1 CORINTIOS 2:4 - Chatino Tataltepec

⁴ Lo'o nda na' cha' bi' lo'o ma̱, ná ngulana na' quiña'a̱ tsa cha' nu tyu'u tu'ba na', ná ngua'ni na' ñi'ya̱ nu ndu'ni ñati̱ nu nchca tsa chcui'. Pana cua nda ycui' Ndyosi juersa jna'; cua nchcui' na' lo'o ma̱ lcaa cha' nu cua nda Xtyi'i ycui' Ndyosi lo'o na', cha' caca cuayá' tso'o ti' ma̱.

1 CORINTIOS 2:4 ပူးပေါင်းရင်းမြစ်များ

LOS HECHOS 20:27

Cua nda na' cha' lo'o ma̱, lcaa cha nu' ngua ti' ycui' Ndyosi cua'ni Ni lo'o ma̱; ni sca cha' ná ndyu'u cuaana ti tyiquee na'.

LOS HECHOS 26:28

―¿Ha yala ti nti' nu'u̱ cha' caca na' ñati̱ ji'i̱ Jesucristo? ―nacui̱ rey Agripa ji'i̱ Pablo li'.

ROMANOS 15:13

Bi' cha' juani nti' na' cha' cua'ni Ni cha' xñi tso'o la ma̱ cha' ji'i̱ ycui' Ni, cha' tso'o tsa caca tyiquee ma̱, cha' ti̱ ti taca tyi'i̱ tyiquee ma̱ li'. Nu lo'o tyanu Xtyi'i ycui' Ndyosi ne' cresiya ji'na, li' nga'aa caca taja ti' na lo'o ntajatya na ji'i̱ ycui' Ndyosi cha' ca̱a̱ Ni.

ROMANOS 15:19

Ngua'ni Ni cña tonu nu ná ca cua'ni ñati̱ chalyuu, cha' cube ti' xa' ñati̱ cha' ycui' Ndyosi laca nu ndyu'ni cña bi'. Jua'a̱ ngua cha' cua ndya'a̱ na' ndi'i̱ na' ca loyuu tyijyu' la. Nguxana na' nde quichi̱ Jerusalén, ña'a̱ cuayá' ndyalaa na' loyuu su cuentya Ilírico. Lcaa quichi̱ su ndya'a̱ na', quiña'a̱ tsa cha' tso'o ji'i̱ Cristo nda na' lo'o ngu' ña'a̱ cuayá' nu ngua 'na.

ROMANOS 16:18

cha' si'i cña ji'i̱ Cristo laca bi', si xa' la cha' nchcui' ngu' lo'o ma̱. Ndu'ni ngu' bi' lcaa cha' cuxi nu nclyacua ti' ycui' ngu' cha' cua'ni ngu'. Lo'o jua'a̱ ndyu'ni ngu' cha' quichi̱ yaa cha' hique ngu' ti'i, cha' tso'o tsa ndañi cha' nu nda ngu', cha' tajua' ti nchcui' ngu'.

1 CORINTIOS 1:17

Si'i cha' tyucuatya na' ji'i̱ ñati̱ nda ycui' Ndyosi cña 'na lijya̱a̱; cua ngulo Ni cña 'na cha' tsa'a̱ chcui̱' cha' tso'o nu ntsu'u ji'i̱ Jesús lo'o ñati̱. Si'i na lijya̱ na' lo'o quiña'a̱ tsa cha' nu culo hique ti na', ñi'ya̱ nchcui' ñati̱ chalyuu nu nchca tsa ji'i̱; si jua'a̱, ná ca cuaya' ti' ñati̱ ñi'ya̱ ngua cha' tlyu nu ngua'ni Cristo lo'o ngujuii yu lo crusi.

1 CORINTIOS 2:1

Cu'ma̱ tya'a ngusñi na cha' ji'i̱ Cristo, tyi'u ti' ma̱ ñi'ya̱ ngua'ni na' tya clyo, lo'o ndyalaa na' su ndi'i̱ ma̱ cha' chcui' na' lo'o ma̱ cha' tso'o nu cua nda ycui' Ndyosi lo'o na, cha' ji'i̱ Jesucristo bi'; ná quiña'a̱ tsa cha' tucui nchcui' na' lo'o cu'ma̱ li', si'i cha' nchca tsa na' nchcui' na' lo'o cu'ma̱ li'.

1 CORINTIOS 2:13

Nu lo'o cacha' na cha' tso'o nu ji'i̱ ycui' Ndyosi bi' ji'i̱ ñati̱ ji'i̱ ycui' Ni, nu ngu' nu ntsu'u Xtyi'i ycui' Ni ne' cresiya ji'i̱, li' clyana na sca cha' nu chcui' na, sca cha' nu ta Xtyi'i ycui' Ni lo'o na; ná clyana na quiña'a̱ tsa cha' chcui' na ñi'ya̱ nu ndu'ni ñati̱ nu nchca tsa ji'i̱ ycui' ca ngu'.

1 CORINTIOS 4:20

Ná taca tyatí̱ yu'u na cha' ji'i̱ ycui' Ndyosi cha' laca Ni loo ji'na si na nchcui' ti na cha' ji'i̱ Ni; na cua nti' Ni cha' cua'ni na cña ji'i̱ Ni, tsa ña'a̱ cña nu ndu'ni ycui' Ni.

2 CORINTIOS 6:6

Pana ndi'ya̱ ca cuayá' ti' ngu' cha' cña ji'i̱ ycui' Ndyosi laca nu ndya'a̱ ya lo'o: na cua ngua lubii cresiya ji'i̱ ya cuentya ji'i̱ ycui' Ni; liñi tsa nchca cuayá' ti' ya cha' ji'i̱ Ni; ndalo tsa tyiquee ya ña'a̱ ya ji'i̱ ngu', cha' ndyanu Xtyi'i ycui' Ndyosi ne' cresiya ji'i̱ ya, lo'o jua'a̱ chañi cha' ntsu'u tsa tyiquee ya ña'a̱ ya ji'i̱ tya'a ñati̱ ya;

GÁLATAS 1:10

Lo'o nacui̱ na' jua'a̱, si'i cha' ndyu'ni cña tsa ti' na' cha' caja ñati̱ 'na nu cua'ni chi̱ loo na'. Tsa bi' ti cha' tso'o nti' na', si ycui' Ndyosi cua'ni chi̱ Ni loo na'; si'i na cua nti' na' cha' tso'o ti chcui' ñati̱ jna'. Nga'aa caca cua'ni na' cña ji'i̱ Cristo, si xcui' cha' cua'ni tya'a na' lo'o ñati̱ ntsu'u tyiquee na'.

COLOSENSES 2:4

Cua nti' tsa na' cha' ná tucui cñilo'o ji'i̱ ma̱, masi nti' ma̱ cha' tso'o tsa nchcui' ngu' bi'; bi' cha' laca nchcui' na' lo'o cu'ma̱ jua'a̱.

1 TESALONICENSES 1:5

xqui'ya cha' ngusñi ma̱ cha' tso'o nu cua nchcui' ya lo'o ma̱, la cui' cha' tlyu nu nda Xtyi'i ycui' Ni cha' chcui' ya lo'o ma̱; Xtyi'i ycui' Ndyosi ngua'ni cña laja lo'o nchcui' ya lo'o ma̱, bi' cha' ngusñi ma̱ cha' bi'. Lo'o jua'a̱ jlo ti' ma̱ ñi'ya̱ ngua cña nu ngua'ni ya lo'o nguti'i̱ ya ca slo cu'ma̱.

1 PEDRO 1:12

Pana ná nquije cha' bi' ji'i̱ ngu' bi' li'; sca ti cha' nchcui' ycui' Ni lo'o ngu' bi', cha' si'i ycui' ngu' bi' laca nu ca cuayá' tso'o ti' ñi'ya̱ caca cha' bi' tyempo nde loo la. Pana cu'ma̱ ni, nu lijya̱ chalyuu nde loo la ji'i̱ ngu' jyo'o bi', nchca cuayá' ti' ma̱ juani, xqui'ya cha' cua ndyuna ma̱ lcaa cha' tlyu nu ngua'ni Jesucristo. Cua ndacha' liñi ya cha' bi' ji'i̱ ma̱; chacuayá' ji'i̱ Xtyi'i ycui' Ndyosi ngulu'u ya cha' bi' ji'i̱ ma̱, cha' cua nda ycui' Ndyosi Xtyi'i ycui' Ni lijya̱ lo ya nde chalyuu. Lo'o jua'a̱ lcaa xca̱ ji'i̱ ycui' Ni nu ndi'i̱ slo Ni, lcaa ngu' bi' nti' tsa ngu' ca cuayá' ti' ngu' lcaa cha' nu ngua ji'i̱ Cristo lo'o ñaa yu nde chalyuu.

2 PEDRO 1:16

Si'i cña cua̱ nu ngua'ya hique ti ya ngua cha' nu nchcui' ya lo'o ma̱, nu lo'o ndacha' ya ji'i̱ ma̱ cha' tlyu tsa cha' caca ji'i̱ ycui' Jesucristo nu Xu'na na nu lo'o ca̱a̱ yu chaca quiya'. Ycui' cuare cua na'a̱ ya ji'i̱ Jesús lo'o tlyu tsa cha' ntsu'u ji'i̱ yu;

2 PEDRO 2:18

Jlo tsa ti' nu ngu' cuiñi bi' ñi'ya̱ chcui' ngu' sca cha' tso'o, pana tucua lo cha' ntsu'u tyiquee ngu' bi'; na cñilo'o ngu' bi' ji'i̱ ngu' nu ngusñi ca ti cha' tso'o ji'i̱ Jesucristo, cha' lo'o ngu' cua'ni suba' ngu' chaca quiya' nti' nu ngu' cuiñi bi'. Ñi'ya̱ ngua'ni ngu' cha' cuxi tya tsubi' la, nu lo'o bilya cuna ngu' cha' tso'o ji'i̱ ycui' Ndyosi, jua'a̱ nti' ngu' cuiñi bi' cha' cua'ni ngu' chaca quiya'.