1 CORINTIOS 1:26 - Chatino Tataltepec26 Cu'ma̱ tya'a ngusñi na cha' ji'i̱ Cristo, tyi'u ti' ma̱ juani ñi'ya̱ ña'a̱ ñati̱ ngua ma̱ tya clyo, nu lo'o ngusubi ca ti Ni ji'i̱ ma̱: sca tucua ti ma̱ nu nchca tsa ji'i̱ ma̱; si'i ñati̱ tlyu laca ma̱, si'i ñati̱ culiya' laca ma̱ su ndi'i̱ ma̱ chalyuu, sca tucua ti cu'ma̱ nu tso'o laca xi ji'i̱ ma̱. အခန်းကိုကြည့်ပါ။ |
Sca hora bi' tso'o tsa ntsu'u tyiquee Jesús xqui'ya cha' ndi'i̱ Xtyi'i ycui' Ndyosi lo'o yu. Bi' cha' nchcui' Jesús lo'o ycui' Ndyosi Sti yu li': ―Sti na', cua'ni chi̱ na' loo ycui' nu'u̱ juani. Nu'u̱ laca ycui' Ni nu laca loo nde cua̱, jua'a̱ laca nu'u̱ loo nde lo yuu. Cua ngutu'u yacu̱' ti cha' bi' cuentya ji'i̱ ñati̱ nu ngua tya sa'ni la, cha' ná ca cuayá' ti' ngu' cha' bi' tsiya' ti, masi nchca tsa ji'i̱ ngu'; pana tsa xlya'be hi̱ cha' cua ngulu'u tso'o nu'u̱ cha' bi' ji'i̱ ñati̱ jua'a̱ ti juani, masi ná jlo tso'o ti' ñati̱ bi'. Ndyu'ni tlyu na' jinu'u̱ cha' jua'a̱ ngua ti' ycui' nu'u̱ cha' caca ―nacui̱ Jesús ji'i̱ ycui' Ndyosi.
Pana ndu'u lca'a̱ xi ngu' ji'i̱ yu li', xqui'ya cha' jlya ti' ngu' bi' cha' nu cua nchcui' yu lo'o ngu'. Sca nu qui'yu nu naa Dionisio ngusñi cha' bi', masi laca Dionisio sca ngu' cusu' nu ndya'a̱ ca Areópago; jua'a̱ sca nu cuna'a̱ nu naa Dámaris ngusñi cha' bi', lo'o xi xa' la ñati̱ ngusñi cha' bi'.
¿Ni cña tso'o cuentya ji'i̱ ycui' Ndyosi ndu'ni ñati̱ nu nchca tsa ji'i̱ lacua? ¿Ni cña ndu'ni ngu' nu ngua tsa'a̱ tso'o ti? ¿Ni cña ndu'ni ngu' nu nchca tsa nchcui' lacua? Sca ti nde chalyuu cua'nijo'o cña bi' ji'i̱ ngu'. Cua nacui̱ ycui' Ndyosi ji'na cha' ná tso'o tsiya' ti sca cha' nu ngua tsa'a̱ ñati̱ chalyuu ti, cha' tonto laca bi'.
Nu lo'o cacha' na cha' tso'o nu ji'i̱ ycui' Ndyosi bi' ji'i̱ ñati̱ ji'i̱ ycui' Ni, nu ngu' nu ntsu'u Xtyi'i ycui' Ni ne' cresiya ji'i̱, li' clyana na sca cha' nu chcui' na, sca cha' nu ta Xtyi'i ycui' Ni lo'o na; ná clyana na quiña'a̱ tsa cha' chcui' na ñi'ya̱ nu ndu'ni ñati̱ nu nchca tsa ji'i̱ ycui' ca ngu'.
Cu'ma̱ ngu' tya'a na nu tyaca'a tsa ma̱ 'na, cui'ya ma̱ cuentya ji'i̱ cha' re: Cua ngusubi ycui' Ndyosi ji'i̱ ñati̱ ti'i cha' taca xñi tso'o ngu' cha' ji'i̱ ycui' Ni; ta Ni chalyuu tso'o ji'i̱ ngu' bi' li', la cui' chalyuu nu nacui̱ Ni cha' caja ji'i̱ ñati̱ nu ntsu'u tsa tyiquee ña'a̱ ji'i̱ ycui' Ni. Masi ti'i tsa ñati̱ bi' nde chalyuu, pana culiya' ngu' cuentya ji'i̱ ycui' Ndyosi.
La cui' nu cusu' Juan laca na'. Nscua na' sca quityi re, ma' cusu', jua'a̱ sñi' nu'u̱, cha' ca̱a̱ quityi re ca slo cu'ma̱ ngu' tya'a ngusñi na cha' ji'i̱ Jesús, cha' cua ngusubi ycui' Ni ji'i̱ ma̱ cha' caca ma̱ ñati̱ ji'i̱ Ni. Chañi cha' ntsu'u tsa tyiquee na' ña'a̱ na' ji'i̱ ma̱; ni si'i sca ti na', lo'o lcua ti ña'a̱ ñati̱ lcaa quichi̱ nu nduna cha' liñi ji'i̱ Jesús, lo'o lcaa ñati̱ bi', ntsu'u tsa tyiquee ngu' ña'a̱ ngu' ji'i̱ ma̱.