Josué 10:13 - Chuj San Sebastian Bible

¹³ 'Ix 'och wan sb'ey c'u yet' 'uj, masnto xlajw scham eb' 'ajc'ojl yajch 'a eb' israel cha. Atn jun tic tz'ib'b'il can 'a ch'an̈ slibro win Justo, ata tzyal 'ixtic: 'Ix 'och wan sb'ey c'u 'a spacl satcha'an̈, tecn jun c'u 'ix 'och wan sb'eyi, ma'ix q'uic'b' xon 'a jun c'u cha, xchi.

Chuj San Mateo Bible

¹³ Yuj chi' ix och vaan c'u yed' q'uen uj, masanto ix satel eb' ayoch ajc'olal d'a eb' israel chi'. Icha chi' yaj stz'ib'chajcan d'a Jazer to ix och vaan sb'ey c'u d'a snan̈al satchaan̈, quen am man̈ junoc c'ual ix och vaan sb'eyi, majxo q'uic'b'oclaj.

Josué 10:13 ပူးပေါင်းရင်းမြစ်များ

A Ch'an̈ Schab'l Libro Samuel 1:18

'Ix yalni to yowlal tzcuyx eb' 'aj Judá 'a jun b'it tic. A jun b'it tic, ata tz'ib'b'il can 'a ch'an̈ un̈ yic Jaser, 'aj tzyal 'ixtic:

A Ch'an̈ Schab'il Libro Yic Yab'ixal Eb' Rey 20:10

'Ix ta'w Ezequías 'ixtic: —A yic tz'at wewen 'a yojltac man̈ 'ajltacoc. Palta ax pax wewen tzmeltzj 'a spatic, caw 'ajltac jun cha, xchi.

Ester 8:13

A scopiail jun un̈ cha, yowlal tz'at 'a junjn chon̈b'al, tzlajw cha, tzalx 'el 'a smasnil eb' 'anma', chajtlto caw ley jun cha, yic wach' a 'a jun c'u cha, a smasnil eb' israel yojc xo eb' to 'oj spac sb'a eb' 'a eb' 'ajc'ojl cha.

Job 9:7

A tztac' yaln 'a c'u, to matz q'uel 'a junc c'u cha, a tztac' yaln pax 'a jun tzo'n̈ c'anal sec matz yac' eb' sacq'uinlal.

Salmos 148:3

A c'u, 'uj yet' smasnil c'anal, yal cab' eb' swach' paxti 'a Jehová.

Salmos 19:4

palta c'uxn tzpucb't yab'xil 'a smasnil chon̈ab', masnto tzc'och 'a 'aj tzlajw c'och yolyib'n̈q'uinl tic. A 'a satcha'an̈, ata b'ob'il can 'och c'u yu'uj.

Is 24:23

A 'a jun c'ul cha, 'oj 'och q'uic'q'uinl 'a c'u yet' 'a 'uj, ax Jehová tztac' yuj smasnil, 'oj 'och Reyl 'a lum tzaln Sión 'a Jerusalén, ax sch'oxn stzictznil 'a sat eb' yichm wincal schon̈ab'.

Is 38:8

A 'a jun sreloj win Acaz, ata 'oj yac' meltzjoc Dios jun yen̈l yoc c'u lajn̈c'ajoc 'a spatic, atn jun yoc c'u tox xeq'ui, xchi Isaías. Ax x'aji, 'ix 'el'ch 'icha yaj yaln can cha, 'ix meltzj jun yoc c'u chi lajn̈c'aj 'a spatic, atn jun yoc c'u tox x'ec' cha.

Jl 2:10

Caw tz'ib'x lum lum 'a yojltac e no', tzi'mj pax satcha'an̈. Tztup yoc c'u yet' yoc 'uj yuj yen̈l no', man̈x checloc swetzwni c'anal.

Jl 2:31

'Oj 'och q'uic'q'uinl 'a c'u, ax 'uj caw chac 'oj 'aj 'icha chic'. A jun tzo'n̈ tic, 'oj ujoc 'a yic mantzac jaw sc'ul in jaw an Jehová in tic. A jun c'u cha, caw niwn yel'chi, caw 'ay smay.

Jl 3:15

A c'u yet' 'uj man̈x 'oj yac' sacq'uinlal, ax jun tzo'n̈ c'anal, 'oj sat stzictznil eb'.

Habacuc 3:11

Ax c'u yet' 'uj, 'ix 'och wan eb' sb'eyi, yic 'ix 'elt jupljoc a jul-lab' cha, caw 'ix q'ue wan jupljoc a lanza.

Nm 21:14

Atn jun tzo'n̈ lugar chi tzb'inax cot yuj ch'an̈ libro, yic yab'xil owl yic Jehová, 'a 'aj tzyal 'ixtic: On̈ 'e'tec 'a chon̈b' Vaheb 'a yol yic Sufá, on̈ laj 'e't 'a ch'olctac 'aj 'ay a a', yet' 'a yojl a Arnón.

Nm 31:2

Al 'a eb' et israelal tic, to tzpac sb'a eb' 'a eb' 'aj Madián, tzlajw xoj cha, ax a chami, xchi Dios.

Mt 24:29

A 'a yic 'oj lajwc 'ec' jun niwn yailal cha, 'oj 'och q'uic'q'uinl 'a c'u, 'oj tup yoc 'uj, ax yemt jun tzo'n̈ c'anal, yujto 'oj stzicb'tan̈c Dios tas 'ay 'a satcha'an̈.

Mt 5:45

'Ixta 'oj eyutc e ch'oxni to yel yunnalx qui Mam 'ayc' 'a satcha'an̈. Yujto a tz'a'n 'emt yoc c'u 'a yib'n̈ eb' maysch'olnil yet' 'a yib'n̈ eb' wach'. An̈jtona', tzya'n pax 'emt n̈ab' 'a yib'n̈ eb' man̈ tojloc snab'en yet' 'a yib'n̈ eb' tojl snab'en.

Lc 18:7

An̈jtona Dios, caw 'oj sb'oyaj pax eb' sic'b'il 'el yu'uj, eb' to tz'awj 'a sc'ual yac'wlil 'a 'a. ¿Tom 'oj 'ec' tiempo sb'onyaj eb'?

A Tas Sc'ulejnac Eb' Schecab' Jesús Hechos 2:20

'Oj 'och q'uic'q'uinl 'a c'u, ax 'uj caw chac 'oj 'aj 'icha chic'. A jun tzo'n̈ tic, 'oj ujoc 'a yic mantzac jaw sc'ul in jaw an Eyajl in tic. A jun c'u cha, caw niwn yel'chi, caw satjub'tac.

Josué 10:11

'Ay pax eb' xcob' yac' ganar s'at 'elc 'a eb' israel cha, ya' sb'a wan spichlj 'ejm eb' 'a lum span̈nil Bet-horón. Ax Jehová 'ix 'a'n cot jun tzo'n̈ niwc sq'uenal sacb'at 'a yib'n̈ eb', masnto 'a Azeca. Yel xo wal caw niwn eb' xcham yuj q'uen sq'uenal sacb'at cha, 'a yib'n̈ pax eb' xtzu'x cham yuj eb' israel cha.

Josué 10:14

May juncxo c'u 'aj 'ix uj 'icha jun tic, may 'aj ujnac 'a yic pecti', may pax 'aj 'ix uj jun 'ejmocx 'a spatquil xo, yic xyab'n Dios tas xyal junc 'anma', yujto a xcolwj yet' eb' israel 'a owal.

Apoc 21:23

A 'a jun chon̈b' cha, may tz'och yoc c'u, may pax tz'och yoc 'uj. Yujto a sacq'uinlal Dios yet' pax sacq'uinlal jun tzcuch Calnelu, a tzyac' sacq'uinlal 'a 'a.

Apoc 6:10

A eb' cha, caw 'ip xyal eb' 'ixtic: —Ach Cajlil, caw wach'n̈j ach. Caw tz'el'chn̈ej tas tzala. ¿B'a'n̈ wal 'oj a b'eyc'ojloc eb' 'anma 'a yolyib'n̈q'uinl yuj qui chaml on̈, ax a'n spac 'a eb'? xchi eb'.

Apoc 6:12

A jun tzcuch Calnelu cha, 'ix wiln sn̈i'chtan pax jun swacl seyo. 'Ix 'ec' jun quixcab' caw ow. A c'u, caw q'uic' x'aj 'icha lopil. Ax 'uj, caw chac x'aj 'icha chic'.

Apoc 8:12

'Ix yutz'n jun schan̈l ángel strompeta. Yajn̈j wal cha, jab'xoj man̈ spacloc x'aj sjuw c'u, yet' 'uj, yet' pax c'anal. Jab'xoj man̈ spacloc x'aj sq'uic'b' eb'. Yuj cha, junjn c'u man̈x 'a wal sacq'uinal, ax 'a junjn 'ac'wal, man̈x 'a wal yoc 'uj yet' c'anal.

Jueces 16:28

Xlajw cha, 'ix yaln win Sansón 'ixtc 'a Jehová: Tzin tew 'aych Mamin Jehová to tzin 'a na coti. Cojxn̈ej jun 'ejm tic tzac' wip ach in Diosal, yic tzwa'n spac 'a eb' filisteo yuj chab' yol in sat 'ix yij 'elt eb' tic, xchi Sansón.

Jueces 5:2

B'itn coyc qui masnil 'a Jehová, yujto a x'a'n 'och jun tzo'n̈ eb' yajl 'a chon̈b' Israel, yujto caw 'ay pax eb' soldado 'a chon̈b' tic caw c'asn sc'ojl ya'n owal.