1 CORINTIOS 9:23 - Chatino Tataltepec

²³ Jua'a̱ ndu'ni na' lcua ti se'i̱ su ndya'a̱ na', cha' nchcui' na' lo'o ngu' cha' tso'o ji'i̱ Jesús. Cua nti' na' cha' ñi'ya̱ ndyaca tso'o ne' cresiya 'na xqui'ya cha' bi', la cui' jua'a̱ caca tso'o ne' cresiya ji'i̱ lcaa ñati̱.

1 CORINTIOS 9:23 ပူးပေါင်းရင်းမြစ်များ

SAN MARCOS 8:35

Chcuna' chalyuu ji'i̱ ngu' si xcui' nclyacua tsa ti' ngu' ñi'ya̱ caca ji'i̱ ycui' ti ngu'; pana quije chalyuu nu ná nga'a̱ cha' tye ji'i̱ ngu' si tyaja'a̱ ngu', masi cujuii ñati̱ ji'i̱ ngu' cuentya 'na, xqui'ya cha' nchcui' ngu' cha' tso'o jna' lo'o xa' ñati̱.

ROMANOS 11:17

Laca ngu' judío ñi'ya̱ si laca ngu' sca yaca cuiñii, sca yaca olivo ni. Na cua ngusi'yu ycui' Ndyosi ji'i̱ tyu̱u̱ tya'a sta̱' yaca bi', ngulotsu' Ni ji'i̱ sta̱' yaca bi' li'; pana juani la cui' ca su ngutucua sta̱' yaca bi' nquicha', ndacua ngusca̱' Ni tyu̱u̱ tya'a sta̱' yaca quixi̱', cha' xñi ca'a̱ sta̱ yaca quixi̱' bi' ji'i̱ yaca cuiñii bi'. Ñi'ya̱ laca sta̱' yaca quixi̱', jua'a̱ laca cu'ma̱ ngu' xa' tsu', cha' cua ngujui la cui' cha' tso'o ji'i̱ ma̱, ña'a̱ cha' tso'o nu ntsu'u ji'i̱ ngu' judío. Laca ma̱ ñi'ya̱ laca si sca ti su̱u̱ yaca laca ma̱ lo'o ngu' judío, si sca ti si'ye laca ma̱ lo'o ngu' bi'.

1 CORINTIOS 9:12

Xa' la tya'a ndyu'ni ya cña ndyiji na laca nu lyiji ji'i̱ ngu' nu lo'o nda ma̱ xi xcaya' ngu' bi'. ¿Ha ná tso'o si la cui' ti cha' caja ji'i̱ ya, ñi'ya̱ nu ndyiji ji'i̱ ngu' bi'? Tsa bi' ti cha', ná ndijña ya cha' tso'o bi' ji'i̱ ma̱ tsiya' ti. Ndalo tsa ya ji'i̱ cua ña'a̱ ca cha' ti'í nu ndyacua ji'i̱ ya, cha' ná nti' ya tsiya' ti tacu̱' ya ji'i̱ cha' tso'o ji'i̱ Cristo nu nchcui' ya lo'o ma̱, cha' ná cuna ñati̱ ji'i̱ cha' bi'.

1 CORINTIOS 9:22

Lo'o li', lo'o ndi'i̱ na' lo'o ngu' tya'a ngusñi na cha' ji'i̱ Jesús nu tya lyiji jlya tso'o ti' ngu' cha' ji'i̱ Jesús, ñi'ya̱ si stu'ba ti cha' laca 'na lo'o ngu', jua'a̱ ndi'i̱ na' lo'o ngu' li', cha' cuna la ngu' bi' cha' ji'i̱ Cristo. Lcua ti lo cña cua'ni na' cha' tyaja'a̱ la ñati̱ xñi ngu' cha' ji'i̱ Cristo.

1 CORINTIOS 9:24

Ndi'ya̱ laca cña nu nda Ni 'na, ñi'ya̱ ndyaca lo'o cua'ni ngu' sca posta lo'o nxna ngu'. Tyu̱u̱ tya'a ngu' xna ngu' stu'ba ti li', masi sca ti yu tyiji̱loo ji'i̱ ca ta'a ngu' su tye cha' bi'. La cui' jua'a̱ caca lo'o na, nga'a̱ cha' tsa cu' ti cua'ni na cña ña'a̱ cuayá' nu tye chalyuu ji'na.

2 CORINTIOS 2:4

Nu lo'o nguscua na' quityi bi', quiña'a̱ tsa ngulacua ti' na' li'; xñi'i̱ tsa ti' na' ngua li', hasta ndyunaa na' xqui'ya cu'ma̱. Pana si'i cha' ca xñi'i̱ ti' cu'ma̱ nguscua na' quityi bi'; ngua ti' na' cha' ca cuayá' ti' cu'ma̱ cha' ntsu'u tsa tyiquee na' ña'a̱ na' ji'i̱ cu'ma̱, bi' cha' nguscua na' quityi bi'.

GÁLATAS 2:5

Pana ná ndaquiya' ya ji'i̱ cha' nu nchcui' ngu' bi' tsiya' ti. Ngua ti' ya cha' ná chcuna' tsiya' ti ni sca cha' liñi nu cua nda Cristo lo'o na, nu lo'o cua ngua'ni lyaá yu ji'na; ngua ti' ya cha' tyanu tso'o lcaa cha' bi' ne' cresiya ji'i̱ ma̱.

2 TIMOTEO 2:10

bi' cha' talo tyiquee na' ji'i̱ ngu', masi nchcube' tsa ngu' jna'. Talo na' ji'i̱ cha' cuxi bi' cuentya ji'i̱ ca ta'a ñati̱ nu ngusubi ycui' Ndyosi ji'i̱, cha' lo'o ñati̱ bi' ngua'ni lyaá Jesucristo ji'i̱, cha' caja chalyuu nu ná nga'a̱ cha' tye ji'i̱ ñati̱ bi'. Caca tyi'i̱ ngu' bi' ca slo ycui' Ndyosi su tso'o tsa ña'a̱ lcaa cha'.

2 TIMOTEO 2:6

Chaca cha' ni, sca ñati̱ nu tlyu tsa cña ngua'ni lo xtya̱ ji'i̱ yu, clyo cacu ycui' yu na nu ndyu'u lo xtya̱ bi'.

HEBREOS 3:1

Cu'ma̱ tya'a ngusñi na cha' ji'i̱ Cristo, cu'ma̱ nu cua ngusubi ycui' Ndyosi ji'i̱ ma̱, culacua tso'o ti' ma̱ tilaca laca Jesucristo. Cua nda ycui' Ndyosi Sti yu ji'i̱ yu cha' ya̱a̱ yu nde chalyuu, lo'o nu juani laca yu ñi'ya̱ laca sti jo'ó nu laca loo la cuentya ji'na, cha' ngusñi na cha' ji'i̱ ycui'.

HEBREOS 3:14

Lcaa na lo'o tya'a na, tya ntsu'u cha' ji'na lo'o Cristo si ña'a̱ ti xñi na cha' ji'i̱ Ni ña'a̱ cuayá' nu tye chalyuu ji'na, la cui' ñi'ya̱ lo'o jlya ti' na ji'i̱ yu nu ngua tya clyo.

1 PEDRO 5:1

Sca ngu' cusu' nu laca loo laca na', lo'o juani nti' na' ta na' sca cui̱i̱ lo'o cu'ma̱ tya'a cusu' na. Lo'o na', cua na'a̱ na' ji'i̱ Cristo lo'o nguxcube' ngu' ji'i̱ yu, bi' cha' jlo ti' na' cha' stu'ba ti tyi'i̱ lcaa tya'a na ca slo ycui' Ndyosi; ña'a̱ na cha' tlyu nu caca li'.

1 JUAN 1:3

Juani culu'u ya ji'i̱ ma̱ cua ña'a̱ ca cha' nu cua na'a̱ ya, culu'u ya cua ña'a̱ ca cha' nu cua ndyuna ya. Chañi laca cha' stu'ba ntsu'u tyiquee na lo'o ycui' Ndyosi Sti na, jua'a̱ lo'o Jesucristo nu sca ti Sñi' ycui' Ni. Lo'o juani cua nti' ya cha' stu'ba ti caca tyiquee ma̱ lo'o ya;