Jn 15:25 - Chuj San Sebastian Bible

²⁵ Palta 'ixtn tic tz'aj yel'ch jun tzo'n̈ tic, sec tz'el'ch tas tz'ib'b'il can 'a ch'an̈ ley 'aj tzcob' ya'ch eb' snab'en. 'A 'aj tzyal 'ixtic: Tzcomn chichn 'och eb' 'ayin, xchi 'a Ch'an̈ U'un̈.

Chuj San Mateo Bible

²⁵ Palta icha tic ix aj yelc'och juntzan̈ tic, yic tz'elc'och tas tz'ib'yajcan d'a ley b'aj nivanoc syac'och spensar eb'. Aton jun tz'alan icha tic: Nab'an̈ej scomon och eb' ajc'olal d'ayin, xchi d'a Slolonel Dios Tz'ib'ab'ilcani.

Jn 15:25 ပူးပေါင်းရင်းမြစ်များ

Salmos 109:3

A eb' tzchichn 'och 'ayin, tzyij eb' yip 'a in patquil tzwab'i, tznib'j eb' tas tzin yutej, palta toc 'ay in mul 'a eb'.

Salmos 35:19

A eb' 'ajc'ojl yajch 'ayin, man̈ cab' comn tzaljc eb', man̈ tz'eynoc cab' tzin yutj eb' in yilni. May in mul 'a eb', palta tzcomn chichn 'och eb' 'ayin.

Salmos 69:4

'Ec'b'al sb'isl eb' tzcomn chichn 'och 'ayn 'icha sb'isl xil in jolom; caw xjelnb'i eb' 'ajc'ojl yajch 'ayin. Wach'xam may in mul, palta tznib'j eb' tzin smil chamoc, tznib'j eb' tzc'an meltzjoc tas 'ayn 'a nab'an̈ej, palta may tas wel'jnac.

Salmos 7:4

Toc wal 'ay 'aj tu xwutj in b'a 'a eb' wach' xyutj sb'a 'ayin. Toc 'ay 'aj 'ix wixtj eb' 'ajc'ojl yajch 'ayin, 'a yic may jac smul eb' tz'och 'ayin.

Mt 10:8

A eb' ya'ay yuj lepra, tz'ec' eyac' b'oxc eb'. Yet' pax jun tzo'n̈ xo eb' ya'ay, tzeyac' b'oxc sc'ojl pax eb'. Tzeya'n pax pitzwc eb' chamnac. An̈jtona', tz'ec' laj eyi'nc pax 'el ewin demonio 'a eb' 'anma'. Xe chaj jun e poder tic 'a nab'an̈ej, yuj cha, 'oj e colwj pax yet' 'a nab'an̈ej jun xo.

Lc 24:44

Xlajw cha, xyaln pax 'a eb' 'ixtic: —A ticnec, 'ix 'el'ch 'icha yaj waln 'ayex, yic in 'ec' eyet'oc. 'In waljnac 'ayex, to yowlal 'oj 'el'choc jantcn̈ej wab'xil tz'ib'b'il can 'a ley yic Moisés, yet' tas tz'ib'b'il can yuj eb' schecb' Dios, yet' jun tzo'n̈ xo wab'xil 'a ch'an̈ libro salmos, xchi 'a eb'.

Jn 10:34

Yuj cha, 'ix yaln pax 'ixtc 'a eb': —A 'a ch'an̈ ley 'aycn 'ayn̈ec, ata tz'ib'b'il can 'ixtic: An tzwala, ax tic, dios ex, xchi Dios 'a Ch'an̈ Un̈ cha.

Jn 13:18

—Matz wal eyuj e masnil, yujto wojtac, machx sic'b'ilx xo 'el wu'uj. Palta yowlal 'oj 'el'choc tas tz'ib'b'il can 'a Ch'an̈ U'un̈, 'a 'aj tzyal 'ixtic: A jun in wach'c'ojl to junn̈j tzin wa yet'oc, 'ix meltzj 'och 'ajc'ojlal 'ayin, xchi.

Jn 19:36

'Ixta yaj sb'ocn jun tzo'n̈ tic, sec tz'el'ch tas tz'ib'b'il can 'a Ch'an̈ U'un̈, 'a 'aj tzyal 'ixtic: May junc sb'acl 'oj ma'x pojoc, xchi.

Ro 3:19

Cojquec, jantcn̈ej tas tz'ib'b'il can 'a ley, a tzaln 'a eb' 'aych 'a yol sc'ab', sec wach' may junc mach 'oj stac' scoln sb'a. Yuj cha, smasnil 'anma 'a yolyib'n̈q'uinl tic, 'oj b'eyc'ojlaxc eb' yuj Dios.

Ro 3:24

Palta yujn̈ej swach'c'ojlal Dios, on̈ 'ochc wach'l 'a sat ticnec, yujto colchjnacn̈ec xo yuj Cristo Jesús.

2 Co 11:7

A yic 'ec' walnc 'el wach' 'ab'x yic colnb'il 'a e cal ta', may xon jac tas in c'anjnac 'ayex. 'Ixta wutjnac wi'n 'ejm in b'a, sec caw niwn eyel'chi. Palta, ¿Tom maysch'olnil wutjnac in b'a 'ixta'?

Gl 2:21

Matz tac' calnec, to nab'an̈ej sch'oxjnac Dios swach'c'ojlal 'a eb' wit israelal. Q'uinloc yujn̈ej qui yiclniec ley yic Moisés, tzyaln Dios, to wach'n̈ec 'a sat, to 'ixta', nab'an̈ej xcham Cristo cujec.

2 Ts 3:8

Eyojtac, may 'aj qui c'anjnac wa qui b'a 'ayx 'a nab'an̈ej on̈. Palta sc'ual yac'wlil on̈ munlj 'a e cal on̈. Caw ca'jnac 'ip qui munlj on̈, yujto qui nib'jnac on̈, may mach tz'ab'n syal ya'n qui gasto ta 'on̈.

Apoc 21:6

Xlajw cha, xyaln pax 'ayn 'ixtic: —Tox 'ix b'o 'el'chi. An tic, b'ab'l waj 'a smasnil, slajb' in paxi. 'Icha chab' letra A yet' Zeta, 'ixta 'in. A eb' 'ay stacn̈ti'al, 'oj wac' yuc' eb' jun spac'b'a tz'a'n q'uinl 'a jun 'ejmn̈ej. 'Oj wac' 'a eb' 'a nab'an̈ej.

Apoc 22:17

A Yespíritu Dios, yet' eb' 'icha to 'oj 'och yistloc jun tzcuch Calnelu, tzyaln eb' 'ixtic: —¡Cotn̈ec! xchi eb'. Yet' eb' tz'ab'n tas tzyal jun un̈ tic, yal cab' pax eb' 'ixtic: —¡Cotn̈ec! xchi cab' eb'. A eb' 'ay stacn̈ti'al, toto tznib'j eb', cot cab' eb'. Yu' cab' eb' jun a tz'a'n qui q'uinl 'a jun 'ejmn̈ej. Atn jun a tz'ajx 'a nab'an̈ej.