1 PEDRO 2:10 - Chatino Tataltepec

¹⁰ Nu juani laca ma̱ ñati̱ ji'i̱ ycui' Ndyosi, masi nu ngua tya tsubi' la ná ntsu'u cha' ji'i̱ ma̱ lo'o ycui' Ndyosi tsiya' ti. Lo'o jua'a̱ cua nchca cuayá' ti' ma̱ juani cha' ndyu'ni tya'na tsa ti' Ni ji'i̱ ma̱, masi tya tsubi' la ná nchca cuayá' ti' ma̱ cha' ji'i̱ ycui' Ndyosi tsiya' ti.

1 PEDRO 2:10 ပူးပေါင်းရင်းမြစ်များ

ROMANOS 10:19

Chaca cha' xcuane na' ji'i̱ ma̱ li': ¿Ha ná nda ngu' judío cuentya ñi'ya̱ ndyu'u cha' bi' lacua? Sa'ni tsa nguscua jyo'o Moisés cha' ji'i̱ ngu' bi', ndi'ya̱ nchcui' quityi bi': Cua'ni na' cha' caca liye' ti' ma̱ ña'a̱ ma̱ ji'i̱ xa' ñati̱ nu si'i ñati̱ tso'o laca ngu' nti' ma̱, nacui̱ Ni. Nacui̱ ma̱ cha' ple tsa ngu'; ná nchca cuayá' ti' ngu', nti' ma̱. Ta na' cha' ñasi̱' ti' ji'i̱ ma̱, xqui'ya cha' cua ngusñi ñati̱ bi' cha' jna'; masi cu'ma̱ ni, ná nti' ma̱ cuna ma̱ cha' jna', nacui̱ Ni.

ROMANOS 11:30

Lo'o jua'a̱ cu'ma̱, ná ndaquiya' ma̱ cha' ji'i̱ ycui' Ndyosi cua sa'ni la; pana tya'na ti' Ni ña'a̱ Ni ji'i̱ ma̱ nu lo'o nga'aa jlya ti' ngu' judío ji'i̱ Ni.

1 CORINTIOS 7:25

Bilya ta ycui' nu Xu'na na cha' lo'o na' ñi'ya̱ cua'ni ñati̱ nu ntucua ycui' ti, si caja clyo'o ngu', si ná caja clyo'o ngu'; bi' cha' cuentya jna' ti, ta na' xi cha' lo'o ma̱. Taca xñi ma̱ cha' jna', xqui'ya cha' lo'o na' ngua'ni tya'na ti' Ni 'na; bi' cha' ndyu'ni na' cña ji'i̱ Ni.

1 TIMOTEO 1:13

Ngusubi Ni jna', masi suba' tsa nchcui' na' ji'i̱ Ni cua sa'ni la, tyempo lo'o nguxcube' na' ji'i̱ ñati̱ ji'i̱ Jesucristo; tyaala tsa na' nu ngua li'. Pana ná jlo ti' na' tyempo bi', cha' bilya xñi na' cha' tso'o ji'i̱ ycui' Ndyosi, bi' cha' ngua tya'na tsa ti' Ni jna'.

HEBREOS 4:16

Ná cutsi̱i̱ na tsiya' ti lacua, tyucui tyiquee na jña na sca cha' ji'i̱ ycui' Ndyosi ca su tlyu ca su laca Ni loo; chcui' na lo'o ycui' Ndyosi nu xcui' tso'o tsa ndu'ni lo'o ñati̱, cha' cui'ya Ni cha' clyu ti' ji'na, cha' xtyucua Ni ji'na, masi la cui' ca hora nu lyiji tsa cha' ji'na.