Ro 6:23 - Chuj San Sebastian Bible

²³ Toto a maysch'olnil tzqui b'o'ec, 'oj qui chac stojol, atn chaml 'a jun 'ejmn̈ej. Palta ax jun siylab' tzyac' Dios 'ayn̈ec, atn qui q'uinlec 'a jun 'ejmn̈ej, yujto junxn̈ej cajc yet' Cristo Jesús, atn Cajlilec.

Chuj San Mateo Bible

²³ Tato a chucal sco c'ulejn̈ej, a stojol ol co cha'a, aton chamel d'a juneln̈ej. Axo jun silab' syac' Dios d'ayon̈, aton co q'uinal d'a juneln̈ej, yujto junxon̈ej caj yed' Cristo Jesús, aton Cajal.

Ro 6:23 ပူးပေါင်းရင်းမြစ်များ

Gn 2:17

ax pax te tz'a'n nachjoc 'el tas wach' yet' tas tu', man̈ a lo sat te'. Toto 'oj a lo sat te', wal yel 'oj a chami, xchi Dios 'a winac.

Gn 3:19

'Oj 'el yalil snan̈l a sat, ax yilchj tas 'oj a c'uxu', masnto 'oj a meltzj 'a lum lum tic jun 'ejm xo, yujto a 'a lum ach coti, yuj cha, 'oj a meltzj can pax 'och lumal jun 'ejm xo, xchi Dios.

Pr 11:19

Toto tzon̈ 'ochc tza'n yuj tojlal, wan qui 'atc 'a jun b'e yic q'uinal, ax toto tzon̈ 'atc 'a maysch'olnil, to 'ixta' wan qui 'atc 'a jun b'e yic chamel.

Is 3:11

'Oltac wal eb' 'anma tu snab'en, a maysch'olnil 'oj scha sb'a eb' yet'oc, a tas sb'ojnac eb', a chi 'oj 'ajxoc spacc 'a eb'.

Is 3:9

A sat eb' 'anma chi tzch'oxn 'eli to b'an̈quintac eb', tzch'oxn 'el eb' to 'ay smul eb' 'icha eb' 'aj Sodoma, toc tzq'uixw eb' sb'on 'a sat 'anma'. 'Oltac wal eb', mun wal tzyij cot eb' yailal 'a yib'an̈.

Ez 18:20

A mach tz'och smul, a tzchami. A win 'unnab'il, matz tac' scham win yuj smul smam. 'Ixta pax win mamb'il cha, matz tac' scham win yuj smul yunnal. A mach tojl tas tzb'o'o, wach' spac 'oj scha'; ax mach maysch'olnil tas tzb'o'o, maysch'olnil tas 'oj scha sb'a yet'oc.

Ez 18:4

A eb' 'anma', wic eb' smasnil, wic win mamb'il yet' win 'unnab'il, a mach tz'och smul, tojln̈ej schami.

Mt 25:46

A eb' cha, 'oj 'atcn eb' 'a yailal 'a jun 'ejmn̈ej. Palta ax eb' tojl sb'eyb'al, 'oj scha eb' sq'uinl 'a jun 'ejmn̈ej, xchi Jesucristo 'a eb'.

Jn 10:28

An tzwac' sq'uinl eb' 'a jun 'ejmn̈ej. Yuj cha, man̈x b'a'n̈ 'oj satl eb'. May junc mach 'oj stac' yi'n 'ec' eb' 'a yol in c'ab'.

Jn 17:2

Yujto ach a'jnac wopiso 'a yib'n̈ smasnil 'anma', sec wach' jantcn̈ej eb' tzac' 'ayin, tztac' wa'n sq'uinl eb' 'a jun 'ejmn̈ej.

Jn 3:36

A eb' tzya'ch sc'ojl 'a Yunnal Dios, 'ay sq'uinl eb' 'a jun 'ejmn̈ej. Palta a eb' matz ya'ch sc'ojl 'a 'a, ma'oj scha eb' sq'uinl 'a jun 'ejmn̈ej. 'Ay cot yowl sc'ojl Dios 'a yib'n̈ eb'.

Jn 4:14

Palta ax eb' tz'u'n jun a tzwac'a, man̈x b'a'n̈ 'oj cot stacn̈til eb' jun 'ejm xo. Yujto a jun a tzwac' tic, 'oj 'aj sjaj a 'a eb', ax ya'n a sq'uinl eb' 'a jun 'ejmn̈ej, xchi Jesús 'a 'ix.

Jn 4:36

'Ay eb' 'e'nc xo munljoc 'a scal eb', 'icha junc 'awm 'in̈at. 'Ay pax eb' tzmunlj 'icha junc jach'm 'a scal eb', sec 'oj scha eb' 'anma chi sq'uinl 'a jun 'ejmn̈ej. Ax eb' tzmunlj cha, c'uxn 'oj scha eb' spac jun smunljel cha, sec wach' lajnn̈ej 'oj tzaljc eb' munljum chi smasnil.

Jn 5:24

Wal yel tzwal 'ayex, a eb' tz'ab'n in paxti', tzya'n 'och eb' sc'ojl 'a jun checjnacn coti, atn eb' chi 'ay sq'uinl 'a jun 'ejmn̈ej. Man̈x 'oj 'at eb' 'a yailal, yujto tox 'ix 'el eb' 'a yol sc'ab' chamel, 'ix schaj eb' sq'uinal.

Jn 6:27

Man̈oc 'a jun tzo'n̈ tas tzqui c'uxu, man̈oc tzeya'ch e nab'en e sayn 'eq'ui, yujto ton̈j 'e'lb'a yec' jun tzo'n̈ cha. 'Ayt wal junx tas 'icha to tzqui c'uxu, palta may b'a'n̈ tzlajwi. 'Ay yopiso jun chi ya'n e q'uinl 'a jun 'ejmn̈ej. Yuj cha, a 'a jun chi tzeya'ch e nab'en e sayn 'eq'ui. An 'oj wac' jun chi 'ayex, yujto 'Ochnc in 'Anma'il. A qui Mam Dios 'a'jnac spoder 'ayin, xchi Jesús 'a eb'.

Jn 6:40

An tic, Yunnaln Dios. Yuj cha, jantcn̈ej eb' tz'och q'ueln 'ayin, toto tzin ya'ch eb' 'a sc'ojol, tznib'j in Mam cha, to tzchaj eb' sq'uinl 'a jun 'ejmn̈ej. Yuj cha, an 'oj wac' pitzwc pax chan̈ eb' 'a slajb' c'ual, xchi Jesús 'a eb'.

Jn 6:68

Ax Simón Pedro 'ix ta'w 'ixtc 'a 'a: —Mamin, ¿tom 'ay junc mach 'aj 'oj stac' qui 'at yet' on̈? Yujto a jun tzo'n̈ paxti tzal 'ayn̈ tic on̈, ata 'oj qui cha qui q'uinl 'a jun 'ejmn̈ej on̈.

Ro 1:32

Yojc xon eb' jun sley Dios tzalni, to a eb' tzb'on jun tzo'n̈ chi 'ixta', smoj s'atcn eb' 'a chaml 'a jun 'ejmn̈ej. Palta an̈j 'ijnoc sb'on eb', tzlaj tzalj pax eb' yet' eb' yit 'anmal tzb'on jun tzo'n̈ chi yet'oc.

Ro 2:7

'Ay eb' 'oj yac' sq'uinl 'a jun 'ejmn̈ej. Atn eb' te'n tzyutj sb'a sb'on jun tzo'n̈ wach'il, yujto tznib'j eb' tza'wni swach'l 'icha swach'l Dios. Tznib'j eb' to 'ay yel'ch eb' 'a sat, tznib'j pax eb' tzchaj sq'uinl 'a jun 'ejmn̈ej.

Ro 5:12

Yuj wal jun winac, spitzw can maysch'olnil 'a yolyib'n̈q'uinl tic, atn Adán. Yuj maysch'olnil cha, spitzw can chamel. Yuj cha, yochcn chaml 'a yib'n̈ smasnil 'anma', yujto c'uxn x'och smul eb' 'a Dios.

Ro 5:17

Yujn̈ej smul jun winac, yajx can 'och smasnil 'anma 'a yol sc'ab' chamel. Palta yujn̈ej junx mach, atn Jesucristo, caw niwn swach'c'ojlal Dios tzch'ox 'ayn̈ec, yujto tzyala to wach'n̈ec 'a sat. Yujn̈ej wal cha, ax qui chanec qui q'uinl 'a jun 'ejmn̈ej, ax cochc yajlil yet'oc.

Ro 5:21

'Aych eb' 'anma smasnil 'a yol sc'ab' maysch'olnil. Yuj spoder maysch'olnil cha, tzlaj cham eb'. Palta ax swach'c'ojlal Dios, 'ay pax spoder. Yu'uj, wach'n̈ec 'a sat ticnec. 'Ixta tzyutj ya'n qui q'uinlec 'a jun 'ejmn̈ej yuj Cajlil Jesucristo.

Ro 6:16

Cojquec, toto 'ay junc mach tzya'ch sb'a smoosoc junc winac, to man̈x yico'oc sb'a, toto 'ixta', an̈j win 'ay yic 'a jun 'ejmn̈ej. Yowlal tzyiclj tas tzyal winac. An̈jtona', 'ixta on̈c paxi. Toto tzca'c 'och qui b'a ya'malc servil maysch'olnil, tzqui yiclni tas tznib'ej, to 'ixta', an̈j 'ayn̈ec yico'. Ax qui chamc yuj 'a jun 'ejmn̈ej. Palta toto tzca'c servil Dios, tzqui yiclniec tas tznib'ej, to 'ixta', an̈j 'ayn̈ec yico'. Ax swach' tojlb'i qui nab'enec yu'uj.

Ro 6:21

Palta ¿tom 'ay jac qui ganar 'a spatc jun tzo'n̈ qui b'ojnaquec cha? Caw tzon̈ q'uixwec yuj jun tzo'n̈ chi ticnec. Yuj wal jun tzo'n̈ cha, tz'at eb' 'anma 'a chaml 'a jun 'ejmn̈ej.

Ro 8:13

Toto an̈ja qui b'eylb'anec 'icha tznib'j qui tu nab'enal, 'oj qui chamc yuj 'a jun 'ejmn̈ej. Palta toto yuj spoder Yespíritu Dios tzcactnec can qui b'on jun tzo'n̈ maysch'olnil yet' qui niwnalec tic, to 'ixta', 'oj qui chac qui q'uinl 'a jun 'ejmn̈ej.

Ro 8:38

Yuj cha, caw wojtac to may junc tas tztac' on̈ yi'nec 'el 'a schamc'ojlal Dios. Toxn̈ej 'oj jawc chamel, qui q'uinlec, mto junc ángel, mto junc xo 'ay spoder, junc tas 'ayc' ticnec, mto junc tas tot 'oj jawoc,

Ro 8:39

wach'xam junc 'ayc' 'a satcha'an̈, mto junc 'ayc' 'a yaln̈ lum tic, tzann̈j junc xo tas b'ob'il yuj Dios, toxn matz tac' on̈ yi'nec 'el 'a schamc'ojlal. A jun schamc'ojlal tic, ch'oxb'il 'ayn̈ec yuj Cristo Jesús, atn Cajlilec.

Gl 3:10

A eb' tzya'ch yipc sc'ojl syiclni ley yic Moisés, 'ay cot yowl sc'ojl Dios 'a yib'n̈ eb'. Yujto tzyal 'ixtc 'a Ch'an̈ U'un̈: Tzann̈j mach matz yiclnin̈ej smasnil tas tz'ib'b'il can 'a ley, 'ay cot yowl sc'ojl Dios 'a yib'n̈ eb', xchi.

Tito 1:2

'Ixta tzwutj in b'a, sec tzya'ch eb' 'anma yipc sc'ojol, to 'oj qui cha qui q'uinl 'a jun 'ejmn̈ej. A Dios, may 'aj tzyac' 'es jun 'ejmoc. A yic mantzac sb'o yolyib'n̈q'uinl tic, ya'jnac can sti', to 'oj yac' qui q'uinal.

Santiago 1:15

Ax 'a yic tzqui b'on jun tzo'n̈ maysch'olnil tzqui nib'j 'och cha, tzwach' 'och qui mul. Ax yic tzwach' juw 'el qui nab'en yuj qui mul cha, yujn̈ej cha, ax qui cham 'a jun 'ejmn̈ej.

1 Jn 2:25

Atn Jesucristo ya'jnac can sti 'ayn̈ec, to tzyac' qui q'uinlec 'a jun 'ejmn̈ej.

Apoc 21:8

Palta 'ay eb' 'anma tzcomn xiwi, 'ay eb' matz ya'ch sc'ojl 'ayin, eb' yajb'entac, eb' milm cham 'anma', eb' tzb'on 'ajmulal, eb' 'ajchum, eb' tzyal sb'a 'a jun tzo'n̈ tzalx 'och diosal, yet' eb' 'a'm 'es. A eb' cha, 'oj scha eb' spac yico', 'oj 'atcn eb' 'a scal jun c'ac' tzn̈ilchji, caln yaj yet' azufre, atn jun 'icha pama'. A jun cha, atn schab'l chamel, xchi Dios.