1 CORINTIOS 10:32 - Chatino Tataltepec

³² Ná ta ma̱ chacuayá' tyu'utsu' ni tsaca ngu' ji'i̱ tyucui̱i̱ liñi ji'i̱ Cristo; ni ngu' judío, ni ngu' xa' tsu' nu si'i ngu' judío laca, ni tsaca ñati̱ tya'a ngusñi ma̱ cha' ji'i̱ ycui' Ndyosi, ná tso'o tsiya' ti si tyú ngu' ya' nu xña'a̱.

1 CORINTIOS 10:32 ပူးပေါင်းရင်းမြစ်များ

LOS HECHOS 20:28

Nu juani ntsu'u cha' ña'a̱si̱i̱ ma̱ ji'i̱ ycui' ca ma̱, lo'o jua'a̱ ña'a̱si̱i̱ ma̱ ji'i̱ ca ta'a ñati̱ ji'i̱ Jesucristo ca quichi̱ tyi ma̱, cha' cua nda Xtyi'i ycui' Ndyosi cña ji'i̱ ma̱ cha' caca ma̱ loo ji'i̱ taju ñati̱ bi'. Tlyu tsa cña nu ngua'ni ycui' nu Xu'na na cha' ca ti̱ qui'ya nu ntsu'u ji'na tya lo'o ngujuii yu lo crusi, nu lo'o ndyalú tañi ycui' ca yu.

LOS HECHOS 24:16

bi' cha' nti' na' cua'ni na' xcui' cha' tso'o laja lo'o ndi'i̱ na' chalyuu, cha' ná caja ñi'ya̱ nu cutsi̱i̱ na' ca slo ycui' Ndyosi, lo'o jua'a̱ ná cutsi̱i̱ na' slo ñati̱ ti li'.

ROMANOS 14:13

Nga'aa chcui' cuxi ma̱ ji'i̱ cña nu ndyu'ni scaa ngu' tya'a ngusñi ma̱ cha' ji'i̱ Jesús lacua. Ndi'ya̱ cua'ni ma̱ juani: nga'aa ta ma̱ tyempo ji'i̱ ngu' tya'a ma̱ cha' cua'ni ngu' cha' cuxi xqui'ya cu'ma̱.

1 CORINTIOS 1:2

Nscua na' quityi re cha' ca̱a̱ slo cu'ma̱, ngu' taju ñati̱ ji'i̱ Jesucristo nu ndi'i̱ ma̱ nde quichi̱ Corinto. Xqui'ya Jesucristo cua ngusubi Ni ji'i̱ ma̱, lo'o juani laca ma̱ ñati̱ ji'i̱ ycui' Ni; nga'a̱ cha' tyi'u ti' ma̱ ji'i̱ Ni lcua ti lo cña nu ndu'ni ma̱ su ndi'i̱ ma̱ chalyuu. Stu'ba cha' ji'i̱ ma̱ lo'o cua ña'a̱ ca ñati̱ nu ndu'ni tlyu ji'i̱ Jesucristo nu Xu'na na tyucui ña'a̱ chalyuu, cha' ñi'ya̱ laca Ni Xu'na na, jua'a̱ laca Ni Xu'na ngu' bi'.

1 CORINTIOS 10:33

Lcaa su ndyu'ni na' cña ndube ti' na' ji'i̱ xa' ñati̱, si caca tso'o cresiya ji'i̱ ngu' lo'o cua'ni na' cña bi'. Si'i na tyacua cha' tso'o ji'i̱ ycui' ca na', nti' na' cha' caca tso'o cresiya ji'i̱ cua ña'a̱ ca ñati̱, cha' caja ñi'ya̱ clyaá ngu' ji'i̱ nu cuxi li'.

1 CORINTIOS 11:22

Taca cacu ma̱ co'o ma̱ to' tyi ma̱ si ntyute' tsa ma̱. Pana ñi'ya̱ nu ndu'ni ma̱ juani, na ndu'ni ñu'u̱ ma̱ ji'i̱ tya'a ndi'i̱ ma̱, tya'a ngusñi ma̱ cha' ji'i̱ ycui' Ndyosi, ña'a̱ cuayá' nda ma̱ cha' tyuju'u ti' ji'i̱ ngu' ti'i tya'a ngusñi ma̱ cha' ji'i̱ Jesús. Ná tyiquee' cua ngua cuayá' ti' ma̱ na laca nu nti' na' chcui̱' lo'o ma̱ juani, cha' nga'aa ntsu'u cha' tso'o nu caca chcui̱' lo'o ma̱ tsiya' ti cuentya ji'i̱ cha' bi'.

1 CORINTIOS 12:28

Tso'o tsa ngusubi ycui' Ndyosi ji'i̱ ñati̱ nu caca cña ji'i̱ laja lcaa tya'a ñati̱ nu cua ngusñi cha' ji'i̱ Cristo scaa quichi̱: clyo ngusubi Ni ji'i̱ ñati̱ nu ndya'a̱ xa' quichi̱ tyijyu' la cha' chcui' ngu' cha' ji'i̱ Jesús lo'o ngu' quichi̱ bi'; li' ngusubi Ni ji'i̱ ñati̱ nu ndacha' ji'i̱ tya'a ngu' sca cha' nu cua nda ycui' Ndyosi lo'o ngu'; lo'o jua'a̱ ntsu'u ñati̱ nu liñi tsa nclyu'u cha' ji'i̱ Jesús ji'i̱ tya'a ngu'; lo'o jua'a̱ ntsu'u ñati̱ nu ndu'ni cha' tlyu chacuayá' ji'i̱ ycui' Ndyosi, cña nu ná nchca cua'ni ñati̱ nquicha'; lo'o jua'a̱ ntsu'u ñati̱ nu nchca ji'i̱ cua'ni cha' tyaca tso'o nu quicha chacuayá' ji'i̱ Jesús; lo'o jua'a̱ ntsu'u ñati̱ nu nchca ji'i̱ xtyucua ji'i̱ tya'a ngu' lo'o cua ña'a̱ ca lo cña; lo'o jua'a̱ ntsu'u ñati̱ nu laca cña cuentya ji'i̱ tya'a ngu', ntsu'u ñati̱ nu nchca chcui' cha'cña ji'i̱ xa' la ñati̱. Laja ñati̱ ji'i̱ Ni, nsubi ycui' Ndyosi ji'i̱ ngu' nu caca lcaa lo cña bi'.

1 CORINTIOS 15:9

Ná tso'o na' tsiya' ti nti' na', masi ngusubi Ni 'na cha' sañi na' cha' ji'i̱ Jesús ca xa' quichi̱ tyijyu', cha' ntsu'u xa' la ngu' tya'a ya nu nchca la ji'i̱ ngu' cua'ni ngu' cña bi'. Ná stu'ba na' lo'o ngu' bi', cha' tya tsubi' la lya' tsa ti' na' ji'i̱ lcaa ñati̱ ji'i̱ Jesucristo.

1 CORINTIOS 7:17

Nu lo'o tya lyiji cusubi ycui' Ndyosi ji'na, tya li' cua laca nda Ni ji'na ñi'ya̱ nu tyi'i̱ scaa na chalyuu. Ycui' Ndyosi laca nu nda chalyuu ji'na tya clyo, lo'o jua'a̱ ycui' Ni laca nu ngusubi ji'na cha' xñi na cha' ji'i̱ Ni juani. Tya la cui' chalyuu bi' laca nu ntsu'u ji'na juani, la cui' ña'a̱ chalyuu nu ngujui ji'na tya clyo; pana juani tyucui tyiquee na ndi'i̱ na chalyuu. La cui' ti cha' nchcui' na' lo'o ngu' lcua ti quichi̱ su ndi'i̱ ngu' nu ngusñi cha' ji'i̱ Cristo.

1 CORINTIOS 8:13

Lo'o jua'a̱ na', tso'o la masi ná cacu na' cuaña' nu cua nscua slo jo'ó, cha' jua'a̱ ná cua'ni ngu' tya'a na' cha' cuxi xqui'ya na' li'. Ná nti' na' cha' tyu'utsu' ngu' tya'a na' ji'i̱ tyucui̱i̱ liñi.

2 CORINTIOS 1:1

Pablo laca na'. Se'i̱ ti ndi'i̱ na' ca nde lo'o Timoteo tya'a ngusñi na cha' ji'i̱ Cristo. Nscua ya quityi re cha' ca̱a̱ slo lcaa cu'ma̱ ca quichi̱ Corinto nu tsa tlyu ti ndyu'ni tlyu ma̱ ji'i̱ ycui' Ndyosi, lo'o jua'a̱ tyaa quityi re slo lcaa ñati̱ nu ntsu'u cha' ji'i̱ lo'o ycui' Ndyosi tyucui ña'a̱ loyuu su cuentya Acaya. Cua nda ycui' Ndyosi cña 'na cha' tsa'a na' chcui' na' lo'o ngu' xa' quichi̱ ca tyijyu' la, lcaa cha' nu ji'i̱ Jesucristo.

2 CORINTIOS 6:3

Ná nti' ya cha' xtyí lo'o ngu' ji'i̱ ya xqui'ya cña nu ndyu'ni ya, cha' lo'o ji'i̱ ycui' Ndyosi xtyí lo'o ngu' bi' li'; bi' cha' ná ta ya chacuayá' cha' tyu'u tucua sca cha' cuxi, nu xqui'ya bi' taca chcui' ngu' ji'i̱ ya.

GÁLATAS 1:13

Cua jlo ti' ma̱ ñi'ya̱ nu ngua'ni na' nde chalyuu tya sa'ni la, ñi'ya̱ ndaquiya' tsa na' ji'i̱ lcaa cña tacati nu ndu'ni ngu' judío tya'a ya. Cua jlo ti' ma̱ cha' ti'í tsa nguxcube' na' ji'i̱ lcaa ñati̱ nu ntsu'u cha' ji'i̱ lo'o Jesucristo nu ngua li'; ngua ti' na' cua'ni tye na' ji'i̱ ñati̱ bi' tsiya' ti.

FILIPENSES 1:10

ndijña na' cha' lcaa tyempo taca ca'ya cha' hique ma̱ ñi'ya̱ nu tso'o la cha' cua'ni ma̱. Jua'a̱ nga'aa tyaja'a̱ ma̱ cua'ni la ma̱ cha' cuxi, nga'aa tyanu yabe' hichu̱' ma̱ nu lo'o tyalaa tsa̱ cha' ca̱a̱ Cristo chaca quiya'.

FILIPENSES 3:6

cha' jlya tsa ti' na' ji'i̱ nu cha' cusu' bi', bi' cha' nguxcube' tsa na' ji'i̱ lcaa ñati̱ nu ngusñi cha' ji'i̱ Jesucristo, lya' tsa ti' na' ji'i̱ ngu' bi'. Lo'o jua'a̱ ná ntsu'u qui'ya 'na lo'o ngu' judío cuentya ji'i̱ cha' cusu' bi', cha' cua ndaquiya' tsa na' lcaa nu cha' cusu' bi'; tya sa'ni cua ngua lubii cresiya jna', si chañi cha' caca tso'o cresiya ji'na cuentya ji'i̱ ycui' Ndyosi jua'a̱ ti.

1 TESALONICENSES 2:14

Ñi'ya̱ nu ngua tya tsubi' la, cha' ngua'ni lya' ti' ngu' judío ji'i̱ ña'a̱ taju ñati̱ tya'a ntsu'u cha' ji'na lo'o Jesucristo ca loyuu su cuentya Judea, jua'a̱ ngua'ni lya' ti' ngu' tya'a quichi̱ tyi ma̱ ji'i̱ cu'ma̱ li'. Cu'ma̱ ngu' tya'a na, la cui' tya'a cha' ti'í ngua ji'i̱ ma̱ ñi'ya̱ nu ngua ji'i̱ ngu' judío tya'a na bi'.

1 TIMOTEO 3:5

Ná caca ji'i̱ sca ñati̱ caca loo ji'i̱ taju tya'a ñati̱ ji'i̱ ycui' Ndyosi si ná lo'o culo tso'o yu bi' cña to' tyi yu;