Jeremías 31:34 - Chuj San Sebastian Bible

³⁴ Man̈x yowlalc 'ayt junc mach 'oj alnc 'a junc xo yit chon̈b' 'ixtic: 'Ojquej 'el Jehová, man̈ xchioc. Yujto an Jehová in, an tzwala, to smasnil eb' 'oj in yojcoc 'eli, wach'xam 'unin, wach'xam 'ichm 'anma'. 'Oj wac' lajwc smul eb', man̈x 'a b'a'n̈ 'oj in na cot smul eb' cha, xchi Dios.

Chuj San Mateo Bible

³⁴ Man̈xo yovaliloc ay junoc ex ol eyal d'a eb' eyetchon̈ab' icha tic: Ojtaquejel Jehová, man̈xo xe chioc. Yujto a in Jehová in svala' to e masanil ol in eyojtaquejeli, vach'chom eb' unin, ma eb' icham anima. Ol vac' nivanc'olal schucal eb', man̈xa b'aq'uin̈ ol in nacot smul eb', xchi Jehová.

Jeremías 31:34 ပူးပေါင်းရင်းမြစ်များ

1 Cr 28:9

Ach xo tic ach wunnal Salomón, 'ojquej 'el wal qui Diosal, 'ac' servil 'a smasnil a pixan, mun cab' wal tz'el 'a a c'ojol, yujto a Jehová yojc smasnil tas 'ay 'a qui pixan, tznachj 'el pax yu'uj tas 'ay 'a qui nab'en. Toto 'oj al a b'a 'a 'a, 'oj ta'wc 'ayach, palta toto 'oj e'cn 'el a b'a 'a 'a, 'oj ach spatquilc can 'el 'a jun 'ejmn̈ej.

Salmos 25:7

Ax pax jun tzo'n̈ in mul jun, man̈ a na coti, man̈ a na cot jun tzo'n̈ in tu nab'enal 'ix in b'o 'a yic quelm in 'unin. Tzin a na cot yet' a chamc'ojlal, yet' a wach'c'ojlal.

Is 11:9

Xyaln Jehová 'ixtic: Man̈x 'a xon yailal 'oj jawc 'a tzaln Sión, atn jun sic'b'il 'el wu'uj, xchi. 'Icha wal tz'aj sb'ut'j 'el a mar, 'ixta wal tz'aj yolyib'n̈q'uinl tic sb'ut'j 'el yuj eb' 'anma tz'ojcan 'el Jehová.

Is 29:24

A eb' matz nachj 'el yu'uj, 'oj cuychjoc 'el jelnal yuj eb', ax eb' b'uchwjum, 'oj scha eb' yab' in cuynb'il, xchi Dios.

Is 30:26

A yoc 'uj, lajn 'oj 'aj 'icha yowl yoc c'u, ax yoc c'u, uc 'ejm 'oj 'aj yowb' sacq'uinlal, 'icha wal sacq'uinlal uque'oc c'u to yamn yaji, 'ixta wal 'oj 'aj jun c'u cha. Atn wal 'a yic jun c'ul cha, ata 'oj yan̈tc Jehová eb' schon̈ab', ax spichn tas lajwnac 'a eb' yu'uj.

Is 33:24

May junc mach cajn 'a Sión chi 'oj alnc 'ixtic: Ya 'ayn an tic, man̈ xchioc. A eb' cajn ta', 'oj 'ajxoc niwnc'ojlal smul eb'.

Is 33:6

'Oj ac' ste'nal eb', sjelnal eb', yet' snab'en eb'; a jun tzo'n̈ chi 'oj colnc 'el eb', ax yoch eb' yiclumal 'ayach, 'icha to 'oj 'och eb' ricoal o'oj.

Is 38:17

Caw niwquil in yailal 'ix 'eq'ui, palta 'ix 'och in wach'loc. 'Ix 'el pax 'a a c'ojl in a coln can 'el 'a yol sc'ab' chamel, yujto 'ix ac' niwnc'ojlal smasnil in mul.

Is 43:25

Palta an tic, yuj swach'l in nab'en, yuj cha, tzin sucsat e maysch'olnilal, man̈x 'a b'a'n̈ 'oj in na cot e mul cha.

Is 44:22

An 'ix wac' satl e maysch'olnilal yet' e mul, 'icha tz'aj satchan̈ xob' lum lu'um. Meltzjan̈c pax cot 'ayin, yujto 'oj ex wa'l 'a libre, xchi Dios.

Is 52:6

Yuj cha, 'oj c'och sc'ual, ax in yojcan pax 'el eb' in chon̈b' tic, 'oj nachjoc 'el yuj eb' to an paxtinnacn 'a eb', 'aynn̈ej pax 'ec' yet' eb', xchi Dios.

Is 54:13

'Oj in cuy eb' 'a swach'il, caw wach' oj 'aj 'el'ch eb'.

Jeremías 24:7

'Oj wac' wal snab'en eb', yic tzin yojcan 'el eb', chajtlto an ton Jehová in, ax eb', in chon̈b' yaj eb'; 'oj woch sDiosalc eb', yujto yet' wal smasnil sc'ojl eb', ax smeltzj paxt eb' 'ayin.

Jeremías 32:40

'Oj in b'o jun in trato yet' eb' 'a jun 'ejmn̈ej, to man̈x b'a'n̈ 'oj woch wan in b'on tas wach' 'a eb'. 'Oj wa'ch in b'a 'a snab'en eb' yic wach' caw 'ay wel'ch 'a sat eb', sec man̈x 'a b'a'n̈ 'oj yi'l sb'a eb' 'a in tz'ey.

Jeremías 33:8

'Oj wi'cn 'el smaysch'olnilal eb'. 'Oj wa'cn lajwc smul eb' cha, yet' smasnil stenmtacl eb' 'ayin.

Jeremías 50:20

An Jehová in, an tzwala: To a 'a yic jun tiempoal cha, 'oj in col 'elt jaywn̈ocx eb' 'aj Israel, yet' eb' 'aj Judá. 'Oj wi'l smasnil smul eb', yuj cha, man̈x 'a 'aj 'oj 'ilchjoc, 'oj wac' sat smasnil smul eb' cha, xchi Dios.

Jeremías 9:23

'Ix yaln pax Jehová 'ixtic: A eb' jelan, man̈ cab' yac' eb' tzaljoc sc'ojl yet' sjelnal. An̈jtona eb' 'ay yip, man̈ cab' yac' eb' tzaljoc sc'ojl yet' yip, an̈jtona eb' rico, man̈ cab' yac' eb' tzaljoc sc'ojl yet' sricoal cha.

Os 2:20

'Icha to wistzil 'oj aji, 'oj in b'o 'icha tas 'ix wala, 'ixta 'oj 'aj snachj 'el o'oj, to an Jehová in.

Miqueas 7:18

Mamin Jehová, may junc xo Dios lajn et'oc, yujto ach tic, ach tzac' niwnc'ojlal smul jaywn̈ xo eb' a chon̈b' tic xcani, tz'atcn satc'ojlal stenmtacl eb' o'oj. Man̈ 'ayc 'ec' yowl a c'ojl 'a smasnil tiempo, yujto tz'el 'a a c'ojl a ch'oxn pax a chamc'ojlal.

Miqueas 7:19

'Oj 'o'ch a c'ojl 'ayn̈ jun 'ejm xo. A qui mul on̈, 'icha to 'oj a muccn 'ejm 'a yol lu'um. A qui maysch'olnilal on̈, 'icha to 'oj a julcn 'at 'a xab'l yich a mar.

Habacuc 2:14

Tz'acn 'oj yutc yojcan 'el smasnil 'anma stzictznil Jehová, 'icha wal tz'aj sb'ut'j 'el a mar yuj a a'.

Mt 11:27

Xlajw cha, xyaln 'a eb' 'ixtic: —A 'in Mam, ya'jnac smasnil tas 'a yol in c'ab'. An Yunnaln tic, may junc mach 'ojtnacn si'mb'il, cojxn in Mam 'ojtnac in. An̈jtona', may mach tzcomn 'ojcan 'el in Mam. Cojxn in an Yunnaln tic, yet' pax eb' tzin nib'j tzwac' 'ojcanc 'eli.

Lc 1:77

Ach 'oj ac' nachjc 'el yuj eb' schon̈ab', tas 'oj 'aj eb' scolchji, ax yajx can lajwc smul eb'.

Jn 17:3

Caw yel cojn ach Dios ach, a eb' 'ojtnac ach, an̈jtona yojc in pax eb' an checb'iln cot oj tic, atn eb' chi 'ay sq'uinl 'a jun 'ejmn̈ej.

Jn 17:6

A eb' xa sic' 'elt 'a yolyib'n̈q'uinl tic, xa'n eb' 'ayin, xin ch'ox 'a eb' tas yaj a nab'en. A eb' xac' 'ayn cha, toxn ec xon eb'. Tzlaj syiclc eb' a paxti'.

Jn 6:45

Tz'ib'b'il can yuj jun tzo'n̈ eb' schecb' Dios 'ixtic: 'Oj 'ajxoc cuywc smasnil 'anma yuj Dios, xchi eb'. Yuj cha, jantcn̈ej eb' tzya'ch schicn 'a tas tzyal qui Mam Dios, toto tznachj 'el yuj eb' tas tzyala, 'oj jawc eb' 'ayin.

A Tas Sc'ulejnac Eb' Schecab' Jesús Hechos 10:43

Yictax pecti', 'aycto, yaln can 'el eb' schecb' Dios yab'xil Jesús. Yaljnac can junjn eb', chajtlto jantcn̈ej mach 'oj ya'ch sc'ojl 'a 'a, 'oj 'ajxoc can lajwc smul eb' yu'uj, xchi Pedro 'a eb'.

2 Co 2:10

Al ticnec, a mach 'oj eyac' niwnc'ojlal yuj junc tas, eyu'uj 'oj wac' pax niwnc'ojlal 'a 'a. Wach'xam man̈oc 'ayn tz'och smul, palta 'a sat Cristo, ax wa'n niwnc'ojlal.

2 Co 4:6

A Dios yaljnac can 'ixtic: A 'a scal q'uic'q'uinl tic, pitzw cab' sacq'uinal, xchi. Caw a 'a'jnac cot sacq'uinlal 'a qui pixnec, sec yuj jun sacq'uinlal tic, tzcojcanec 'eli, chajtlto caw niwn swach'l Dios. A 'a Jesús, ata tzcheclj 'el swach'l Dios cha.

Ef 1:7

Yuj wal sniwn chamc'ojlal, on̈ scolnec 'el yet' schic'l Yunnal, yic 'ix cham cujec. Caw xlajw can qui mulc yu'uj.

1 Ts 4:9

Man̈ yowlalc an tzwalb't 'ayex, tze chamc'ojlan eb' eyit creyenteal. Yujto caw a Dios tz'a'n nachjc 'el eyu'uj, tas tzeyutj e chamc'ojlan e b'a.

A Ch'an̈ Carta D'a Eb' Hebreo 5:12

'In 'ayx stiempoal eya'n 'och 'a e c'ojol. Smoj to cuywjumx xo ticnec. Palta an̈j jun tzo'n̈ b'ab'l cuynb'il yic Dios, yowlal an̈ja tzat alx 'ayex. Mant 'a e te'nal, lajn ex 'icha junc tz'ulc 'unn tzat chuwi, mant 'a jac tas tzc'uxu.

A Ch'an̈ Carta D'a Eb' Hebreo 8:11

Man̈x yowlalc 'ayt junc mach 'oj alnc 'a junc xo yit chon̈ab', mto 'a junc yican, sec tzin yojquej 'eli. Yujto c'uxn 'oj in yojcoc 'el xon eb' ta'. wach'xam eb' 'unin, wach'xam eb' caw 'ichm 'anma xo, c'uxn 'oj in yojcoc 'el eb'.

A Ch'an̈ Carta D'a Eb' Hebreo 8:12

'Oj wac' niwnc'ojlal smul eb'. Man̈x 'a b'a'n̈ 'oj in na cot smul eb' cha, xchi Cajlil 'a Ch'an̈.

1 Jn 2:20

Palta a Cristo 'a'jnac Yespíritu Dios 'ayx quet' on̈. Yuj cha, cojquec qui masnil jun cuynb'il caw yel.

1 Jn 2:27

A Jesucristo 'a'jnac Yespíritu 'ayn̈ junjn on̈ec. Yuj cha, man̈ yowlalc chuct junc 'anma tzon̈ cuynec, yujto a Yespíritu tzon̈ cuynec 'a smasnil tas. A jun tzo'n̈ cuynb'il tzyac' 'ayn̈ec, caw yel, may junc 'es 'aych 'a scal. Yuj cha, yowlal junn̈j tzon̈ 'ajc yet' Cristo, yujto 'ixta yaj yaln Yespíritu 'ayn̈ec.

1 Jn 5:20

An̈jtona', cojquec paxi, wulnc 'ec' Yunnal Dios 'a yolyib'n̈q'uinl tic. A xjacn qui nab'enec, sec wach' tzcojquejec 'el Dios caw yel. Yuj cha, junn̈j cajc yet' jun caw yel cha, atn Jesucristo Yunnal. A jun cha, caw yel Dios. A tz'a'n qui q'uinlec 'a jun 'ejmn̈ej.

A Ch'an̈ B'ab'el Libro Samuel 2:12

A eb' yunnal Elí caw maysch'olnil sb'eyb'al eb', may xon yel'ch Jehová 'a sat eb'.