Jeremías 31:32 - Chuj San Sebastian Bible

³² An Jehová in, an tzwala to a wal jun in trato 'oj wac' yet' eb' cha, caw man̈ lajnoc 'icha jun in b'ojnac yet' eb' smam yichm eb', yic wi'n 'elt eb' 'a lum Egipto. A yic cha, 'icha to 'ochnc in quetzn 'a sc'ab' eb' yic wi'n 'elt eb'. Wach'xam lajn in 'icha junc winc yet' yistzil, 'ixta waj 'a eb', palta ma'ix syiclj eb' jun in trato cha.

Chuj San Mateo Bible

³² A in Jehová in svala' to a jun trato chi', man̈ lajanoc yed' jun in b'onac yed' eb' e mam eyicham ayic vic'annaquelta eb' d'a Egipto. Ichato ochnac in quetzquetz d'a sc'ab' eb' ayic vic'annaquelta eb' chi', palta maj sc'anab'ajej in trato eb' in b'o yed'oc, vach'chom ichato vetb'eyum vutejnac eb'.

Jeremías 31:32 ပူးပေါင်းရင်းမြစ်များ

A Ch'an̈ B'ab'el Libro Yic Yab'ixal Eb' Rey 8:9

May junc xo tas 'ay 'ejm 'a yojl te caxa cha, cojn wal chapachn̈ q'uen q'uen ya'jnac can 'ejm Moisés 'a yojl te 'a Horeb, tzcuch pax Sinaí, atn q'uen 'aj tz'ib'b'il can 'och strato Jehová ya'jnac can yet' eb' israel, yic yelt eb' 'a lum Egipto.

Salmos 73:23

Palta an tic, 'aynn̈ej 'ec' et'oc, quetzb'iln oj yet' a wach' c'ab'.

Salmos 78:37

May xon jac 'aj wach' xyutj sb'a eb', man̈ yelc tzyal eb', matz yac' 'el'choc eb' strato yet' Dios.

Ex 19:5

Palta ax ticnec, yiclum tzeyutj e b'a 'ayin, tzeyiclni in trato eyet'oc, to in chon̈b' ex, sic'b'ilx 'el wuj 'a scal jun tzo'n̈ xo chon̈ab', yujto wic smasnil lum lu'um.

Ex 32:8

Yajn̈j wal cha, 'ix yi'n 'el sb'a eb' 'a tas xwala, sb'on eb' jun yechl quelm wacax; xlaj cob' ya'nc 'ejm sb'a eb', xya'n eb' xajmb'al 'a jun yechl cha, xyaln eb' 'ixtic: Ex q'uit israelal, atn wal qui diosalec tic on̈ 'i'nec 'elt 'a Egipto, xchi cob' eb', xchi Dios 'a Moisés cha.

Cantares 8:5

¿Mach jun 'ix chi tzcot 'a lum cusltac lum cha, pacn q'ue 'a squelb' jun chamc'ojlb'il yuj cha? xchi eb'. A 'a yich jun te snun mansan, ata xin pitzl a wayan̈, ata yab'jnac a nun syail yic alji.

Is 24:5

Caw wal xjuw 'el lum lum tic yuj eb' cajn 'a 'a, yujto matz yiclj eb' 'icha tzyal ley, matz yiclj eb' jun tzo'n̈ checnb'il, caw xyixtj 'el eb' jun trato b'ob'il 'a jun 'ejmn̈ej.

Is 41:13

Yujto an tic, an ton Jehová e Diosal in, an ex in quetzb'eyoc', 'ix waln 'ayx 'ixtic: Man̈ex xiwoc, an 'oj ex in colo', xin chi, xchi Dios.

Is 54:5

A jun mach ex b'oni, a 'icha 'ichmilab'il yaj 'ayex, atn Jehová tztac' yuj smasnil; qui colmal an̈ israel on̈ tic, qui Diosalec; sDiosal pax smasnil tas 'ay 'a sat lum lum tic.

Jeremías 11:3

Tzal 'a eb' to an Jehová sDiosal in eb', an tzwala to catb'tzab'il eb' matz yiclni tas tzyal jun in trato tic.

Jeremías 11:4

Atn jun in trato in b'ojnac yet' eb' e mam eyicham, yic 'ix wi'n 'elt eb' 'a Egipto. A jun nacion̈ cha, lajn yaj 'a eb' 'icha junc jorna 'aj tzn̈usx 'elt q'uen hierro. 'Ix waln 'a eb' 'ixtic: Yicljec 'ayin, b'oc smasnil tas tzwal 'ayex. To 'ixta', 'oj eyoch in chon̈b'oc, an xo, 'oj woch e Diosaloc, xin chi 'a eb'.

Jeremías 2:2

'Ixic, 'at al yab' eb' 'aj Jerusalén, to an Jehová in, an tzwal 'a eb' 'ixtic: Tzin na cot wal eyiclumal 'ayin, yic ex wi'n 'och wico'oc, caw tzin e chamc'ojlej, 'icha junc cob's 'ix tot xnupni, caw 'ay schamc'ojlal 'a yichmil, 'ixta ex. 'Ochnc ex tza'n wuj 'a lum cusltac lu'um, atn lum lum may xon 'aj tz'awxi.

Jeremías 22:9

Ax sta'w jun tzo'n̈ xo eb' chi 'ixtc 'a eb': Yujto xyactj can eb' jun strato 'ix sb'o yet' Jehová sDiosal, ax 'a jun tzo'n̈ xo comn dios 'aj 'ix yal sb'a eb', 'oj schic eb' 'a eb', xchi Dios.

Jeremías 3:14

'Ix yaln pax Jehová 'ixtic: Ex in chon̈b' to caw tenmtac, meltzjan̈c cot 'ayn an e Yajlil in tic. Junjn ex, 'oj ex wi' cot 'a junjn chon̈ab'. Chatcwan̈il 'oj ex wutc ex wi'n cot 'a junjn macn̈ 'in̈tal. 'Ixta 'oj ex wutc wi'n meltzjoc 'a Sión.

Jeremías 31:1

A Jehová, a tzaln 'ixtic: A wal 'a yic jun tiempoal 'oj jawc cha, an wal caw 'oj woch sDiosalc junjn macn̈ eb' yin̈tl Israel, a eb' 'oj 'ochcn in chon̈b'oc.

Jeremías 34:13

An Jehová in, e Diosal in, in b'ojnac jun in trato yet' eb' e mam eyicham, yic 'ix wi'n 'elt eb' 'a Egipto, atn 'a 'aj 'aych eb' mosoal, 'aj man̈ yico'oc sb'a eb'. A yic cha, 'ix wala,

Jeremías 34:14

to a 'a junjn yuctquil ab'il, tzeya'n 'el eb' e moso 'a libre, atn eb' eyit israelal, eb' tzchon̈ch sb'a e mosooc, eb' tox ex 'a'n servil waque'oc ab'il. Palta a eb' e mam eyichm cha, ma'ix schaj eb' yab' tas waljnac, caw ma'ix syiclj eb'.

Ez 16:8

In 'ec' pax 'a stz'ey jun 'ejm xo, xwilni to stiempoal xo yoch 'a nupnel. Yuj cha, ax in potil, a xin potb't 'a yib'an̈, 'ixta x'aj yoch spichul, 'ix macchj 'el sq'uixwelal. 'Ix wa'n in trato yet'oc to tzwique'ej an Jehová in.

Ez 20:37

An 'oj ex in b'eyc'ojloc, ax wa'n eyiclc in trato.

Ez 23:4

A 'ix b'ab'el, Ahola sb'i 'ix, tzyal 'el'chi, atn chon̈b' Samaria; ax 'ix schab'il, Aholiba sb'i 'ix, tzyal 'el'chi, atn chon̈b' Jerusalén. 'Ix wica'an eb', 'ix laj 'alj wunnal yet' eb' 'ix.

Os 11:1

'Ix yaln pax Dios 'ixtic: A yic 'icha to caw 'unn to jun chon̈b' Israel tic, caw 'ay in chamc'ojlal 'a 'a, 'icha to wunnal yaji. A 'a Egipto, atta 'ix wawtj coti.

Os 2:2

'Ix yaln Jehová 'ayin to an tzwa'ch in b'a ch'oxnb'ilal yet' eb' wunnal yet' pax snun eb', yuj cha, xwaln 'ixtic: —Wach'xam a e nun cha, man̈x wistziloc, man̈x in yichmilc paxi, palta alc 'a 'a, man̈x cab' ya'ch sb'a 'ajmulal, tzyactn can pax 'ix eb' winc nib'b'il yuj cha.

Os 3:1

'Ix yaln pax Jehová 'ixtc 'ayn an Oseas in tic: A ticnec, chamc'ojlej pax 'ix estzil, wach'xam sb'o 'ix 'ajmulal yet' eb' winc sc'umej. Palta to a 'ix tzwa'ch ch'oxnb'ilal 'a eb' et israelal, wach'xam xya'ch eb' israel snab'en 'a jun tzo'n̈ comn dios, xlaj yi'n 'at eb' te tacn̈ sat uva ofrendail 'a jun tzo'n̈ comn dios cha, palta 'oj in chamc'ojloc pax eb', xchi Dios 'ayin.

Lv 26:15

Toto tze patquilj can 'el in cuynb'il, may yel'ch in checnb'il 'ayex, tzeyixtn 'el in trato in b'ojnac eyet'oc,

Mr 8:23

Ax Jesús cha, 'ix 'och yamn 'a sc'ab' winac, 'ix squetzn 'at win 'a sti 'el chon̈ab', 'ix sucn 'och jab' stzub' 'a yol sat winac, 'ix stzayn 'och sc'ab' 'a 'a, xlajw cha, 'ix sc'anb'ni, toto tzax yil win jab'oc.

Jn 3:29

Q'uinloc 'ay junc nupnel tz'och ticnec. A win tznupni, tzyi'n junc 'ix. Toto 'ay junc swach'c'ojl win 'ayc' yet' ta', caw tzalj yab'n tas tzyal win tznupn chi yet' 'ix 'ix cha. An̈jtona', 'ixta 'in tzalj ticnec, yujto wan yoch eb' 'anma scuywumoc Jesús.

A Tas Sc'ulejnac Eb' Schecab' Jesús Hechos 23:19

Ax win comandante chi 'ix quetzn win quelm cha, 'ix sb'esn 'el'ch sb'a eb'. —¿Tas tza nib'j tzal 'ayin? xchi win 'a 'a.

2 Co 11:2

Caw wal tzex in ya'ilej, 'icha wal tzyutj Dios ex sya'ilni. Yujto tox xwac' in trato yet' Cristo, chajtlto 'oj ex wac' 'a yol sc'ab'. 'Icha junc cob's 'ix mant 'a jac smul, tz'ajx 'och 'a yol sc'ab' yichmil, comnoc 'ixta 'ex, yic 'oj ex wa'nc 'och 'a yol sc'ab' Cristo.

Dt 1:31

yet' pax tas quiljnaquec 'a lum cusltac lu'um. A Jehová qui Diosalec, 'icha to quetzb'iln̈ec yu'uj, yic on̈ yi'nec cot 'a yol b'e, masnto on̈ jawc 'a jun lugar tic. 'Icha wal tzyutj squetzn b'ey junc mamb'il yunnal mto yisil, 'ixta 'on̈ yutjec.

Dt 29:1

Atn jun tzo'n̈ paxti tic xyac' Jehová yal Moisés 'a eb' yit chon̈ab', yic 'ayc' eb' 'a yol smacb'en lum Moab; atn strato Dios chi sb'ojnac yet' eb' israel yic 'ayc' eb' 'a yich witz Sinaí.

Dt 29:21

A Jehová a 'oj pojnc 'el jun 'anma chi 'a scal smasnil eyin̈til, yic tzya'n 'och yailal 'a yib'an̈. Yuj cha, smasnil jun tzo'n̈ yailal tz'ib'b'il can 'a ch'an̈ un̈ yic trato 'ajtil tz'ib'b'il can smasnil ley, c'uxn 'oj jawc jun tzo'n̈ tic 'a yib'an̈.

Dt 29:24

Yuj cha, smasnil eb' 'anma 'a yolyib'n̈q'uinl tic, 'oj sc'anb'lac eb' 'a 'ixtic: ¿Tas laj yuj 'ixtc xyutj Jehová jun chon̈b' tic? ¿Tas laj wal yuj yel xo niwquil xyutj ya'n cot yowl sc'ojl 'a yib'an̈? 'oj schic eb'.

Dt 31:16

'Ix yaln Jehová 'a Moisés 'ixtic: Ach tic jab'xoj wal 'oj a chami, ax jun chon̈b'al eb' 'anma tic, 'oj ya'cn 'at sb'a eb' 'a sdiosal jun tzo'n̈ chuc chon̈b'al 'ayc' 'a sat lum lum 'aj 'oj c'och cajn eb' cha. Yuj cha, ax in yactn can eb', ax sjun 'el eb' in trato 'ix in b'o yet'oc.

Dt 31:20

A yic 'oj lajwc wi'n 'och eb' 'anma tic 'a sat lum lum 'aj 'ix wac' in ti wa'n 'a eb' e mam eyicham, lum caw 'ay syaxil sat, caw 'oj wa eb' si'mb'il, 'oj b'ut'joc sc'ojl eb', ax sb'a'chb'i eb'. 'Oj lajwc cha, ax yoch tza'n eb' yuj jun tzo'n̈ comn dios, ax yi'n 'ejm sb'a eb' 'a 'a; an xo tic, 'oj in spatquilc can 'el eb', ax sjun 'el eb' in trato 'ix in b'o yet'oc.

Dt 5:2

A Jehová qui Diosalec, sb'o jun strato tic quet'ec 'a lum yich witz Sinaí.

Dt 5:3

Man̈ cojnoc yet' eb' qui mam quichmec sb'o jun strato tic, palta 'ix sb'o pax quet'ec an̈ec yamnon̈c tic.

A Ch'an̈ Carta D'a Eb' Hebreo 8:9

A wal jun in trato cha, caw man̈ lajnoc 'icha jun in b'ojnac yet' eb' smam yichm eb', yic wi'n 'elt eb' 'a Egipto. 'Icha to in quetz sc'ab' eb', yic wi'n 'elt eb'. Palta a eb' cha, ma'ix syiclj eb' jun in trato cha, yuj cha, wactn can eb' sch'ocoj.