Pr 4:18 - Chuj San Sebastian Bible

¹⁸ A eb' tojl snab'en, a swach' b'eyb'al eb', caw tzq'ue'ch 'icha yic tzq'uel c'u 'a yic tzsacb'eli, masnto tzowb' yoc c'u cha.

Chuj San Mateo Bible

¹⁸ A sb'eyb'al eb' tojol spensar, lajan icha ayic vanto sacb'i masanto sq'ue c'u, scheclaj spatic yichan̈ eb' yuuj.

Pr 4:18 ပူးပေါင်းရင်းမြစ်များ

A Ch'an̈ Schab'l Libro Samuel 23:4

lajn wal 'icha yic tzsacb' cot yib'cha'an̈, lajn wal 'icha yic c'achan, yic may 'asun, a tz'a'n q'uib' te c'ultac yic tzlajw yec' n̈ab', xchi 'ayin.

Job 11:17

Toto tza na a b'a, wach'xam 'icha to ach can 'a q'uic'q'uinl yuj a yailal tic, palta ax ticnec, 'icha to 'oj sacb' pax 'el 'a eb'an̈. Caw tzaljc'ojlal 'oj a canxi, 'icha wal to chimc'ul 'aj 'aych pax 'eq'ui.

Job 17:9

A eb' wach' snab'en, wach' 'oj 'aj 'el'ch eb', a tas tojl tzb'o eb', 'oj niwtjoc chan̈ eb' yet'oc.

Job 23:10

Palta yojtac chajtl yilx in b'eyb'al. A yic 'oj lajwc wajx prowal yu'uj, ax in b'ocn 'icha q'uen oro tz'ec' 'a scal c'ac'.

Salmos 84:7

'Oj 'och yip eb' si'mb'il, ax 'a lum tzaln Sión, ata 'oj ach yil eb' ach in Diosal.

Salmos 97:11

'Oj yac' sacq'uinl 'a eb' tojl sb'eyb'al, ax ya'n tzaljc'ojlal 'a eb' 'anma wach' snab'en.

Pr 13:9

Toto tojl qui b'eyb'alec, lajn on̈c 'icha junc luz caw tzictzni yilx yoc; ax toto may qui ch'olnilec, lajn on̈c 'icha junc cantil wan stupi.

Pr 15:24

A jun b'e yic q'uinal, 'ixtc tzq'ue'i, yuj cha, a eb' jelan, matz 'ejm eb' 'a jun b'e yic chamel.

Pr 2:20

B'eylb'ej jun b'eyb'al caw wach', tza b'eylb'an sb'eyb'al eb' tojl sb'eyb'al.

Pr 2:9

Toto tza chaj ab' in checnb'il, 'oj a b'eylb'oc tojlal, wach'il yet' wach' b'eyb'al.

Is 26:7

A sb'eyb'al eb' wach' snab'en, caw tojl toni; Mamin, ach xo tza wach' tojlb'tzej sb'eyb'al eb', 'icha pan̈n 'a'lic 'ixta tzotj can sb'e eb' cha.

Dn 12:3

A eb' caw jelan, eb' niwn sb'isl 'anma tzjucb'tzej 'a tojl b'eyb'al, a eb' cha, caw wach' yilx 'oj 'aj eb' 'icha yilx satcha'an̈, caw tzictzni yilx 'oj 'aj eb' 'a jun 'ejmn̈ej, 'icha stzictznil c'anal.

Os 6:3

Ca'c wal quip cojcanec 'el Jehová. Tojln̈ej 'oj jawc 'ayn̈ec, 'icha wal cojcanec 'eli to 'oj sacb'oc. 'Oj yi' cot yaxilal 'ayn̈ec 'icha wal tz'aj sjaw b'ab'l yaxn̈ab' 'a sat lum tic, yet' pax 'a yic tz'och n̈ab'lq'uinal, 'oj schic cob' eb'.

Mt 5:14

'Icha sacq'uinal, 'ixta 'ex 'a yolyib'n̈q'uinl tic. Q'uinloc 'ay junc chon̈b' 'a junc tzalan, caw matz tac' sc'ub'x 'eli.

Mt 5:16

'Icha junc cantil cha, 'ixta 'ex cab'i', tze ch'oxl e sacq'uinlal 'a eb' 'anma'. Tzyal 'el'chi, atn e wach' b'eyb'al tze ch'ox yil eb', sec 'oj yal eb' wach' paxti 'a qui Mam 'ayc' 'a satcha'an̈.

Mt 5:45

'Ixta 'oj eyutc e ch'oxni to yel yunnalx qui Mam 'ayc' 'a satcha'an̈. Yujto a tz'a'n 'emt yoc c'u 'a yib'n̈ eb' maysch'olnil yet' 'a yib'n̈ eb' wach'. An̈jtona', tzya'n pax 'emt n̈ab' 'a yib'n̈ eb' man̈ tojloc snab'en yet' 'a yib'n̈ eb' tojl snab'en.

Jn 8:12

'Ix yaln pax Jesús 'ixtc 'a scal eb' 'anma cha: —An tic, 'icha sacq'uinl waj 'a eb' 'anma 'ay 'a yolyib'n̈q'uinl tic. A eb' tz'och in cuywumoc, 'oj wac' sacq'uinl 'a spixn eb'. Yuj jun sacq'uinl cha, 'oj scha eb' sq'uinl 'a jun 'ejmn̈ej. Man̈x 'oj b'ey eb' 'a scal q'uic'q'uinal, xchi Jesús.

2 Co 3:18

Yuj cha, man̈x 'ayc 'och jun 'icha nip chi 'a qui satc qui masnil. A ticnec, lajn on̈c 'icha junc nen 'aj tzquil qui sat, yujto cujec, tzcheclj 'el swach'l Cajlil. Yuj cha, wan slajnb'i qui nab'enec 'icha Cristo, yujto wan xo stz'acw qui wach'lec 'icha swach'il. 'Ixta wan on̈ yutnec Cajlil, atn Yespíritu Dios.

A Scarta San Pablo D'a Eb' Aj Filipos 2:15

Man̈ e b'o 'ixta', sec may mach 'oj alnoc, to 'ay e mul, mto e paltail. Wach'xam 'ayx 'ec' 'a scal eb' 'anma maysch'olnil, mto eb' tu snab'en, ax xo yel yunnal ex Dios, man̈x 'a maysch'olnil 'aych 'ayx yet' eb'. 'Icha jun tzo'n̈ c'anal, caw tzictzni yilx 'a q'uic'q'uinal, 'ixta ex 'a scal eb'.

A Schab'il Carta San Pedro 1:19

An̈jtona', 'aycto sjaw Cajlilec, stz'ib'n can eb' schecb' Dios yab'xil. An̈ja 'ayc' Ch'an̈ Un̈ chi ticnec. A tas tzyal Ch'an̈ Un̈ cha, caw yel. Caw wach' tzcutjec qui b'a, toto an̈ja ca'nec 'och qui nab'en 'a tas tz'ib'b'il can yuj eb' cha. Yujto a Ch'an̈ Un̈ cha, lajn 'icha junc cantil tzqui tzic 'a 'aj caw q'uic'q'uinal. Tzyac' yoc 'ayon̈, masnto yic wan sacb'i, yic tzq'uel jun niwquil chac c'anal. 'Icha jun c'anal cha, 'ixta 'oj 'aj Cristo yic 'oj jawc paxi, ax swach' 'a'n sacq'uinl 'a qui pixnec.

A Schab'il Carta San Pedro 3:18

Yowlal tze wach' 'ojquej 'el Cajlilec, atn Jesucristo qui Colmalec. An̈jtona', caw tze wach' chaj swach'c'ojlal 'a junjn c'u. Niwn cab' yel'ch Cajlilec ticnec, yet' 'a smasnil tiempo. Ya' cab'i'.

Apoc 21:23

A 'a jun chon̈b' cha, may tz'och yoc c'u, may pax tz'och yoc 'uj. Yujto a sacq'uinlal Dios yet' pax sacq'uinlal jun tzcuch Calnelu, a tzyac' sacq'uinlal 'a 'a.

Apoc 22:5

A wal ta', man̈x 'a 'ac'wal. Ax eb' 'oj c'och ta', man̈x 'a yopiso junc cantil yuj eb'. Man̈x 'a yopiso yoc c'u yuj eb'. Yujto a Dios Cajlilec, a 'oj yac' sacq'uinlal 'a eb'. Ax eb' cha, 'oj 'och eb' yajlil 'a smasnil tiempo.

Jueces 5:31

Mamin Jehová, 'ixta cab' wal tz'aj satl eb' 'aych 'ajc'ojlal chi 'ayach, ax eb' tzach chamc'ojlani, 'icha cab' stzictznil yoc c'u, 'ixta cab' yilx eb', xchi 'ix Débora chi yet' win Barac 'a sb'it. A yic xlajw ye'cn jun tzo'n̈ owl cha, chawinc ab'il x'ochcn junc'ojlal 'a chon̈b' Israel.