Zacarías 6:6 - Chuj San Sebastian Bible

⁶ A jun caruaje toc'b'il yuj e no q'uic' chej cha, ata tz'at 'a jun nacion̈ 'ay 'a stojlal norte, ax jun caruaje toc'b'il yuj e no sac chej cha, ata tz'at 'a jun nacion̈ 'ay 'a stojlal 'aj tz'em c'u. Ax junx caruaje toc'b'il yuj e no tz'ib'quintac chej cha, ata tz'at 'a jun nacion̈ 'ay 'a stojlal sur, xchi jun ángel cha.

Chuj San Mateo Bible

⁶ A jun carruaje n̈erb'il yuj noc' q'uiq'uic' chej chi', sb'at d'a jun nación d'a stojolal norte. Axo jun carruaje n̈erb'il yuj noc' sacsac chej chi', sb'at d'a stojolal b'aj tz'em c'u. Axo junxo carruaje n̈erb'il yuj noc' chej sacb'alinac chi', sb'at d'a stojolal sur, xchi jun ángel chi'.

Zacarías 6:6 ပူးပေါင်းရင်းမြစ်များ

Is 30:6

Yaljnac Dios 'ixtc yuj no 'ictzum noc' tzlaj 'ec' 'a sat lum Neguev: A jun lugar cha, caw wal 'ay smay. Ata cajn 'ec' no león, til wal yel yaw no ta', 'ay no niwc chan, yet' no chan tzlaj jen̈wi. Ata tzb'ey no chej yet' no cameyo tzlaj cuchnc 'at sricoal chon̈b' Judá, yic tzya'n siylab'oc 'a Egipto, jun chon̈b' to matz colwj jab'oc.

Is 43:6

'Oj wal 'a eb' chon̈b' 'ay 'a stojlal norte 'ixtic: 'A'c meltzjoc eb' in chon̈ab', 'oj in chioc. Ax 'a eb' chon̈b' 'ay 'a stojlal sur, 'oj wal 'ixtc 'a eb': Man̈ eyamch wan eb', 'ijec cot eb' wunnal yet' eb' wisl 'aycn 'at 'a caw najt cha, eb' 'ay 'a 'aj tzlajw c'och yolyib'n̈q'uinal.

Jeremías 25:9

yuj cha, 'oj wawtc cot smasnil eb' chon̈b' 'ay 'a stojlal norte, yet' pax in checb' Nabucodonosor sreyl chon̈b' Babilonia, yic wach' tzjaw eb' yac' owl 'a jun chon̈b' tic, yet' 'a smasnil jun tzo'n̈ xo nacion̈ 'ay 'a stz'ey, yet' smasnil eb' cajn 'a 'a. 'Oj in satl eb' smasnil. Jun 'ejmn̈ej 'oj wac' lajwc 'ejm eb'. Ax eb' 'oj 'ilnc eb', 'oj xiw eb' yuj eb', 'oj b'uchxoc eb' yuj eb'.

Jeremías 4:6

'Ijec chan̈ e bandera, yic tzch'oxni to tz'at sc'ub'c 'el sb'a eb' cajn 'a Sión. Sayc 'aj tz'at e col e b'a, man̈ ex 'och wa'an. Yujto a 'a stojlal norte, ata 'oj wi' cot jun niwquil yailal 'oj satnc 'el smasnil.

Jeremías 46:10

Palta atn jun c'u tic wic an Jehová in, tztac' wuj smasnil. A wal 'a jun c'u tic 'oj in pac in b'a 'a eb' 'ajc'ojl yajch 'ayin. A q'uen espada 'oj 'a'nc lajwc eb' smasnil, masnto 'oj pimb'oc 'el q'uen yet' chic', yujto caw niwn eb' soldado 'oj in mil cham 'a stojlal norte 'a stz'ey a niwn a Éufrates.

Jeremías 51:48

An Jehová in, an tzwala: A satcha'an̈ yet' yolyib'n̈q'uinl tic yet' smasnil tas 'ay 'a 'a, caw 'oj tzaljoc cha'an̈, yic 'oj 'ejmc Babilonia cha, yic 'oj cot eb' soldado 'a stojlal norte 'oj wul satnc 'eli.

Jeremías 6:1

¡Ex yin̈tl can Benjamín, sayc 'aj tz'at e col e b'a, 'eln̈ec 'a yol chon̈b' Jerusalén! 'Utz'jec q'uen trompeta 'a chon̈b' Tecoa, 'a'c 'och tab' ch'oxnb'ilal 'a Bet-haquerem, yujto 'ay wal jun niwquil yailal tzcot 'a stojlal norte, til wal tas tzjuw 'el yu'uj.

Ez 1:4

Xlajw cha, xwiln scot jun niwquil 'ic' yet' jun niwquil 'asn 'a stojlal norte. A 'a scal cha, ata 'aych pax jun c'ac' caw tzn̈iln̈ni sc'aq'uil, jub'lji yec' sletz'lomal. Ax 'a scal jun c'ac' cha, ata 'aych jun tas caw tzictzni, lajn wal stzictznil yilx 'icha q'uen bronce.

Dn 11:40

A yic 'oj c'och jun slajb' tiempoal cha, 'oj 'at win rey 'ay 'a sur yac' owl yet' jun rey 'ay 'a norte. Ax jun rey 'ay 'a norte cha, 'oj 'eltoc yac' owl yet' winac. Yet' wal smasnil yip ax yelt yet' scaruaje yic owal, yet' eb' soldado 'ay q'ue 'a yib'n̈ chej, caw niwn pax te barco 'oj cot yet'oc. 'Oj b'ut'joc 'el jun tzo'n̈ chon̈b' yu'uj, 'icha wal yel 'a 'elmal a', 'ixta 'oj 'aj yeq'ui.

Dn 11:9

'Oj lajwc cha, ax jun rey 'ay 'a norte cha, 'oj ya'lc cob' ya'n owl yet' jun rey 'ay a sur, palta ma'oj stac' yu'uj, yuj cha, ax smeltzj 'a schon̈ab'.

Apoc 6:5

A jun tzcuch Calnelu cha, a yic 'ix sn̈i'chtan jun yoxl seyo, 'ix wab'n yaln junx yoxl querubín chi 'ixtic: Cotan̈, xchi. Ax xwilni, 'ayc' junx chej caw q'uic'. A jun 'ay q'ue 'a yib'an̈, yamb'il jun libra yu'uj.