Nm 18:32 - Chuj San Sebastian Bible

³² Toto tox xyijcan 'el eb' jun macn̈ tzyac' 'ayn cha, tztac' sc'uxn eb' jantc to tas tzcani. A jun cha, man̈ muloc. Toto 'ixta', matz yixtj eb' yofrenda eb' yit israelal tzyac' 'ayin, sec ma'oj cham eb', xchi Dios.

Chuj San Mateo Bible

³² Ayic toxo ix eyic'canel jun macan̈ te vach' chi' d'ayin, tzaxo yal e vaan jantacto scan chi', malaj e mul tz'och yuj e vaani. A d'a icha chi', max eyixtejb'atlaj yofrenda eb' eyetisraelal to vic yaji. Yuj chi' maxtzac javilaj chamel d'a eyib'an̈, xchi Jehová, xa chi d'a eb'.

Nm 18:32 ပူးပေါင်းရင်းမြစ်များ

Ex 28:43

Yowlal tzya'ch Aarón jun tzo'n̈ pichl chi yet' eb' yunnal yic tz'ochch eb' 'a yol in cajnub' 'aj tzin chaj in b'a eyet'oc. Yowlal 'aych yuj eb' yic tz'ochch eb' 'a stz'ey yet'l xajmb'al yic tzyiln eb' yopiso, sec wach' ma'oj 'och smul eb', ma'oj comn cham eb'. A jun tic, ley tz'ajcn 'a Aarón yet' 'a eb' yin̈tl b'aq'uin̈, xchi Dios 'a Moisés.

Lv 19:8

A mach tzchin no chib'j chi 'a schab'jial, tzcann̈j jun mul chi 'a yib'an̈, yujto comn tzyutj sc'uxn tas to wic yaji. A jun cha, yowlal tz'ijx 'el 'a e cal.

Lv 22:2

An Jehová in, an tzwala. Al jun tic 'a Aarón yet' 'a eb' yin̈til, to yowlal tzya'iljsb'a eb' yet' jun tzo'n̈ ofrenda tzyac' eb' eyit chon̈b' 'ayin, toto ma'ay, may wel'ch 'a sat eb' tzyal cha.

Malaquías 1:7

Ax tic, tzeyij cot 'ixm pan to man̈ smojc sjaw 'a yet'l xajmb'al to wic yaji, tzlajw cha, tzcob' e c'anb'n pax 'ayn 'ixtic: ¿Tas wal 'aj tz'och qui mul 'ayach? xe chi. Ax tic, x'och e mul 'ayin, yujto xe patquilj can 'el jun yet'l xajmb'al cha.

Nm 18:22

Ax pax smasnil jun tzo'n̈ xo eb' eyit israelal, may yaln eb' yic sjaw 'a in Mantiado, toto ma'ay, 'oj 'och smul eb', ax scham eb' ta'.

Nm 18:31

tztac' sc'uxn eb' yet' yunnal, yaln̈ej 'aj 'ayc' eb'. Atn jun chi tztojlej eb', yic tzmunlj eb' 'a yol Mantiado cha.

Nm 19:1

'Ix yaln Jehová 'a Moisés yet' 'a Aarón 'ixtic:

1 Co 11:27

Yuj cha, toto 'ay mach man̈ wach'c tzyutj swan jun pan tic, tzyu'lb'an pax jun vaso yic Cajlil tic, caw tz'och smul 'a sniwnal Cajlilec, yet' 'a schiq'uil.

1 Co 11:29

Yujto a yic tzqui wanec, tzcu'nec jun tic, toto matz cham qui nanec sniwnal Cajlilec, caw tzquijec cot yailal 'a quib'an̈.