Jeremías 14:19 - Chuj San Sebastian Bible

¹⁹ Yuj cha, xwaln 'ixtc 'a 'a: Mamin Jehová, ¿tom wal jun 'ejmn̈ej 'ix ejcan 'el eb' 'anma 'aj Judá 'a a c'ojol? ¿Tom 'ix 'a patquilj can 'el chon̈b' Sión? ¿Tas yuj on̈ ac' lajwoc, yic to man̈x 'a wach' tzon̈ 'aj can̈txi? A calni to tzon̈ q'ue'ch yet' tas 'ay 'ayn̈ on̈, palta may tas wach' 'ix qui cha'aj. 'Ix qui na'a, to wach'n̈j 'oj qui b'ey 'a cojltac on̈, palta cojn tas caw 'ay smay xjaw 'ayn̈ on̈.

Chuj San Mateo Bible

¹⁹ Yuj chi' ix valan icha tic: Mamin Jehová, ¿tom juneln̈ej ix iq'uel eb' aj Judá tic d'a a c'ool? ¿Tom toxo ix a patiquejel chon̈ab' Sion? ¿Tas yuj ix on̈ ac' echnajoc to maxtzac yal can̈taji? Sco nib'ej junc'olal caji, palta malaj jab'oc tas vach' sjavi d'ayon̈. Sco na' to vach'n̈ej ol on̈ b'ey d'a quichan̈, palta an̈ej tas ay smay ix ja d'a quib'an̈.

Jeremías 14:19 ပူးပေါင်းရင်းမြစ်များ

2 Cr 36:16

Palta ton̈j 'ix tzetzx eb' schecb' Dios chi yuj eb', may yel'ch tas 'ix yal eb' chi 'a sat eb', tzb'uchwj pax eb' 'a eb' schecb' Dios cha, masnto xjaw yowl sc'ojl Jehová 'a yib'n̈ schon̈ab', man̈xtzac stac' yoch wa'an.

Job 30:26

Yuj cha, a tzaljc'ojlal xin tan̈wj sjawi, ax x'aji, a in cusc'ojlal xjawi; xin tan̈wj sjaw sacq'uinl 'a wib'an̈, ax x'aji, a q'uic'q'uinl 'ix jawi.

Salmos 78:59

Caw xcot yowl sc'ojl Dios yic xyiln jun tzo'n̈ cha. Yuj cha, xyi'n can 'el eb' quit israelal chi 'a sc'ojol,

Salmos 89:38

Ax ticnec Mamin, 'in xa chab'c'ojlej win rey sic'b'il 'el o'oj, xa patquiln can 'el winac, 'ix cot wal owl 'a 'a.

Pr 29:1

A mach pit tzyutj sb'a, wach'xam niwn 'ejm tz'ajx cuenta, a jun cha, caw ji'lti 'oj 'aj slajw 'eli, man̈x 'oj stac' scoln sb'a.

Jeremías 12:7

'Ix yaln Jehová 'ixtic: Tox 'ix can jun chon̈b' chamc'ojlb'il tic wu'uj. A eb' wic yaji, tox 'ix in patquilj can 'el eb', tox 'ix wa'ch eb' 'a yol sc'ab' eb' 'ajc'ojol.

Jeremías 12:8

A jun chon̈b' to wicn̈ej cob' yaj tic, a 'a in sat, caw lajn 'icha no león tz'ec' 'a lum niwc yaxc'ultac, caw tz'el yaw scot 'ayin, yuj cha, tzin yajn can 'eli.

Jeremías 15:1

'Ix ta'w Jehová 'ayn 'ixtic: Man̈x 'oj 'o'ch in c'ojl 'a eb' in chon̈b' tic. Wach'xam caw a Moisés mto a Samuel tzjapx tewc 'a wojltac yuj eb' 'icha yutjnac eb' 'a yic pecti', man̈x 'oj in ta'w 'a eb'. Yuj cha, al 'a eb' chon̈b' cha, to tz'el eb' 'a wojltac, sayt cab' sb'a eb'.

Jeremías 15:18

¿Tas yuj may b'a'n̈ tz'och wan in yailal 'icha wal junc lajwel may xon tz'aj yan̈txi? ¿Tom 'oj in extc 'icha junc yet'l a 'elmal a tztup cha'an̈? xin chi 'a Dios.

Jeremías 30:12

Tzyaln pax Jehová 'ixtc 'a eb' schon̈ab': A wal tas lajwnac 'ayx cha, ma'oj stac' yan̈txi, a eyailal cha, caw man̈x 'a sremelal.

Jeremías 30:13

Man̈x 'a mach 'oj e nani, may mach 'oj 'an̈tnoc tas lajwnac 'ayx cha, man̈x 'a sremelal jun eyailal cha.

Jeremías 51:5

Wach'xam a eb' 'aj Israel yet' eb' 'aj Judá, caw 'ix 'och smul eb' 'ayin, palta an̈ja mantzac wij 'el in c'ojl 'a eb' an Jehová in, tztac' wuj smasnil, sDiosal in eb', to Cojxn̈ in.

Jeremías 6:30

'Oj alxoc yuj eb' to lajn eb' 'icha q'uen plata julb'ilx 'eli, yujto an Jehová in tic, an xin patquilj can 'el eb', xchi 'ayin.

Jeremías 7:29

¡Ex 'aj Jerusalén, joxc 'el xil e jolm yuj cusc'ojlal, tze juln can 'eli! ¡'Ixquec 'a lum tzalctac to caw cusltac, tze b'itnan jun tzo'n̈ b'it yic cusc'ojlal! Yujto an Jehová in, caw xcot wowl 'ayex, tox ex wactj cani, xchi Dios.

Jeremías 8:15

'Ix qui nib'j cob' on̈ q'ue'ch ricoal, palta may tas wach' x'ajx 'ayon̈. 'Ix qui nib'j cob' tzaljc'ojlal on̈ b'eyc 'a cojltac, palta cojn tas 'ay smay xjaw 'ayn̈ec.

Jeremías 8:22

¿Man̈x am wal sb'omb'il 'a lum Galaad? ¿May am wal junc mach tztac' yan̈tn ta'? ¿Tas wal yuj matz tac' yan̈tx eb' wit chon̈b' tic?

Lm 2:13

Ex 'aj Jerusalén, ¿mach junc tzex in lajb'tzej yet'oc? Ex 'aj Sión, ¿tas junc ch'oxnb'il tzwac' 'ayex yic tzwa'n sniwnal e c'ojol? Caw wal niwn ex 'aj e satli. ¿Mach to wal junc 'oj 'a'nc b'oxc pax e c'ojol?

Lm 2:22

Mamin Jehová, a wal yic sc'ul 'ay cot yowl 'a c'ojl cha, tzanxn̈ej 'aj tzej cot yailal 'a yib'n̈ chon̈b' Jerusalén, lajn 'icha sjaw eb' 'anma 'a yic 'ay q'uin̈. A 'a jun c'u cha, man̈x 'a junc mach stac' scoln sb'a. A eb' 'anma xqui q'uib'tzej on̈, eb' xlaj cac' cuywc on̈, 'ix milx cham eb' yuj eb' 'ajc'ojl cha, xchi eb'.

Lm 4:17

Caw wal on̈ c'unb' qui macn sjaw junc mach tzon̈ coln on̈, palta may mach xjawi. 'Ay cob' jun nacion̈ yipc'ojlal yaj cuj on̈, palta ma'ix stac' on̈ scolni.

Lm 5:22

Palta ach tic, jun 'ejmn̈ej on̈ a patquilj 'el on̈, yel xo xcot yowl a c'ojl 'a quib'n̈ on̈.

Miqueas 1:12

A eb' cajn 'a chon̈b' Marot, caw tzch'umm 'ec' eb' yuj yab'n syail. Tztan̈wj eb' cob' sc'och colwal, yujto tox xc'och yailal 'a sti chon̈b' Jerusalén yuj Jehová.

1 Ts 5:3

A 'a yic jun tiempoal cha, 'oj cob' yal eb' 'anma 'ixtic: An̈ec tic, caw wach' cajec, toc 'ay tas tzqui na'ec, 'oj schic cob' eb'. Palta yajn̈j wal cha, ax satx can 'ejm eb'. 'Icha tz'aj sjaw syailal junc 'ix tz'alj yune', 'ixta 'oj 'aj sjaw syailal eb' cha. Wal yel, may junc eb' 'oj colchjoc can 'el 'a jun syailal cha.