Jeremías 22:22 - Chuj San Sebastian Bible

²² 'Oj 'ijxoc 'at eb' eyajlil yuj eb' 'ajc'ojl 'icha junc niwquil 'ic', ax eb' 'aych eyet'oc, 'oj 'ijxoc 'at eb' 'icha presoal. Toxn̈ej 'oj e q'uixw can 'eli. Man̈x 'a yel'ch 'oj eyajcni, yuj ton wal e maysch'olnilal.

Chuj San Mateo Bible

²² Ol ic'jocb'at eb' eyajalil yuj eb' ajc'ool, icha yic'jib'at junoc tas yuj oval ic', axo eb' ayoch eyed'oc ol ic'jocb'at eb' d'a junocxo ch'oc chon̈ab'il. Toxon̈ej ol ex q'uixvoccanoc. Man̈xa ol ajcan eyelc'och yuj jantac e chucal.

Jeremías 22:22 ပူးပေါင်းရင်းမြစ်များ

Is 64:6

Qui masnil on̈, lajn quilx 'icha junc mach man̈ wach'c yaji. Smasnil tas wach' xlaj cob' qui b'o 'on̈, lajn xoj yilx 'icha junc nip yajb'entac yilxi. Yuj tas maysch'olnil xlaj qui b'o 'on̈, yuj cha, lajn on̈ xoj 'icha te xil te tzpucli, c'un xoj s'at yuj 'ic'.

Is 65:13

Palta tzwal 'ayex, to a eb' in checab' 'ay tas 'oj sc'ux eb', ax xo tic, 'oj e cham yuj wejel. 'Ay tas 'oj yuc' eb', ax xo, 'oj e cham yuj tacn̈ti'al. 'Oj tzaljoc eb', ax xo, to 'oj e q'uixw can 'eli.

Jeremías 10:21

A eb' 'aych yilmalc jun chon̈b' tic, caw may snab'en eb'. Matz c'an eb' sjelnal 'a Jehová, yuj cha, 'ix lajw 'ejm eb'. 'Ix sactzic can 'at eb' 'anma smasnil.

Jeremías 12:10

Til wal eb' syajlil eb' 'ajc'ojl xwul satnc 'el in chon̈ab', 'icha to satl eb' te wawb'en uva 'awb'il wu'uj. Ste'wtan̈j eb' lum lum 'aj tzb'o in munljel. A lum lum caw wal nib'b'il wu'uj, caw wal cusltac x'ajcn lum yuj eb'.

Jeremías 2:36

¿Tas yuj tzex 'och 'il e jeln 'el eb' tze nib'j tzcolwj eyet'oc? 'Icha wal 'ajnc ex e q'uixw 'el yuj eb' 'aj Asiria yujto ma'ex scol eb', 'ixta 'oj eyaj e q'uixw 'el pax yuj eb' 'aj Egipto.

Jeremías 2:37

Caw q'uixwc'ojlal 'oj eyaj e meltzj cot 'a Egipto cha, yujto an Jehová in, tox xin patquilj can 'el eb' 'aych cob' yipc e c'ojl cha. May jac tas 'oj eyac' ganar yet' eb', xchi Dios.

Jeremías 2:8

A eb' ya'mal 'och e ti 'ayin, man̈x 'ic jaw eb' 'a wojltac. Ax eb' e cuywmal, man̈x 'ic in yojquej 'el eb'. A eb' yajl yaj 'a e chon̈ab', 'ix meltzj 'och eb' 'ajc'ojlal 'ayin, ax eb' in checb' cob'i', a 'a sb'i Baal, ata xpaxtin 'el eb'. 'Ix 'och tza'n eb' yuj jun tzo'n̈ comn dios to may jac yopiso, xchi Dios.

Jeremías 20:11

Palta ach tic Mamin Jehová, 'aych 'ec'n̈ej wet'oc, 'icha junc soldado may tz'aj yejm xoni. A eb' tzin pechn b'eyc'oc, 'oj telwc eb', palta an xo, ma'oj wejm yuj eb'. Caw 'oj q'uixwc can 'el eb' 'a jun 'ejmn̈ej, ma'oj sat sc'ojl eb' 'a sq'uixwelal cha.

Jeremías 30:14

Smasnil eb' 'ay cob' schamc'ojlal 'ayex, ex 'atcn 'a satc'ojlal yuj eb'. Man̈xtzac ex sna eb' jab'oc. An wal 'ix wac' eyailal si'mb'il, 'icha 'ajc'ojl wajch 'ayex, yujto niwn maysch'olnilal xe b'o'o, caw man̈x b'ischjb'enoc e mul cha.

Jeremías 4:30

A Jerusalén, tox 'ix 'ixtx 'eli. Lajn tzyutj sb'a 'icha junc 'ix 'ix to nab'axoj tzb'o sb'a yet' te pichl nab'a púrpura. Tzya'n 'och 'ix q'uen oro caw wach' yilx 'a 'a, caw q'uic' tzyutj 'ix ya'n 'och yan̈l yol sat. Wach'xam caw wach' yilx tzyutj ton 'ix sb'on sb'a, palta man̈x 'a jac yel'chi, yujto a ewin winc chamc'ojlb'il cob' yuj 'ix, tox xyajx can 'el 'ix yuj ewinac. A tas tzna ewinac, to tzsay ewin tas 'oj yutc smiln cham 'ix. 'Ixta wal yaj Jerusalén yet' jun tzo'n̈ xo nacion̈.

Jeremías 5:13

A eb' schecb' Dios cha, caw may yel'ch tas tzyal eb', man̈oc spaxti Dios tzyal eb', xchi eb'. Palta a Jehová Dios, jun tzta'n̈j yuj smasnil, a 'ix aln 'ayn 'ixtic: Yujn̈ej to 'ix yal eb' jun tzo'n̈ paxti cha, yuj cha, 'ixtc wal tas 'oj jawc 'a yib'n̈ eb'. A 'in paxti 'oj 'eltoc 'a a ti', lajn 'oj wutc 'icha te c'ac', ax eb' chon̈b' tic, lajn 'oj 'aj eb' 'icha te c'atzitz. Ax jun c'ac' chi 'oj 'a'nc lajwc 'ejm eb' smasnil, xchi Dios.

Jeremías 7:19

An Jehová in, an tzwala to man̈ cojnoc in tzin yixtj eb', palta mun tzyixtj 'el sb'a eb', mun tzyij 'el eb' sq'uixwel.

Os 12:1

A eb' 'aj Efraín, a tas tzb'o eb', may jac yel'chi, ton̈j tzyixtj sb'a eb'. Caw tzniwtj yixtn eb' yit 'anma'il, tzniwtj pax ya'n eb' 'es. Tzb'o eb' strato yet' chon̈b' Asiria, tzya'n 'at eb' aceite smontnb'ilc Egipto, xchi Dios.

Os 13:15

Wach'xam 'oj e niwtj chan̈ 'a scal eb' eyit israelal, palta 'oj cot wowl 'ayex. Lajn 'oj 'aj scot 'icha tacn̈ 'ic' tzcot 'a cusltac lum 'aj tzq'uel c'u, yuj cha, 'oj tup chan̈ eb' a spac'b'a' yet' eb' a c'ob'a'. Ax eb' 'ajc'ojl yajch 'ayex, a eb' 'oj 'i'nc 'at smasnil e ricoal.

Os 4:19

Yuj cha, 'icha wal tz'aj yijx 'at c'alem yuj 'ic', 'ixta 'oj 'aj eb' yijx 'ati. Caw 'oj q'uixwc 'el eb' yuj xajmb'al cha.

Zacarías 11:17

Caw 'oltac wal jun yilmal in chon̈b' to may snab'en cha, yujto xyactjcan yiln schon̈ab'. Tecx cab' 'och q'uen espada 'a sc'ab' yet' 'a yol sat 'a swach'. Sicb' cab' can 'el sc'ab' cha, 'och cab' 'a sat 'a jun 'ejmn̈ej, xchi Dios.

Zacarías 11:8

A 'a yol jun 'uj, xin chec meltzjc 'oxwn̈ eb' 'ilm calnelu, 'ix lajw c'och in niwnc'ojlal 'a eb', 'ixta pax eb', caw wal man̈xtzac in snib'j eb'.