Zacarías 5:3 - Chuj San Sebastian Bible

³ Xlajw cha, xyaln 'ayn 'ixtic: —A 'a ch'an̈, ata tz'ib'b'il jun yailal 'oj jawc 'a yib'n̈ smasnil eb' maysch'olnil sb'eyb'al 'a jun nacion̈ tic. Atn tic tz'ib'b'il 'a schapaq'uil: Jun pac' 'aj tzyal yuj smasnil eb' 'elc'um, ax 'a junx pac', ata tzyal yuj eb' 'a'm 'es, c'uxn 'oj satxoc 'el eb' 'a sat lum lu'um.

Chuj San Mateo Bible

³ Ix yalan d'ayin icha tic: Ata' tz'ib'ab'iloch jun yaelal ol ja d'a yib'an̈ masanil eb' chuc d'a jun nación tic. Icha syal tas tz'ib'ab'iloch d'a junoc pac'an̈, ol satel masanil eb' elc'um. Icha syal tas tz'ib'ab'iloch d'a junxo pac'an̈, ol satel masanil eb' syac' sti' d'a esal.

Zacarías 5:3 ပူးပေါင်းရင်းမြစ်များ

Ex 20:15

Man̈ ex 'elc'woc.

Pr 29:24

A mach tzya'ch sb'a yet' eb' 'elc'um, mun tzyij cot 'a yib'an̈, yujto tzyac' sti yaln junc chi 'a stojlal 'a sat eb' yajal, palta matz yal pax 'icha tzyutj ya'n sti cha.

Pr 3:33

Tzya' cot Jehová catb' 'a yib'n̈ eb' maysch'olnil, palta ax eb' wach' sb'eyb'al, a yaxilal tzya' cot 'a yib'n̈ eb'.

Pr 30:9

Toto 'oj yac' sobra tas 'ayin, ax 'oj 'ajoc, 'oj a 'at am satc'ojlal wu'uj, ax walni to man̈ ach wojcoc. Toto may pax tas 'ay 'ayin, ax 'oj 'ajoc, 'elc'ln̈ej am 'oj weq'ui, ax yoch in mul 'aych ach in Diosal, xin chi 'a Dios.

Is 24:6

Yuj wal cha, 'ix cotcn catb' 'a yib'n̈ lum lum tic, ax eb' cajn 'a sat lu'um, wan yab'n eb' syail, wan yemt sb'isl eb', jaywn̈ xoj eb' 'ayq'ui.

Is 43:28

Yuj cha, ma'ix yal in c'ojl to tzin ya' servil eb' ya'mal 'och e ti ax israel ex tic. Ex yin̈tl can Jacob, 'oj ex wac' satxoc 'eli, caw wal 'oj eyixtxi, xchi Dios.

Is 48:1

A Dios a tzaln 'ixtic: 'Ab'c wal jun tic ex yin̈tl Jacob, ex tze cuch israel, yin̈tl ex pax can Judá. Tze loc in b'i an Jehová in tic, tzeyalni to tzex 'och 'emmquilal 'ayin. Ex israel, e Diosal in eyalni, palta man̈ yelc tzeyala, tzex paxtin 'a chab'satil.

Jeremías 23:10

A wal jun nacion̈ tic, caw b'ut'n yuj eb' tzb'on 'ajmulal, yuj eb' 'anma caw tz'a'n 'ip sb'on maysch'olnil. Tzc'anlb'ej eb' yip smasnil yic tzyixtn eb' yit 'anma'il. Yuj wal cha, 'ix scatb'an can Jehová lum lum tic. Yuj cha, 'ix tacj chan̈ lu'um, 'ix tacj pax 'el te c'ultc tzlo e no noc'.

Jeremías 26:6

Toto an̈ja ma'oj eyicloc, to 'ixta', 'ixtc 'oj wutc can watut 'icha wutjnac jun in cajnub' 'a Silo. 'Oj wa' cot catb' 'a yib'n̈ jun chon̈b' tic 'a scal smasnil nacion̈ 'ay yolyib'n̈q'uinl tic, xchi Dios, xa chi 'a eb', xchi 'ayin.

Jeremías 5:2

'Ay cob' eb' tzin b'inan an Jehová in tic, palta tzin sb'inej eb' 'a ya'm 'esal, xchi.

Jeremías 7:9

Tzex 'elc'wi, tzex milw cham 'anma', tze b'on 'ajmulal, tzeya'n cob' e ti 'a tas man̈ yeloc, tzeya'n tz'a incienso 'a jun comn dios tzcuch Baal, tzeya'n 'emmquilal 'a jun tzo'n̈ xo comn dios to may 'aj 'ix colwj 'ayex.

Ez 2:9

Ax xwilni 'ay jun c'ab' xjaw 'a wojltac, 'ix cot b'achn 'ayn yet' jun ch'an̈ un̈ chulb'ilb'ec'an.

Dn 9:11

An̈ tic on̈, xqui ten tas xyal a checnb'il, ma'ix qui chaj cab' tas xala. Yuj wal qui mul cha, xjaw jun tzo'n̈ yailal tic 'a quib'n̈ on̈, atn jun tzo'n̈ tz'ib'b'il can 'a ch'an̈ libro yuj a checb' Moisés.

Os 4:2

Caw tzniwtj eb' laj sjelnc tas tzyala, tzlaj ya'nc eb' 'es. Tzmilw cham 'anma eb', tz'elc'w eb', cojxn̈ej 'ajmulal tzlaj sb'o eb', tzlaj yixtn eb' yit 'anma'il, jab'jb' scal tzlaj milw 'anma eb'.

Lv 19:11

Man̈ ex 'elc'woc, man̈ eyac' 'es, man̈ eyixtc paxti e b'a junjn ex.

Lv 19:12

An Jehová in an tzwala. Man̈ e loc in b'i 'a scal 'es paxti tzeyala. Toto 'ixta tzeyutej, man̈x 'a wel'ch 'a e sat.

Am 3:10

A Jehová a tzaln 'ixtic: Caw man̈ yojcoc eb' sb'on jac tas tojol. A 'a yol yatut eb', ata molb'il tas ton̈j tzyij 'ec' eb' 'a eb' 'anma', xchi.

Zacarías 5:4

A Jehová tztac' yuj smasnil, a tzaln 'ixtic: An wal 'oj wa't jun yailal tic, sec wach' 'oj 'och 'a yol yatut eb' 'elc'um yet' eb' tzlocn in b'i yic tzya'n 'es, 'oj cann̈j jun yailal chi 'a junc n̈a cha, masnto 'oj lajwc 'ejm spatzb'il, man̈x 'a junc sq'uenal 'oj canoc, xchi Dios, xchi jun ángel cha.

Zacarías 8:17

man̈ e nalb'oc eya'n tu nab'enal 'a eb' eyit 'anma'il, man̈ eyac' 'es 'ayx junjn ex. An Jehová in, an tzwala, to caw wal tzin yaj jun tzo'n̈ b'eyb'al cha, xchi Dios.

Malaquías 3:5

An Jehová tztac' wuj smasnil, an tzwal 'ixtic: 'Oj in jaw 'a e cal wul ex in b'eyc'ojloc. An wal 'oj wac' testigoal in b'a yuj jun tzo'n̈ eb' tic: atn eb' 'ajchum, eb' tzb'on 'ajmulal, eb' tz'a'n 'es, eb' man̈ tz'acnoc tzyutj stojn smajan, eb' tz'ixtn eb' 'ix chamnc yichmil yet' eb' meb'a 'unn chamnc smam, eb' matz b'onyaj eb' chuc chon̈b'al, yet' pax smasnil eb' may jac wel'ch 'a sat.

Malaquías 4:6

A Elías cha, a 'oj 'a'nc 'och eb' mamb'il yet' eb' 'unnab'il 'a junc'ojlal. Toto ma'oj sna sb'a eb', ax yic 'oj in jawi, ax in satn 'el eb' in chon̈b' 'a jun 'ejmn̈ej, xchi Dios.

Mt 25:41

'Oj lajwc cha, ax waln 'a eb' 'ayc' 'a in surito: 'Eln̈ec ax tic 'a in tz'ey, yujto 'ay yowl sc'ojl Dios 'a eyib'an̈. 'Ixquec 'a jun c'ac' may b'a'n̈ tztupi, 'a jun lugar sb'ojnac Dios yico'oc win diablo, yet' eb' yángel winac.

Lc 21:35

Yujto 'icha wal junc ya'al, 'ixta 'oj 'aj sjaw 'a yib'n̈ eb' 'anma smasnil 'a yolyib'n̈q'uinl tic.

Ef 4:28

Toto 'ayex, an̈ja 'elc'm ex, caw man̈x eyelc' junc tas ticnec. Yel xo wach' tzex munlj 'a junc munljel wach', sec 'oj stac' e colwj pax 'a jun tzo'n̈ xo eb' caw may jac yico'.

1 Ti 1:9

Nachj cab' 'el o'oj, man̈ yujoc eb' wach' sb'eyb'al, x'ajx can jun ley cha. Palta yuj eb' 'oj wal tic, 'ix 'ajx cani. Atn eb' tenmtac tzyutj sb'a 'a Dios, eb' man̈ yiclumoc 'a tas tzyala, eb' matz b'eylb'an 'icha tznib'ej, eb' maysch'olnil sb'eyb'al, eb' may yel'ch Dios 'a sat, eb' tzcomn b'uchwj 'a junc tas wach', eb' tzma' cham smam snun, yet' eb' milm cham 'anma',

Santiago 5:12

Palta ex wu'tac, ex wanab', 'ay wal junx tas 'oj walb't 'ayex, yowlal 'oj eyicloc. Man̈ e comn locc sb'i Dios 'aj satcha'an̈, mto junc tas 'ay 'a yolyib'n̈q'uinl tic, man̈ e comn locc sb'i junc xo mach, mto junc xo tas. A yic tzex laj paxtini, N', xe chi, toto yel. Ma'ay, xe chi, toto man̈ yeloc. Cojxn jun tzo'n̈ tic tzeyala, sec wach' ma'oj 'ajxc 'och eyailal.

Santiago 5:4

A eb' e majn xmunlj 'ayex, 'in ma'ix e toj eb', ton̈j xeyixtj paxti eb'. Yuj cha, tz'awj chan̈ eb' 'a e patic, tzyaln eb' e mul. Ax yaw eb' cha, tzc'och 'a Cajlil 'a satcha'an̈.

Josué 9:20

A tas 'oj qui b'oc yet' eb', to 'oj can cajn eb' 'a qui calec, sec ma'oj cot yowl Jehová 'ayn̈ec, yujto tox 'ix ca'c qui ti 'a 'a, xchi eb'.

Apoc 21:8

Palta 'ay eb' 'anma tzcomn xiwi, 'ay eb' matz ya'ch sc'ojl 'ayin, eb' yajb'entac, eb' milm cham 'anma', eb' tzb'on 'ajmulal, eb' 'ajchum, eb' tzyal sb'a 'a jun tzo'n̈ tzalx 'och diosal, yet' eb' 'a'm 'es. A eb' cha, 'oj scha eb' spac yico', 'oj 'atcn eb' 'a scal jun c'ac' tzn̈ilchji, caln yaj yet' azufre, atn jun 'icha pama'. A jun cha, atn schab'l chamel, xchi Dios.

Apoc 22:15

Palta 'ay pax jun tzo'n̈ eb' ma'oj stac' yochi. Atn eb' tu snab'en, 'icha junc tz'i', yet' eb' 'ajchum, eb' tzb'on 'ajmulal, eb' milm cham 'anma', eb' tzyal sb'a 'a jun tzo'n̈ yechl tzalx 'och diosal, yet' jantcn̈ej eb' 'aych snab'en 'a jun tzo'n̈ 'es, tzlaj yalnc pax eb' 'es cha. Atn eb' tic, ma'oj stac' yochi.