Nehemías 10:36 - Chuj San Sebastian Bible

³⁶ An̈jtona', 'oj qui'c 'at eb' qui b'ab'l 'unnal, no sb'ab'l 'une qui wacax, no sb'ab'l 'une qui calnelu yet' sb'ab'l 'une qui chiwo 'a yatut qui Diosalec, 'a yojltac eb' ya'mal 'och qui ti 'a Dios, atn eb' tzmunlj 'a yatut qui Diosalec cha, 'icha yaj stz'ib'x can 'a ch'an̈ ley.

Chuj San Mateo Bible

³⁶ Ol quic'anpaxcot eb' b'ab'el cuninal yed' b'ab'el yune' noc' co vacax yed' noc' co calnel d'a stemplo co Diosal d'a yichan̈ eb' sacerdote smunlaj ta', icha val yajcan d'a ch'an̈ ley chi'.

Nehemías 10:36 ပူးပေါင်းရင်းမြစ်များ

2 Cr 31:5

A yic x'elt jun ley cha, 'ix yac' eb' israel jantcn̈ej tas x'el 'a sc'ojl ya'ni, jun tzo'n̈ yel xo wach': atn 'ixm trigo, yal uva, aceite, no yalchab', yet' jantcn̈ej tastc tzmol chan̈ eb'. An̈jtona', xyi'n pax cot eb' sdiesmoal sat yawb'en. Caw niwn 'ix yac' eb'.

Nehemías 12:44

A 'a yic jun c'ul cha, 'ay jun tzo'n̈ eb' x'ajx 'och yopiso stan̈wni yet'l 'aj tzmolx ofrenda, atn sb'ab'l sat 'awb'en, yet' diesmo, a tzyal jantc tas tzcot 'a junjn lugar 'a yol yic junjn chon̈ab'. A jun tzo'n̈ cha, yic eb' ya'mal 'och sti eb' 'anma 'a Dios, yet' jun tzo'n̈ xo eb' levita, yujto a eb' chon̈ab' caw wal tzalj eb' yet' eb', yujto tz'a'w servil eb' 'a yatut Dios.

Nehemías 13:5

yuj cha, 'ix ya'n jun niwquil cuarto 'a 'a, atn jun 'aj tzlaj molx q'uen ofrenda 'a yaln̈taxi, 'aj tzmolx incienso, jun tzo'n̈ yamc'ab', sdiesmoal 'ixm trigo, yal uva yet' aceite. A jun tzo'n̈ chi 'ix alxi to tz'ajx 'a eb' levita, 'a eb' tzb'itni, 'a eb' tan̈m puerta, yet' 'a eb' ya'mal 'och sti eb' 'anma 'a Dios.

Ex 13:2

A eb' b'ab'l winc 'unn tz'alj 'a e cal, pojc 'el eb', yujto wic tz'ajcn eb'. An̈jtona no cajb'en noc', a sb'ab'l 'une e no', wic yaj no', xchi.

Ex 23:19

A wal sb'ab'l sat eyawb'en wach' tz'el-l 'a sat lum lu'um, a tzeyij cot 'a watut an Jehová e Diosal in tic. Man̈ e tz'an̈ no cotc chiwo 'a scal yal yim no snun.

Ex 34:19

Smasnil eb' e b'ab'l winc 'unin, wic yaj eb'. An̈jtona' 'ixta pax yuj sb'ab'l 'une e wacax, e calnelu mto e chiwo. Toto smam no 'unn cha, wic yaj no'.

Malaquías 3:10

A ticnec jun, 'ijec cot smasnil e diesmo, tzwul eya'nc 'a sc'un̈ail 'ay 'a watut, sec wach' 'ay tas tzc'ux eb' tzin 'a'n servil. An Jehová in, tztac' wuj smasnil, an tzwala: 'A'nec prowal nab'an, ax eyilni 'icha to 'oj in jac sc'un̈ail satchan̈ 'ayex, ax in secn 'emt yaxilal 'a eyib'an̈, man̈x 'a yet'l 'aj 'oj eyac'a'.

Nm 3:13

A yic xwa'n cham smasnil eb' sb'ab'l winc 'unn eb' 'aj Egipto, 'ix in colcn 'el eb' sb'ab'l winc 'unn eb' et israelal yic tz'och eb' wico'oc. 'Ixta pax smasnil sb'ab'l 'une no scajb'en noc' eb', wic yaj no'. An Jehová in, an tzwala, xchi Dios.

Gl 6:6

A eb' tzon̈ cuynec 'a spaxti Dios, yowlal tzon̈ colwjec ca'n jun tzo'n̈ tas wach' 'a eb'.

Dt 12:6

A 'a jun lugar cha, ata 'oj 'at e n̈ustz'a e xajmb'al, atn no noc' caw wach' 'a sat Jehová. Tzeyij 'at e diesmo, e colwal to ta'wb'il eyu'uj, yet' eyofrenda ton̈j tz'el 'a e c'ojl eya'ni. An̈jtona pax no sb'ab'l 'une e wacax yet' e calnelu, yowlal tzeyij 'at 'a jun lugar cha.