Jeremías 51:28 - Chuj San Sebastian Bible

²⁸ Ya' cab' lista sb'a eb' nacion̈ yic tz'och eb' 'a owal. Cot cab' eb' sreyl Media, yet' eb' gobernador, yet' eb' to niwc yel'ch yopiso, yet' pax smasnil eb' 'anma cajn 'a yol smacb'en, xchi Dios.

Chuj San Mateo Bible

²⁸ Yac'ocab' lista sb'a juntzan̈xo nación sb'at yac' oval d'ay. Cotocab' eb' sreyal Media, eb' gobernador, eb' nivac yopisio yed' masanil eb' anima ay d'a yol smacb'en, xchi Jehová.

Jeremías 51:28 ပူးပေါင်းရင်းမြစ်များ

Gn 10:2

Atn sb'i eb' yunnal Jafet tic: Gomer, Magog, Madai, Javán, Tubal, Mesec, yet' Tiras.

1 Cr 1:5

Eb' yunnal Jafet: atn Gómer, Magog, Madai, Javán, Tubal, Mesec yet' Tirás.

Ester 1:3

A yic stz'acw yoxl ab'il yoch win Asuero chi reyal, 'ix ya'n 'och win jun niwn wa'el, yet' jun niwquil q'uin̈ yet' smasnil ewin niwc yajal, ewin 'ay yopiso yet' winac, eb' syajlil eb' soldado 'aj Persia, yet' eb' 'aj Media; eb' gobernador, yet' pax eb' yajl yaj 'a junjn niwc chon̈b' cha.

Ester 10:2

A smasnil jun tzo'n̈ sjelnal win rey yet' yopiso, yet' pax yab'xil tas wal xyutj win ya'n jun niwquil 'opiso 'a win Mardoqueo, a jun tzo'n̈ cha, 'ix tz'ib'x can 'a yojl ch'an̈ un̈ 'aj tz'ib'x tas ujnc 'a yol yic Media yet' Persia.

Is 13:17

'Oj wi' cot eb' 'aj Media, ax sjaw eb' 'a scal eb'. A jun tzo'n̈ 'anma cha, may tz'och q'uen plata yet' q'uen oro yuj eb'.

Is 21:2

Caw wal 'ay xo smay jun tas x'ajx wil tic 'a 'icha waychil. A mach toxn to tu snab'en, caw tu tas tzb'o'o, a mach milwjum xoni, caw tzmilwjn̈ej. 'Ixquec mu'c 'a owl ex 'aj Elam, ex 'aj Media, 'ochn̈ec oyn 'a chon̈b' Babilonia. Smasnil jun tzo'n̈ yailal xya'ch Babilonia cha, c'uxn 'oj 'och wan yuj Jehová.

Jeremías 25:14

'Oj wa'ch eb' 'a yol sc'ab' jun tzo'n̈ niwc nacion̈, yet' 'a yol sc'ab' jun tzo'n̈ niwc yajl to caw 'ay xo smay sb'inaxi. 'Ixta wal 'oj yutc eb' schan spac, atn tas smoj schan eb' yuj tas tz'el sb'oni, xchi Dios 'ayin.

Jeremías 25:25

'Ix wa'n 'a smasnil eb' rey 'a chon̈b' Zimri, 'a Elam, yet' 'a Media,

Jeremías 50:41

'Iltec wal jun tzo'n̈ soldado tzcot 'a stojlal norte, til wal eb' rey tzcot yet' jun nacion̈ to caw jelan, wan syamn sb'a eb' 'a najat.

Jeremías 51:11

A Jehová 'ix 'a'n sb'o eb' sreyl chon̈b' Media jun cha, yujto nab'ilx xon yu'uj to 'oj satl Babilonia. 'Ixta wal 'oj yutc ya'n spac yuj tas 'ix 'aj yixtx 'el yatut yuj eb'. Tzalx 'a eb' soldado: 'A'c lista e jul-lab', 'a'c 'och tas tzmacn sat jul-lab' 'ayex.

Jeremías 51:27

Ch'oxc chan̈ jun senya yic owl 'a Babilonia. 'Utz'jec q'uen trompeta, sec tzjaw smasnil nacion̈ yac' owl 'a 'a. Cot cab' eb' 'aj Ararat, yet' eb' 'aj Mini, yet' pax eb' 'aj Askenaz yac' owl yet'oc. Si'c 'och junc general tzjucb'tzan eb' soldado 'a owal. 'At cab' no chej 'a owal, niwn cab' no 'icha no c'ulb' man̈x jantcoc sb'isul.

Jeremías 51:29

A lum lum tic, caw 'oj 'ib'xoc lu'um, 'oj tzicb'tan̈xoc, yujto 'oj 'el'choc tas nab'il yuj Jehová. A yic 'oj 'ochcn Babilonia tic 'a cusltac lumal, man̈x 'a mach 'oj cajnoc.

Dn 6:1

'Ix ya'n 'och win rey Darío 120 eb' gobernador, sec a eb' tz'iln junjn chon̈b' 'ay 'a yol smacb'en win 'aj tzyac' yajlil.

Dn 6:8

A ticnec jun mamin rey, 'ac' a firma 'a jun ley tic, sec wach' may junc mach tztac' sjelni, a tzyal yaln qui leyl an̈ 'aj Media yet' an̈ 'aj Persia on̈ tic, to man̈xtzac 'ec' jun ley cha, xchi eb'.

Dn 8:20

A no calnelu chab' sch'ac xel cha, atn eb' sreyl chon̈b' Media yet' Persia tzch'oxo.

Dn 9:1

'Ix yaln pax Daniel 'ixtic: A Darío yunnal Asuero, ata cotnc yin̈tl 'a eb' 'aj Media, ata 'aych reyl 'a yol yic eb' caldeo.