1 CORINTIOS 9:20 - Chatino Tataltepec

²⁰ Nu lo'o nga'a̱ na' slo ngu' judío, li' ndyu'ni na' ñi'ya̱ nu ndu'ni lcaa ngu' judío, cha' xñi la ngu' judío cha' ji'i̱ Cristo. Nchcui' na' cha' ji'i̱ Jesús lo'o ngu' bi', bi' cha' ñi'ya̱ nu ndu'ni ngu' judío lo'o tya'a ngu', jua'a̱ ndu'ni na' slo ngu', masi nga'aa ntsu'u cha' taquiya' na' ji'i̱ cha' cusu' ji'i̱ ngu' bi', nu cña nu nguscua jyo'o Moisés lo quityi cha' cua'ni ngu' bi' tya sa'ni la. Pana laca cha' cua nti' na' cha' quiña'a̱ la ñati̱ bi' xñi ngu' cha' ji'i̱ Cristo.

1 CORINTIOS 9:20 ပူးပေါင်းရင်းမြစ်များ

LOS HECHOS 16:3

Ngua ti' Pablo cha' tsaa Timoteo lo'o ngu' li', bi' cha' ngusi'yu Pablo quiji̱ Timoteo cha' culacua̱ yu. Ná ca ñasi̱' ngu' judío lcaa quichi̱ su tya'a̱ yu lo'o ngu' li', masi jlo ti' lcaa ngu' cha' ngu' griego ngua sti yu.

LOS HECHOS 18:18

Tya ndyanu Pablo quichi̱ bi' tya tyu̱u̱ tsa̱; li' ngutu'u yu ndyaa yu lo'o Aquila lo'o Priscila bi', ndyaa ngu' ne' yaca ni'i̱ ca quichi̱ Cencrea. Li' tsaa ycui' Pablo ca loyuu su cuentya Siria. Ca quichi̱ Cencrea bi' ngusi'yu ngu' quicha̱' hique Pablo, cha' caca cuayá' ti' ngu' jua'a̱ cha' ntsu'u sca cha' nu cua ngüiñi ji'i̱ yu lo'o ycui' Ndyosi tya tsubi' la.

ROMANOS 11:14

Nti' tsa na' cha' lo'o xi ngu' judío tya'a na' jña ngu' ji'i̱ ycui' Ndyosi, cha' ta Ni la cui' ti cha' tso'o nu ntsu'u ji'i̱ ma̱ ji'i̱ ngu' judío bi', cha' caca cua'ni lyaá Ni ji'i̱ ngu' bi'.

ROMANOS 3:19

Cua jlo ti' na cha' cua nscua lcaa cha' cusu' bi', cha' cube ti' ngu' judío nu ntsu'u cha' ji'i̱ lo'o cha' bi'; jua'a̱ nguscua jyo'o cusu', cha' cua nti' ycui' Ndyosi cha' caca cuayá' ti' lcaa ñati̱ tyucui ña'a̱ chalyuu cha' ná caja ñi'ya̱ nu cua'ni lyaá ngu' ji'i̱ ycui' ca ngu' lo'o Ni, cha' nga'a̱ cha' cua'ni cuayá' Ni ji'i̱ ngu'.

GÁLATAS 2:19

Lo'o na' ni, ná nchca cua'ni na' lcaa cha' cusu' bi', bi' cha' cua ndye cha' jna' lo'o cha' bi'; juani xcui' ndi'i̱ na' chalyuu cha' cua'ni na' lcaa ña'a̱ cña nu nti' ycui' Ndyosi cha' cua'ni na'.

GÁLATAS 4:21

Cu'ma̱, cua nti' ma̱ taquiya' ma̱ ji'i̱ cha' cusu' bi' ti. Tso'o lacua. ¿Ha bilya cuna ma̱ cha' re, nu nchcui' cha' ji'i̱ Abraham?

GÁLATAS 4:5

Jua'a̱ ñaa Jesús nde chalyuu cha' cua'ni lyaá yu ji'na ji'i̱ yabe' nu ntsu'u ji'na xqui'ya cha' cusu' bi'. Lo'o jua'a̱ ta Ni chacuayá' juani cha' cua cusu' la na, cha' tyanu cha' ji'na ñi'ya̱ nu nscua cha' tyacua ji'na, xqui'ya cha' laca na sñi' ycui' Ni.

GÁLATAS 5:18

Lo'o taquiya' ma̱ ji'i̱ cha' nu nda Xtyi'i ycui' Ndyosi cha' tyanu ne' cresiya ji'i̱ ma̱, li' nga'aa si'i cha' cusu' nu nda ñati̱ ti nu caca loo ji'i̱ ma̱ li'.