1 JUAN 3:17 - Chatino Tataltepec

¹⁷ Ntsu'u ngu' tya'a na nu nga'aa ntsu'u na nu lyiji ji'i̱ ngu' tsiya' ti cha' tyiji̱ yu'u ji'i̱ ngu' chalyuu. Si jua'a̱ tso'o ti ndi'i̱ na, lo'o li' ña'a̱ na ji'i̱ tya'a na nu ntsu'u na nu lyiji ji'i̱ ngu', pana ná ntaja'a̱ na cua'ni tya'na ti' na ji'i̱ tya'a na, li' ná taca ji'na ñacui̱ na cha' ntsu'u tyiquee na ña'a̱ na ji'i̱ ycui' Ndyosi, cha' nu ycui' Ndyosi ni, ntsu'u tsa tyiquee Ni ña'a̱ Ni ji'na.

1 JUAN 3:17 ပူးပေါင်းရင်းမြစ်များ

SAN LUCAS 3:11

Li' ngulu'u Juan ji'i̱ ngu': ―Nde laca cña nu cua'ni ma̱ ―nacui̱ Juan―. Si ntsu'u tucua tya'a camxa ji'i̱ sca ma̱, ta ma̱ tsaca ji'i̱ sca ñati̱ ti'i nu ná ntsu'u ji'i̱ tsiya' ti; si ntsu'u na cacu ma̱, li' sa'be ma̱ xi cha' ta ma̱ xi cacu ñati̱ nu ná ntsu'u tsiya' ti ji'i̱ ―nacui̱ Juan ji'i̱ ngu'.

2 CORINTIOS 8:9

Cua jlo ti' ma̱ ñi'ya̱ ndu'ni Jesucristo nu Xu'na na, cha' xcui' tso'o tsa ndu'ni Ni lo'o ñati̱. Lcaa na cua ntsu'u ji'i̱ Ni, pana cua ntaja'a̱ Ni ngua Ni sca ñati̱ ti, ñi'ya̱ nti' sca ñati̱ ti'i nu ná sca na ntsu'u ji'i̱ tsiya' ti. Xqui'ya cu'ma̱, bi' cha' ngua'ni Ni jua'a̱, cha' tiya' la li' taca caja lcaa na nu ntsu'u ji'i̱ ycui' Ni ji'i̱ ma̱.

HEBREOS 13:16

La cui' jua'a̱ ná ca taja ti' ma̱ cua'ni ma̱ lcaa cha' tso'o, jua'a̱ xtyucua ma̱ ji'i̱ tya'a ñati̱ ma̱; bi' laca cña nu ndiya ti' Ni cha' cua'ni na cuentya ji'i̱ ycui' Ni.

SANTIAGO 2:15

Ná tyiquee' ntsu'u ngu' tya'a ndyu'u ti'i̱ ma̱ nu lyiji tsa ste' ngu', nu lyiji tsa na cacu ngu', masi qui'yu, masi cuna'a̱.

SANTIAGO 2:16

Si chcui' ma̱ lo'o ngu' bi' ndi'ya̱: “Xtyucua Ni ji'i̱ ma̱”, ñacui̱ ma̱ ji'i̱ ngu', “cacu' ma̱ ste' ma̱ cha' caca chcatsu̱ ma̱, cacu tso'o ma̱ tyaja”, ñacui̱ ma̱ ji'i̱ ngu', pana ná nda ma̱ na nu lyiji ji'i̱ ngu' bi' li', ¿ha tso'o nti' ma̱ cha' nchcui' ma̱ lo'o ngu' jua'a̱? Ná tso'o chcui' ma̱ jua'a̱, cha' cua ngujlyaa ti' ma̱ cha' ji'i̱ ycui' Ndyosi si chcui' ma̱ jua'a̱;

1 JUAN 4:20

Ngu' nu ñacui̱ ndi'ya̱: “Ntsu'u tsa tyiquee na' ña'a̱ na' ji'i̱ ycui' Ndyosi”, lo'o li' ña'a̱ ti tya liye' ti' ngu' bi' ña'a̱ ngu' ji'i̱ tya'a ngu', cha' cuiñi ti laca nu nchcui' ngu' bi'. Ndi'ya̱ ndyu'u cha' bi': taca ña'a̱ na ji'i̱ tya'a ñati̱ na, pana ycui' Ndyosi ni, bilya ña'a̱ na ji'i̱ Ni tsiya' ti; bi' cha' lacua, si ná ntsu'u tyiquee na ña'a̱ na ji'i̱ tya'a ngusñi na cha' ji'i̱ Jesucristo, li' ná taca ñacui̱ na cha' ntsu'u tyiquee na ña'a̱ na ji'i̱ ycui' Ndyosi Sti na.

1 JUAN 5:1

Lcaa ñati̱ nu jlya ti' ji'i̱ Jesús, cha' laca yu Cristo nu cua nda ycui' Ndyosi ji'i̱ ya̱a̱ chalyuu, chañi cha' laca ngu' bi' sñi' ycui' Ndyosi. Ycui' Ndyosi laca Sti na, lo'o jua'a̱ ntsu'u tsa tyiquee na ña'a̱ na ji'i̱ Ni, bi' cha' ntsu'u tyiquee na ña'a̱ na ji'i̱ xa' la sñi' ycui' Ni, tya'a ngusñi na cha' ji'i̱ Jesús.