Jeremías 50:6 - Chuj San Sebastian Bible

⁶ A wal eb' in chon̈b' tic, lajn wal eb' 'icha e no calnelu satnc can 'ati, yujto man̈ wach'c tz'aj stan̈wx yuj yilmal, yuj cha, tzsatcn 'at e no 'a eb' lum jolmctac witz. Axn̈ejta tz'ec' e no 'a eb' lu'um, jun xo tzsat sc'ojl e no 'a scolal.

Chuj San Mateo Bible

⁶ A in chon̈ab' tic, lajan icha noc' calnel satnacb'ati, max tan̈vaj yuj stan̈vumal, yuj chi' satcanb'at noc' d'a jolomtac vitz. Axon̈ej d'a jolomtac vitz chi' tz'ec' noc', axo tz'aji, sat sc'ol noc' d'a smacte'.

Jeremías 50:6 ပူးပေါင်းရင်းမြစ်များ

Salmos 116:7

A ticnec b'i'an, tzalj in c'ojl tzwab'i, yujto wach' snab'en Jehová 'ayin,

Salmos 119:176

In satc' 'icha tzyac' junc no calnelu tzsatq'ui, ach xo in a sayq'ui. In 'ilchj o'oj, yuj cha, matz wac' sat in c'ojl 'a jun tzo'n̈ a checnb'il tic.

Salmos 23:2

'Icha junc 'ilm calnelu tzyac' 'iljoc scalnelu 'a junc 'a'lic 'ay syaxil sat, tzyi'n 'at e no 'a 'aj caw wach' sb'ey lab'b'oc a a', 'ixta waj o'oj.

Salmos 32:7

A 'aych tzin col in b'a, ach tzin a tan̈wj 'a yol sc'ab' tas 'ay smay, 'oj 'el waw ach in b'itnan yuj in colnb'il 'ix ac'a.

Salmos 90:1

Mamin, 'a yictax pecti', yic xlaj 'ec' jun tzo'n̈ tiempo 'a yalan̈, toxn to qui Colmal aj on̈.

Salmos 91:1

A eb' tzcol sb'a 'a yaln̈ spoder Jehová, atn jun caw niwn yel'chi, tztac' yuj smasnil,

Is 1:3

A no wacax yojc no yajal, yet' no b'uru yojc no 'aj tz'ajx wa yuj mach 'ay yico'. Palta ax in chon̈b' Israel, toxn man̈ jac tznachj 'el yu'uj toto wico', 'icha to may xon snab'en, xchi.

Is 30:15

A Jehová qui Diosal an̈ israel on̈c tic, jun Dios To Cojxni, a tzaln 'ixtic: Meltzjan̈c cot 'ayin, tzin eya'n 'och yipc e c'ojol, man̈ ex 'och 'il, sec 'ixta 'oj eyaj e colchji, xchi. Palta ax xo tic, ma'ix e chaj eyab'i'.

Is 32:2

A junjn eb', 'icha to qui colnb'il yaj eb' 'a junc 'ic' caw ow, mto 'a niwc yaxn̈ab'. 'Icha sb'e a yaj eb' 'a lum tacn̈ lu'um, 'icha wal pax yen̈l junc niwquil q'uen 'a lum cusltac lu'um, 'ixta yaj eb'.

Is 53:6

On̈ sactzic qui masnil 'icha no calnelu, mun xoj xqui na junjn on̈ 'aja b'el 'aj tzon̈ laj 'atcni, palta ax Jehová, 'ix ya'ch jun tzo'n̈ qui mulc chi 'a yib'n̈ jun schecb' cha.

Jeremías 10:21

A eb' 'aych yilmalc jun chon̈b' tic, caw may snab'en eb'. Matz c'an eb' sjelnal 'a Jehová, yuj cha, 'ix lajw 'ejm eb'. 'Ix sactzic can 'at eb' 'anma smasnil.

Jeremías 13:16

A tze na'a, to 'oj jawc sacq'uinal, palta to 'oj wach' q'uic'b'oc si'mb'il yu'uj. Yuj cha, meltzjan̈c 'a Jehová qui Diosalec, tzeyaln q'uet e mul, ya' sb'a mantzac ex telw 'a lum tzalctac yuj q'uic'q'uinl 'oj ya' coti.

Jeremías 2:20

A 'a yictax yaln̈taxi, syamn 'och yoch e tenmtacl 'ayin. Ma'ix eyiclj tas xwala. 'Ix eyaln 'ixtic: Matz qui nib'j tzach cac' servil, xe chi. Cojxn 'ajmulal tzlaj e b'o 'a lum tzalctac yet' 'a yich eb' te te caw pim xi'il.

Jeremías 2:32

¿Tom tzsat sc'ojl eb' 'ix cob'stac ya'n 'och ston̈, mto spichul yic tz'och eb' 'ix 'a nupnel? Ax xo wal ax in chon̈b' ex tic, pectix in 'atcn satc'ojlal eyu'uj.

Jeremías 23:1

A Jehová tzaln 'ixtic: Ex yilmal in chon̈ab', caw lajn ex 'icha eb' 'ilm calnelu to tzmiln cham e no', tzsactzic can 'at pax e no yuj eb', xchi Dios.

Jeremías 3:23

Wal yel, nab'an̈ej on̈ xit'c ca'ch sq'uin̈l jun tzo'n̈ comn dios 'a lum jolmctac witz. Palta cojn 'aych Jehová qui Diosal on̈, ata 'ay qui colnb'il on̈.

Jeremías 3:6

A 'a yic stiempoal win rey Josías, 'ix yaln Jehová 'ayn 'ixtic: ¿'Ix el am wal tas sb'o eb' et chon̈b' cha? Lajn wal xyutj sb'a eb' 'icha eb' 'ix 'ajmul 'ix. Caw tz'at eb' 'at sb'o mul 'a smasnil lum tzalctac, yet' 'a yich eb' te te pim xi'il.

Jeremías 33:12

A 'a jun lum lum sictac yajcn tic, man̈x 'a 'anma', man̈x 'a pax no noc' 'a sat smasnil. Palta ax 'oj 'ajoc, a 'a spatquil 'el jun tzo'n̈ chon̈b' tic, ata 'oj tan̈wxoc wa no calnelu yuj eb' yilmal jun 'ejm xo.

Jeremías 50:17

'Ix yaln pax Jehová 'ixtic: 'Icha no calnelu satnc can 'ati, pechb'il no yuj no león, 'ixta yaj eb' israel. B'ab'el 'emnc eb' yuj win sreyl Asiria. Xlajw cha, ax Nabucodonosor sreyl Babilonia, a 'ix wach' satn 'el eb'.

Jeremías 50:19

'Oj wi'x meltzjoc eb' israel 'a slum jun 'ejm xo. 'Oj sc'ux eb' smasnil tas wach' tzc'uxxi, atn tas tzpac' 'a lum Carmelo, yet' 'a Basán. 'Oj sc'ux eb' jantc tas tznib'ej, atn tas tzpac' 'a lum jolmctac witz 'a yol yic Efraín, yet' 'a Galaad.

Ez 13:10

A eb' tzyalch sb'a in checb'oc cha, caw wal 'ix yac' eb' 'es 'a eb' in chon̈ab'. 'Ix cob' yaln eb' 'ixtic: A ticnec man̈x e na to 'ay tas 'oj jawc 'a quib'n̈ec, xchi cob' eb', palta man̈ yeloc to may tas 'oj jawc 'a yib'n̈ eb'. A eb' cha, lajn tzyutj sb'a eb' 'icha junc mach tznipn junc muro ton̈j b'alb'ob'il. A b'i'ch tzya'ch sniploc, tzicn 'och tan̈ 'a spatic yic wach' cob' yilxi. Palta ax yic tzya'n junc niwquil yaxn̈ab' 'aych yic'al, 'aych pax sacb'at 'a scal, a jun n̈ab' chi tzma'n lan̈chjoc. Ax yic tzyiln eb' 'anma to lan̈chjnacx 'ejmi, tzyaln eb' 'ixtic: ¿Tas x'aj lum b'i'ch x'och sniploc jun muro tic? ¿'Ajtil xc'och lu'um? xchi eb'. 'Ixtnta yaj tas tzyal eb' cob' tzyalch sb'a in checb'oc cha. Tzyal cob' eb' to a Jerusalén may tas 'oj 'i'noc yuj smaysch'olnilal eb' 'anma cha. Palta an Jehová in, an tzwal 'ixtic: 'Oj wa' cot yowl in c'ojl 'a yib'n̈ Jerusalén, 'oj lajwc 'ejm yuj in c'a'lc'ojlal. Sactzicnac 'oj 'ajcn 'a sat lu'um, ax scheclj yipnub'al yich. 'Ixta 'oj 'aj scham eb' cob' tzyalch sb'a in checb'oc cha yujto a tas tzyal eb' 'a eb' in chon̈ab', lajn 'icha b'i'ch tz'och sniploc junc muro cha. Ax waln 'ixtic: 'Iltec, tox 'ix lajw 'ejm Jerusalén, yet' eb' 'anma xcob' 'alnoc to may tas tz'i'ni, 'oj in chioc. Atta 'oj in eyojcoc 'eli, to an ton Jehová in, to cojn in ton Dios in.

Ez 34:14

'Oj wi't eb' 'a lum lum caw 'ay syaxil sat, atn lum jolmctac witz wa'jnac 'a eb'. Ata 'oj wac' 'iljoc eb', ax wa'n tas caw wach' tzc'ux eb' ta'.

Ez 34:15

An Jehová Yajl in, an tzwala: To an 'oj in tan̈wc eb' in chon̈ab', ax wa'n 'iljoc eb' 'a sat slum cha.

Ez 34:16

'Oj in sayc' eb' satnc can 'ati, ax in molb'tzan eb' sactzicnac yajcn 'at cha, 'oj wan̈tc eb' lajwnac, eb' wecchil, ax wa'n yip eb' may yip, palta 'oj in satl eb' yajl yaj 'a scal eb', atn eb' tzlaj 'ixtn eb' in chon̈ab'. Caw wach' 'oj wutc in tan̈wni eb' in chon̈b' cha.

Mt 10:6

An̈j 'a eb' satnc to 'a scal eb' quit israelal, an̈jta tzex 'eq'ui. Yujto 'icha junc calnelu tzsatq'ui, 'ixta 'eb'.

Mt 15:24

'Ix ta'w Jesús 'a 'ix 'ixtic: —An̈j 'a eb' wit israelal checb'iln cot yuj Dios. Yujto 'icha jun tzo'n̈ calnelu tzsatq'ui, 'ixta eb', xchi.

Mt 9:36

A yic x'och q'ueln 'a eb' 'anma cha, 'ix 'o'ch sc'ojl 'a eb', yujto lajn eb' 'icha jun tzo'n̈ calnelu may yilmal, caw 'aych eb' 'a syailal, caw cusc'ojlal yaj eb'.

A Sb'ab'el Carta San Pedro 2:25

A 'a yic yalan̈, lajn on̈c 'icha jun tzo'n̈ calnelu pucnc can 'ati. Palta ax ticnec, on̈ meltzjec cot 'a Quilmalec, atn jun tzon̈ tan̈wniec.