1 CORINTIOS 12:10 - Chatino Tataltepec

¹⁰ lo'o jua'a̱ ntsu'u ngu' nu nchca ji'i̱ ndu'ni xa' la cha' tlyu chacuayá' ji'i̱ ycui' Ndyosi, cña nu ná nchca cua'ni ñati̱ nquicha'; cuati ntsu'u xa' la ngu' nu nchca ji'i̱ ndacha' ji'i̱ ñati̱ sca cha' nu nda ycui' Ndyosi lo'o ngu' bi'; cuati jua'a̱ ntsu'u ngu' nu nchca tii ni cña ndu'ni sa scaa ngu', si cuentya ji'i̱ Xtyi'i ycui' Ndyosi ndu'ni ngu' cña, si si'i cuentya ji'i̱ ycui' Ndyosi ndu'ni ngu' cña; lo'o jua'a̱ ntsu'u ngu' nu nchca ji'i̱ nchcui' cha'cña ji'i̱ xa' la ñati̱; jua'a̱ tya ntsu'u xa' la ngu' nu nchca ji'i̱ xtyacui cha' bi', cha' caca cuayá' ti' lcaa ñati̱ ni cha' nda ngu' bi' li'.

1 CORINTIOS 12:10 ပူးပေါင်းရင်းမြစ်များ

SAN MARCOS 16:17

Ñati̱ nu xñi cha' 'na ni, cua'ni ngu' bi' cha' tonu chacuayá' jna', cha' cube tsa ti' xa' ñati̱: culo ngu' bi' ji'i̱ cui'i̱ cuxi nu ngusñi ji'i̱ ñati̱; caja ñi'ya̱ nu chcui' ngu' bi' cha'cña ji'i̱ xa' ñati̱ chacuayá' jna';

SAN MARCOS 16:20

Li' ndu'u ngu' nu ngua tsa'a̱ ji'i̱, ndyaa ngu' lcaa quichi̱ cha' chcui' ngu' cha' ji'i̱ Jesús lo'o xa' ñati̱. Nxtyucua tsa nu Xu'na na ji'i̱ nu ngu' nu ngua tsa'a̱ ji'i̱, hasta ngua cuayá' tso'o ti' ngu' lcaa quichi̱ su ndyaa ngu' bi', cha' chañi tsa cha' nu nchcui' ngu' cuentya ji'i̱ ycui' Ndyosi; ngua cuaya' ti' ngu' quichi̱ bi' lo'o na'a̱ ngu' cha' tonu nu ngua'ni ngu' bi' chacuayá' ji'i̱ ycui' Ndyosi. Tsa lo cua ti cha'.

SAN LUCAS 24:49

Lo'o jua'a̱ ta na' Xtyi'i ycui' na' ji'i̱ ma̱, cha' cua nchcui' Sti na' cha' ta Ni Xtyi'i ycui' Ni ji'i̱ ma̱; bi' cha' tyanu ma̱ nde Jerusalén re, ña'a̱ cuayá' nu caja juersa ji'i̱ Xtyi'i ycui' Ndyosi ji'i̱ ma̱. Tyu'u bi' nde cua̱ cha' ca̱a̱ tyanu ne' cresiya ji'i̱ ma̱.

SAN JUAN 14:12

Liñi tsa cha' nu ta na' lo'o ma̱ juani, cha' lcaa ñati̱ nu xñi cha' jna', taca cua'ni ngu' la cui' ña'a̱ cña tonu nu ndu'ni ycui' na'; lo'o jua'a̱ tlyu la cña caca cua'ni ngu' bi' li', cha' cua tya'a ti na' ca su ndi'i̱ ycui' Ndyosi Sti na' ―nacui̱ Jesús―.

SAN JUAN 16:13

Nu lo'o ca̱a̱ Xtyi'i ycui' Ndyosi nu tyu'u nde slo ycui' Ni, li' culu'u nu bi' lcaa cha' nu liñi ca ji'i̱ ma̱; li' chcui' liñi nu bi' lo'o ma̱ lcaa cha' nu cuentya 'na ―nacui̱―. Ná chcui' nu bi' chacuayá' ji'i̱ ycui' ca Ni; tsa ña'a̱ cha' nu cua ndyuna ti Ni ca slo ycui' Ndyosi, bi' ti cha' ta nu bi' lo'o ma̱ ―nacui̱ Jesús―. Lo'o jua'a̱ ta nu bi' cha' lo'o ma̱, lcaa cha' nu caca jna'.

LOS HECHOS 1:8

Juani xa' chcui' na' lo'o ma̱, cha' caja ñi'ya̱ cua'ni ma̱ nu lo'o tyanu Xtyi'i ycui' Ndyosi ne' cresiya ji'i̱ ma̱, cha' li' taca chcui' ma̱ cha' tso'o lo'o lcaa ñati̱, nu cha' ji'i̱ ycui' na'. Chcui' ma̱ lo'o ngu' nde quichi̱ Jerusalén, jua'a̱ lo'o ngu' loyuu su cuentya Judea, jua'a̱ lo'o ngu' loyuu cacua ti nu naa Samaria bi'; chcui' ma̱ lo'o ngu' lcaa quichi̱ su ndi'i̱ ngu' chalyuu.

LOS HECHOS 11:27

Tyempo bi' ndyalaa tucua sna la tya'a ñati̱ nu ngua tu'ba ji'i̱ ycui' Ndyosi. Ndu'u ngu' quichi̱ Jerusalén ndyalaa ngu' quichi̱ Antioquía li'.

LOS HECHOS 11:28

Agabo naa tsaca ngu' bi'. Cua nda Xtyi'i ycui' Ndyosi sca cui̱i̱ lo'o nu Agabo bi' cha' chcui' yu lo'o ngu'. Li' nchcui' Agabo lo'o ngu' cha' cua ca̱a̱ ti sca jbi'ña tlyu tsa tyucui ña'a̱ chalyuu. Chañi cha' jua'a̱ ngua cha' nu nda Agabo bi', pana nde loo la ngua cha' bi', nu lo'o ngua Claudio rey nu laca loo.

LOS HECHOS 19:6

Li' ngusta ya' Pablo hique ngu'. Ndyanu Xtyi'i ycui' Ndyosi ne' cresiya ji'i̱ ngu' li'; hora ti nchcui' ngu' cha'cña ji'i̱ xa' ñati̱, lo'o jua'a̱ nchcui' ngu' ña'a̱ cha' nu nda ycui' Ni ji'i̱ ngu' cha' chcui' ngu' lo'o tya'a ngu'.

LOS HECHOS 5:3

Nchcui' Pedro lo'o yu li': ―Ananías ―nacui̱―, ¿na laca ngua hi̱? ¿Ni cha' laca nda nu'u̱ chacuayá' ji'i̱ nu xña'a̱ nu naa Satanás cha' caca loo ne' cresiya jinu'u̱? Bi' laca nu ngua'ni cha' nguñilo'o nu'u̱ ji'i̱ Xtyi'i ycui' Ndyosi ―nacui̱ Pedro ji'i̱ yu bi'―. Nacui̱ nu'u̱ cha' nde laca lcaa cñi nu ngujui jinu'u̱ lo yuu bi', lo'o si'i lcaa cñi laca re.

ROMANOS 12:6

Xi xa' la cña nchca cua'ni sa scaa na, ña'a̱ cña nu nda Ni chacuayá' cha' cua'ni scaa na, cha' tso'o tsa ntsu'u tyiquee Ni ña'a̱ Ni ji'na. Nu lo'o ntsu'u ngu' tya'a ma̱ nu nchca ji'i̱ ngu' chcui' ngu' sca cha' nu nti' ycui' Ndyosi ta Ni lo'o ma̱, bi' cña cua'ni ngu' lacua. La cui' ñi'ya̱ nduna ngu' bi' cha' nu nda ycui' Ndyosi, ñi'ya̱ ngusñi ngu' cha' bi', la cui' jua'a̱ ta ngu' cha' bi' lo'o ma̱.

ROMANOS 15:19

Ngua'ni Ni cña tonu nu ná ca cua'ni ñati̱ chalyuu, cha' cube ti' xa' ñati̱ cha' ycui' Ndyosi laca nu ndyu'ni cña bi'. Jua'a̱ ngua cha' cua ndya'a̱ na' ndi'i̱ na' ca loyuu tyijyu' la. Nguxana na' nde quichi̱ Jerusalén, ña'a̱ cuayá' ndyalaa na' loyuu su cuentya Ilírico. Lcaa quichi̱ su ndya'a̱ na', quiña'a̱ tsa cha' tso'o ji'i̱ Cristo nda na' lo'o ngu' ña'a̱ cuayá' nu ngua 'na.

1 CORINTIOS 11:4

Bi' cha' ná tyucua smalyu scua' que ngu' qui'yu ne' laa su ndyu'u ti'i̱ ma̱; masi chcui' yu lo'o ycui' Ndyosi, masi cacha' yu sca cha' ji'i̱ Ni ji'i̱ ñati̱, ná tyucua smalyu hique yu. Loo laca Cristo ji'i̱ yu, bi' cha' ná cua'ni tyucuaa ti' yu ji'i̱ Ni ñi'ya̱ si tyucua smalyu hique yu.

1 CORINTIOS 13:8

Nde loo la ná ntsu'u cha' tye cha' ntsu'u tyiquee na ña'a̱ na ji'i̱ ñati̱. Nde loo la tyalaa tyempo nu lo'o nga'aa ndu'ni cha' tya chcui' la ycui' Ndyosi lo'o na nde chalyuu, nga'aa ndu'ni cha' chcui' la na cha'cña ji'i̱ xa' ñati̱, ni nga'aa ndu'ni cha' caca cuayá' ti' na lcaa cha' ji'i̱ ycui' Ndyosi ca lo'o caca tyempo bi'; pana ná tye chca cha' ntsu'u tyiquee na ña'a̱ na ji'i̱ ñati̱.

1 CORINTIOS 14:13

Tso'o lacua, si nchca chcui' na cha'cña ji'i̱ xa' la ñati̱, pana tso'o la si jña na chacuayá' ji'i̱ ycui' Ndyosi cha' caca cuayá' ti' na ni cha' nda na lo'o ngu'.

1 CORINTIOS 14:39

Jua'a̱ caca lacua, cu'ma̱ tya'a ngusñi na cha' ji'i̱ Jesús, jña ma̱ chacuayá' ji'i̱ ycui' Ndyosi cha' caca chcui' ma̱ lcaa cha' ji'i̱ Ni nu cua nti' Ni cha' ta Ni lo'o ñati̱. La cui' jua'a̱ tso'o laca si ná cua'a ma̱ ji'i̱ ñati̱ nu nchcui' cha'cña ji'i̱ xa' ñati̱.

GÁLATAS 3:5

Na cua nda ycui' Ndyosi Xtyi'i ycui' Ni cha' tyanu ne' cresiya ji'i̱ ma̱, lo'o xqui'ya nu bi' cua ngujui ñi'ya̱ caca tyu̱u̱ lo cha' tlyu nu ndyu'ni ycui' Ndyosi nde su ndi'i̱ cu'ma̱. Lo'o ndu'ni Ni jua'a̱, si'i xqui'ya cha' ndaquiya' ma̱ ji'i̱ cha' cusu' bi'; pana ndu'ni Ni jua'a̱, xqui'ya cha' jlya ti' ma̱ lo'o ndyuna ma̱ cha' tso'o ji'i̱ cña nu cua ngua'ni Jesús cuentya ji'na.

1 TESALONICENSES 5:20

Ná xtyí lo'o ma̱ ji'i̱ tya'a ma̱ lo'o chcui' ngu' sca cha' ji'i̱ ycui' Ndyosi lo'o ma̱;

HEBREOS 2:4

Lo'o jua'a̱ ngua'ni ycui' Ndyosi cña cha' ca cuayá' ti' na cha' chañi tsa laca cha' nu nchcui' ngu', ngua'ni Ni quiña'a̱ tsa cha' tlyu slo na cha' ña'a̱ na ji'i̱. Tyu̱u̱ tsa cha' nu ná nchca cua'ni ñati̱ chalyuu ngua'ni Ni, cha' cube tsa ti' na ji'i̱ ycui' Ni lo'o ña'a̱ na cha' tlyu bi'. Lo'o li' cua nda Ni Xtyi'i ycui' Ni cha' tyanu ne' cresiya ji'i̱ ñati̱ chalyuu, tsa ña'a̱ nu ntsu'u tyiquee ycui' Ni nda Ni ji'i̱ ngu'; bi' cha' nchca ji'na cua'ni na tyu̱u̱ lo cña cuentya ji'i̱ ycui' Ndyosi, nu ná nchca ji'i̱ ñati̱ cua'ni ycui' ca ngu'.

1 JUAN 4:1

Cu'ma̱ tya'a ngusñi na cha' ji'i̱ Cristo nu tyaca'a tsa ma̱ 'na, ná xñi ma̱ cha' ji'i̱ cua ña'a̱ ca ñati̱ nu ñacui̱ cha' cua nda ycui' Ndyosi Xtyi'i ycui' Ni ji'i̱ ngu' bi'. Cua'ni cuayá' ma̱ ji'i̱ ngu' bi' clyo, cha' quijeloo cha' ji'i̱ ma̱ lo'o ngu' si chañi cha' cua ndyanu Xtyi'i ycui' Ndyosi ne' cresiya ji'i̱ ngu' bi', si cha' cuiñi ti laca nu nchcui' ngu' bi'. Cua ndu'u tucua tyu̱u̱ tsa tya'a ngu' cuiñi chalyuu juani, nu nñilo'o ji'i̱ ñati̱ cha' cuentya ji'i̱ ycui' Ndyosi nchcui' ngu'.

APOCALIPSIS 2:2

Cua jlo ti' na' lcaa ña'a̱ nu ndu'ni ma̱, nacui̱ Jesús. Jlo ti' na' cha' ndalo tsa tyiquee ma̱, masi ndyiji tsa cha' ti'í ji'i̱ ma̱ cha' ndacu̱' ma̱ cha' ji'i̱ ngu' xña'a̱, nacui̱ Ni. Lo'o jua'a̱ jlo ti' na' cha' ná ndalo ma̱ tsiya' ti ji'i̱ ñati̱ cuxi. Cua ngua'ni cuayá' ma̱ ji'i̱ ñati̱ nu nacui̱ cha' cua nda na' ji'i̱ ycui' ngu' lijya̱ slo ma̱, masi ná nda na' ji'i̱ ngu' bi' lijya̱; cua nquijeloo cha' ji'i̱ ma̱ cha' cuiñi ngu' bi', nacui̱ Ni.