Is 8:19 - Chuj San Sebastian Bible

¹⁹ 'Oj laj yal eb' 'anma chi 'ayx 'ixtic: C'anb'jec eyab' 'a eb' tz'acn snab'en, 'a eb' tzc'umn spixn eb' chamnac, atn 'a eb' tzsajsni sc'umn sb'a sch'ocoj, 'oj schic eb'. Ax eyaln 'a eb': ¿Tas yuj man̈oc 'a sDiosal jun tzo'n̈ 'anma tic tzc'anb'j sb'a? ¿tas yuj a 'a eb' chamnc chi tzc'anb'j sb'a eb' pitzan?

Chuj San Mateo Bible

¹⁹ Ol laj yal eb' anima d'ayex icha tic: C'anb'ejec e b'a d'a eb' vin̈ syal yuuj yed' d'a eb' sc'uman spixan eb' chamnac, aton eb' snumnoni yed' eb' sajsoni. ¿Tas yuj man̈oc d'a eb' co diosal sco c'anb'ej co b'a? ¿Tas yuj man̈oc d'a eb' co chamnac sco c'anb'ej co b'a yic scolvaj eb' d'ayon̈ pitzan on̈ tic? xcham eb'.

Is 8:19 ပူးပေါင်းရင်းမြစ်များ

Gn 41:24

Ax 'ixm tacn̈ cha, a 'ixm xc'uxn 'ejm 'ixm caw wach' cha. Xwal in waych tic 'a ewin tztac' snan 'el paxti', palta may xon junc ewin xnachj 'el yu'uj tas wal tzyal 'el'chi, xchi win rey cha.

A Ch'an̈ Schab'il Libro Yic Yab'ixal Eb' Rey 1:3

Xlajw cha, 'ix yaln jun yángel Jehová 'ixtc 'a Elías 'aj Tisbe: 'Ixc muc'uc, 'at 'ilt eb' schecb' win sreyl chon̈b' Samaria, tzaln 'a eb' 'ixtic: ¿Tom may Dios 'a qui chon̈b' Israel, yuj cha, at 'a Baal-zebub sdiosal Ecrón ata tz'at e c'anb'c e b'a? xa chi 'a eb'.

A Ch'an̈ Schab'il Libro Yic Yab'ixal Eb' Rey 21:6

Xya'n win tz'a yunnal xajmb'alil, scuyn sb'a win 'a jun tzo'n̈ xo b'eyb'al tic; atn wayjlil, 'ajchumal, tzc'umn win spixn eb' chamnac. Yel xo caw tu 'ix 'el sb'on 'a sat Jehová, caw 'ix tzuntzj cot yowl sc'ojl Dios chi 'a yib'an̈.

A Ch'an̈ Schab'il Libro Yic Yab'ixal Eb' Rey 23:24

An̈jtona', c'uxn 'ix yac' Josías satl smasnil eb' 'ajchum, eb' tzc'umn spixn eb' chamnac, eb' comn dios 'ay 'a yoltc n̈a, yet' pax smasnil jun tzo'n̈ to yajb'il yuj Jehová 'ay 'a Judá yet' 'a Jerusalén. 'Ixta xyutj yiclni jun tzo'n̈ ley tz'ib'b'il can 'a ch'an̈ libro 'ix 'ilchj yuj Hilcías ya'mal 'och sti eb' 'anma 'a Dios 'a yatut Jehová.

1 Cr 10:13

'Ixta 'ix 'aj scham Saúl yuj smaysch'olnilal. 'Ix 'och smul yujto ma'ix syiclj schecnb'il Jehová. An̈jtona', a pax 'a jun 'ix 'ix tzc'umn spixn eb' chamnc 'anma', ata xit' sc'anb'c snab'en, man̈oc 'a Jehová sc'anb'ej. Yuj cha, 'ix smiln chamoc, ax 'a David yunnal Isaí, ata 'ix 'ajx can jun yopiso Saúl cha.

2 Cr 33:6

'Ix ya'n pax tz'a yunnal xajmb'al-l 'a lum pan̈n 'a'lic yic Ben-hinom, scuyn sb'a 'a jun tzo'n̈ xo b'eyb'al tic: atn wayjlil, 'ajchumal, b'almil, yet' c'umj spixn eb' chamnac. Caw wal maysch'olnil tas 'ix sb'o 'a sat Jehová, 'ix tzuntzj cot yowl sc'ojl Dios 'a yib'an̈.

Salmos 106:28

'Ix ya'n 'ejm sb'a eb' 'a Baal-peor, schin eb' no xajmb'al tz'ajx 'a jun tzo'n̈ yechl comn dios may sq'uinal.

Is 19:3

'Oj wac' somchjoc 'el snab'en eb', man̈x 'oj nachjoc 'el yuj eb' tas 'aj tzc'och eb'. Yuj cha, ax sc'anb'n sb'a eb' 'a eb' comn dios, 'a eb' wayjel, 'a eb' tzc'umn spixn eb' chamnac yet' 'a eb' 'ajchum.

Is 26:14

A eb' cha, chamnc xo eb', man̈x 'oj pitzwc pax eb' jun 'ejm xo; man̈x b'a'n̈ 'oj checljoc chan̈ eb'. Lajn x'aj eb' yec' 'icha wewen, tox 'ix ac' syailal eb', 'ix a'n sat 'ejm snanb'il cot eb'.

Is 29:4

Caw 'oj 'ijxoc 'ejm Jerusalén, 'icha to 'oj can t'ocn 'a sat lu'um, ax 'a sat lum chi 'oj paxtinc cha'an̈, toxn̈ej 'oj wulwnoc spaxtin 'a scal pococ, axn̈ej 'a yol lum 'oj paxtinc q'ueta, 'icha junc mach tzpaxtin yet' spixn junc chamnc 'anma'.

Is 30:2

Yajn̈ej tzcob' 'at eb' 'a Egipto, palta toc tzc'anb'j eb' 'ayin. A yipal win rey faraón chi tznib'j eb' tzcolni, tzya'n 'och eb' Egipto chi yipc sc'ojol.

Is 45:11

A Jehová qui Diosal an̈ israel on̈ tic, atn jun Dios To Cojxni, a b'ojnac n̈ec, a tzaln 'ixtic: ¿Tom ax 'oj eyal 'ayin tas 'oj in b'o yet' eb' wunnal 'a yic b'aq'uin̈? ¿Tom ax 'oj eyac' in nab'enoc tas 'oj in b'o'?

Is 47:12

B'eylb'ej 'ajchumal cha, yet' tas cuyb'il oj 'a yictax cob'sal. 'Oj ela', toto 'oj 'och to yopiso jun chi o'oj, 'oj ela', toto 'ojt xiw eb' 'anma chi 'aych yu'uj.

Is 47:13

Til wal eb' 'a'm nab'en smolb'tzej sb'a et'oc, caw ach tzactzj c'och yet' eb'. Jaw cab' eb' tzchumn yet' c'anal chi ticnec, eb' tzalni to a yic tzyiln eb' jun tzo'n̈ c'anal, tznachj 'el junc tas yuj eb'. Tztac' sb'isn eb' 'uj yalni, tzyaln eb' tas 'oj jawc 'a eb'n̈ b'aq'uin̈, jaw cab' eb' wul ach scolo'.

Jeremías 10:10

A Jehová, atn jun Dios pitzan, caw Rey 'a jun 'ejmn̈ej. A yic tzcot yowal, caw tz'ib'x lum lum tic yu'uj. Man̈xtzac stac' ste'wtzan sb'a jun tzo'n̈ nacion̈ 'a yowl sc'ojl cha.

Jeremías 27:9

Yuj wal cha, man̈ e cha eyab' tas tzyal jun tzo'n̈ eb' tzaln 'ayex to matz eya'ch e b'a 'a yaln̈ schecnb'il win Nabucodonosor sreyl Babilonia. A eb' tzaln jun tzo'n̈ cha, atn eb' tztac' snan 'el paxti yalni, eb' tztac' yaln tas tzyal 'el'ch junc wayich, eb' wayjel, eb' tzalni tas 'oj ujc b'aq'uin̈.

Lv 19:31

Man̈ e c'anb'c e b'a 'a eb' tzyal jelnal sb'a, mto 'a eb' 'ajchum, sec wach' matz ex juw 'el yuj eb'.

Lv 20:6

Toto 'ay mach tz'at sc'anb'c sb'a 'a eb' 'ajchum mto 'a eb' tzyal to tzc'umj spixn eb' chamnc 'anma', tzyiclni tas tzyal eb', an xo 'oj wac' yowlal 'a 'a, ax in satn 'el 'a scal yit chon̈ab'.

Miqueas 5:12

'Oj in satl smasnil eb' b'alm 'a e cal. Man̈x 'a junc eb' 'ajchum 'oj wactc cani.

A Tas Sc'ulejnac Eb' Schecab' Jesús Hechos 16:16

Ax 'a jun 'el, yic wan qui 'at 'a 'aj tzleslwi eb' 'anma on̈, 'ix c'och jun cob's 'ix 'ayn̈ on̈. 'Aych jun demonio 'a 'ix, yuj cha, wayjl 'ix. Jun 'ejmn̈ej 'aych 'ix ya'malc servil jun tzo'n̈ winac. A eb' cha, til wal tumn xyac' ganar eb' 'a spatquil 'ix, yujto tzyal 'ix, to yojcn̈ej 'ix tastc tot 'oj jawoc.

Dt 18:10

May cab' junc mach 'a e cal tzyac' tz'a junc yunnal mto yisil xajmb'alil. May cab' junc mach tzcuy sb'a snan 'el paxti', tzyaln yuj tas tot 'oj jawoc, mto tzyal tas tzyal 'el'ch junc lab', mto tzcuy 'ajchumal, mto wayjlil,

Dt 18:11

mto b'almil. May cab' junc mach tzc'anb'j sb'a 'a eb' tznan 'el paxti', yet' pax 'a eb' tzyal to tzc'umj spixn eb' chamnac.

1 Ts 1:9

Yujto smasnil eb', wan laj yalnc eb' eyab'xil, chajtlto wach' e chajnacn̈ on̈, yic quec' 'ayx on̈. Wan yaln pax eb', chajtl eyutjnac eyactn can jun tzo'n̈ eyaljnac 'och e diosaloc, eyamn 'och eya'n servil Dios pitzan, atn Dios caw yel.

A Schab'il Carta San Pedro 2:1

A eb' wit israelal 'a pecti', 'ay eb' cob' yaljnac 'och sb'a schecb'oc Dios, palta yes eb'. An̈jtona 'ay eb' 'oj pitzwc chan̈ 'a qui calec, ax ya'n eb' cuyxoc jun tzo'n̈ 'es. 'Oj yi'ch eb' jun tzo'n̈ chuc cuynb'ilal 'a qui calec, sec 'ayn̈ec 'oj qui juwc 'el yuj eb'. Caw may jac yel'ch Cajlilec 'a sat eb', wach'xam a xcham stojloc smul eb'. Yuj cha, mun tzyij cot eb' 'a yib'an̈. Yajn̈ej, ax satcn 'el eb' 'a jun 'ejmn̈ej.

A Ch'an̈ B'ab'el Libro Samuel 28:11

—¿Mach pax jun tza nib'j tzwawtj chi ala'? xchi jun 'ix cha. —Atn Samuel tzawtej, xchi Saúl.

A Ch'an̈ B'ab'el Libro Samuel 28:16

Xlajw cha, xyaln Samuel chi 'a 'ixtic: —¿Tas yuj tzat a c'anb'j 'ayin, toto a Jehová tox 'ix yij 'el sb'a 'a a tz'ey? A ticnec 'ajc'ojl xo yajch 'ayach.

A Ch'an̈ B'ab'el Libro Samuel 28:7

Yuj cha, 'ix yaln Saúl 'a eb' schecb' 'ixtic: —Sayc junc 'ix 'ix to tzc'umn spixn eb' chamnac, sec wach' a 'a tzin 'at in c'anb'c in nab'en, xchi winac. 'Ix ta'w eb' schecb' 'a 'a, xyaln eb' 'ixtic: —'Ay jun 'ix tztac' yuj 'a Endor, xchi eb'.

A Ch'an̈ B'ab'el Libro Samuel 28:8

'Ix sjeln 'el Saúl spichl yic sreyal, sec matz nachj 'el yuj eb' 'anma', mach winac. 'Ix 'at chawn̈ xo winc yet'oc, yic tz'at yilnc jun 'ix chi 'a 'ac'wal. Xc'och eb' 'a 'ix, 'ix yaln win 'ixtic: —Tzin tew 'ayach, tzin nib'j tzawtj spixn jun mach 'oj wal tic, xchi.