1 CORINTIOS 3:10 - Chatino Tataltepec

¹⁰ lo'o na', ñi'ya̱ nti' sca cuityi ni'i̱ cuentya ji'i̱ ycui' Ndyosi, jua'a̱ laca na' lo'o cu'ma̱, laja lo'o nclyu'u na' ji'i̱ ma̱ cha' ji'i̱ ycui' Ni. Ndi'ya̱ ndyu'ni na' lo'o ma̱: ñi'ya̱ nti' si cua ngusta tso'o na' quiya' sca ni'i̱, lo'o li' ndyalaa xa' la ngu' cuityi cha' cua'ni lyiji ngu' cha' tya' ni'i̱ bi', bi' laca ñati̱ nu tya'a ndya'a̱ na' cña nu cua ngulu'u tso'o la ji'i̱ ma̱. Lcaa ngu' cuityi nga'a̱ cha' culacua ti' clyo ñi'ya̱ ña'a̱ xana tya' ni'i̱; lo'o jua'a̱ lcaa ya tya'a ndyu'ni ya cña, nga'a̱ cha' cui'ya tso'o ya cuentya ñi'ya̱ nu caca culu'u tso'o la ya cha' bi' ji'i̱ ñati̱.

1 CORINTIOS 3:10 ပူးပေါင်းရင်းမြစ်များ

SAN MATEO 24:45

’¿Ha ntsu'u ngu' cu'ma̱ nu tyucui tyiquee ma̱ ntaja'a̱ ma̱ cua'ni ma̱ cña 'na? Ndi'ya̱ cua'ni ma̱ lacua: Sca msu nu tso'o ni, ta xu'na yu cña ji'i̱ yu cha' caca yu loo ne' ni'i̱ ji'i̱ xu'na yu; culo xu'na yu cña ji'i̱ yu cha' xacu yu ji'i̱ lcaa ngu' nu ndi'i̱ ni'i̱ bi'.

SAN MATEO 7:24

’Lcaa ñati̱ nu cuna tso'o cha' nu nchcui' na' re, lcaa ñati̱ nu taquiya' tso'o ji'i̱ cha' nu nchcui' na', laca ñati̱ bi' ñi'ya̱ laca sca ñati̱ nu ngulacua xi ti' nu lo'o tya lyiji cuiñá yu ni'i̱ ji'i̱. Lo'o li' ngüiñá yu bi' ni'i̱ ji'i̱ yu chu̱' sca quee cuaja'.

SAN LUCAS 11:35

Tii ti' ma̱ lacua; cui'ya ma̱ cuentya cha' chañi cha' ntsu'u xee ne' cresiya ji'i̱ ma̱, cha' si'i chalyuu cuxi ntsu'u tyiquee ma̱.

SAN LUCAS 21:8

―Cui'ya ma̱ cuentya ―nacui̱ Jesús li'―, cha' ná tucui cñilo'o ji'i̱ ma̱. Quiña'a̱ tsa ngu' ca̱a̱ ngu' nu ñacui̱ cha' Cristo laca ycui' ca ngu': “Juani ndyalaa tyempo bi'”, ñacui̱ ngu' bi'. Pana ná xñi ma̱ cha' ji'i̱ ngu' bi'.

LOS HECHOS 18:27

Ca tiya' la ngua ti' Apolos tsaa yu ca loyuu su cuentya Acaya. Tso'o ntsu'u tyiquee tya'a ñati̱ ji'i̱ Jesucristo cha' tsaa yu cajua, bi' cha' nguscua ngu' sca quityi cha' tsaa slo tya'a ñati̱ ji'i̱ Jesucristo cajua, cha' tso'o ti chcui' ngu' lo'o yu nu lo'o tyalaa yu ca su ndi'i̱ ngu'. Ndyaa yu li', ndyalaa yu ca loyuu su cuentya Acaya bi'. Li' nguxtyucua tsa yu ji'i̱ ngu' nu ntsu'u cha' ji'i̱ lo'o Jesucristo lcaa quichi̱ su ndyaa yu. Xqui'ya cha' tso'o tsa tyiquee ycui' Ndyosi ña'a̱ Ni ji'i̱ ngu', bi' cha' cua ngusñi ngu' cha' ji'i̱ Ni.

ROMANOS 1:5

Tso'o tsa ngua'ni ycui' Ndyosi lo'o na' xqui'ya Jesucristo. Cua ngulo Ni cña jna' cha' tsa'a na' tyucui ña'a̱ chalyuu mala su ndi'i̱ ñati̱; chacuayá' ji'i̱ ycui' Ni tsa'a na' chcui' na' cha' tso'o ji'i̱ ycui' Ndyosi lo'o ñati̱. Nti' Ni cha' caja ñati̱ ji'i̱ ycui' Ni lcua ti se'i̱, ñati̱ nu xñi cha' ji'i̱ ycui' Ni, ñati̱ nu taquiya' ji'i̱ cha' nu nchcui' Ni.

ROMANOS 12:3

Tlyu tsa cha' tso'o nu ngua'ni ycui' Ndyosi lo'o na', nu lo'o nda Ni cña jna'; bi' cha' nchcui' tsa na' lo'o ma̱ juani, cha' nga'aa cua'ni tyucuaa ti' ma̱ lo'o xa' ñati̱. Nga'a̱ cha' culacua ti' ma̱ cha' lcaa cña nu cua nchca ji'i̱ ma̱ juani, Cristo ngua'ni cha' caca ji'i̱ ma̱, nu lo'o ngusñi ma̱ cha' ji'i̱ Ni.

ROMANOS 15:15

Cua nscua na' quityi re cha' ca̱a̱ ca su ndi'i̱ ma̱; ná ntsi̱i̱ na' tsiya' ti cha' chcui' na' cha' bi' lo'o ma̱, cha' xñi tso'o la ma̱ cha' bi'. Ntsu'u chacuayá' cha' chcui' na' lo'o ma̱, cha' ycui' Ndyosi cua nda Ni cña bi' 'na, cha' tso'o tsa ndu'ni Ni lo'o na'.

ROMANOS 15:20

Lye tsa ndyu'ni cña ti' na', cha' tsa'a na' tsaana na' lcua ti quichi̱ su bilya cuna ngu' cha' ji'i̱ Cristo. Bi' ti quichi̱ ndyanu na' nclu'u na' cha' tso'o bi' ji'i̱ ngu', cha' ná nti' na' tyatí̱ yu'u na' lo'o cña nu ndyu'ni xa' tya'a ñati̱ ji'i̱ Cristo.

1 CORINTIOS 3:11

Jua'a̱ laca cha' lacua: cua laca ngusta ycui' Ndyosi ji'i̱ Jesucristo, cha' sca ti yu bi' caca su̱u̱ lcaa cha' bi', cha' ycui' Jesús laca nu ntucua quiya' cha' nu cua ngusñi na ji'i̱ ycui' Ndyosi Sti na; nga'aa ntsu'u xa' la jo'ó xa' la ñati̱ nu laca su̱u̱ cha' bi'.

1 CORINTIOS 9:2

masi nti' xa' ñati̱ cha' si'i cña ji'i̱ Ni laca na'; pana cu'ma̱ ngu' Corinto cua nslo ma̱ 'na, cha' cua nda na' cha' ji'i̱ Jesús lo'o ma̱ tya clyo. Chañi cha' bi'. Taca jlo ti' ngu' cha' jua'a̱ laca cña nu ndyu'ni na', lo'o ña'a̱ ngu' ñi'ya̱ ndyaca cha' bi' lo'o ma̱.

2 CORINTIOS 10:15

Ná ntsu'u cha' chcui' ya ji'i̱ cña nu ndyu'ni xa' ñati̱ cuentya ji'i̱ ycui' Ndyosi, chcui' ya ji'i̱ tsa bi' ti cña nu nda Ni chacuayá' cha' cua'ni ycui' ca ya ca slo ma̱. Na cua nti' ya cha' xñi tso'o la ma̱ cha' ji'i̱ ycui' Ndyosi nde loo la, cha' li' quiña'a̱ la cña taca cua'ni ya laja ngu' tya'a ma̱, ñi'ya̱ nu cua nda Ni chacuayá' cha' cua'ni ya.

EFESIOS 2:20

Lcaa cu'ma̱ nu ngusñi ma̱ cha' ji'i̱ Cristo, cua laca ma̱ tya'a na; sca ti Cristo laca nu ndulo tsa cha' ji'i̱ cuentya ji'na. Xqui'ya Cristo, bi' cha' cua ndyanu tso'o cha' ji'i̱ ma̱ lo'o ycui' Ndyosi; xqui'ya Cristo, bi' cha' cua ngujui cña nu cua'ni scaa ma̱, cha' caca ma̱ cña ji'i̱ Ni, cha' cua ngua stu'ba cha' ji'i̱ ma̱ lo'o Ni. Ñi'ya̱ nti' sca ni'i̱ nu tso'o tsa ndya', jua'a̱ nti' ma̱. Tachaa tsa ntsu'u quiya' ni'i̱ bi', cha' ntsu'u sca quee tlyu nu cui'ya ji'i̱, nu ta juersa ji'i̱ ni'i̱ bi'; chu̱' bi' lijya̱ ndya' ña'a̱ tsaca ni'i̱ li'. Nu ngu' nu ngua tsa'a̱ ji'i̱ Jesús tya clyo, lo'o jua'a̱ jyo'o cusu' nu ngua tu'ba ji'i̱ ycui' Ndyosi nchcui' Ni lo'o ñati̱ nu ngua sa'ni la, ngu' bi' laca nu ngusta su̱u̱ cha', cha' ngusñi ma̱ cha' ji'i̱ ycui' Ndyosi; pana sca ti Cristo laca nu ndulo la cha' ji'i̱ cuentya ji'i̱ ma̱.

COLOSENSES 1:29

Bi' cha' lye tsa ndyu'ni na' cña cuentya ji'i̱ cha' bi'; nguula tsa cña ndyu'ni na', lo'o jua'a̱ tlyu tsa juersa nda ycui' Cristo 'na cha' tyu'ú ne' cresiya 'na, cha' talo na' cua'ni na' cña bi'.

COLOSENSES 4:17

Ndi'ya̱ chcui' ma̱ lo'o yu Arquipo tya'a na: “Cua ngua'a̱ lo ycui' nu Xu'na na jinu'u̱ cha' cua'ni nu'u̱ cña bi' cuentya ji'i̱ ycui' Ni”, ñacui̱ ma̱ ji'i̱ yu, “bi' cha' juani cua'ni cña ti' nu'u̱ cha' caca tso'o cña bi'”.

1 TIMOTEO 4:16

Talo nu'u̱ ji'i̱ cña bi'. Cua'a nu'u̱ ji'i̱ ycui' ca cha' xcui' cha' tso'o ti cua'ni nu'u̱. Tso'o ti culu'u nu'u̱ ji'i̱ ngu' tya'a na, cha' jua'a̱ cuna tso'o ngu' cha' nu nclu'u nu'u̱ ji'i̱ ngu', cha' cua'ni lyaá ycui' Ndyosi ji'i̱ ngu' bi' li'. Lo'o jua'a̱ cua'ni lyaá Ni jinu'u̱ li'.

2 TIMOTEO 2:15

Lye tsa cua'ni nu'u̱ cña nu cua nda ycui' Ndyosi jinu'u̱, cha' ná ca tyuju'u ti' nu'u̱ xqui'ya cña nu ngua'ni nu'u̱ nu lo'o tsaa nu'u̱ tyi'i̱ ca slo Ni. Chañi tsa laca cha' ji'i̱ ycui' Ndyosi, bi' cha' tya culu'u la nu'u̱ cha' liñi bi' ji'i̱ ngu' lacua; tso'o ti caca tyiquee Ni ña'a̱ Ni jinu'u̱ li'.

SANTIAGO 3:1

Cu'ma̱ tya'a ngusñi na cha' ji'i̱ Cristo, ná tso'o si tyu̱u̱ tsa tya'a ma̱ culu'u ma̱ ji'i̱ tya'a ñati̱ ma̱; cuayá' xti ti na caca na mstru nu culu'u cha' ji'i̱ ycui' Ndyosi ji'i̱ ngu' tya'a na. Cua jlo ti' ma̱ cha' lye tsa ndi'i̱ loo ngu' ña'a̱ ngu' ji'na, bi' cha' yala tsa chcui' ngu' ji'na si xñi na cña cha' culu'u na ji'i̱ ngu' tya'a na.

1 PEDRO 4:11

Culu'u ma̱ cha' ji'i̱ ñati̱, si bi' laca cña nu cua nda Ni ji'i̱ ma̱ cha' cua'ni ma̱; culu'u ma̱ tsa ña'a̱ cha' nu nti' ycui' Ndyosi chcui' Ni lo'o ngu'. Lo'o jua'a̱ xtyucua ma̱ ji'i̱ tya'a ñati̱ ma̱ lo'o tyucui juersa nu nda ycui' Ndyosi ji'i̱ ma̱, si bi' laca cña nu cua nda Ni ji'i̱ ma̱ cha' cua'ni ma̱. Nu lo'o ña'a̱ ngu' cña tso'o nu ndyu'ni ma̱ bi', li' cua'ni tlyu ngu' ji'i̱ ycui' Ndyosi xqui'ya Jesucristo. Lo'o li' ná nga'a̱ cha' tye cha' cua'ni tlyu ngu' ji'i̱ Cristo bi', cha' laca Cristo loo tsiya' ti. Jua'a̱ caca cha' tu'ni.

2 PEDRO 3:15

Tyi'u ti' ma̱ cha' ndalo tsa tyiquee ycui' Ndyosi ña'a̱ Ni ji'na, cua nda tsa Ni tyempo ji'na cha' clyaá na ji'i̱ nu cuxi. Jua'a̱ Pablo tya'a na ni, la cui' tya'a cha' nguscua yu lo quityi; ñati̱ tya'a tso'o na laca yu bi', lo'o jua'a̱ tso'o tsa nchcui' quityi nu nguscua yu nu cua ndyalaa slo ma̱. Ycui' Ndyosi laca nu ngulu'u ji'i̱ yu lcaa ña'a̱ cha' tso'o nu nguscua yu lo quityi bi'.

APOCALIPSIS 21:14

Tii tyucuaa tya'a quee tonu ntsiya quiya' lo'o; jua'a̱ hichu̱' quee bi' cua nscua xtañi nu tii tyucuaa tya'a ngu' nu ngua'a̱loo nu ñi'ya̱ ña'a̱ xlya' bi' cña ji'i̱ ngu', nu cua'ni ngu' cuentya ji'i̱ ycui' Ni.

APOCALIPSIS 21:19

Cua ngalya' lcaa lo quee ndubi nu ntsu'u chalyuu chu̱' quee tonu nu ntsu'u quiya' lo'o ji'i̱ quichi̱: cua ngalya' quee nu ntucua clyo nu ntsu'u quiya' lo'o, lo'o quee jaspe; cuati ngalya' quee nu nchca tyucuaa nu ntsu'u quiya' lo'o, lo'o quee zafiro, sca quee azul ña'a̱; cuati ngalya' quee nu nchca tyuna nu ntsu'u quiya' lo'o, lo'o quee ágata; cuati ngalya' quee nu nchca jacua nu ntsu'u quiya' lo'o, lo'o quee esmeralda, sca quee nga'á ña'a̱;