1 PEDRO 1:20 - Chatino Tataltepec

²⁰ Tya clyo lo'o bilya cuiñá Ni chalyuu, cua jlo ti' ycui' Ndyosi cha' ntsu'u cha' cua'ni Cristo cña tonu bi'; pana ngujuatya ycui' Ni ni jacua' nu tyalaa tyempo bi'. Li' ñaa Cristo, ngua'ni yu cña bi' cuentya ji'na, cha' tyacua cha' tso'o bi' ji'na.

1 PEDRO 1:20 ပူးပေါင်းရင်းမြစ်များ

SAN MATEO 25:34

Ca li' lo'o caca na' loo tsiya' ti, chcui' na' lo'o taju ñati̱ nu ndi'i̱ la'a tsu' cui̱ 'na: “Tya̱a̱ ma̱ ca su ntucua ycui' Ni nu laca loo, lcaa cu'ma̱ nu tso'o tsa nti' ycui' Ndyosi Sti na' ña'a̱ Ni ji'i̱ ma̱, cha' cua ngua'ni cho'o ycui' Ni su tyi'i̱ ma̱ slo Ni, tya lo'o ngüiñá Ni chalyuu.

LOS HECHOS 2:23

Cua sa'ni la cua jlo ti' ycui' Ndyosi, tya li' cua nchcui' Ni ñi'ya̱ nu caca ji'i̱ Jesús. Ndacha' lo Ni ji'i̱ ngu' cha' cujuii ñati̱ cuxi ji'i̱ ycui' Jesús. Jua'a̱ ngua li'; tsubi' ti ngusñi ma̱ ji'i̱ yu, ngujui'i̱ ca'a̱ ma̱ ji'i̱ yu lo crusi. Cua ndyujuii ma̱ ji'i̱ yu lo'o nda ma̱ cña ji'i̱ ñati̱ cuxi bi', cha' cua ngua'ni ngu' cña cuxi bi' cuentya ji'i̱ ma̱, ñi'ya̱ nu nacui̱ Ni cha' caca.

ROMANOS 3:25

Nda ycui' Ndyosi ji'i̱ Jesús ñaa chalyuu cha' tyaja'a̱ yu cajaa yu; masi ycui' yu chcube' yu cña loo lcaa ñati̱ chalyuu, cha' qui'ya ycui' yu yabe' nu ntsu'u ji'na. Caca cha' bi' ji'na si tyaja'a̱ na xñi na cha' ji'i̱ Jesús. Lo'o jua'a̱ nti' Ni culu'u Ni ji'na cha' xcui' cha' liñi ndu'ni Ni lo'o na, masi ná ngua'ni cuentya Ni ji'i̱ qui'ya nu ntsu'u ji'i̱ jyo'o cusu' ji'na; pana ndalo tsa tyiquee Ni ji'i̱ ngu' bi' li'.

ROMANOS 8:29

Masi tya lo'o nguxana chalyuu, tya li' jlo ti' ycui' Ni tilaca laca nu tyaja'a̱ xñi cha' ji'i̱ Ni nde loo la. Ngua ti' Ni cha' caca na ñi'ya̱ laca Jesús, Sñi' ycui' ca Ni, ngua ti' Ni cha' caca Jesús tya'a na; quiña'a̱ tsa tya'a sñi' ycui' Ni caca na li', pana loo la laca Jesús.

GÁLATAS 4:4

Pana lo'o cua ndyalaa tsa̱ nu ndu'u scua cha' nu ngüiñi ji'i̱ Ni lo'o na, li' cua nda ycui' Ndyosi ji'i̱ Sñi' ycui' ca Ni ñaa chalyuu; sñi' sca nu cuna'a̱ ngu' judío ngua nu Jesús bi', lo'o jua'a̱ ndaquiya' tsa yu ji'i̱ lcaa cha' cusu' nu jlya ti' ngu' judío.

EFESIOS 1:10

ngua ti' Ni cha' caca stu'ba lcaa lo na nu ntsu'u nde chalyuu, lo'o sca ti Cristo nu Xu'na na caca loo la li'. Lo'o tyalaa tyempo bi', li' xuti'i̱ Ni lcaa na nu ntsu'u loyuu chalyuu, lo'o jua'a̱ lcaa na nu ntsu'u nde cua̱; li' sca ti Cristo caca loo ji'i̱ lcaa na bi'.

EFESIOS 1:4

Lo'o tya lyiji tya' chalyuu, tya li' cua ngusubi ycui' Ndyosi ji'na cha' caca na ñati̱ ji'i̱ ycui' Ni, nu lo'o caca stu'ba cha' ji'na lo'o Cristo. Ngua ti' Ni cha' tyu'utsu' na ji'i̱ lcaa lo cha' cuxi, cha' jua'a̱ nga'aa nti' cha' sta Ni qui'ya ji'na tsiya' ti.

EFESIOS 3:11

Ngua'ni Ni cha' tlyu bi', nu lo'o nda Ni ji'i̱ Jesucristo nu Xu'na na ñaa chalyuu, ñi'ya̱ nu ngua ti' Ni cua'ni Ni tya lo'o bilya tya' chalyuu.

EFESIOS 3:9

Cua nchcui' Ni lo'o na' lacua. Ycui' Ndyosi nu ngüiñá Ni lcaa na nu ntsu'u chalyuu, nti' Ni cha' culu'u na' cha' bi' ji'i̱ lcaa ñati̱, cha' li' caca cuayá' ti' ngu' ñi'ya̱ laca cña nu nti' Ni cha' cua'ni ngu'. Nu ngua tya sa'ni la, bilya cuna ñati̱ cha' nu ngua ti' ycui' Ndyosi cua'ni Ni xqui'ya Cristo;

COLOSENSES 1:26

Tyucui tyempo nu ngua sa'ni la, ná ngujui ñi'ya̱ nu caca cuayá' ti' ngu' cha' bi'; cua ntsu'u yacu̱' ti cha'. Pana juani cua ngulu'u ycui' Ndyosi cha' bi' ji'i̱ lcaa ñati̱ nu ntsu'u cuentya ji'i̱ Ni.

1 TIMOTEO 3:16

Chañi cha' tlyu tsa cha' tso'o ji'i̱ Jesucristo nu ngusñi na. Ndi'ya̱ nchcui' cha' bi': Nu ngua sa'ni la ni, ni sca ñati̱ ná ngua cuayá' ti' ñi'ya̱ cua'ni lyaá ycui' Ndyosi ji'i̱ ngu'; pana nu juani jlo ti' na, xqui'ya cha' ngula Jesucristo chalyuu, cha' ngua ycui' Ni sca ñati̱. Lo'o jua'a̱ nchcui' Xtyi'i ycui' Ni cha' ji'i̱ yu, cha' sca ñati̱ nu lubii tsa laca yu; cua na'a̱ xca̱ ji'i̱ ycui' Ndyosi ji'i̱ Jesús, nu ñati̱ lubii bi'. Li' nclyu'u ngu' cha' ji'i̱ Jesucristo bi' ji'i̱ ñati̱ ca quiña'a̱ tsa quichi̱ tyucui ña'a̱ chalyuu; ngusñi ñati̱ lcaa quichi̱ cha' nu nchcui' ngu' ji'i̱ Ni li'. Cua ndyaa Jesús ca slo ycui' Ndyosi Sti na nde cua̱, lo'o juani tlyu tsa laca Jesús cajua.

HEBREOS 1:2

Pana nu juani lo'o cua tye ti chalyuu, cua nchcui' Ni lo'o na, xqui'ya cha' cua ñaa Jesús nde chalyuu ca su ndi'i̱ na, la cui' Jesús nu laca sca ti Sñi' ycui' Ni. Cua nguti'i̱ nu Jesús bi' lo'o ycui' Ndyosi Sti yu nu lo'o ngüiñá Ni chalyuu tya clyo; tya lo'o ngüiñá Ni lcaa lo na nu ntsu'u nde cua̱ lo'o lcaa lo na nu ntsu'u lo yuu chalyuu, cua laca ndu̱ Jesús lo'o ycui' Ndyosi Sti Jesús li'. Lo'o jua'a̱ cua nda Ni chacuayá' ji'i̱ cha' caca ycui' Jesús loo ji'i̱ lcaa na bi'.

HEBREOS 2:14

Nu na, ñati̱ chalyuu na ni, sca ti cuaña' na, sca ti tañi na lo'o ngu' cusu' ji'na, jua'a̱ lo'o ngu' tya'a na. Ca ta'a na nu cua ngusñi na cha' ji'i̱ Jesús laca na ñati̱ chalyuu; bi' cha' lo'o nu Jesús bi' ngua yu ñati̱, cha' li' ngua ji'i̱ yu ngujuii yu cuentya ji'na. Sca ti jua'a̱ ngujui ñi'ya̱ tyiji̱loo yu ji'i̱ nu xña'a̱ nu nclyo cña nde ca bilyaa, su nti' nu xña'a̱ bi' cha' tsaa cresiya ji'i̱ lcaa ñati̱.

HEBREOS 9:26

Si jua'a̱ ngua, ná tyiquee' cua tyu̱u̱ tsa quiya' cua ngujui'i̱ ca'a̱ ngu' ji'i̱ Cristo lo crusi tya lo'o ndya' chalyuu; pana si'i jua'a̱ ngua cha' bi', sca ti quiya' cua ya̱a̱ yu chalyuu nu ngua sa'ni xi lo'o cua tye ti chalyuu cusu', cha' cuityi̱ yu qui'ya nu ntsu'u ji'i̱ lcaa ñati̱ lo'o ngujuii yu lo crusi.

1 PEDRO 1:2

Tya clyo la cua jlo ti' ycui' Ndyosi Sti na lcaa ña'a̱ cha' nu caca nde loo la, bi' cha' ngusubi ycui' Ni ji'i̱ ma̱. Lo'o juani ndyu'ni Xtyi'i ycui' Ndyosi cña cha' tyanu lubii cresiya ji'i̱ ma̱, cha' taquiya' ma̱ ji'i̱ ycui' Jesucristo; na cua ngujuii yu lo crusi xqui'ya cu'ma̱, ndyalú tañi yu cha' caja ñi'ya̱ caca lubii cresiya ji'i̱ ma̱. Lo'o juani nti' na' cha' ña'a̱ ti tya cua'ni ycui' Ndyosi cha' tso'o lo'o ma̱, cha' jua'a̱ ti̱ ti tyi'i̱ tyiquee ma̱ lcaa hora.

1 JUAN 1:2

Ngula Jesucristo nde lo yuu chalyuu su ndi'i̱ ya, lo'o jua'a̱ cua na'a̱ ya ji'i̱ ycui' yu; bi' laca cha' nu ndacha' ya ji'i̱ ma̱ juani, cha' chañi tsa laca cha' bi'. Nclyu'u ya ji'i̱ ma̱ ñi'ya̱ laca cha' tyucui tyempo lu'ú Jesucristo, cha' ntucua yu ca slo ycui' Ndyosi Sti na clyo; jua'a̱ nclyu'u ya ñi'ya̱ ngua cha' na'a̱ ya ji'i̱ yu nde chalyuu re.

1 JUAN 3:5

Cua jlo ti' ma̱ cha' cua ya̱a̱ Jesucristo chalyuu cha' cuityi̱ Ni qui'ya nu ntsu'u ji'i̱ ñati̱; pana ycui' Cristo ni, ná ntsu'u qui'ya ji'i̱ yu tsiya' ti.

1 JUAN 3:8

Lcaa ñati̱ nu ndu'ni xcui' cha' cuxi, cua laca ngu' bi' sñi' ycui' nu xña'a̱ nu laca xu'na cuiñaja; tya lyiji tye cha' cua'ni nu xña'a̱ bi' cha' cuxi. Sca ti Jesús nu Sñi' ycui' Ndyosi, cua ya̱a̱ Ni chalyuu cha' cua'ni tye Ni ji'i̱ lcaa cña nu ndyu'ni nu xña'a̱ bi'.

APOCALIPSIS 13:8

lcaa ñati̱ tyucui ña'a̱ chalyuu cua'ni tlyu ngu' ji'i̱ na'ni bi' li', si ná nscua xtañi ngu' lo quityi ji'i̱ ycui' Ndyosi. Nu ngua tya clyo la lo'o tya lyiji cuiñá Ni chalyuu, tya li' nguscua Ni xtañi ñati̱ nu ná nga'a̱ cha' tye chalyuu ji'i̱. Cua ndyanu quityi bi' cuentya ji'i̱ nu ñi'ya̱ ña'a̱ xlya' nu cua ndyujuii ñati̱ ji'i̱ tsaca quiya'.