Lv 23:24 - Chuj San Sebastian Bible

²⁴ Al jun tzo'n̈ tic 'a eb' et israelal to an tzwal 'ixtic: A 'a b'ab'l c'u yic yucl 'uj, ata tzex 'ilji. Tzeyamn e b'a yic tzex 'och 'emmquilal 'ayin. Tzeyutz'n q'uen trompeta yic tzin e nan coti.

Chuj San Mateo Bible

²⁴ Al d'a eb' etchon̈ab' icha tic: A d'a sb'ab'el c'ual yic yuquil uj, tzeyic' eyip, tze molb'anoch e b'a ejmelal d'ayin, spuji q'uen trompeta yic tze naancot in vach'c'olal.

Lv 23:24 ပူးပေါင်းရင်းမြစ်များ

1 Cr 15:28

Smasnil eb' israel caw tzya'l eb' yaw yuj tzaljc'ojlal, yic 'ix 'ijx cot te caxa cha. 'Ix 'utz'x pax cacha, trompeta, syucn eb' platillo, salterio yet' arpa.

2 Cr 5:13

Xlajw cha, junn̈j xyutj eb' yutz'n strompeta cha, junn̈j xyutj eb' sjaj sb'itni, junn̈j xyutj pax eb' yaln wach' paxti', yuj yaln eb' yuj diosal 'a Jehová. 'Ix 'utz'x trompeta, 'ix yucx platillo, yet' jun tzo'n̈ xo yamc'ab', yic tz'och b'it 'a Dios. Ya' sb'a wan sb'itn eb', 'ix yaln eb' 'ixtic: Calc wach' paxti 'a Jehová, yujto yel xo wach' snab'en, yujto 'ay schamc'ojlal 'a jun 'ejmn̈ej, xchi eb' 'a sb'it. A 'a yic jun rato cha, 'ix macchj 'el yol yatut Jehová chi yuj jun 'asun.

Esdras 3:6

A 'a yic b'ab'l c'u yic yucl 'uj, 'ix schan 'el eb' 'anma yich ya'n xajmb'al to tz'a smasnil, palta mantzac 'em yich yatut Jehová.

Nehemías 8:2

A win Esdras cha, ya'mal 'och sti eb' 'anma yaj win 'a Dios. 'Ix yi'n cot win ch'an̈ ley 'a sat eb' 'anma yamn yaj cha, 'a b'ab'l c'u yic yucl 'uj. Ata syam sb'a smasnil eb' winac, smasnil eb' 'ix 'ix, yet' smasnil eb' 'unn tzax nachj 'el yu'uj.

Salmos 89:15

Mamin Jehová, a eb' 'anma tzach b'itnan yet' tzaljc'ojlal, caw wach' yic eb', yujto a 'a checnb'il tzb'eylb'ej eb'.

Salmos 98:6

B'itn coyc yet' qui tzaljc'ojlal 'a yojltac qui Reyal. B'itn coyc yet' jun tzo'n̈ yamc'ab' tz'utz'xi, 'icha trompeta yet' no cacha.

Is 27:13

A 'a jun c'ul cha, 'oj 'utz'xoc jun trompeta to 'oj 'ab'xoc sjaj 'a najat, a eb' satnc can 'at 'a Asiria, yet' eb' 'ijxnac can 'at 'a Egipto, 'oj jawc eb' wul yac' 'ejm sb'a 'a Jehová, atn 'a lum tzaln to yic 'emmquilal yaj 'a Jerusalén.

Lv 23:23

'Ix yaln Jehová 'a Moisés 'ixtic:

Lv 25:9

A 'a lajn̈e yoch yucl 'uj, atn sc'ul yic tz'ajx lajwc mul, ata tzeyutz'j no ch'ac calnelu 'a smasnil yol e chon̈ab'.

1 Co 15:52

A jun cha, caw ji'lti 'oj jawc tza'n̈joc. Jun mutz'satiln̈ej 'oj 'aj sjawi, yic 'oj 'oc' jun slajb' trompeta. A yic 'oj 'oc' jun trompeta cha, ax spitzw pax eb' creyente chamnc xo, man̈x b'a'n̈ 'oj cham eb'. An̈ xo pitzn on̈c to ta', 'oj jelmjoc pax qui niwnalec tic.

1 Ts 4:16

'Oj 'awtxoc jun checnb'il yuj jun sat ángel, ax yoc' pax strompeta Dios. At wal ta 'oj 'emloc Cajlilec 'a satcha'an̈. Ax eb' creyente chamnc xo, 'oj b'ab'l pitzwc pax sniwnal eb'.