1 CORINTIOS 14:12 - Chatino Tataltepec

¹² Cua jlo ti' na' cha' nti' tsa ma̱ cha' caca cua'ni ma̱ cua ña'a̱ ca cña nu nda Xtyi'i ycui' Ndyosi ji'na; bi' cha' jña la ma̱ chacuayá' ji'i̱ ycui' Ndyosi cha' taca ji'i̱ ma̱ cua'ni ma̱ lcaa lo cña tso'o, cua ña'a̱ ca cña nu xtyucua ji'i̱ ngu' tya'a ngusñi ma̱ cha' ji'i̱ Jesús ca bi', cha' tyatí̱ la ti' tyiquee ngu'.

1 CORINTIOS 14:12 ပူးပေါင်းရင်းမြစ်များ

ROMANOS 14:19

Tso'o lacua. Lcaa tya'a na nga'a̱ cha' clyana na cua ña'a̱ ca cha' nu cua'ni cha' caca tyi'i̱ tso'o na lo'o tya'a ñati̱ na, ña'a̱ cha' nu cua'ni cha' xtyucua na ji'i̱ tya'a ñati̱ na, cha' tso'o ti tyi'i̱ na cuentya ji'i̱ Cristo;

1 CORINTIOS 12:31

Bi' cha' nga'a̱ cha' jña ma̱ chacuayá' ji'i̱ ycui' Ndyosi cha' caca cua'ni la ma̱ cña, cha' caca xtyucua ma̱ ji'i̱ xa' la ngu' tya'a ma̱. Lo'o jua'a̱ tya ntsu'u chaca cha' nu ndulo la ji'i̱ ma̱, nu bilya culu'u na' ji'i̱ ma̱; bi' laca cha' nu culu'u na' ji'i̱ ma̱ juani.

1 CORINTIOS 12:7

Ndu'ni Xtyi'i ycui' Ndyosi lo'o na cha' taca cua'ni lcaa na sca cña cuentya ji'i̱ ycui' Ni, ca ta'a na nu ntsu'u cha' ji'na lo'o Jesús; bi' laca sca lo cña nu xtyucua ji'i̱ ca ta'a na, lo'o jua'a̱ xqui'ya cha' bi' cua jlo ti' na cha' cua ntsu'u Xtyi'i ycui' Ndyosi ne' cresiya ji'na.

1 CORINTIOS 14:1

Cua'ni ma̱ cha' xcui' tso'o tyu'u tyiquee ma̱ ña'a̱ ma̱ ji'i̱ tya'a ñati̱ ma̱ lacua. Lo'o jua'a̱ jña ma̱ chacuayá' ji'i̱ ycui' Ndyosi cha' taca cua'ni ma̱ la cui' cña nu nda Xtyi'i ycui' Ni ji'na. Pana lo'o chaca cña ntsu'u nu ndulo tsa ji'i̱ ma̱, cha' ca tsa'a̱ ma̱ ta ma̱ cha' lo'o ñati̱, lcaa ña'a̱ cha' nu cua nti' ycui' Ndyosi cha' ta Ni lo'o ngu' bi'.

1 CORINTIOS 14:13

Tso'o lacua, si nchca chcui' na cha'cña ji'i̱ xa' la ñati̱, pana tso'o la si jña na chacuayá' ji'i̱ ycui' Ndyosi cha' caca cuayá' ti' na ni cha' nda na lo'o ngu'.

1 CORINTIOS 14:26

Cu'ma̱ tya'a ngusñi na cha' ji'i̱ Jesús, ndi'ya̱ cua'ni ma̱ nu lo'o tyu'u ti'i̱ ma̱ lo'o tya'a ma̱: Tyatu̱ tsaca ma̱ cha' cacha' ni ji̱i̱ caca nu cula tu'ba ma̱ cuentya ji'i̱ ycui' Ndyosi; cuati tyatu̱ chaca nu culu'u cha' ji'i̱ ycui' Ni ji'i̱ tya'a ma̱; lo'o li' chcui' tsaca ngu' sca cha' nu nti' Ni ta Ni lo'o ma̱; lo'o jua'a̱ taca ta ma̱ xi cha' lo'o cha'cña ji'i̱ xa' ñati̱, si lo'o nchca ji'i̱ ma̱ xtyacui ma̱ cha' bi', cha' caca cuayá' ti' lcaa ñati̱ nu nga'a̱ ca ndacua. Lcaa ña'a̱ nu cua'ni ma̱ ntsu'u cha' tyatí̱ la ti' tyiquee lcaa ñati̱ tya'a ndyu'u ti'i̱ ma̱.

1 CORINTIOS 14:5

Jua'a̱ na', tso'o nti' na' si lcaa cu'ma̱ caca chcui' ma̱ cha'cña ji'i̱ xa' ñati̱; pana cña nu ndulo la cha' ji'i̱ ma̱ laca si ta ma̱ cha' lo'o tya'a ma̱, la cui' cha' nu cua nti' ycui' Ndyosi chcui' Ni lo'o ma̱. Tso'o la si jua'a̱ taca ta ma̱ cha' lo'o tya'a ma̱; ná ntsu'u cha' chcui' ma̱ cha'cña ji'i̱ xa' ñati̱ li', sca ti ca si ntsu'u chaca ngu' nu taca ji'i̱ xtyacui cha' bi' cha' caca cuayá' ti' tya'a ndyu'u ti'i̱ ma̱. Li' tso'o la tyatí̱ ti' tyiquee ngu' tya'a ma̱.

TITO 2:14

Nu lo'o nda Jesús chacuayá' cha' ndyujuii ngu' ji'i̱, nda yu tyucui ña'a̱ ycui' ca yu cha' taca clyaá na ji'i̱ nu cuxi. Ngua'ni lubii Ni ji'i̱ cresiya ji'na li' cha' caca na ñati̱ ji'i̱ Ni, cha' tyaja'a̱ na cua'ni na xcui' cha' tso'o li'.