Lo'o li' tya ngulu'u la Jesús xi ji'i̱ ngu': ―Lcaa chacuaya' ji'i̱ Sti na' ndyanu ya' na'. Ni sca ñati̱ ná jlo ti' ñi'ya̱ laca cha' nu ntsu'u ne' cresiya 'na nu laca̱ Sñi' ycui' Ni; sca ti ycui' Ndyosi Sti na' jlo ti' ñi'ya̱ laca cha' nu ntsu'u ne' cresiya 'na. Lo'o jua'a̱, ni sca ñati̱ ná jlo ti' ñi'ya̱ laca cha' nu ntsu'u ne' cresiya ji'i̱ Sti na'; sca ti na' nu laca̱ Sñi' ycui' Ni jlo ti' na', lo'o jua'a̱ culu'u na' cha' bi' ji'i̱ ñati̱ nu subi na' ji'i̱ cha' ca tsa'a̱ ngu' 'na.
1 CORINTIOS 8:6 - Chatino Tataltepec6 Pana nu ñati̱ tya'a ntsu'u cha' ji'na lo'o Jesús, sca ti ycui' Ndyosi Sti na jlya ti' na ji'i̱ tsiya' ti; la cui' ti jua'a̱ sca ti ycui' Jesucristo nu Xu'na na ngusñi na cha' ji'i̱. Ngüiñá Ni tyucui ña'a̱ chalyuu, xqui'ya Jesús ndya' lcaa lo na; cuentya ji'i̱ ycui' Jesús laca lcaa lo na nu ntsu'u chalyuu, lo'o jua'a̱ xqui'ya ycui' Jesús ndi'i̱ na chalyuu. အခန်းကိုကြည့်ပါ။ |
1 CORINTIOS 8:6
40 ပူးပေါင်းရင်းမြစ်များ
Li' nchcui' Jesús lo'o María: ―Ná cala' nu'u̱ jna' cha' tya lyiji tya'a na' nde cua̱ ca su ntucua Sti na' ―nacui̱―. Nu juani, yaa clya nu'u̱ su ndi'i̱ nu xa' la ñati̱ nu cua ngusñi cha' 'na, yaa cacha' nu'u̱ ji'i̱ ngu' bi', cha' cua tyacuí̱ ti na' tya'a na' ca su ntucua ycui' Ndyosi Sti na', nu laca Sti ma̱. Tya'a na' ca su ntucua ycui' Ndyosi nu Xu'na na', nu bi' nu laca ycui' Ndyosi nu Xu'na ma̱.
Nchca ji'i̱ Jesús bi' cuityi̱ yu cha' cuxi nu ntsu'u ji'i̱ ñati̱ chalyuu. Ycui' Jesús laca nu Xu'na na, bi' cha' la'a tsu' cui̱ ca su ntucua Ni nda ycui' Ndyosi su tyi'i̱ Jesús. Ngua'ni Ni jua'a̱ cha' caja ñi'ya caca tyuju'u ti' na nu laca na ngu' Israel ji'i̱ qui'ya nu ntsu'u ji'na, lo'o jua'a̱ cui'ya Ni cha' clyu ti' ji'na li'.
Nscua na' quityi re cha' ca̱a̱ slo cu'ma̱, ngu' taju ñati̱ ji'i̱ Jesucristo nu ndi'i̱ ma̱ nde quichi̱ Corinto. Xqui'ya Jesucristo cua ngusubi Ni ji'i̱ ma̱, lo'o juani laca ma̱ ñati̱ ji'i̱ ycui' Ni; nga'a̱ cha' tyi'u ti' ma̱ ji'i̱ Ni lcua ti lo cña nu ndu'ni ma̱ su ndi'i̱ ma̱ chalyuu. Stu'ba cha' ji'i̱ ma̱ lo'o cua ña'a̱ ca ñati̱ nu ndu'ni tlyu ji'i̱ Jesucristo nu Xu'na na tyucui ña'a̱ chalyuu, cha' ñi'ya̱ laca Ni Xu'na na, jua'a̱ laca Ni Xu'na ngu' bi'.
Ntsu'u chaca cha' nu nchcui' ñati̱: “Taca cacu na lcua ti lo na nu nti' na cacu na”, nacui̱ ngu', “bi' cha' ntsu'u quiji̱ ne' na cha' cua'ni cha'á̱ na bi' lo'o na cacu na”, nacui̱ ngu'. Chañi cha' bi', pana sca ti cuayá' cua'ni tye ycui' Ndyosi ji'i̱ na ndacu na lo'o jua'a̱ ji'i̱ cuaña' ycui' na. La cui' jua'a̱ cua ngüiñá ycui' Ndyosi ji'i̱ tyucui ña'a̱ na lijya̱ na chalyuu, pana si'i cha' culiji ti cuaña' na lo'o ndu'ni suba' na lo'o ñati̱, si'i xqui'ya cha' bi' ngüiñá Ni ji'na; cha' caca na ñati̱ ji'i̱ ycui' Ni, cha' caca Ni nu Xu'na na, bi' cha' cua nda ycui' Ndyosi ji'na lijya̱ na chalyuu.
Tso'o lacua. Ta na cha' lo'o tya'a na si tso'o cuentya ji'i̱ ycui' Ndyosi cha' cacu na msta̱ nu cua ngusta ngu' slo jo'ó tya clyo. Cua jlo ti' na ñi'ya̱ nu laca sca lcui̱ jo'ó, lcui̱ ti laca bi'. Ná tyaca̱' ña'a̱ na sca na nu lu'ú, ñi'ya̱ nu ña'a̱ lcui̱ jo'ó bi'. Sca ti ycui' Ndyosi Sti na ntsu'u chalyuu.
Lye tsa tya na xlya'be ji'i̱ ycui' Ndyosi Sti na, nu laca Sti Jesucristo nu Xu'na na. Cua ndyaca stu'ba cha' ji'na lo'o Cristo; bi' cha' lo'o ycui' Ndyosi, tso'o tsa nti' Ni ña'a̱ Ni ji'na. Lcaa lo cha' tso'o nu tyacua ji'na cha' ngusñi na cha' ji'i̱ Jesucristo, cua ngua'ni Ni cha' bi' lo'o na xqui'ya Cristo.
Cua lijya̱ ngañi la cha' tso'o ji'i̱ Jesús bi' tyucui ña'a̱ chalyuu, lo'o jua'a̱ lijya̱ ndyaca tso'o la cresiya ji'i̱ ñati̱ macala su nduna ngu' cha' bi'. La cui' jua'a̱ ndyaca tya lo'o ndyuna ma̱ cha' bi' tya clyo; tya li' cua ndyuna ma̱ cha' ndu'ni tsa ycui' Ndyosi cha' xlya'be lo'o ñati̱, li' ngua cuayá' ti' ma̱ cha' chañi tsa laca cha' bi'.
Xqui'ya Cristo, bi' cha' jlya ti' ma̱ ji'i̱ ycui' Ndyosi, cha' cua ngua'ni ycui' Ni cha' ndyu'ú Cristo chaca quiya' lo'o cua ngujuii yu. Lo'o li' nda ycui' Ndyosi sca su tso'o su tyi'i̱ Cristo, ca su tlyu su ntucua ycui' Ni. Ngua'ni Cristo cña tonu bi', cha' taca xñi ma̱ cha' ji'i̱ ycui' Ndyosi, lo'o li' taca tyu̱ ti' ma̱ cha' caca lcaa ña'a̱ cha' nu nacui̱ Ni cha' caca.
ကြော်ငြာတွေ