Josué 21:27 - Chuj San Sebastian Bible

^27-33 Ax 'a eb' yin̈tl Gersón, win yunnal Leví, a 'a eb' x'ajx 'oxlajn̈e chon̈b' yet' swalab' no cajb'en noc' 'a junjn chon̈b' cha. 'A yol smacb'en spacl xo eb' yin̈tl Manasés ata x'elt chab' xo chon̈b' cha: Atn Golán, 'ay 'a yol yic Basán, 'aj tzcol sb'a eb' tzmiln junc 'anma', yet' chon̈b' Beestera. Ax 'a yol smacb'en eb' yin̈tl Isacar, ata x'elt chan̈e xo chon̈ab': Atn Cisón, Daberat, Jarmut yet' En-ganim. 'A 'a yol smacb'en eb' yin̈tl Aser, ata x'elt chan̈e xo chon̈ab': Atn Miseal, Abdón, Helcat yet' Rehob. 'A yol yic Neftalí, ata x'elt 'oxe xo chon̈ab': Atn Cedes 'ay 'a yol yic Galilea, 'aj tzcol sb'a eb' tzmiln junc 'anma'. X'ajx pax Hamot-dor yet' Cartán 'a eb' cha.

Chuj San Mateo Bible

^27-33 Axo pax eb' levita yin̈tilal Gersón, chab' chon̈ab' ix ac'ji d'a eb' d'a yol yic nan̈alxo eb' yin̈tilal Manasés. A juntzan̈ chon̈ab' chi', aton Golán yed' Beestera d'a yol yic Basán. A d'a chon̈ab' Golán chi' syal scolan sb'a eb' smac'ancham junoc anima. Axo pax d'a yol yic eb' yin̈tilal Isacar chan̈e' chon̈ab' ix ac'jipax d'a eb', aton Cisón, Daberat, Jarmut yed' En-ganim. Axo d'a yol yic eb' yin̈tilal Aser, an̈eja' chan̈e' chon̈ab' ix ac'jipax d'a eb', aton Miseal, Abdón, Helcat yed' Rehob. Axo pax d'a yol yic eb' yin̈tilal Neftalí, oxe' chon̈ab' ix ac'jipax d'a eb', aton Cedes d'a yol yic Galilea, b'aj syal scolan sb'a eb' smac'ancham junoc anima. Ix ac'jipax chon̈ab' Hamot-dor yed' Cartán d'a eb'. Yuj chi' a masanil chon̈ab' ix yic' eb' yin̈tilal Gersón, 13 d'a smasanil, ato syal jay macan̈ yaj eb'.

Josué 21:27 ပူးပေါင်းရင်းမြစ်များ

1 Cr 6:71

Ax 'a eb' yin̈tl Gersón, a tzyal jantc sb'isl eb', ata 'ix 'ajx chon̈b' Golán 'ay 'a yol yic Basán, yet' chon̈b' Astarot yet' ya'lical junjn chon̈b' 'aj tzwa scajb'en noc' eb'. A chab' chon̈b' cha, ata 'ay 'a yol yic spacl eb' yin̈tl Manasés.

Dt 1:4

A yic mantzac yal Moisés jun tzo'n̈ tic, 'emnc xo win Sehón sreyl eb' amorreo yuj eb' israel. Ata cajn win 'a chon̈b' Hesbón. 'Ix 'em pax win Og sreyl Basán yuj eb'. Ata cajn win 'a Astarot yet' 'a Edrei.

Dt 4:43

A jun tzo'n̈ chon̈b' cha, atn eb' tic: chon̈b' Beser, 'a span̈nil lum cusltac lum 'a 'aj xcan eb' yin̈tl Rubén; chon̈b' Ramot, 'a yol yic Galaad, 'a lum 'aj xcan eb' yin̈tl Gad; yet' pax chon̈b' Golán, 'a yol yic Basán, 'a lum 'aj xcan spacl eb' yin̈tl Manasés.

Josué 20:8

Ax 'a junx sc'axpil 'ec' a Jordán, 'a stojlal 'aj tzq'uel c'u 'a Jericó, ata si'l eb' 'oxe xo chon̈b' tic: Béser 'ay 'a lum span̈nil yic cusltac lu'um, 'a yol yic eb' yin̈tl Rubén. Ramot 'a yic Galaad, 'a yol smacb'en eb' yin̈tl Gad. Golán 'a yol yic Basán, 'a yol smacb'en eb' yin̈tl Manasés.

Josué 21:6

X'ajx pax yic jun tzo'n̈ xo eb' yin̈tl Leví, eb' cotnc yin̈tl 'a win Gersón, 'oxlajn̈e schon̈b' eb' x'ajxi. Ata x'elt 'a yic eb' yin̈tl Isacar, 'a eb' yic Aser, 'a eb' yic Neftalí, yet' 'a spacl xo eb' yin̈tl Manasés 'ayc' 'a lum Basán.