1 PEDRO 1:1 - Chatino Tataltepec

¹ Pedro laca na' nu nscua na' quityi re cha' ca̱a̱ slo lcaa cu'ma̱ nu ngusñi ma̱ cha' ji'i̱ Jesús, cu'ma̱ ngu' nu ndi'i̱ tyijyu'. Ntsu'u cu'ma̱ nu ndyalaa ma̱ nde loyuu su cuentya Ponto; xi xa' la tya'a cu'ma̱ ndyalaa ma̱ nde loyuu su cuentya Galacia, jua'a̱ loyuu su cuentya Capadocia, jua'a̱ loyuu su cuentya Asia, jua'a̱ loyuu su cuentya Bitinia cua lye tsa ngañi ma̱. Cña nu nda ycui' Jesucristo 'na, bi' laca cha' tsa'a na' chcui' na' cha' ji'i̱ Ni lo'o xa' la ñati̱.

1 PEDRO 1:1 ပူးပေါင်းရင်းမြစ်များ

SAN MATEO 10:2

Nde nscua na' xtañi ca ta'a tii tyucuaa tya'a ngu' nu ngusubi Jesús: nu clyo ngusubi yu ji'i̱ Simón, nu lo'o ndu'ni ngu' Pedro ji'i̱, lo'o Andrés tya'a ngula nu Simón bi'; li' ngusubi yu ji'i̱ Jacobo, lo'o Juan tya'a ngula Jacobo, nu laca sñi' Zebedeo;

SAN MATEO 24:22

Pana cua nacui̱ ycui' nu Xu'na na cha' xti ti tsa̱ caca tyempo nu chcube' ngu' jua'a̱; si tyiquee' talo tyempo cuxi bi', nga'aa clyaá ni tsaca ñati̱ chalyuu li'. Pana tya'na ti' ycui' Ndyosi ña'a̱ Ni ji'i̱ ñati̱ ji'i̱ Ni, bi' cha' cua'ni Ni cha' xti ti tsa̱ caca tyempo cuxi bi'.

SAN MATEO 4:18

Lo'o ngua sca tsa̱ ndya'a̱ Jesús to' tayu' Galilea bi'. Li' na'a̱ yu ji'i̱ Simón lo'o Andrés tya'a ngula Simón, nchcu̱ ngu' taraya lo hitya cha' xñi ngu' cualya, cha' bi' laca cña nu ndu'ni ngu' bi' lcaa tsa̱. Lo'o nu Simón bi' ni, Pedro ndu'ni ngu' ji'i̱.

SAN LUCAS 18:7

Pana tso'o tsa tyiquee ycui' Ndyosi, yala ti xtyucua Ni ji'i̱ ñati̱ nu cua ngusubi Ni ji'i̱, nu tya'na tsa nxi'ya ji'i̱ Ni tsa̱ lo'o talya. ¿Ha tiya' tsa xtyucua Ni ji'i̱ ngu' nti' ma̱?

SAN JUAN 11:52

masi cajaa Jesús cuentya ji'i̱ lcaa ñati̱ lcua ti ña'a̱ chalyuu, cha' stu'ba ti caca tyiquee lcaa ñati̱ nu jlya ti' ji'i̱ ycui' Ndyosi, ngu' nu cua ngusubi ycui' Ndyosi ji'i̱ cha' caca ngu' sñi' Ni.

SAN JUAN 7:35

―¿Macala tsaa yu jua, su ná taca quije yu ji'na? ―nacui̱ nu ngu' judío bi' ji'i̱ tya'a ngu'―. ¿Ha tsaa yu tyijyu' la ca su ndi'i̱ xa' la ngu' judío tya'a na? ¿Ha tsaa yu cha' culu'u yu cha' ji'i̱ ycui' Ndyosi ji'i̱ xa' ñati̱ nu ndi'i̱ ca bi'? ―nacui̱ ngu'―.

LOS HECHOS 18:2

Quichi̱ bi' ndyacua tya'a yu lo'o sca ngu' judío nu naa Aquila, ngu' quichi̱ Ponto laca nu Aquila bi'. Nguti'i̱ ngu' nde Italia nquicha', nu Aquila bi' lo'o clyo'o nu naa Priscila; pana ndu'utsu' ngu' ndyalaa ngu' nde quichi̱ Corinto, nu lo'o ngulo rey Claudio cña cha' culo'o ngu' ji'i̱ lcaa ngu' judío nu nguti'i̱ quichi̱ Roma, quichi̱ nu laca loo ji'i̱ loyuu su cuentya Italia bi'. Toni'i̱ ji'i̱ nu Aquila bi' ndyalaa Pablo li'.

LOS HECHOS 18:23

Ndyanu yu sca tucua co' ca quichi̱ bi', li' ndu'u yu ndyaa yu chaca quiya' cha' tsaa yu ca slo lcaa taju ñati̱ ji'i̱ Jesucristo nu ndi'i̱ ca loyuu su cuentya Galacia, su cuentya Frigia. Nchcui' yu lo'o ngu' cha' tyanu tachaa la cha' ji'i̱ Jesucristo tyiquee ngu'.

LOS HECHOS 19:10

Tucua yija̱ ngua'ni yu jua'a̱, ña'a̱ cuayá' nu ndyuna lcaa ngu' loyuu su cuentya Asia cha' ji'i̱ Jesús. Nchcui' yu lo'o lcaa ngu' bi', masi lo'o ngu' judío, masi lo'o xa' la ngu'.

LOS HECHOS 6:9

Pana ntsu'u ñati̱ nu lijya̱ ngutu'u nde xa' loyuu nu naa Cirene, lo'o ngu' quichi̱ Alejandría, lo'o ngu' Cilicia, lo'o ngu' Asia; ca ta'a ngu' ndya'a̱ ngu' ne' laa ji'i̱ ngu' libertades, su ndyu'u ti'i̱ ngu' nu ngua preso ji'i̱ ngu' tsubi' la. Li' nguxana ngu' bi' nxu̱u̱ tya'a tsa ngu' lo'o Esteban.

LOS HECHOS 8:4

Lo'o nu ngu' nu ndyaa xa' quichi̱ bi' ni, nda ngu' cha' ji'i̱ Cristo nu Xu'na na lo'o ngu' lcaa quichi̱ ca su ndyaa ngu'.

1 CORINTIOS 16:19

Lcaa quichi̱ ca loyuu su cuentya Asia su ntsu'u ñati̱ nu ndyu'u ti'i̱ cuentya ji'i̱ Jesús, nda ngu' xlyo ni'i̱ ji'i̱ ma̱. Lo'o jua'a̱ Aquila lo'o Priscila, cuati jua'a̱ lcaa ñati̱ nu ndyu'u ti'i̱ to' tyi ngu' bi', nda ngu' xlyo ni'i̱ ji'i̱ ma̱ cuentya ji'i̱ ycui' nu Xu'na na.

2 CORINTIOS 1:8

Cu'ma̱ tya'a ngusñi na cha' ji'i̱ Cristo, cua nti' ya cha' caca cuayá' ti' ma̱ ñi'ya̱ ngua lo'o ngujui cha' ti'í ji'i̱ ya ca quichi̱ su ndyaa ya ca loyuu su cuentya Asia, cha' tlyu tsa cha' cuxi nu ndyacua ji'i̱ ya nu ngua li'. Ná jlo ti' ya tsiya' ti ñi'ya̱ caca cha' tyiji̱loo ya ji'i̱ cha' cuxi bi' nquicha'; ngua ti' ya cha' nga'aa tyu'ú ya,

GÁLATAS 1:2

Lo'o na', lo'o lcaa tya'a ndi'i̱ na' ca nde nu ntsu'u cha' ji'i̱ ngu' lo'o Jesús, nscua ya quityi re cha' tsaa lcaa quichi̱ tyi cu'ma̱ ngu' gálatas, lcaa quichi̱ su ntsu'u cu'ma̱ taju ñati̱ ji'i̱ Jesucristo.

EFESIOS 2:12

Ñati̱ nu ndi'i̱ xa' chalyuu laca cu'ma̱, bi' cha' ná stu'ba cha' ji'i̱ ma̱ lo'o ngu' judío, nu ngu' nu cua ngusubi ycui' Ndyosi ji'i̱ nu ngua sa'ni, cha' caca ngu' bi' ñati̱ ji'i̱ Ni. Ni sca quiya' sa'ni la ná nda Ni cha' lo'o cu'ma̱ ngu' xa' tsu'; ná ntsu'u cha' tso'o nu caca ji'i̱ ma̱ nde loo la, cha' ná jlo ti' ma̱ ni sca cha' ji'i̱ ycui' Ndyosi tsiya' ti chalyuu bi' ca su ndi'i̱ ma̱. Ná ntsu'u cha' ji'i̱ cu'ma̱ lo'o Cristo tsiya' ti nu ngua tsubi'.

EFESIOS 2:19

bi' cha' juani nga'aa tyijyu' ycui' Ndyosi ji'i̱ cu'ma̱. Cuentya ji'i̱ ycui' Ndyosi ni, ná laca ma̱ ñi'ya̱ si laca ma̱ ngu' xta nu ndi'i̱ sca chalyuu tyijyu' nu si'i quichi̱ tyi ma̱; lcaa chacuayá' nu ntsu'u ji'i̱ ycui' Ni cua nda ycui' Ndyosi ji'i̱ ma̱ juani, cha' laca ma̱ ñati̱ ji'i̱ Ni. Stu'ba ntsu'u cha' ji'i̱ ma̱ lo'o lcaa ñati̱ nu ngusñi cha' ji'i̱ ycui' Ndyosi xa' quichi̱, bi' cha' laca ma̱ ñi'ya̱ nti' si stu'ba ti ndi'i̱ ma̱ lo'o ycui' Ndyosi.

2 TIMOTEO 1:15

Jlo ti' nu'u̱ cha' quiña'a̱ ñati̱ ji'i̱ Jesucristo cua nguxtyanu ngu' 'na; masi cua ña'a̱ ca ngu' nde loyuu su cuentya Asia, lo'o yu Figelo, lo'o yu Hermógenes, cua nguxtyanu ngu' bi' 'na.

HEBREOS 11:13

Ña'a̱ ti jlya ti' lcaa jyo'o bi' ji'i̱ ycui' Ndyosi lo'o ngujuii ngu', masi nga'aa na'a̱ ngu' lo'o ndyu'u tucua lcaa cha' nu nacui̱ Ni cha' caca; pana tso'o tsa ngua tyiquee ngu' bi', cha' nu jlo ti' ngu' cha' cua ngulala ti caca cha' bi', ñi'ya̱ si tsa lyiji ti na'a̱ ngu' ji'i̱. Jlo ti' ngu' cha' tyijyu' ngutu'u ycui' ca ngu' lijya̱ ngu', lo'o ná ntsu'u tyi ngu' lo yuu bi'.

SANTIAGO 1:1

Santiago laca na' nu nscua̱ quityi re cha' ca̱a̱ ca su ndi'i̱ cu'ma̱, ñati̱ ji'i̱ ycui' Ndyosi nu ndyaa ma̱ tyucui ña'a̱ chalyuu. Cña laca na' cuentya ji'i̱ ycui' Ndyosi, la cui' jua'a̱ laca na' cña ji'i̱ Jesucristo nu Xu'na na. Cua nti' na' chcui' na' xlyo ni'i̱ lo'o lcaa ma̱ lo'o tya'a ma̱.

1 PEDRO 2:11

Cu'ma̱ ngu' tya'a tso'o na, cua nscua cha' tyi'i̱ na ca slo ycui' Ni tyempo ca nde loo la, bi' cha' nga'a̱ cha' tyi'i̱ na chalyuu juani ñi'ya̱ si laca na ngu' tyijyu' nu ná ntsu'u tyi ngu'. Lye tsa chcui' na' lo'o ma̱ juani cha' nga'aa cua'ni ma̱ cua ña'a̱ ca cha' cuxi nu ndijña tyiquee ma̱ cha' cua'ni ma̱; nga'aa taquiya' ma̱ ji'i̱ cha' cuxi bi', cha' jua'a̱ nga'aa caca ji'i̱ nu cha' cuxi bi' cua'ni ñu'u̱ ji'i̱ ma̱.

2 PEDRO 1:1

Simón Pedro laca na'; ndyu'ni na' cña ji'i̱ Jesucristo, cha' cua ngusubi Ni 'na cha' tsa'a na' ta na' cha' tso'o ji'i̱ Cristo lo'o ngu' xa' quichi̱. Lo'o nu juani nscua na' quityi re cha' tsaa slo lcaa ñati̱ nu ngusñi cha' ji'i̱ ycui' Ndyosi ñi'ya̱ nu ngusñi na ji'i̱. Xcui' cha' liñi ndu'ni ycui' Ndyosi nu Xu'na na, la cui' Jesucristo nu ndyu'ni lyaá ji'na ji'i̱ nu cuxi laca bi'; bi' cha' stu'ba ti laca lcaa na cuentya ji'i̱ ycui' Ndyosi, tso'o tsa ndyaca ji'i̱ lcaa na cuentya ji'i̱ Ni.

APOCALIPSIS 1:11

Ndi'ya̱ nchcui' nu bi' lo'o na': ―Ñi'ya̱ nti' letra A, jua'a̱ nguxana lcaa cha' lo'o na'; ñi'ya̱ nti' letra Z, jua'a̱ tye lcaa cha' lo'o na' ―nacui̱ nu nchcui' bi'―. Scua clya nu'u̱ lcaa cha' nu cacha' na' jinu'u̱ juani; lcaa cha' nu ña'a̱ nu'u̱ juani, scua clya nu'u̱ ji'i̱ lo quityi. Li' ta nu'u̱ quityi re cha' tsaa slo nu cati tya'a taju ñati̱ nu ntsu'u cha' ji'i̱ lo'o Jesucristo ca quichi̱ tyi ngu', ca loyuu su cuentya Asia nu ñacui̱ na' re: quichi̱ Efeso, jua'a̱ quichi̱ Esmirna, jua'a̱ quichi̱ Pérgamo, jua'a̱ quichi̱ Tiatira, jua'a̱ quichi̱ Sardis, jua'a̱ quichi̱ Filadelfia, jua'a̱ quichi̱ Laodicea.