Josué 8:20 - Chuj San Sebastian Bible

²⁰ Ax yic xmeltzj 'at q'ueln eb' winc yic Hai chi 'a spatquil, 'ix yiln eb' to wan sq'ue wan tocc'oc stab'l schon̈b' eb' stz'a'i, xq'ue'ch jun tab' chi 'a satcha'an̈. Man̈x 'a 'aj wach' scoln sb'a eb', ax eb' israel x'at 'elc 'a lum cusltac lum cha, 'ix meltzj eb' yac' owl chi yet' eb'.

Chuj San Mateo Bible

²⁰ Axo yic ix meltzajb'at q'uelan eb' vin̈ soldado aj Hai chi', ix yilan eb' van sq'ue stab'il schon̈ab' eb' chi' stz'ab'ati. Man̈xa b'aj ix yal scolan sb'a eb', yujto a eb' israel van yel d'a eb' chi', ix meltzaj eb' yac' oval yed' eb'.

Josué 8:20 ပူးပေါင်းရင်းမြစ်များ

Gn 19:28

'Ix yilni to a 'a Sodoma, 'a Gomorra yet' 'a smasnil ya'lical jun lugar cha, wacqui sq'ue wan stab'il, 'icha sq'ue wan stab'l junc niwquil jorna.

Job 11:20

Palta ax eb' maysch'olnil snab'en, 'oj cob' sayc' eb' mach 'oj colwjoc 'a 'a, palta caw nab'a xoj. Man̈x 'oj 'ilchjoc 'aj wach' scoln sb'a eb', axn̈ej schamlil eb' 'aj 'oj ya'ch snab'en, xchi win Zofar.

Salmos 76:5

A eb' soldado caw jelan, 'ix 'ijx 'ec' sricoal eb'. Chamnc pax eb', man̈x 'a jac tas 'ix stac' yuj eb'.

Is 34:10

Sc'ual yac'wlil sn̈ilchj sc'aq'uil, 'oj q'uen̈j wan stab'l 'a smasnil tiempo, 'oj 'actxoc can 'a jun 'ejmn̈ej; man̈x 'a b'a'n̈ 'ay junc mach 'oj 'ec' ta'.

Josué 8:19

Ax eb' soldado c'ub'b'il 'el cha, 'ix 'elt eb' 'a yet'l chi muc'uc. 'Ix 'och eb' 'a jun chon̈b' cha, yajn̈ej 'ix ya'n 'och eb' sc'aq'uil.

Josué 8:21

Ax xyiln Josué yet' eb' soldado to tocq'ui sq'ue wan stab'l jun chon̈b' chi stz'a yuj eb' soldado c'ub'b'il 'el cha, 'ix yojcan 'eli, to tox 'ix 'och eb' soldado 'a yol chon̈b' cha. 'Ix meltzj eb' yac' owl yet' eb' 'aj Hai cha.

Apoc 18:9

Ax eb' niwc yajl 'a yolyib'n̈q'uinal, eb' xb'on 'ajmulal yet' jun tzalx 'ixl tic. Caw locn eb' yet' 'a sricoal. Palta ax yic 'oj yilnc eb' sq'ue stab'l stz'a'i, caw 'oj 'oc' eb'. 'Oj cul-loc eb' yoc' yu'uj.

Apoc 19:3

Xlajw cha, xyaln pax eb' 'ixtic: ¡Calc wach' paxti 'a Dios! yujto man̈x 'a b'a'n̈ 'oj 'och wan sq'ue stab'l stz'a jun tzalx 'ixl cha, xchi eb'.

Jueces 20:38

Yujto yaljnac can eb', to a yic tox 'ix 'ajx ganar jun chon̈b' cha, tzn̈usn can eb'. 'Oj q'ue wan stab'l stz'a'i, sec tznachj 'el yuj eb' to tox 'ix 'ajx ganar jun chon̈b' cha.

Jueces 20:40

Palta ax yic schan 'el yich sq'ue wan tocc'oc stab'l jun chon̈b' cha, 'ix yiln 'at eb' 'a spatquil, chajtlto tocq'ui sq'ue wan stab'l schon̈b' eb' 'a satchan̈ stz'a'i.

Jueces 20:41

Yuj cha, 'ix swach' te'wtzan sb'a eb' israel 'a yojltac eb' yic Benjamín. Ax eb' 'ajc'ojl cha, caw 'ix xiw eb' yuj tas 'ix jaw 'a yib'n̈ cha.