Pr 12:27 - Chuj San Sebastian Bible

²⁷ A eb' ma'm noc' to 'isaj, matz b'o eb' schi no noc' chi tzyamchj yu'uj; ax eb' c'asan, caw tzyac' eb' snab'en sc'uxn tas tzyij cha.

Chuj San Mateo Bible

²⁷ A eb' jaragana pechum noc', max sb'olaj noc' syamchaj yuj eb'. Axo pax eb' jelan spensar jun, jantac b'eyumal tz'ilchaj yuj eb'.

Pr 12:27 ပူးပေါင်းရင်းမြစ်များ

Salmos 37:16

Yel xo wach' jab' wal tas 'ay 'a eb' 'anma wach' snab'en, 'a yib'n̈ sricoal eb' maysch'olnil sb'eyb'al.

Pr 10:4

A eb' matz nib'j munljoc sb'a, 'oj 'och eb' meb'a'il, ax eb' tzmunlj si'mb'il, 'oj 'och eb' ricoal.

Pr 12:26

Toto wach' qui nab'enec, tzqui jucb'tzejec eb' quit 'anmal 'a swach'il, ax toto tu qui nab'enec, caw tzquijec 'at eb' quit 'anmal chi 'a maysch'olnil.

Pr 13:4

A eb' 'isaj, 'ay tas tznib'j eb', palta matz 'ilchj yuj eb'; ax eb' tzmunlji, caw wal 'oj niwtjoc tas 'ay 'a eb'.

Pr 15:16

A junc meb'a to 'ay yel'ch Jehová 'a sat, yel xo wach' yic 'a yib'n̈ junc rico to somc'ojlaln̈ej yaji.

Pr 16:8

Yel xo wach' toto tzon̈ munljec 'a stojlal, wach'xam jab' wal tas tzca'c ganar 'a qui munljelec, 'a yib'n̈ to niwn tzcac' ganar 'a spatc munljel man̈ tojloc.

Pr 23:2

Wach'xam c'aync ex to niwn e wa'i, palta wach' toto jab' wal tas tze c'uxu.

Pr 26:14

'Icha wal yec' swisagreil junc puerta, 'ixta yec' b'alb'noc jun 'isj chi 'a sat sch'at.

Pr 26:15

A junc 'isj cha, tzya' cob' 'ejm sc'ab' 'a yol yuc'ab', palta ax ya'n 'och tas tzc'ux 'a sti', caw 'ajltac tzyila.