Jeremías 14:14 - Chuj San Sebastian Bible

¹⁴ 'Ix ta'w Jehová 'ayn 'ixtic: Toto 'ixta tzyutj eb' checb' chi yaln 'el 'a in b'i, wan ya'n eb' 'es tzyal cha. An tic, man̈oc in tzwac' yal eb'. May junc checnb'il 'ix wac' 'a eb', may in tzin paxtin 'a eb'. A jun tzo'n̈ 'icha waychil xyutj yiln eb' chi yala', caw man̈ yeloc, yuj cha, may jac yel'chi. Mun yol yic jun tzo'n̈ checb' cha, tzpitzn chan̈ eb' yal jun tzo'n̈ cha.

Chuj San Mateo Bible

¹⁴ Ix tac'vi Jehová d'ayin icha tic: Tato icha chi' tz'aj yalanel eb' checab' chi' d'a in b'i, van yesan eb' syal chi', yujto man̈oc in tzin chec yal eb'. Malaj junoc checnab'il ix vac' d'a eb', maj in lolonpax d'a eb'. A juntzan̈ syal eb' chi' to a in ix vac' yil eb' yalani, palta man̈ yeloclaj, malaj yelc'ochi. Munil d'a yol yic eb' snachaan̈ juntzan̈ syal chi'.

Jeremías 14:14 ပူးပေါင်းရင်းမြစ်များ

Is 56:10

yujto a eb' stan̈mal in chon̈ab', 'icha to man̈xtzac uj yiln eb', man̈xtzac uj snan eb' tas tzb'o'o. Lajn xoj tzyutj sb'a eb' 'icha no tz'i matz chiwj xoni, teln 'ec' eb' swayi tz'ec' c'u, cojxn wayl chi tzc'an eb' sb'o'.

Is 9:15

(A jun jolm cha, tzyal 'el'chi, atn eb' yichm wincal chon̈ab' yet' eb' yajl yaj 'a scal eb'. Ax jun sn̈e cha, atn eb' tzcob' yalch sb'a schecb'oc Dios, palta yes eb'.)

Jeremías 20:6

Ach wal ach tic Pasur, 'oj ejx 'at 'icha presoal 'a Babilonia yet' smasnil eb' cajn et' 'a yol atut. Ata 'oj a chami, ata 'oj a mucx yet' smasnil eb' a wach'c'ojl cha, atn eb' 'aj xalcn 'el jun tzo'n̈ 'es paxti', xchi Dios, xin chi 'a winac.

Jeremías 28:11

Wal 'a sat smasnil eb' chon̈ab', 'ix yaln 'ixtic: —A Jehová 'ix aln 'ixtic: Yic wal chab' ab'il ticnec, ax wi'n 'el jun yugo 'aych 'a yib'n̈ jun tzo'n̈ nacion̈ yuj win Nabucodonosor, ax in ma'n can wecchjoc, xchi Dios, xchi Hananías. Xlajw xoj cha, in 'at an Jeremías in tic.

Jeremías 28:13

'Ixic, 'at al 'a Hananías, chajtlto an Jehová in, an tzwala: Stac' a ma'n wecchjoc te yugo, palta ax jun yugo to nab'a hierro a 'oj wa'xcan sjelc te'.

Jeremías 28:15

Xlajw cha, xwaln 'a Hananías 'ixtic: —Ach Hananías, 'ab' wal tas 'oj wala', ach tic, man̈oc Jehová ach checn coti. Caw man̈ yelc tas wan a'n 'och yipc sc'ojl eb' chon̈b' tic.

Jeremías 29:21

An Jehová in, tztac' wuj smasnil, e Diosal in paxi, tzwal yuj win Acab yunnal Colaías, yet' pax yuj Sedequías yunnal Maasías, atn eb' tzaln 'el jun tzo'n̈ 'es paxti 'a in b'i: 'Oj wac' milxoc cham eb' yuj Nabucodonosor cha. Q'ueln ex 'och wal 'ax tic, ax smiln cham win eb'.

Jeremías 37:19

A jun tzo'n̈ xyalch sb'a schecb'oc Dios, eb' 'ix alni to ma'oj jawc win sreyl Babilonia wul yac' owl yet' jun chon̈b' tic, toc 'ix a'ch eb' 'a preso.

Jeremías 5:31

Cojn 'es tzyal-l eb' tzcob' yalch sb'a in checb'oc. Ax eb' ya'mal 'och sti eb' 'anma 'ayin, tzyac' eb' yajlil 'icha tas tznib'ej. Ax jun in chon̈b' tic, wach' tzyab' 'ixta'. Palta ¿tas wal 'oj yutc sb'a eb', yic 'oj jawc jun slajb' tiempoal? xchi Dios.

Jeremías 8:10

Yuj wal cha, 'oj wa'cn 'och yistl eb' 'a yol sc'ab' jun tzo'n̈ocx winac, yet' pax slum eb', chucx mach 'oj 'ica'anoc. Smasnil eb' niwc yel'chi, yet' eb' may yel'chi, axn̈ej tas tzyac' ganar eb' 'a spatc maysch'olnil, a chi tzna eb'. 'Ixta pax eb' tzyalch sb'a in checb'oc, yet' eb' tz'a'n 'och e ti 'ayin, cojxn̈ej 'elc'l tzb'o eb'.

Jeremías 8:11

Tzya'lj eb' cob' sb'on yaj syailal eb' in chon̈ab', tzyaln eb', to wach'x yaj smasnil, palta caw may tas wach' yaji.

Lm 2:14

A eb' cob' tzyalch sb'a schecb'oc Dios 'a e cal, ton̈j ex yixtj paxti eb', 'esn̈j tas xyal eb' 'ayex. Ma'ix schecltej 'el eb' e mul, yuj cha, matz e jel e nab'en. 'Ix alx 'es paxti 'ayex, xeya'n 'och jun chi yipc e c'ojol.

Lm 2:9

A jun chon̈b' cha, man̈x 'a spuertail, wecchjnacx yijl 'aychi. Choc' x'ajcn smasnil, toxn̈ej tzicn can 'at 'a sat lu'um. Ax win rey yet' smasnil eb' 'ay yopiso yet' winac, scal eb' chuc chon̈b'al 'aj 'ayx 'ec' eb'; ata' man̈x 'a sley Dios 'a sat eb' 'anma cha. Ax eb' schecb' Jehová, man̈x 'a xon tas tz'ajx yojcoc 'el eb' yu'uj.

Ez 12:24

Yujto man̈x 'a mach 'oj cob' stz'ac yala', to 'ay tas tzyil 'a 'icha waychil, mto cob' 'oj sna chan̈ junc 'es paxti 'a scal eb' in chon̈b' cha.

Ez 13:2

Ach 'anma', al jun tzo'n̈ in paxti tic 'a eb' tzcob' yalch sb'a in checb'oc 'a scal eb' israel. A eb' cha, mun tzcob' yal eb' junc tas 'a yol yico', al yab' eb' to an Jehová in, an tzwal 'ixtic:

Ez 13:23

Yuj cha, man̈x 'a wal b'a'n̈ 'oj stac' eyalni to 'ay tas tzeyila, mto 'ay tas 'oj stac' e nan 'eli. An 'oj in col-l eb' in chon̈b' tic 'a yol e c'ab', ax in eyojcan 'eli, to an Jehová in, xchi Dios, xa chi 'a eb', xchi 'ayin.

Ez 21:29

Til wal tas tzcob' sna chan̈ eb' 'anma chi yal 'ayex. Tzcob' yal eb' 'ixtic: Man̈ ex 'och 'il, may tas 'oj jawc 'a quib'n̈ec, xchi cob' eb', palta a jun tzo'n̈ cha, 'esn̈ej. A q'uen espada cha, 'etzn xo 'och q'uen 'a yib' sjaj jun chon̈b'al eb' 'anma cha, yujto maysch'olnil sb'eyb'al eb'. 'Ayx 'och eb' 'a yol sc'ab' chamel. Xc'och stiempoal yoch syailal eb' yuj tas maysch'olnil tzb'o'o.

Miqueas 3:11

A eb' juez yaj 'a yol chon̈ab', man̈ wach'c tzyutj eb' sb'onyaj junc 'anma', tzchaj eb' q'uen c'ultac tumin. An̈jtona eb' tz'a'n 'och qui ti 'a Dios, yujn̈ej schan eb' tumin, yuj cha, tzcuywj eb'. 'Ixta pax eb' tzyalch sb'a schecb'oc Dios, yujn̈ej schan eb' tumin, yuj cha, tzyaln eb' tas tz'aj 'el'ch junc mach. Tzyaln pax eb' to 'aych Dios yet' eb', yuj cha, tzyaln eb' 'ixtic: A Jehová 'aych quet'ec, yuj cha, may yailal 'oj 'ec' 'a quib'n̈ec, xchi cob' eb'.

Zacarías 10:2

Man̈ 'ixta'oc spac tz'ajx 'a eb' tzc'anb'n yab' junc tas 'a jun tzo'n̈ yechel, yet' 'a eb' 'ajchum. A tas tzyal eb' cha, 'esn̈j smasnil, may jac yel'chi. A tas tzyal eb' tzwaych'ni, ton̈j tz'ixtx paxti junc mach chi yuj eb'. A spaxti eb' tz'a'n sniwnal sc'ojl cob' junc mach, may jac swach'il. Yuj cha, ton̈j tzsatc' eb' chon̈b' chi 'icha no calnelu tzsatq'ui, tzyab'n syail yujto may yilmal.

Zacarías 13:3

Yuj cha, toto 'ay junc mach 'oj stz'ac yal-l in paxti', ax smam yet' snun 'oj alnc 'a 'ixtic: Ach tic 'oj a chami, yujto xa te'wtzej a b'a 'a'n 'es aln 'eli, chajtlto yic Jehová jun tzal-l cha, 'oj schic eb' 'a 'a. A wal smam yet' snun chi 'oj tecn chamoc, yujto cob' tzyalch sb'a in checb'oc.

Dt 18:20

Toto 'ay junc cob' tzyalch sb'a in checb'oc, ax yaln tas to man̈oc in tzwal 'a 'a, mto tzyal 'a sb'i jun tzo'n̈ comn dios, a jun cha, yowlal tze mil chamoc.

1 Ti 4:2

'Oj ya'ch eb' schicn 'a jun tzo'n̈ 'anma tzyac' 'es. A eb' 'anma cha, caw chab'sat eb'. Toxn caw juwnac 'el snab'en eb' 'a jun 'ejmn̈ej.

1 Jn 4:1

Ex chamc'ojlb'il wu'uj, toto 'ay eb' tzalni to yic Dios jun tzo'n̈ tas tz'ec' yal eb', man̈ e comn chac eyab' mu'c 'a eb'. Yowlal tze b'ab'l 'a'j prowal eb', toto yel a Dios 'aych yet' eb'. Yujto til wal eb' 'a'm 'es 'ay 'a yolyib'n̈q'uinl tic. Tzcob' yalch sb'a eb' schecb'oc Dios.