Jeremías 39:8 - Chuj San Sebastian Bible

⁸ Ax eb' 'aj Babilonia cha, 'ix sn̈usn can eb' despacho, yet' smasnil n̈a 'ay 'a Jerusalén. 'Ix sma'n lan̈chjoc eb' smuroal chon̈ab'.

Chuj San Mateo Bible

⁸ Axo eb' soldado Babilonia chi' ix ac'anoch sc'ac'al spalacio vin̈ yed' masanil pat ay d'a Jerusalén chi'. Ix smac'anem lan̈naj smuroal jun chon̈ab' chi' eb'.

Jeremías 39:8 ပူးပေါင်းရင်းမြစ်များ

A Ch'an̈ Schab'il Libro Yic Yab'ixal Eb' Rey 25:8

Uque xo c'u yoch yol 'uj 'a yic sb'aln̈lajn̈il xo ab'il yoch Nabucodonosor reyl 'a Babilonia, 'ix jaw Nabuzaradán yet' eb' soldado 'a Jerusalén, sat yajl yaj yuj win rey cha, comandante pax yaj 'a eb' soldado tztan̈wni winac.

2 Cr 36:19

'Ix sn̈usn eb' yatut Dios, sma'n can lan̈chjoc eb' smuroal Jerusalén, sn̈usn eb' smasnil despacho, sma'n can juwc eb' smasnil tas to chan̈ stojol.

Nehemías 1:3

Xyaln eb' 'ayn 'ixtic: A eb' quit chon̈b' cha, 'ayc' eb' ticnec 'a Judá, caw cusltac yaj eb', q'uixweltac yilx 'och eb'. Ax pax yuj Jerusalén, mac'b'il 'ejm lan̈chjoc smuroal, tz'anc pax spuertail, xchi eb' 'ayin.

Salmos 79:7

Yujto on̈ smil cham eb' an̈ yin̈tl on̈ Jacob tic. Ax jun qui chon̈b' tic on̈, 'ix satcn 'el yuj eb'.

Is 5:9

A Jehová tztac' yuj smasnil, a 'ix 'a'n alxc 'ayn 'ixtic: A jun tzo'n̈ n̈a cha, toxn̈ej to niwac, mto caw wach' yilxi, palta 'oj can 'a sictaquil. Man̈x 'a mach 'oj cajnc eb' te'.

Jeremías 17:27

Palta toto an̈ja eyi'n 'oxt eyictz 'a spuertail chon̈b' tic 'a jun c'ul cha, 'icha to may yel'ch jun c'ul chi 'a e sat. To 'ixta', 'oj wa'ch c'ac' 'a spuertail chon̈b' tic. A jun c'ac' chi 'oj satnc 'el smasnil yatut eb' rey 'ay 'a Jerusalén tic, man̈x 'a mach 'oj stac' sma'n tupoc, xchi Dios, xa chi, xchi 'ayin.

Jeremías 21:10

An Jehová in, an tzwala to tox xin nalb'ej wi'n cot yailal 'a yib'n̈ jun chon̈b' tic, man̈xoc wach'l 'oj wi' coti. 'Oj wa'ch 'a yol sc'ab' sreyl Babilonia, ax 'oj n̈usnoc cani.

Jeremías 32:29

A eb' caldeo wan ya'n owl 'a jun chon̈b' tic, 'oj 'oxtoc eb' 'a yol chon̈b' tic, ax sn̈usn can eb', ax stz'a smasnil jun tzo'n̈ n̈a 'aj xlaj ya'ch eb' 'anma smul 'ayin, a 'a span̈nil yib'n̈ jun tzo'n̈ n̈a cha, ata xyac' tz'a eb' incienso 'a Baal, 'ix ya'n pax eb' yal uva 'a jun tzo'n̈ chuc diosal.

Jeremías 34:2

An Jehová in, e Diosal in, an tzwal 'ayach, to tz'at al 'ixtc 'a Sedequías sreyl Judá: Al 'a 'a to an Jehová in, an tzwal 'ixtic: 'Oj wa'ch jun chon̈b' tic 'a yol sc'ab' sreyl Babilonia, a 'oj n̈usnoc cani.

Jeremías 34:22

An Jehová in, an tzwala: 'Oj wac' jawc pax eb' 'a jun chon̈b' tic jun 'ejm xo, ax ya'n pax eb' owl yet'oc. 'Oj 'ejmc yuj eb', ax sn̈usn can eb'. Ax jun tzo'n̈ xo chon̈b' 'a yol yic Judá, 'oj wa'cn 'och eb' 'a cusltac lumal, man̈x 'a junc 'anma 'oj can cajn 'a 'a, xchi Dios.

Jeremías 37:10

Wach'xam ax tic, 'oj eyac' ganar yejm eb' soldado wan ya'n owl eyet'oc, yuj cha, cojxn eb' lajwnac 'oj can 'a scamplamento eb' cha, palta a eb' cha, 'oj q'uex wan eb', ax ya'n can 'och eb' sc'a'l jun e chon̈b' tic, xchi Dios, xa chi 'a eb', xchi 'ayn an Jeremías in tic.

Jeremías 38:18

Palta toto ma'oj a'ch a b'a 'a yol sc'ab' eb', to 'ixta', 'oj yi'c eb' jun chon̈b' tic, ax sn̈usn can eb', ach xo tic, man̈x 'oj stac' a coln a b'a 'a eb', xchi Dios, xin chi 'a win rey.

Jeremías 5:10

¡'Och cab' eb' 'ajc'ojl satl te uva, palta man̈ smasnilc te tzsatl eb'! ¡Sb'ijl cab' eb' sc'ab' te' cha, yujto man̈x wico'oc te'!

Jeremías 7:20

Yuj cha, an Jehová in, Yajl in, an tzwala, to 'oj wa' cot wal yowl in c'ojl 'a yib'n̈ jun lugar tic, 'a yib'n̈ eb' 'anma', 'a yib'n̈ no noc', 'a yib'n̈ te te', yet' 'a yib'n̈ smasnil 'awb'en. Lajn wal 'oj 'aj jun tic 'icha junc c'ac' to man̈x 'a tz'aj stupi, xchi Dios.

Lm 1:10

A eb' 'ajc'ojl yajch 'a Jerusalén, tox 'ix yij 'ec' eb' smasnil sricoal jun chon̈b' tic. 'Ix yiln pax eb' 'anma yoch eb' 'ajc'ojl chi 'a yol scajnub' Dios, atn jun tzo'n̈ 'anma yaljnac Dios to matz tac' yochi.

Lm 2:2

C'uxn 'ix satl Cajlilec smasnil eb' lum chon̈b' 'aj cajn eb' yin̈tl Jacob. Yuj yowl sc'ojl cha, caw wal yajn̈ej 'ix ya'n lan̈chjoc 'ejm smuroal chon̈b' Judá; 'ix yi'n can 'ejm jun nacion̈ tic 'a sat lu'um, yet' eb' 'aych cob' yajlil 'a 'a.

Lm 2:7

'Ix spatquilj can 'el Cajlilec jun tzo'n̈ yet'l xajmb'al, man̈x 'a yopiso yu'uj. 'Ix ya'n can 'och 'a yol sc'ab' eb' 'ajc'ojol yic tzma'n 'ejm eb' yatutal. Til wal 'aw 'aych 'a yol yatut Jehová, 'icha xo to q'uin̈ 'aych ta tzcab'i.

Ez 16:41

'Oj sn̈ustz'a eb' yatut, ax sb'eyc'ojlan eb' yet' yailal 'a sat jun tzo'n̈ xo eb' 'ix 'ix. 'Ixta 'oj aj yoch wan sb'on 'ajmulal, ax yactn stojn eb' chamc'ojlab'il yuj cha.

Ez 23:47

Ax eb' 'anma cha, a eb' 'oj julq'uenan eb' 'ix. 'Oj tzu'x cham eb' yet' q'uen espada, ax smilx pax yune eb' chi yet'oc. Tzlajw cha, ax sn̈usx can yatut eb'.

Ez 33:21

A 'a yic o'e yoch slajn̈il 'uj yic slajchwil ab'il quijx cot 'icha presoal, ata xjaw jun winc 'ayin, xyalni to ata tzcot 'elc 'a Jerusalén, yujto satl jun chon̈b' chi yuj eb' 'ajc'ojol.

Am 2:5

Yuj cha, 'oj wac' n̈usxoc tz'a Judá, ax jun c'ac' chi 'oj satnc 'el jun tzo'n̈ cuartel 'a Jerusalén, xchi Jehová.

Miqueas 3:12

Smulyujoc eb', ax slajw 'ejm Jerusalén, atn jun chon̈b' yic tzaln Sión, 'icha wal t'ocb'il lum 'oj 'ajcni. Jun b'uln̈ 'oj 'ajcn 'ejmi, ax lum tzaln 'aj 'ay yatut Dios, waymtac 'oj 'ajcni.