Jn 17:21 - Chuj San Sebastian Bible

²¹ Tzin c'an 'ayach, sec junxn̈ej 'oj 'aj snab'en eb' smasnil. Mamin, junn̈j in et'oc, junn̈j ach pax wet'oc. Comnoc 'icha caji, 'ixta 'oj 'aj eb', junn̈j tz'aj eb' quet'oc. Toto 'ixta', ax eb' 'anma 'a yolyib'n̈q'uinl tic, 'oj ya'ch eb' 'a sc'ojol, to ach checjnacn coti.

Chuj San Mateo Bible

²¹ Tzin c'an d'ayach yic junxon̈ej ol aj spensar eb' smasanil. Mamin, junn̈ej vaj ed'oc, junn̈ej pax aj ved'oc. Ichoc val caji, ichocab' ta tz'aj pax eb', junn̈ejocab' tz'aj eb' qued'oc. Tato icha chi', axo eb' anima d'a yolyib'an̈q'uinal tic, ol yac'och eb' d'a sc'ool to a ach a checnac in coti.

Jn 17:21 ပူးပေါင်းရင်းမြစ်များ

Jeremías 32:39

Junxn̈ej 'oj 'aj snab'en eb' wu'uj, jun lajnxoj 'oj yutc eb' in ya'n servil 'a smasnil tiempo, yic tz'och swach'loc eb', yet' swach'loc yin̈tl eb'.

Sofonías 3:9

A yic 'oj jawc jun c'ul cha, cojxn wach' paxti 'oj wac' yal eb' 'anma smasnil, sec smasnil chon̈b' 'oj yal sb'a eb' 'ayin, junxn̈ej 'oj yutc eb' in ya'n servil.

Zacarías 14:9

A 'a yic jun c'ul cha, cojxn̈ej Jehová 'oj yac' Yajlil 'a yib'n̈ smasnil yolyib'n̈q'uinal, cojxn̈ej ton Dios. A Dios, Jehová sb'i, cojxn̈ej 'oj b'inaxoc.

Mr 3:24

Q'uinloc 'ay junc niwc chon̈b' 'aj tzlaj spoj sb'a eb' yajal, tzlaj ya'nc eb' owal; toto 'ixta', yajn̈ej tzjuw 'el jun yic eb' cha.

Jn 10:16

'Ay pax jun tzo'n̈ xo eb' 'oj ya'ch sc'ojl 'ayin, palta man̈ quit chon̈b'oc eb'. Yowlal 'oj in molb'tzoc cot eb'. A eb' cha, 'oj syiclc eb' tas tzwala. Junn̈j 'oj 'aj eb' wic smasnil, yujto junn̈j mach tz'iln eb'.

Jn 10:30

An tic, caw lajn in yet' qui Mam Dios, yujto junn̈j 'anmal waj yet'oc, xchi Jesús 'a eb' 'aj Judea cha.

Jn 10:38

Palta an tic, yel wan in b'on 'icha tzb'o in Mam cha. Yuj cha, wach'xam matz eya'ch e c'ojl 'a tas tzwala, palta 'a'c 'och e c'ojl 'ayn yuj jun tzo'n̈ tzin b'o tic. Toto 'ixta', 'oj nachjoc 'el eyu'uj, chajtlto 'aych qui Mam Dios 'ayin, 'ayn 'och pax 'a 'a, xchi 'a eb'.

Jn 11:42

Wojc xoni to smasnil tiempo tzab' tas tzwala. Palta yuj eb' 'anma tic, tzwaln jun tzo'n̈ tic 'ayach, sec wach' 'oj ya'ch eb' 'a sc'ojol, chajtlto ach checjnacn coti, xchi Jesús.

Jn 13:32

Toto tzin ch'oxo to niwn yel'ch Dios, an̈jtona 'oj sch'oxl paxi, to niwn pax wel'chi. Yajn̈ej ax sch'oxn 'eli, to niwn wel'chi.

Jn 13:35

Toto tzlaj e chamc'ojloc e b'a junjn ex, 'oj yojcoc 'el eb' 'anma smasnil, to yel in cuywum ex, xchi Jesús 'a eb'.

Jn 17:11

Jab'xoj wal 'ayn 'ec' 'a yolyib'n̈q'uinl tic, ax in pax q'ue et'oc. Ax eb' tic, 'oj laj can eb' jacx 'a yolyib'n̈q'uinl tic. Mamin, caw tojln̈ej a nab'en. A eb' xac' 'ayn tic, tza tan̈wj eb' yet' a poder, sec junxn̈ej tz'aj snab'en eb' 'icha waj et'oc.

Jn 17:18

'Icha in otj in a checn cot 'a scal eb' 'anma 'a yolyib'n̈q'uinl tic, 'ixta tzwutj eb' in checn 'at 'a scal eb' 'anma cha.

Jn 17:20

Man̈ yujocn̈ej eb' tic tzin leslwi. Tzin leslwi pax yuj eb' tot 'oj ya'ch sc'ojl 'ayn yuj tastc 'oj yal eb' in checb' tic.

Jn 17:25

Mamin, caw tojl a nab'en. A eb' yic yolyib'n̈q'uinl tic, man̈ ach yojcoc eb'. Aln tic, wojc ach. Ax eb' tic, yojc xo eb' to ach checjnacn coti.

Jn 17:3

Caw yel cojn ach Dios ach, a eb' 'ojtnac ach, an̈jtona yojc in pax eb' an checb'iln cot oj tic, atn eb' chi 'ay sq'uinl 'a jun 'ejmn̈ej.

Jn 17:8

A wal a paxti 'a'jnac 'ayin, c'uxn xwal 'a eb'. Ax eb', xya'ch eb' sc'ojl 'a 'a. Yuj cha, yojc eb' to yel a 'aych cotnc in. Tzya'ch eb' 'a sc'ojol to ach checjnacn coti.

Jn 3:17

An tic, Yunnaln ton Dios. Man̈ yujoc wa'n 'och syailal eb' 'anma', in ya'n cot 'a yolyib'n̈q'uinl tic, palta yuj in coln eb'.

Jn 5:23

'Ixta yutjnac in Mam ya'n wopiso an Yunnaln tic, sec wach' lajn wel'ch yet' in Mam chi 'a sat smasnil 'anma'. Toto 'ay eb' may wel'ch 'a sat, an̈jtona', may yel'ch pax in Mam 'a sat eb', yujto a checjnacn coti.

A Tas Sc'ulejnac Eb' Schecab' Jesús Hechos 2:46

Junjn c'u, tzyamn sb'a eb' 'a yamq'uil yatut Dios. Tzlaj syamn sb'a junjn eb' 'a yatut, tzpojn 'ec' eb' 'ixm pan yic Cena 'a scal. Junxn̈ej tzlaj wa eb' 'a tzaljc'ojlal. Caw junc'ojlal xlaj yutc sb'a eb'.

A Tas Sc'ulejnac Eb' Schecab' Jesús Hechos 4:32

Ax eb' creyente smasnil, jun lajnn̈ej xyutj eb' snab'en. Junc'ojlaln̈ej x'aj eb'. May junc mach 'ix aln yico'oc junc tas sch'ocoj. Yujto jantcn̈ej tas 'ay 'a eb', junn̈j yaj yuj eb' smasnil.

Ro 12:5

'Icha qui niwnalec tic, 'ixta on̈ec. Wach'xam niwn on̈ec, palta 'icha to junn̈j 'anmal cajc 'a yol sc'ab' Cristo. 'Icha jun tzo'n̈ tastc 'ay 'a junc niwnal cha, to junn̈j yaji, 'ixta 'on̈ec, junn̈j cajc pax qui masnil.

1 Co 1:10

Ex wu'tac, ex wanab', tzin tew 'ayx 'a sb'i Cajlil Jesucristo, to junxn̈ej tz'aj e nab'en e masnil ta'. Man̈ comnoc tze pojl e b'a. Caw jun lajn xoj tzeyutj e nab'en, jun lajnn̈ej tzeyutj e nan smasnil tas.

1 Co 12:12

A qui niwnalec tic, wach'xam niwn tas 'ay 'a 'a, palta junn̈j yaji. 'Icha jun tzo'n̈ tas 'a qui niwnalec tic, 'ixta cajc 'och 'a Cristo. 'Icha to sniwnal Cristo cajc qui masnil.

1 Co 6:17

Palta a yic tzca'nec qui b'a 'a Cajlil, junxn̈ej tzon̈ 'ajc can yet' 'a 'esal.

Gl 3:28

Man̈x 'a yel'chi, toto israel on̈, mto griego on̈. Wach'xam 'ayn̈ 'och mosoal to man̈ quico'oc qui b'a, wach'xam mun quic qui b'a, toxn̈ej winac, toxn̈ej 'ix, may yel'chi, yujto junxn̈ej cajc qui masnil yet' Cristo. 'Icha to junxn̈ej 'anmal cajc qui masnil.

A Scarta San Pablo D'a Eb' Aj Filipos 1:27

Palta wach'xam 'oj in c'ochx 'ayex, wach'xam ma'ay, caw wach'n̈j tzeyutj e b'eyb'al 'icha tzyal jun wach' 'ab'x yic Cristo. Toto 'ixta', 'oj wab' eyab'xil, chajtlto an̈ja te'n ex, to an̈ja junn̈j yaj e nab'en ta'. 'Oj wab' paxi, to junn̈j tzeyutj eya'n 'och e c'ojl 'a jun wach' 'ab'x yic colnb'il, caw te'n tzeyutj e b'a 'a 'a.

1 Jn 1:3

A jun quiljnac, cab'jnac spaxtin chi 'on̈, a tzcal 'ayx on̈, sec wach' junxn̈ej tzex 'aj quet' on̈. Yujto wal yel junxn̈ej cajc yet' qui Mam Dios. Junxn̈ej cajc pax yet' Yunnal, atn Jesucristo.

1 Jn 5:7

'Ay 'oxwn̈ tzyac' testigoal sb'a yu'uj: