui' Cristo, nu lo'o ña'a̱ ngu' bi' cha' ña'a̱ ti tya lu'ú ya.

2 CORINTIOS 4:16

Bi' cha' ná nchca taja ti' na ji'i̱ cña nu ndyu'ni na cuentya ji'i̱ ycui' Ndyosi, masi ncliji tyucui ña'a̱ cuaña' na jua'a̱ ti; pana ña'a̱ ti lu'ba ti ndu'ni ycui' Ndyosi cha' ca tso'o la cresiya ji'na.

GÁLATAS 1:24

Lo'o li' nguxana ngua'ni tlyu ngu' ji'i̱ ycui' Ndyosi xqui'ya na'.

HEBREOS 11:26

tso'o la stu'ba ti tyi'i̱ yu lo'o ngu' tya'a yu, masi chi̱i̱ nti' xa' ñati̱ ña'a̱ ji'i̱ yu, ngua ti' yu. Ñi'ya̱ nchcube' ycui' Cristo nde loo la, jua'a̱ nchcube' Moisés nu ngua li'; pana ná ndube ti' yu cha' culiya' ngu', nguxtyanu yu lcaa cha' tso'o nu ntsu'u ji'i̱ ngu' Egipto, cha' jlya ti' yu cha' tso'o la caca ji'i̱ ñati̱ ji'i̱ yu nde loo la xqui'ya ycui' Ndyosi.

SANTIAGO 1:12

Tso'o caca tyiquee ñati̱ nu ña'a̱ ti nxñi cha' ji'i̱ Jesús, masi tyacua cua ña'a̱ ca cha' ti'í ji'i̱ ngu'. Tso'o si talo ngu' tyiquee', ña'a̱ cuayá' tye cha' ti'í bi' ji'i̱ ngu', cha' caja chalyuu nu ná nga'a̱ cha' tye ji'i̱ ngu' bi' li'; bi' laca cha' tso'o nu cua nacui̱ Ni cha' ta Ni ji'i̱ ñati̱ nu ntsu'u tsa tyiquee ña'a̱ ji'i̱ ycui' Ni.

SANTIAGO 5:11

Nacui̱ na cha' tso'o tsa ntsu'u tyiquee jyo'o bi', cha' cua ndalo tsa tyiquee ngu' lo'o nguxcube' ñati̱ ji'i̱ ngu' tyempo bi'. Cua ndyuna ma̱ ñi'ya̱ ngua cha' tyiquee' tsa ndalo jyo'o Job, nu lo'o quiña'a̱ tsa cha' cuxi ngua ji'i̱ yu. Lo'o li' su cua ndye cha', xa' ndya Ni lcaa cha' tso'o ji'i̱ yu chaca quiya'. La cui' jua'a̱, xcui' na tya'na ti' Ni ji'na, xcui' tso'o ntsu'u tyiquee Ni ña'a̱ Ni ji'na.

1 PEDRO 2:12

Xcui' cha' liñi cua'ni ma̱ lacua; xcui' cha' tso'o cua'ni ma̱, xqui'ya nu ñati̱ nu ná jlya ti' ji'i̱ ycui' Ndyosi tsiya' ti, cha' lo'o ngu' bi' taca ca cuayá' ti' ngu' cha' ñati̱ tso'o laca ma̱. Nu juani nti' ngu' bi' cha' cuxi tsa ñati̱ laca ma̱, bi' cha tso'o la si cua'ni ma̱ xcui' cha' tso'o ti cha' ña'a̱ ñati̱ bi' ji'i̱ ma̱; li' ta ngu' bi' cuentya cha' chañi cha' ñati̱ tso'o laca ma̱. Lo'o ñati̱ bi' cua'ni tlyu ji'i̱ ycui' Ndyosi tsa̱ nu cua'ni cuayá' Ni ji'i̱ ñati̱ li'.

1 PEDRO 3:14

Pana si ntsu'u quiya' nu cua'ni lya' ti' ngu' ji'i̱ ma̱ xqui'ya sca cha' tso'o nu ndyu'ni ma̱, tso'o la si ná caca xñi'i̱ ti' tyiquee ma̱ li'; ná cube ti' ma̱, ná cutsi̱i̱ ma̱ ji'i̱ ngu' bi'.

1 PEDRO 3:16

Xcui' cha' tso'o cua'ni ma̱ lo'o ngu' lacua, cha' taca tyanu lubii cresiya ji'i̱ ma̱; li' caca tyuju'u ti' nu ngu' cuiñi bi', ngu' nu nchcui' cuentyu ji'i̱ ma̱ xqui'ya cha' tso'o nu ndyu'ni ma̱ cuentya ji'i̱ Cristo.

1 PEDRO 4:16

Pana ná ntsu'u cha' ca tyuju'u ti' ma̱ si xcube' ngu' ji'i̱ ma̱ cha' laca ma̱ ñati̱ ji'i̱ Jesucristo; cua'ni tlyu ma̱ ji'i̱ ycui' Ndyosi cha' jua'a̱ ndyaca ji'i̱ ma̱ li'.

2 PEDRO 2:2

Lo'o jua'a̱ cua nscua cha' taquiya' tyu̱u̱ tya'a ngu' tya'a na ji'i̱ cha' nu nchcui' nu ngu' cuiñi bi'; lo'o ngu' tya'a na bi' cua'ni ngu' cha' suba' lo'o tya'a ngu' li', ñi'ya̱ nu culu'u ngu' cuiñi bi' ji'i̱ ngu' cha' cua'ni ngu'. Ná tso'o jua'a̱. Nu ngu' nu ná ngusñi cha' ji'i̱ ycui' Ndyosi tsiya' ti ni, quiña'a̱ tsa cha' cuxi chcui' ngu' bi' ji'na li'.