1 JUAN 3:23 - Chatino Tataltepec

²³ Nde laca cña nu cua nda ycui' Ndyosi cha' cua'ni sa scaa na: nga'a̱ cha' xñi tso'o na cha' ji'i̱ Jesucristo Sñi' ycui' Ni; la cui' jua'a̱ tso'o ti tyu'u tyiquee na ña'a̱ na ji'i̱ tya'a ñati̱ na, ñi'ya̱ nu cua nacui̱ ycui' Ni ji'na.

1 JUAN 3:23 ပူးပေါင်းရင်းမြစ်များ

SAN MATEO 22:39

Lo'o jua'a̱ ntsu'u chaca cha' tlyu: “Ntsu'u cha' cua'ni tya'na ti' ma̱ ji'i̱ tya'a ñati̱ ma̱, ñi'ya̱ laca si ndu'ni tya'na ti' ma̱ ji'i̱ ycui' ca ma̱”.

SAN MARCOS 9:7

Lo'o li' ndu'u tucua sca coo nguxi̱i̱ tyucui ña'a̱ hichu̱' ngu' su ndu̱ ngu', li' nguañi nchcui' ycui' Ndyosi lo'o ngu' laja coo bi': ―La cui' yu re laca nu sca ti Sñi' na' ―nacui̱ Ni―, tyaca'a tsa yu 'na. Cua'a̱ jyaca̱ ma̱ ji'i̱ yu re lo'o chcui' yu lo'o ma̱.

SAN JUAN 1:12

Pana ndi'i̱ xi ñati̱ nu cua ngusñi cha' ji'i̱ yu, jlya ti' ngu' bi' ji'i̱ yu li'; ji'i̱ ñati̱ bi' nda Ni chacuayá' cha' caca ngu' bi' sñi' ycui' Ndyosi.

SAN JUAN 13:34

Nde chcui' na' sca cña cucui lo'o ma̱ cha' cua'ni ma̱: Nga'a̱ cha' tso'o ti tyu'u tyiquee ma̱ ña'a̱ ma̱ ji'i̱ tya'a ñati̱ ma̱; ñi'ya̱ ntsu'u tsa tyiquee na' ña'a̱ na' ji'i̱ ma̱, la cui' jua'a̱ nga'a̱ cha' tyu'u tyiquee ma̱ ña'a̱ ma̱ ji'i̱ tya'a ñati̱ ma̱.

SAN JUAN 14:1

’Ná quiña'a̱ tsa cha' culacua ti' ma̱ cuentya 'na ―nacui̱ Jesús ji'i̱ ngu' li'―. Cua ngusñi ma̱ cha' ji'i̱ ycui' Ndyosi, jua'a̱ xñi tso'o ma̱ cha' jna' li'.

SAN JUAN 15:12

Nde laca cña nu ta na' ji'i̱ ma̱ ―nacui̱ Jesús―, cha' tso'o ti caca tyiquee ma̱ ña'a̱ ma̱ ji'i̱ tya'a ñati̱ ma̱, ñi'ya̱ ntsu'u tyiquee na' ña'a̱a̱ ji'i̱ ma̱.

SAN JUAN 17:3

Chalyuu nu ta na' ji'i̱ ngu' laca cha' tyuloo ngu' jinu'u̱, nu'u̱ nu laca sca ti ycui' Ndyosi nu ntucua nde cua̱; lo'o jua'a̱ tyuloo ngu' jna', cha' laca na' Jesucristo nu nda nu'u̱ lijya̱a̱.

SAN JUAN 2:23

Lo'o ndi'i̱ Jesús Jerusalén ta'a pascua bi', li' nxana quiña'a̱ ñati̱ jlya ti' ngu' cha' ji'i̱ ycui' yu, nu lo'o cua na'a̱ ngu' lcaa cha' tlyu nu ngua'ni yu.

SAN JUAN 3:18

’Ná xcube' ycui' Ndyosi ji'i̱ cua ña'a̱ ca ñati̱ nu xñi cha' jna'. Cua ngua'ni cuayá' Ni ji'i̱ lcaa ñati̱ nu ná nxñi cha' jna', cha' xcube' Ni ji'i̱ ngu', cha' ná ntaja'a̱ ngu' jlya ti' ngu' jna' cha' laca̱ nu sca ti Sñi' ycui' Ndyosi ―nacui̱ Jesús―.

SAN JUAN 6:29

―Ndi'ya̱ laca cña nu nti' ycui' Ndyosi cha' cua'ni ma̱ ―nacui̱ Jesús―. Xñi ma̱ cha' jna', cha' na' laca̱ Sñi' ycui' Ndyosi, cha' cua nda Ni 'na lijya̱a̱ chalyuu.

LOS HECHOS 16:31

―Xñi nu'u̱ cha' ji'i̱ ycui' Jesucristo nu Xu'na na ―nacui̱ Pablo ji'i̱ yu―, bi' nu taca ji'i̱ cua'ni lyaá ji'i̱ lcaa ma̱, lo'o jinu'u̱, lo'o ji'i̱ sñi' nu'u̱, lo'o ji'i̱ lcaa ngu' nu ndi'i̱ slo nu'u̱.

EFESIOS 5:2

Tso'o ti tyu'u tyiquee ma̱ ña'a̱ ma̱ ji'i̱ ñati̱, cha' la cui' jua'a̱ ntsu'u tsa tyiquee Cristo ña'a̱ Ni ji'na. Nu lo'o ñaa Jesús chalyuu ni, cua ntaja'a̱ Jesús nda yu tyucui ña'a̱ ycui' ca yu cha' caca sca msta̱ ji'i̱ ycui' Ndyosi cuentya ji'na. Tso'o tsa ngua ti' ycui' Ndyosi li'.

1 TESALONICENSES 4:9

Ná nga'a̱ cha' scua la na' lo quityi re cha' tso'o ti tyu'u tyiquee ma̱ ña'a̱ ma̱ ji'i̱ ñati̱ tya'a ngusñi ma̱ cha' ji'i̱ ycui' Ni; cua laca ntsu'u tsa tyiquee ma̱ ña'a̱ ma̱ ji'i̱ ngu' bi', xqui'ya cha' cua ngulu'u ycui' Ndyosi ji'i̱ ma̱ ñi'ya̱ nu cua'ni ma̱ lo'o tya'a ma̱.

1 TIMOTEO 1:15

Taca xñi tso'o ngu' cha' nu nchcui' ndi'ya̱: Cua ya̱a̱ Jesucristo nde chalyuu cha' cua'ni lyaá Ni ji'i̱ ñati̱ chalyuu nu ntsu'u qui'ya ji'i̱. Lo'o na', tlyu la xqui'ya na' que xa' la ñati̱, cha' cuxi tsa cña nu ngua'ni na' lo'o ñati̱ ji'i̱ Jesucristo nu ngua sa'ni la.

1 PEDRO 1:22

Xqui'ya cha' nxtyucua Xtyi'i ycui' Ndyosi ji'i̱ ma̱, na cua ndaquiya' ma̱ ji'i̱ cha' liñi nu nda ycui' Ndyosi lo'o na, bi' cha' ngua lubii cresiya ji'i̱ ma̱; juani taca caca tso'o tyiquee ma̱ ña'a̱ ma̱ ji'i̱ tya'a ñati̱ ma̱. Pana tyucui tyiquee ma̱ ntsu'u cha' caca tso'o tyiquee ma̱ ña'a̱ ma̱ ji'i̱ tya'a ñati̱ ma̱, si'i ñi'ya̱ ndu'ni ngu' nu ntsu'u tucua cha' tyiquee ngu' cua'ni cu'ma̱.

1 PEDRO 4:8

Nu cha' nu ndulo tsa cha' cua'ni ma̱ ni, bi' laca cha' xcui' tso'o caca tyiquee ma̱ ña'a̱ ma̱ ji'i̱ tya'a ñati̱ ma̱. Lo'o si jua'a̱ nti' na ña'a̱ na ji'i̱ tya'a na, ndyu'ni clyu ti' na ji'i̱ qui'ya nu ntsu'u ji'i̱ tya'a na li'.

1 JUAN 2:7

Cu'ma̱ tya'a ngusñi na cha' ji'i̱ Jesús, cua nscua cha' lo quityi re cha' tyaja'a̱ ma̱ tyu'u tso'o tyiquee ma̱ ña'a̱ ma̱ ji'i̱ tya'a ñati̱ ma̱. Si'i sca cha' nu bilya cuna ma̱ laca cha' bi'; cua ndyuna ma̱ cha' bi' tya lo'o ngusñi ma̱ cha' ji'i̱ Jesucristo tya clyo la, cha' la cui' ti cha' bi' laca nu cua nscua cua sa'ni.

1 JUAN 3:11

Nde nscua la cui' cha' nu cua ndyuna ma̱ lo'o ngusñi ma̱ cha' ji'i̱ Jesús tya clyo: nga'a̱ cha' tyu'u tyiquee na ña'a̱ na ji'i̱ tya'a ñati̱ na.

1 JUAN 4:15

Ñati̱ nu tyaja'a̱ cacha' ji'i̱ tya'a ñati̱ cha' nu sca ti Sñi' ycui' Ndyosi laca Jesucristo, stu'ba ntsu'u tyiquee ycui' Ni lo'o ngu' bi' li'; jua'a̱ stu'ba ntsu'u tyiquee ngu' bi' lo'o ycui' Ni.

1 JUAN 4:21

Cua ngulo Ni cña bi' ji'na ndi'ya̱: Tso'o ti tyu'u tyiquee ma̱ ña'a̱ ma̱ ji'i̱ ycui' Ndyosi, lo'o jua'a̱ xcui' tso'o ti tyu'u tyiquee ma̱ ña'a̱ ma̱ ji'i̱ tya'a ñati̱ ma̱.

1 JUAN 5:13

Cua nscua na' quityi re lacua, cha' ca̱a̱ ca slo ma̱, lcaa tya'a ngusñi ma̱ cha' ji'i̱ Jesús nu sca ti Sñi' ycui' Ndyosi; xqui'ya cha' re taca ca cuayá' ti' ma̱ cha' cua ngujui chalyuu cucui ji'i̱ ma̱, nu cua nda ycui' Ndyosi ji'na.