1 PEDRO 4:13 - Chatino Tataltepec

¹³ Nga'a̱ cha' caca tso'o tyiquee ma̱ lo'o tyi'u ti' ma̱ cha' ñi'ya̱ ngua lya' ti' ngu' ji'i̱ ycui' Cristo, jua'a̱ ca lya' ti' ngu' ji'i̱ cu'ma̱ juani. Tlyu tsa laca Cristo cuentya ji'i̱ ycui' Ndyosi, lye tsa quiji'i̱ xee ji'i̱ Ni lo'o ca̱a̱ ycui' Cristo chaca quiya' nde loo la; li' ca chaa la ti' ma̱, ca tso'o la tyiquee ma̱.

1 PEDRO 4:13 ပူးပေါင်းရင်းမြစ်များ

SAN MATEO 16:27

Chañi cha' chaca quiya' ca̱a̱ na' nu cua nda Ni 'na lijya̱ na' cha' caca na' ñati̱, stu'ba ti ca̱a̱ na' lo'o lcaa xca̱ ji'i̱ ycui' Ndyosi; ndubi tsa ña'a̱ loo na' lo'o xee ji'i̱ ycui' Ndyosi Sti na' li'. Lo'o li' ta na' xcaya' ngu', ni cña nu cua ngua'ni scaa ngu' lo'o ya̱a̱ ngu' chalyuu.

SAN MATEO 25:21

“Tso'o tsa cña nu ngua'ni nu'u̱”, nacui̱ xu'na msu bi' ji'i̱. “Sca msu tso'o laca nu'u̱, cha' tso'o tsa ndaquiya' nu'u̱ ji'i̱ cha' 'na. Sca cña sube ti nda na' jinu'u̱ tsubi', pana ta na' cña nu cua tlyu la jinu'u̱, cha' cua'ni nu'u̱ nde loo la. Stu'ba ti tyi'i̱ nu'u̱ slo na', cha' stu'ba ti ca tso'o tyiquee nu'u̱ lo'o na'”, nacui̱ xu'na bi' li'.

SAN MATEO 25:23

“Tso'o tsa cña nu ngua'ni nu'u̱”, nacui̱ xu'na msu bi' ji'i̱ yu. “Sca cña sube ti nda na' jinu'u̱ tsubi', pana ta na' chaca cña nu cua tlyu la jinu'u̱, cha' cua'ni nu'u̱ nde loo la. Stu'ba ti tyi'i̱ nu'u̱ slo na', cha' stu'ba ti ca tso'o tyiquee nu'u̱ lo'o na'”, nacui̱ xu'na yu li'.

SAN MATEO 25:31

’Nu lo'o tya̱a̱ na' nu cua nda Ni 'na lijya̱a̱ cha' caca na' ñati̱, ca̱a̱ na' cha' caca na' loo tsiya' ti ji'i̱ ñati̱. Stu'ba ti ca̱a̱ na' lo'o lcaa ngu' xca̱ 'na, lo'o li' tyaca'a̱ na' su tlyu su cua cua̱ la xi, sca se'i̱ su ndubi tsa ña'a̱ laca bi'. Ca bi' cua'ni cuayá' na' ji'i̱ lcaa ñati̱ li'.

SAN MATEO 25:34

Ca li' lo'o caca na' loo tsiya' ti, chcui' na' lo'o taju ñati̱ nu ndi'i̱ la'a tsu' cui̱ 'na: “Tya̱a̱ ma̱ ca su ntucua ycui' Ni nu laca loo, lcaa cu'ma̱ nu tso'o tsa nti' ycui' Ndyosi Sti na' ña'a̱ Ni ji'i̱ ma̱, cha' cua ngua'ni cho'o ycui' Ni su tyi'i̱ ma̱ slo Ni, tya lo'o ngüiñá Ni chalyuu.

SAN MATEO 5:12

Li' caca tso'o tyiquee ma̱, ca chaa ti' ma̱ cha' cua laca nguxco'o ycui' Ndyosi sca cha' tso'o nu tyacua ji'i̱ sa scaa ma̱ ca su ntucua ycui' Ni. La cui' jua'a̱ ngua lya' tsa ti' jyo'o cusu' sa'ni, nu lo'o na'a̱ ngu' ji'i̱ jyo'o cusu' nu ngua tu'ba ji'i̱ ycui' Ndyosi tyempo bi'.

SAN MARCOS 8:38

Caca tyuju'u ti' na' nu cua nda Ni 'na lijya̱a̱ cha' caca na' ñati̱, nu lo'o ña'a̱ na' ji'i̱ scaa ñati̱ chalyuu nu ntyuju'u ti' jna', masi tyuju'u ti' ngu' bi' ji'i̱ cha' tso'o nu nchcui' ti na'. Si xqui'ya na' tyuju'u ti' ngu' bi' slo ngu' cuxi chalyuu juani, masi slo ngu' suba' chalyuu juani, li' caca tyuju'u ti' na' ji'i̱ ngu' bi' nu lo'o ca̱a̱ na' chaca quiya' nde loo la cha' caca na' loo ji'i̱ ñati̱. Li' lye tsa ña'a̱ xee caca lo'o tya̱a̱ na' chaca quiya' chacuayá' ji'i̱ Sti na'. Ca̱a̱ na' lo'o xca̱ nu tacati tsa ji'i̱ ycui' Ni, cha' lubii tsiya' ti ngu' xca̱ bi' ―nacui̱ Jesús ji'i̱ ngu'.

SAN LUCAS 17:30

Jua'a̱ caca tsa̱ bi' lo'o tya̱a̱ na' nu lijya̱a̱ cha' caca na' ñati̱; lo'o ña'a̱ ngu' 'na chaca quiya', ná ca tii ngu' ni tsa̱ caca bi'.

LOS HECHOS 16:25

Nu lo'o ngua cla'be talya nga'a̱ Pablo lo'o Silas ne' chcua̱ bi'; nchcui' ngu' lo'o ycui' Ndyosi, ndyula tu'ba ngu' ji̱i̱ ji'i̱ ycui' Ni. Lo'o jua'a̱ ndyuna lcaa preso tya'a ntsu'u ngu' ne' chcua̱.

LOS HECHOS 5:41

Ndu'u ngu', chaa tsa ti' ngu' li', masi cua nchcube' ngu' nu laca loo bi' ji'i̱ ngu' xqui'ya cha' ngusñi ngu' cha' ji'i̱ Jesús.

ROMANOS 5:3

Masi juani tso'o ntsu'u tyiquee na laja lo'o ndi'i̱ na chalyuu; masi lya' tsa ti' ngu' ji'na, jlo ti' na cha' taca talo na lo'o nchcube' na jua'a̱.

ROMANOS 8:17

Nu lo'o cua laca na sñi' ycui' Ni, lo'o ji'na tyacua lcaa cha' tso'o nu ta Ni li', lcaa ña'a̱ cha' nu cua nda Ni ji'i̱ Cristo; pana si cua nti' na cha' stu'ba ti tyi'i̱ na lo'o Cristo ca su tlyu ca su ntucua Ni, li' ntsu'u cha' talo na lo'o ndyu'ni lya' ti' ngu' ji'na nde chalyuu ti, ñi'ya̱ ndalo ycui' Cristo lo'o ngua'ni lya' ti' ngu' ji'i̱ yu.

ROMANOS 8:18

Ntsu'u quiya' ndyiji xi cha' ti'í ji'na laja lo'o ndi'i̱ ti na nde chalyuu; pana xca ti cha' laca cha' bi', ná stu'ba laca cha' ti'í bi' lo'o cha' tso'o nu caja ji'na ca nde loo la, nti' na'. Lo'o jua'a̱ tya lyiji culu'u Ni lcaa cha' ji'na, ñi'ya̱ caca cha' tso'o bi' nde loo la.

2 CORINTIOS 1:5

Ñi'ya̱ lo'o ngua'ni lya' ti' ñati̱ ji'i̱ Cristo tya sa'ni la, jua'a̱ nda ngu' quiña'a̱ tsa cha' ti'í ji'na juani, nu lo'o nchcui' na cha' ji'i̱ Cristo; pana ña'a̱ ti nxtyucua tsa Cristo ji'na, la cui' hora lo'o nchcube' na.

2 CORINTIOS 1:7

Ndyi'u tsa ti' ya ji'i̱ cu'ma̱. Jlo ti' ya cha' ñi'ya̱ ndyu'ni lya' ti' ngu' ji'i̱ ya, jua'a̱ cua'ni lya' ti' ngu' ji'i̱ ma̱; pana ñi'ya̱ nxtyucua Ni ji'i̱ ya, jua'a̱ xtyucua Ni ji'i̱ cu'ma̱.

2 CORINTIOS 4:10

Macala su ndya'a̱ ya nde chalyuu, lu'ba ti nchca quicha ya, ntsu'u tsa cha' ti'í nu ndyu'ni ngu' lo'o ya, tsa ña'a̱ nu ngua ji'i̱ Cristo lo'o ya̱a̱ yu nde chalyuu, nu lo'o ndyujuii ngu' ji'i̱ yu. Pana li' ca jlo ti' xa' ñati̱ cha' ña'a̱ ti tya lu'ú ycui' Cristo, nu lo'o ña'a̱ ngu' bi' cha' ña'a̱ ti tya lu'ú ya.

2 CORINTIOS 4:17

Si'i na tlyu tsa cha' ti'í nu ndyacua ji'na chalyuu re juani, xti ti tyempo talo cha' ti'í bi'; pana tiya' la ni, tlyu tsa cha' tso'o nga'a̱ cha' tyacua ji'na ca slo ycui' Ndyosi, lo'o ná nga'a̱ cha' tye bi' tsiya' ti. Ná stu'ba cha' ti'í re lo'o cha' tso'o nu nga'a̱ cha' tyacua ji'na nde loo la.

FILIPENSES 3:10

Lo'o juani ni, tsa bi' ti cha' nti' na', cha' tyuloo lyiji na' ji'i̱ Cristo, cha' ca tii na' cha' tya ndyu'ni ycui' Ndyosi cña lo'o na' lo'o la cui' tya'a juersa nu cua ntsu'u ji'i̱ Ni lo'o ngua'ni Ni cha' ndyu'ú Jesús chaca quiya'. Ná ndu'ni cha' masi jua'a̱ chcube' na' ñi'ya̱ nu cua nchcube' ycui' Jesús, masi chcuna' chalyuu 'na tsiya' ti ñi'ya̱ lo'o cua ngujuii ycui' Cristo lo crusi.

COLOSENSES 1:24

Tso'o nti' na' masi cua ngujui xi cha' ti'í 'na cuentya ji'i̱ cu'ma̱; tso'o nti' na' cha' cuentya ji'i̱ ca ta'a taju ñati̱ nu ngusñi cha' ji'i̱ Cristo lcaa quichi̱, bi' cha' ndyacua cha' ti'í bi' 'na. Nchcube' tsa Cristo nde chalyuu xqui'ya na, cha' laca na ñati̱ ji'i̱ ycui' yu; jua'a̱ ndyacua cha' ti'í 'na, cha' cua lijya̱ caca stu'ba la cha' ji'na lo'o ycui' Cristo lo'o cha' ti'í nu ndyaca ji'na nde chalyuu cha' ngusñi na cha' ji'i̱ Cristo.

2 TIMOTEO 2:12

Si talo na lo'o xcube' ngu' ji'na xqui'ya cha' ji'i̱ Ni, li' caja su tyi'i̱ na lo'o ycui' Jesús ca su laca Ni loo ca bi'. Si ñacui̱ na cha' ná ntsu'u cha' ji'na lo'o Jesucristo, jua'a̱ ycui' Ni, ñacui̱ Ni cha' ná ntsu'u cha' ji'i̱ Ni lo'o na.

1 PEDRO 1:13

Bi' cha' culacua xi ti' ma̱, tii ti' ma̱ tyi'i̱ ma̱ chalyuu, cha' lcaa tsa̱ jatya ma̱ ji'i̱ cha' tso'o nu cua tlyu xi, nu cua'ni Ni lo'o ma̱ lo'o cua'ni lyaá lyiji Ni ji'i̱ ma̱; jua'a̱ caca nu lo'o tyu'u tucua Jesucristo chaca quiya'.

1 PEDRO 2:21

Tya lo'o ngusubi Ni ji'i̱ ma̱, tya li' jlo ti' Ni cha' jua'a̱ xcube' ngu' ji'i̱ ma̱, cha' la cui' jua'a̱ nguxcube' ngu' ji'i̱ ycui' Cristo tya clyo la cuentya ji'i̱ cu'ma̱. Jua'a̱ ngua cha' ngulu'u Cristo ji'i̱ ma̱ ñi'ya̱ caca talo tyiquee ma̱ lo'o xcube' ngu' ji'i̱ ma̱.

1 PEDRO 5:1

Sca ngu' cusu' nu laca loo laca na', lo'o juani nti' na' ta na' sca cui̱i̱ lo'o cu'ma̱ tya'a cusu' na. Lo'o na', cua na'a̱ na' ji'i̱ Cristo lo'o nguxcube' ngu' ji'i̱ yu, bi' cha' jlo ti' na' cha' stu'ba ti tyi'i̱ lcaa tya'a na ca slo ycui' Ndyosi; ña'a̱ na cha' tlyu nu caca li'.

1 PEDRO 5:10

Pana xti ti tsa̱ tyacua cha' ti'í ji'i̱ ma̱. Lo'o tye tsa̱ nu nchcube' ma̱, li' cua'ni ycui' Ndyosi cha' caca tso'o ma̱, cua'ni Ni cha' caca nguula ti' tyiquee ma̱ chaca quiya'; ta Ni juersa ji'i̱ ma̱, cha' xcui' tso'o tsa ndu'ni ycui' Ni lo'o na. Xqui'ya Cristo cua ngusubi Ni ji'na cha' taca tyi'i̱ na ca su tlyu su ntucua ycui' Ni.

JUDAS 1:24

Sca ti ycui' Ndyosi ntsu'u chalyuu. Taca cua'ni lyaá Ni ji'na xqui'ya Jesucristo nu Xu'na na; sca ti ycui' Ni nchca ji'i̱ Ni ña'a̱si̱i̱ Ni ji'na, laja lo'o ndya'a̱ na tyucui̱i̱ tso'o nu ngulu'u Ni ji'na. Xtyucua Ni ji'na cha' ná tyeje sna quiya' na, cha' ná tyu'utsu' na ji'i̱ tyucui̱i̱ bi', ña'a̱ cuayá' nu tyalaa na tso'o ti ca su ndubi tsa ña'a̱ xee, ca su ntucua ycui' Ndyosi. Lubii tsiya' ti caca cresiya ji'na lo'o cua ndyalaa na ca slo Ni, lo'o jua'a̱ caca chaa tsa ti' na li'. Bi' cha' juani cua'ni tlyu na ji'i̱ ycui' Ndyosi nu ntucua ca su tlyu nde cua̱, cha' sca ti ycui' Ndyosi ntsu'u nu tlyu tsa laca Ni; sca ti ycui' Ni laca Ni loo ji'i̱ lcaa lo na nu ntsu'u chalyuu, jua'a̱ sca ti ycui' Ni nchca ji'i̱ Ni cua'ni Ni lcaa lo cña tonu tsiya' ti. Lu'ú ycui' Ndyosi tya lo'o bilya tya' chalyuu, lo'o jua'a̱ lu'ú Ni juani; ná nga'a̱ cha' tye tyempo cha' lu'ú Ni ca nde loo la. Jua'a̱ laca cha' lacua.

APOCALIPSIS 1:7

Cui'ya ma̱ cuentya, cha' tya tya̱a̱ Jesucristo nde chalyuu chaca quiya' laja coo. Ña'a̱ lcaa ñati̱ ji'i̱ yu li'; jua'a̱ nu ñati̱ nu liye' tsa ti' ña'a̱ ji'i̱ yu nu ngua tsubi', jua'a̱ nu ñati̱ nu cua ndyojo' chcua̱ ji'i̱ yu, lo'o ngu' bi' ña'a̱ ngu' ji'i̱ yu chaca quiya' li'. Xi'ya ñati̱ tyucui ña'a̱ chalyuu cha' xñi'i̱ ti' ngu' lo'o tya̱a̱ Jesús chaca quiya', cha' cua jlo ti' ngu' cha' ntsu'u qui'ya ji'i̱ ngu'. Jua'a̱ caca cha' bi' lacua.

APOCALIPSIS 1:9

Juan laca na', tya'a ntsu'u cha' ji'na lo'o Jesús laca na'. Ñi'ya̱ nu ndyaca ji'i̱ cu'ma̱, la cui' jua'a̱ ndyaca jna', cha' stu'ba ti ndyiji cha' ti'í ji'na cuentya ji'i̱ Jesús; pana jlya ti' na cha' Cristo laca loo ji'na juani, bi' cha' ndalo na ji'i̱ cha' ti'í nu tyacua ji'na. Nde cha' nu ngua 'na lo'o ndi'i̱ na' loyuu su naa Patmos, sca yuu piti ti nu nscua cla'be hitya. Ca bi' ntsu'u na' ne' chcua̱, xqui'ya cha' ná ntsi̱i̱ na' nchcui' na' cha' ji'i̱ ycui' Ndyosi lo'o ñati̱; nchcui' na' lcaa cha' tso'o nu cua nda Jesús lo'o na.