Malaquías 4:1 - Chuj San Sebastian Bible

¹ A Jehová tztac' yuj smasnil, a tzaln 'ixtic: Wan sjaw jun c'u yic 'oj wa'nc yowl in c'ojol, yic 'oj wa'nc satxoc 'el smasnil eb' b'uchwjum, yet' eb' tzb'on maysch'olnil, man̈x 'a junc eb' 'oj canoc. 'Icha wal tz'aj stz'a 'ejm te 'ac 'a yol junc jorna, 'ixta wal 'oj 'aj eb'.

Chuj San Mateo Bible

¹ A Jehová Yajal d'a Smasanil tz'alan icha tic: Ab'ec, van sja sc'ual yic ol in ch'oxan yoval in c'ool. Ol in satel masanil eb' b'uchumtac yed' eb' sc'ulan chucal icha val tz'aj stz'ab'at an̈ ac d'a yol junoc horno. Man̈xa junoc eb' ol canoc.

Malaquías 4:1 ပူးပေါင်းရင်းမြစ်များ

Job 18:16

Lajn 'oj 'aj 'icha junc te te tacn̈ xo sch'an̈lyib', tacn̈ xo pax sc'ab'.

Salmos 119:119

'Icha tz'aj c'alem sjulx 'eli, 'ixta 'ix otj e'n 'el smasnil eb' maysch'olnil snab'en 'a sat lum lum tic, yuj cha, tzin chamc'ojlan jun tzo'n̈ cuynb'il tzal tic.

Salmos 37:9

A eb' tzb'on maysch'olnil 'oj satxoc 'el eb' yuj Jehová. Palta ax eb' tzya'ch sc'ojl 'a 'a, 'oj can cajn eb' 'a sat lum lum tic.

Ex 15:7

Yet' wal a niwquil poder 'ix a'n 'ejm eb' tznib'j tzyac' owl et'oc. A wal yic tzcot owal, 'icha wal stz'a 'ejm te 'ac, 'ixta wal tz'aj slajw 'ejm eb' o'oj.

Is 40:24

Lajn eb' yajl chi 'icha junc 'unn c'ultc tot 'awb'il, mant 'a sch'an̈lyib' tz'at 'a yol lu'um. Toto tzyutz'j 'och Dios yic' 'a 'a, wal 'a yajn̈ej tztacji, ax chacxuxm'ic' tz'utz'n 'at 'icha solcal trigo.

Is 41:2

¿Mach 'oj 'a'n checljoc jun rey 'a 'aj tzq'uel c'u? ¿Mach 'oj 'a'n yac' ganar jun rey chi owal yic tzann̈j 'aj 'oj 'ec'oc? ¿Mach 'oj 'a'n 'och jun tzo'n̈ nacion̈ 'a yol sc'ab' jun rey cha, sec tzyij 'ejm sb'a eb' 'a 'a? A yespada yet' sjul-lab' jun rey cha, a 'oj pechnoc 'el eb', ax sactzic can 'at eb' 'a juncxo lugar 'icha tz'aj solcal trigo tzpucn 'at 'a scal 'ic'.

Is 47:14

Palta a eb' cha, lajn eb' yet' te 'ac, a te c'ac' 'oj n̈usnctz'a eb', ma'oj stac' scoln 'el sb'a eb' a jun cha. Yujto a jun c'ac' cha, man̈ lajnoc 'icha junc comn c'ac' to a te c'atztz tz'och 'a 'a, wach' qui c'achn 'a sti'.

Is 5:24

Yuj cha, 'icha wal tz'aj stz'a 'ejm te 'ac yuj c'ac', c'uxn tz'a te xil chi smasnil, 'ixta 'oj 'aj slajw 'el eb' tic, 'oj tacjoc 'el eb' 'icha te te c'al xo sch'an̈lyib', munxoj tzpucl snich, 'icha xoj pococ tz'ajcni. Yujto tzpatquiljcan 'el eb' sley Jehová tztac' yuj smasnil, atn qui Diosal to Cojxni.

Is 9:18

Yujto a maysch'olnil 'a scal 'anma', lajn wal 'icha junc c'ac' tz'ec' 'a tzalan, c'uxn tz'a te q'uix yu'uj, lum waymtac, te niwc te', tzch'umn sb'a yic'l 'a scal tab'.

Is 9:19

Yujn̈ej yowl sc'ojl Jehová tztac' yuj smasnil, yuj cha, ax slajw 'el jun chon̈b' tic. 'Icha n̈ej stz'a te 'ac yuj c'ac', 'ixtan̈ej 'oj 'aj slajw 'ejm eb' 'anma tic, man̈x 'oj sna eb' yit 'anma'il.

Ez 20:38

'Oj wic' 'elt eb' maysch'olnil snab'en 'a e cal, yet' eb' x'och 'ajc'ojlal 'ayin, 'oj wic' 'elt eb' 'a e cal 'a lum chuc chon̈b'al 'aj 'ayx 'ec' cha; palta man̈x 'oj 'och eb' 'a lum slum eb' yit israelal cha. Ax in eyojcan 'eli, to an Jehová in, cojn in ton Dios in.

Ez 21:32

'Oj e tz'a 'ejmi, ax sb'ey e chic'l 'a sat lum lum tic. Man̈x 'a mach 'oj e nan cot b'aq'uin̈. An Jehová in, an tzwala, xchi Dios, xa chi 'a eb', xchi 'ayin.

Ez 24:11

Tzlajw cha, tza'n pax q'ue jun chen chi 'a yib'n̈ stzac'ac', palta man̈x 'a tas tz'em 'a yojol, sec 'oj 'ulb'xoc 'elt slumal chi stz'a'i, ax sacb' can pax jun chen cha. 'Ixta 'oj 'aj yel jun sc'uxmtacl cha.

Ez 34:17

An Jehová in, an tzwala: A eb' in chon̈ab' lajn eb' 'icha no calnelu, mto 'icha no chiwo. A no chiwo cha, cojn tas wach' xlaj sc'uxu', ax tas xlaj yac' sobra, ton̈j xlaj stec' yet' yoc, xlaj yuc' a a caw wach', xlaj ste'cn tatb'oc eb' a yet' yoc cha. ¿Tom wach' tzc'ux no calnelu chi jun tzo'n̈ tas xlaj ste'cn 'ejm no chiwo cha? ¿tom wach' tzyu'j no calnelu chi a a ste'cn tatb'oc no chiwo cha?

Ez 7:10

A ticnec xc'och sc'ul slajw 'el e chon̈b' cha. A maysch'olnil a 'oj yac' yajlil 'a 'a, yujto tzyij chan̈ sb'a eb' 'anma cha.

Jl 2:1

'Utz'jec q'uen trompeta 'a tzaln Sión. 'Utz'jec q'ue'en yic tzalx yab' eb' cajn 'a lum tzaln yic 'emmquilal yaj 'a Jehová. 'Ib'x cab' chan̈ smasnil eb' cajn 'a Judá, yujto jab'xoj sjaw jun c'u yic 'oj ya'nc Jehová yowl sc'ojol.

Jl 2:31

'Oj 'och q'uic'q'uinl 'a c'u, ax 'uj caw chac 'oj 'aj 'icha chic'. A jun tzo'n̈ tic, 'oj ujoc 'a yic mantzac jaw sc'ul in jaw an Jehová in tic. A jun c'u cha, caw niwn yel'chi, caw 'ay smay.

Am 2:9

An Jehová in, an tzwala, to in satjnac 'el eb' amorreo, yuj wa'n slum eb' 'ayex. Wach'xam niwc stel eb' 'icha te c'ute', wach'xam tzatz eb' 'icha te jiy, palta 'oj in satl eb' 'a jun 'ejmn̈ej.

Abdías 1:18

A eb' yin̈tl Jacob, yet' eb' yic José, a eb' cha, lajn 'oj 'aj eb' 'icha te snich c'ac'. Ax eb' yin̈tl Esaú, lajn 'oj 'aj eb' 'icha te jach'b'en tzlajw stz'a 'ejm yuj te c'ac' cha. An Jehová in, an tzwala, to man̈x 'a junc eb' yin̈tl Esaú 'oj colchjoc can 'eli, xchi Dios.

Nahúm 1:10

'Icha to caw 'u'm ex 'an̈. 'Oj e lajw 'ejm 'icha tz'aj stz'a 'ejm te q'uix caw jeltz'm yaji mto 'icha tzyac' yoc trigo.

Sofonías 1:14

Caw jab'xoj sjaw jun c'u yic 'oj ya'nc Jehová yowl sc'ojol. A jun c'u cha, caw wal niwn yel'chi, la'n xo yaji, yelc'ojlal sjawi. 'Ab'ec, a wal 'a yic jun c'ul cha, a eb' soldado to caw te'n cob' yip, 'oj 'oc' eb' yuj xiwc'ojlal.

Sofonías 1:18

A wal 'a jun c'u yic 'oj ya'nc Jehová yowl sc'ojl cha, caw ma'oj colchjoc 'el eb' 'anma yuj q'uen oro, mto yuj q'uen plata, yujto yuj yowl sc'ojl cha, 'oj satl smasnil nacion̈. Wal 'a yajn̈ej ax slajw 'el smasnil 'anma 'a yolyib'n̈q'uinl tic, 'icha tz'aj junc tas satl yuj c'ac'.

Zacarías 14:1

Jab'xoj wal sjaw sc'ul yowl sc'ojl Jehová, yic 'oj spojnc 'ec' eb' 'ajc'ojl tastc 'ay 'a eb' cajn 'a Jerusalén, a xon 'a jun lugar chi 'oj spojc' eb'.

Malaquías 3:15

'In tzquilc wal an̈ec tic, to a eb' tzb'an̈ sb'a, tzaljc'ojlal yaj eb'. 'Ixta pax eb' maysch'olnil tas tzb'o'o, caw wach'n̈j tz'el'ch eb'. 'Intax eb' tzte'wtzej sb'a 'a sat Dios, may yailal tzjaw 'a yib'n̈ eb', xe chi, xchi Dios.

Malaquías 3:18

Atta 'oj nachjoc 'el eyuj ax tic, chajtlto chuc spac yic eb' wach' sb'eyb'al tzin 'a'n servil, chuc pax spac yic eb' maysch'olnil sb'eyb'al matz in 'a'n servil, xchi Dios.

Malaquías 3:2

¿Mach wal 'oj techjoc yuj 'a jun c'u yic 'oj in jaw cha? ¿Mach wal 'oj stac' ste'wtzan sb'a yoch lin̈n 'a wojltac? Yujto a wopiso, lajn wal 'icha te c'ac' tzc'an eb' tzb'on q'uen oro, mto 'icha sawon tzc'an eb' tzju'wi.

Malaquías 3:3

An Jehová in, lajn 'oj wutc eb' yin̈tl Leví 'icha junc mach tz'em wocn yi'l slumal q'uen plata, mto q'uen oro 'a scal c'ac'. 'Oj in sacb'tzoc eb', atn eb' ya'mal 'och e ti 'ayin, 'ixta to b'i'an, ax sta'n ya'n eb' yofrenda 'a wojltac, 'a 'icha wal smoj yet' 'a stojlal.

Malaquías 4:5

'Ab'tec, 'oj in b'ab'l checc cot in checb' Elías, yic mantzac jaw jun c'u yic 'oj checljoc chan̈ yowl in c'ojol. A jun c'u cha, caw niwn yel'chi, 'ay xo smay tas 'oj ujoc.

Mt 3:12

A jun cha, lajn 'icha junc winc tzchayj strigo, tz'el stzapil 'a scal. Tzlajw schayni, tzmoln strigo chi 'a yet'ul. Ax stzapil 'ixm cha, tzlan̈cn 'at 'a yib'n̈ junc c'ac' may b'a'n̈ tztupi, xchi Juan chi 'a eb'.

Lc 19:43

Yuj cha, 'ay wal jun tiempoal 'oj jawoc, ax eb' 'ajc'ojl yajch 'a jun chon̈b' tic, 'oj yoych eb' scol-lal. Ax yoch oyn eb' yac' owl yet'oc.

Lc 21:20

A yic 'oj eyila', caw oymntac yajch eb' soldado 'a smasnil stitc Jerusalén tic, nachj cab' 'el eyu'uj, to wal slajw 'el jun chon̈b' tic.

Lc 6:23

Tzaljan̈ec, 'ay cab' e tzaljc'ojlal si'mb'il, yujto caw niwn spac 'oj e cha 'a satcha'an̈. 'Icha tz'ajx 'och 'a eyib'n̈ ticnec, 'ixta 'ajxnac 'och 'a yib'n̈ eb' schecb' Dios pecti'.

2 Ts 1:8

Ata 'oj yac' syailal eb' matz 'ojcan 'el Dios, eb' matz yiclni wach' 'ab'x yic Cajlil Jesucristo.

A Schab'il Carta San Pedro 3:7

A satcha'an̈ yet' sat lum tic, an̈ja 'ayc' ticnec. Palta yaljnac can Dios, to yowlal 'oj cann̈j 'ixtic, masnto 'oj 'ajxc 'emt c'ac' 'a 'a. Atta 'oj jawc jun c'u yic b'eyc'ojlal. Ax eb' may yel'ch Dios 'a sat, 'oj satcn 'el eb' 'a jun 'ejmn̈ej ta'.