1 CORINTIOS 4:17 - Chatino Tataltepec

¹⁷ Juani nda na' ji'i̱ yu Timoteo lijya̱ yu ca su ndi'i̱ ma̱, cha' laca nu Timoteo bi' ñi'ya̱ laca sca sñi' na', cha' tyaca'a tsa yu 'na; jua'a̱ tso'o tsa ngusñi yu cha' ji'i̱ Jesucristo. Lcaa se'i̱ su ndya'a̱ na' slo taju ñati̱ ji'i̱ Jesús nu ndi'i̱ sca quichi̱, ca bi' nclyu'u na' ña'a̱ cha' tso'o nu nga'a̱ cha' cua'ni na chalyuu nu lo'o cua ngusñi na cha' ji'i̱ Jesucristo; jua'a̱ ndu'ni na' tyucui tyempo xqui'ya Jesucristo. Lo'o Timoteo cacha' yu ji'i̱ ma̱ cha' jua'a̱ ndu'ni na'.

1 CORINTIOS 4:17 ပူးပေါင်းရင်းမြစ်များ

SAN MATEO 24:45

’¿Ha ntsu'u ngu' cu'ma̱ nu tyucui tyiquee ma̱ ntaja'a̱ ma̱ cua'ni ma̱ cña 'na? Ndi'ya̱ cua'ni ma̱ lacua: Sca msu nu tso'o ni, ta xu'na yu cña ji'i̱ yu cha' caca yu loo ne' ni'i̱ ji'i̱ xu'na yu; culo xu'na yu cña ji'i̱ yu cha' xacu yu ji'i̱ lcaa ngu' nu ndi'i̱ ni'i̱ bi'.

SAN MATEO 25:21

“Tso'o tsa cña nu ngua'ni nu'u̱”, nacui̱ xu'na msu bi' ji'i̱. “Sca msu tso'o laca nu'u̱, cha' tso'o tsa ndaquiya' nu'u̱ ji'i̱ cha' 'na. Sca cña sube ti nda na' jinu'u̱ tsubi', pana ta na' cña nu cua tlyu la jinu'u̱, cha' cua'ni nu'u̱ nde loo la. Stu'ba ti tyi'i̱ nu'u̱ slo na', cha' stu'ba ti ca tso'o tyiquee nu'u̱ lo'o na'”, nacui̱ xu'na bi' li'.

SAN MATEO 25:23

“Tso'o tsa cña nu ngua'ni nu'u̱”, nacui̱ xu'na msu bi' ji'i̱ yu. “Sca cña sube ti nda na' jinu'u̱ tsubi', pana ta na' chaca cña nu cua tlyu la jinu'u̱, cha' cua'ni nu'u̱ nde loo la. Stu'ba ti tyi'i̱ nu'u̱ slo na', cha' stu'ba ti ca tso'o tyiquee nu'u̱ lo'o na'”, nacui̱ xu'na yu li'.

LOS HECHOS 16:1

Ndyalaa Pablo lo'o Silas ca quichi̱ Derbe, li' ndyalaa ngu' ca quichi̱ Listra. Quichi̱ bi' ndyacua tya'a ngu' lo'o sca yu cuañi' tya'a ngusñi ngu' cha' ji'i̱ Jesucristo nu naa Timoteo. Xtya'a̱ yu laca sca nu cuna'a̱ judío nu ntsu'u cha' ji'i̱ lo'o Jesucristo, pana ngu' griego ngua sti yu.

1 CORINTIOS 11:16

Si chcui' cuxi ngu' xqui'ya cha' ndyacu̱' hique ngu', tso'o si caca cuayá' ti' ngu' bi', cha' sca ti cuayá' ndu'ni ya ñi'ya̱ nu ndu'ni lcaa ñati̱ ji'i̱ Jesucristo lcua ti quichi̱ tyi ngu'.

1 CORINTIOS 11:2

Cu'ma̱ tya'a ngusñi na cha' ji'i̱ Cristo, tso'o tsa ntsu'u tyiquee na' ña'a̱a̱ ji'i̱ ma̱, cha' xcui' ndyi'u ti' ma̱ 'na, lo'o jua'a̱ ndu'ni ma̱ lcaa lo cha' nu ngulu'u na' ji'i̱ ma̱.

1 CORINTIOS 11:34

Si ntsu'u ma̱ nu ntyute' ma̱, jacu ma̱ tyaja to' tyi ti ma̱ clyo. Lo'o li' nga'aa cua'ni cuxi ma̱ lo'o tyu'u ti'i̱ ma̱, li' ná ntsu'u cha' caca tyaala Ni ji'i̱ ma̱. Lo'o ca̱a̱ na', taca quiñi nu xa' la cha' bi' ji'na lo'o cu'ma̱ li'.

1 CORINTIOS 14:33

Nti' Ni cha' tso'o ti cua'ni na lo'o tya'a na lo'o tyu'u ti'i̱ na, ná tso'o nti' Ni si lye tsa nguixa' nu ndu'ni na. Ndi'ya̱ ndu'ni ca ta'a ngu' tya'a ngusñi na cha' ji'i̱ Jesús scaa quichi̱, nu lo'o ndyu'u ti'i̱ ngu':

1 CORINTIOS 16:1

Cua nda na' cha' nu ndyaa slo ca ta'a ngu' nu ndyu'u ti'i̱ cha' cua'ni tlyu ngu' ji'i̱ ycui' Ndyosi ca lcaa quichi̱ ca loyuu su cuentya Galacia; cua nchcui' na' ñi'ya̱ cua'ni ngu' lo'o xti'i̱ ngu' msta̱. La cui' jua'a̱ cua'ni cu'ma̱ nu lo'o xti'i̱ ma̱ msta̱ bi', cha' xtyucua ma̱ ji'i̱ ngu' ti'i tya'a ngusñi na cha' ji'i̱ Jesús nu ndi'i̱ ca loyuu su cuentya Judea.

1 CORINTIOS 16:10

Si tyalaa Timoteo cajua, chcui' tso'o ma̱ lo'o yu, cha' ná ca xñi'i̱ ti' yu laja lo'o tyi'i̱ yu lo'o ma̱. Cuentya ji'i̱ ycui' nu Xu'na na ndya'a̱ yu, la cui' tya'a cña nu ndya'a̱ na'.

1 CORINTIOS 4:14

Lo'o nscua na' quityi re, ná nti' na' cha' ca tyuju'u ti' ma̱; tsa bi' ti cha' nti' na' cha' cua'a na' ji'i̱ ma̱ cha' ná cua'ni tyixi ma̱ lo'o ya. Na tyaca'a cu'ma̱ jna' ñi'ya̱ si laca ma̱ sñi' na'.

1 CORINTIOS 4:15

Ntsu'u tsa ngu' tya'a ntsu'u cha' ji'na lo'o Cristo nu taca xtyucua ngu' ji'i̱ ma̱, pana sca ti na' ndu'ni na' ñi'ya̱ nu ndu'ni sti ma̱, cha' ndye ndacha' na' cha' tso'o nu cua nda Jesucristo lo'o na ji'i̱ ma̱; xqui'ya na' ngusñi ma̱ cha' ji'i̱ Jesús.

1 CORINTIOS 4:2

Lo'o ñati̱ nu cui'ya loo sca cña ni, lcaa tsa̱ nga'a̱ cha' tyi'u ti' ngu' ji'i̱ lcaa cña nu culo xu'na ngu' ji'i̱ ngu'.

1 CORINTIOS 7:17

Nu lo'o tya lyiji cusubi ycui' Ndyosi ji'na, tya li' cua laca nda Ni ji'na ñi'ya̱ nu tyi'i̱ scaa na chalyuu. Ycui' Ndyosi laca nu nda chalyuu ji'na tya clyo, lo'o jua'a̱ ycui' Ni laca nu ngusubi ji'na cha' xñi na cha' ji'i̱ Ni juani. Tya la cui' chalyuu bi' laca nu ntsu'u ji'na juani, la cui' ña'a̱ chalyuu nu ngujui ji'na tya clyo; pana juani tyucui tyiquee na ndi'i̱ na chalyuu. La cui' ti cha' nchcui' na' lo'o ngu' lcua ti quichi̱ su ndi'i̱ ngu' nu ngusñi cha' ji'i̱ Cristo.

1 CORINTIOS 7:25

Bilya ta ycui' nu Xu'na na cha' lo'o na' ñi'ya̱ cua'ni ñati̱ nu ntucua ycui' ti, si caja clyo'o ngu', si ná caja clyo'o ngu'; bi' cha' cuentya jna' ti, ta na' xi cha' lo'o ma̱. Taca xñi ma̱ cha' jna', xqui'ya cha' lo'o na' ngua'ni tya'na ti' Ni 'na; bi' cha' ndyu'ni na' cña ji'i̱ Ni.

2 CORINTIOS 8:18

Lo'o yu ta ya chaca yu tya'a ntsu'u cha' ji'na lo'o Cristo, cha' ca̱a̱ lo'o Tito ji'i̱ yu ca slo ma̱. Cua laca ndyuloo ma̱ ji'i̱ yu bi', cha' tso'o tsa nchcui' ngu' ji'i̱ yu macala su ndyu'u ti'i̱ ngu' cuentya ji'i̱ Cristo, cha' tso'o tsa nda yu cha' ji'i̱ Cristo lo'o ngu'.

EFESIOS 6:21

Cua nda na' ji'i̱ yu Tíquico cha' ca̱a̱ slo ma̱. Tso'o tsa ntsu'u tyiquee ya cha' stu'ba tsa ndu'ni ya cña ji'i̱ ycui' nu Xu'na na lo'o yu. Cacha' lyiji yu ji'i̱ ma̱ lcaa cha' ñi'ya̱ nu ndyaca 'na ca nde, ñi'ya̱ cña nu ndyu'ni na'.

FILIPENSES 2:19

Chacuayá' ji'i̱ Jesús nu Xu'na na, ná tyiquee' ta na' ji'i̱ yu Timoteo cha' tsaa yu ca su ndi'i̱ ma̱ yala ti, cha' quije xi cha' 'na ñi'ya̱ nu ndi'i̱ ca ma̱; tso'o tsa caca tyiquee na' lo'o cuna na' cha' bi'.

FILIPENSES 2:22

Lo'o cu'ma̱, cua jlo ti' ma̱ cha' lubii tsa cña nu ndyu'ni yu Timoteo bi'. Stu'ba ti ndyu'ni yu cña lo'o na' ñi'ya̱ nti' si cua laca yu sñi' na', stu'ba ti ndya'a̱ ya nchcui' ya cha' tso'o ji'i̱ Jesús lo'o xa' ñati̱.

COLOSENSES 1:7

Cua ngujui cha' bi' ji'i̱ ma̱ lo'o ngulu'u yu Epafras ji'i̱ ma̱; tso'o tsa tya'a ndya'a̱ ya cña laca yu bi'. Jlo ti' ya cha' tso'o tsa nchcui' yu cha' ji'i̱ Cristo lo'o ngu' lcaa su ndya'a̱ yu cuentya ji'i̱ ya.

COLOSENSES 4:9

Stu'ba ti ca̱a̱ yu lo'o Onésimo tya'a quichi̱ tyi ma̱; na tyaca'a tsa nu Onésimo bi' ji'i̱ ya, xqui'ya cha' ná nchca taja ti' yu nchcui' yu cha' ji'i̱ nu Xu'na na. Tyucuaa ngu' bi', ta ngu' cha' lo'o ma̱ ñi'ya̱ nu ndyaca lcaa cha' ca su ndi'i̱ ya ca nde.

1 TIMOTEO 1:18

Culo na' cña jinu'u̱ juani, Timoteo, cha' ñi'ya̱ nti' na' ña'a̱ na' ji'i̱ sca sñi' na', jua'a̱ nti' na' ña'a̱ na' jinu'u̱: Tya cua'ni la nu'u̱ cña ji'i̱ ycui' Ndyosi ñi'ya̱ nu cua nacui̱ ngu' nu laca tu'ba ji'i̱ ycui' Ni cha' cua'ni nu'u̱; tyi'u ti' nu'u̱ cha' nu cua nchcui' ngu' bi' jinu'u̱ tya tsubi' la, cha' caca nguula la ti' tyiquee nu'u̱. Li' ñi'ya̱ caca ji'i̱ sca sendaru tso'o, jua'a̱ taca jinu'u̱ xu̱u̱ tya'a lo'o nu cuxi nu ntsu'u chalyuu;

1 TIMOTEO 1:2

Nscua na' quityi re cha' ca̱a̱ slo nu'u̱, Timoteo, cha' ñi'ya̱ si laca nu'u̱ sñi' na', jua'a̱ nti' na' ña'a̱ na' jinu'u̱, cha' ngusñi nu'u̱ cha' ji'i̱ Jesucristo tya lo'o ngulu'u na' cha' bi' jinu'u̱. Ndi'ya̱ nti' na', cha' ña'a̱ ti cua'ni ycui' Ndyosi Sti na cha' tso'o lo'o nu'u̱, cha' cua'ni tya'na ti' Ni jinu'u̱, cha' jua'a̱ cua'ni Ni cha' ti̱ ti tyi'i̱ cresiya jinu'u̱ xqui'ya Jesucristo nu Xu'na na.

2 TIMOTEO 1:2

Nscua na' quityi re cha' ca̱a̱ slo nu'u̱, Timoteo, cha' sñi' na' laca nu'u̱ nti' na', jua'a̱ ntsu'u tsa tyiquee na' ña'a̱ na' jinu'u̱. Ndi'ya̱ nti' na', cha' ña'a̱ ti cua'ni ycui' Ndyosi cha' tso'o lo'o nu'u̱, cha' cua'ni tya'na ti' Ni jinu'u̱, cha' jua'a̱ cua'ni Ni cha' ti̱ ti tyi'i̱ cresiya jinu'u̱ xqui'ya Jesucristo nu Xu'na na.

2 TIMOTEO 2:2

Cua ndyuna nu'u̱ lcaa cha' nu ngulu'u na' ji'i̱ tyu̱u̱ tya'a ñati̱; nu juani la cui' ñi'ya̱ nu ngulu'u na', jua'a̱ culu'u nu'u̱ ji'i̱ ñati̱ nu tyucui tyiquee nti' ngu' culu'u ngu' cha' bi' ji'i̱ xi xa' la ñati̱, cha' ca tsa'a̱ tso'o nu xa' la ngu' bi' cha' ji'i̱ ycui' Ndyosi.

2 TIMOTEO 3:10

Lo'o nu'u̱ ni, Timoteo, jlo ti' na' cha' ná ndu'ni nu'u̱ ñi'ya̱ nu ndu'ni nu ngu' cuxi bi'. Stu'ba ti nti' nu'u̱ lo'o na', bi' cha' ndu'ni nu'u̱ ñi'ya̱ nu ngulu'u na' jinu'u̱; ndyu'ni nu'u̱ cña ñi'ya̱ nu ndyu'ni na' cña, cha' jlya ti' nu'u̱ cha' ji'i̱ Jesús ñi'ya̱ jlya ti' na' ji'i̱. Cua na'a̱ nu'u̱ cha' ndalo tyiquee na' ji'i̱ ñati̱, cha' ntsu'u tyiquee na' ña'a̱ na' ji'i̱ ñati̱, cha' ndalo na',

TITO 1:5

Nguxtyanu na' jinu'u̱ ca loyuu Creta bi', cha' cua'ni lyiji nu'u̱ cña nu nga'a̱ cha' cua'ni nu'u̱, cha' subi nu'u̱ ji'i̱ ngu' cusu' nu caca loo ji'i̱ taju ñati̱ tya'a ngusñi na cha' ji'i̱ Jesús lcaa quichi̱ cajua; subi nu'u̱ ji'i̱ ngu' cusu' bi' ñi'ya̱ nu nacui̱ na' jinu'u̱ tya tsubi' la.

APOCALIPSIS 2:10

Ná cutsi̱i̱ ma̱ ji'i̱ cha' ti'í nu caca ji'i̱ ma̱ nde loo la, masi cua'ni nu xña'a̱ cha' tyu̱u̱ tya'a ma̱ tsaa ma̱ xi ne' chcua̱. Cua nti' yu cua'ni cuayá' yu ji'i̱ ma̱ si ña'a̱ ti tya nxñi ma̱ cha' jna'. Pana tii ti tsa̱ xcube' yu ji'i̱ ma̱, nacui̱ Ni. Ña'a̱ ti tyucui tyiquee ma̱ xñi ma̱ cha' ji'i̱ ycui' Ndyosi Sti na', masi cajaa ma̱, cha' ná nga'a̱ cha' tye chalyuu nu ta na' ji'i̱ ma̱ nde loo la li'.

APOCALIPSIS 2:13

Cua jlo ti' na' lcaa ña'a̱ nu ndu'ni ma̱, nacui̱ Ni. Jlo ti' na' cha' laca Satanás loo ca su ndi'i̱ cu'ma̱; pana masi jua'a̱ laca cha', tya tso'o tsa nxñi ma̱ cha' 'na, nacui̱ Ni. Bilya tya'a̱chu̱' ma̱ ji'i̱ cha' jna'; ña'a̱ ti jlya ti' ma̱ 'na, masi tyempo cuxi nu ngua li', nu lo'o ndyujuii ngu' ji'i̱ jyo'o Antipas. Ná ndyutsi̱i̱ yu bi', nchcui' yu cha' 'na ca quichi̱ tyi ma̱ su ntucua Satanás loo.